Isa ka Mapainubuson nga Aprikano nga Naghigugma Gid sa Pulong sang Dios

ANG mga dumuluaw sa Aprika masami natingala nga kahapos lang sugdan ang isa ka paghambalanay sa mga topiko sa Biblia sa tumandok nga mga tawo. Ang mga pamangkot subong sang, “Ano ang Ginharian sang Dios?” ukon “May permanente bala nga solusyon sa mga problema kaangay sang kakulang sing kalan-on, balatian, inaway, kag krimen?” madali nga makaganyat sa mga tawo nga magpamati. Madamo ang malipayon nga nagatugot sa isa ka estranghero nga ipakita sa ila ang mga sabat gikan sa Biblia. Masami ini nagadul-ong sa isa ka regular nga pagtuon sa Biblia. Kag kon magauswag sa espirituwal ang mga estudyante, mangin bawtismado sila nga mga Cristiano.

Ang isa sa una nga mga Aprikano nga naghulag sa sining paagi ginsambit sa Biblia sa Binuhatan 8:​26-​40. Isa sia ka Etiopianhon nga naglakbay pa Jerusalem agod magsimba sa matuod nga Dios, nga si Jehova.

Subong ginpakita sa larawan sa ubos, ining Etiopianhon nagapauli na sakay sa iya kangga, nga nagabasa sing linukot. Isa ka estranghero ang nagpalapit sa iya kag nagpamangkot: “Nahibaluan mo gid bala ang imo ginabasa?” Sing mapainubuson, ang Etiopianhon nagbaton nga nagakinahanglan sia sing bulig kag hanuot nga nagpakiluoy sa estranghero, ang Cristianong ebanghelisador nga si Felipe, nga magsakay sa kangga. Nian nangabay sia kay Felipe nga ipaathag ang kahulugan sang bahin sang Kasulatan nga bag-o lang niya nabasa. Ginpaathag ni Felipe nga isa ini ka tagna nga nagapatuhoy sa bag-o lang nga pagkapatay sang Mesias, nga si Jesucristo. Ginsugid man ni Felipe ang iban pa nga butang tuhoy sa “maayong balita nahanungod kay Jesus,” walay duhaduha lakip ang pagkabanhaw ni Jesus.

Sang mabatian ining makatilingala nga mga kamatuoran, luyag sang Etiopianhon nga mangin disipulo ni Jesus kag nagpamangkot: “Ano ang nagapugong sa akon sa pagpabawtismo?” Pagkatapos sang iya bawtismo, ining mapainubuson nga Aprikano malipayon nga nagpauli, kag wala na naghinambit pa ang Biblia tuhoy sa iya.

Sa karon, ang mga Saksi ni Jehova nagabulig sa minilyon ka tawo sa bug-os nga kalibutan agod makatuon sa amo man nga “maayong balita.” Mga anom ka milyon ka walay bayad nga pagtuon sa Biblia sa puluy-an ang ginadumalahan karon.