Madumduman Mo Bala?

Nalipay ka bala sa pagbasa sa ulihi nga mga gua sang Ang Lalantawan? Ti, tilawi kon masabat mo ang masunod nga mga pamangkot:

• Ano ang kabangdanan sa pagpili sang Disiembre 25 subong petsa sa pagsaulog sang pagkabun-ag ni Jesus?

Ang Pulong sang Dios wala naghatag sing petsa sang pagkabun-ag ni Jesus. Ang Enciclopedia Hispánica nagsiling: “Ang petsa nga Disiembre 25 para sa pagsaulog sang Krismas wala ginpasad sa husto nga pagbanabana sa kaadlawan ni Jesus kundi, sa paghimo nga Cristiano sa mga kapiestahan sang winter solstice.” Ginaselebrar sang dumaan nga mga Romano ang pagbutlak sang adlaw sa tigtulugnaw paagi sa pagkinasadya, kinagansal, kag pagbayluhanay sing mga regalo.​​​—⁠⁠12/15, pahina 4-5.

• Ginapahangop bala sang Binuhatan 7:​59 nga nangamuyo si Esteban kay Jesus?

Wala. Ang Biblia nagapakita nga ang pangamuyo dapat lamang ipatuhoy kay Jehova nga Dios. Sang nakita si Jesus sa palanan-awon, maathag nga nagbatyag sia nga makapakiluoy sia sing direkta kay Jesus, nga nagasiling: “Ginuong Jesus, batuna ang akon espiritu.” Nahibaluan ni Esteban nga ginhatagan si Jesus sing awtoridad sa pagbanhaw sang mga patay. (Juan 5:27-29) Gani nagpangabay si Esteban ukon nakitluoy kay Jesus nga tipigan ang iya espiritu ukon puwersa sang kabuhi tubtob sa tion sang pagkabanhaw.​​​—⁠⁠1/1, pahina 31.

• Paano naton mahibaluan nga wala gintalana ang madangatan sang isa ka tawo?

Ginhatagan sang Dios ang tawo sing kahilwayan sa pagpili nga nagapaimposible sa predestinasyon. Mangin indi gid mahigugmaon kag di-makatarunganon para kay Jehova nga pat-uron nga daan ang dalanon nga aton pagahimuon kag dayon pasabton kita sa aton mga nahimo. (Deuteronomio 32:⁠4; 1 Juan 4:8)​​​—⁠⁠1/15, pahina 4-5.

• Ngaa indi maugdang ang pagsiling nga imposible ang mga milagro?

Ginkilala nga diutay lamang ang ila nahibaluan sa sientipiko nga mga katingalahan sa likod sang mga tinuga sang Dios, ginbaton sang pila ka sientipiko nga indi na nila mapat-od kon ano ang imposible. Sa masami, handa sila sa pagsiling nga daw indi ini mahimo matabo.​​​—⁠⁠2/15, pahina 5-6.

• Ngaa ginsilingan ni Samson ang iya mga ginikanan nga luyag niya ang anak nga babayi sang mga Filistinhon nga mangin asawa? (Hukom 14:2)

Supak sa kasuguan sang Dios ang pagpangasawa sa isa ka butig nga sumilimba. (Exodo 34:11-​16) Apang, ang Filistinhon nga babayi “nagakaigo” sa panulok ni Samson. “Nagapangita sing kahigayunan [si Samson] batok sa mga Filistinhon,” kag ang babayi nagakaigo gid para sa sina nga katuyuan. Ginbuligan sang Dios si Samson paagi sa Iya espiritu. (Hukom 13:25; 14:​3, 4, 6)​​​—⁠⁠3/15, pahina 26.

• Dapat bala mag-tip ukon maghatag sing isa ka sahi sang regalo ang isa ka Cristiano sa isa ka empleyado sang gobierno tungod sa iya serbisyo?

Sayop ang maghamham sa isa ka opisyal, ang maghatag sa iya sing butang nga may bili agod nga maghimo sia sing ilegal, magpatiko sing hustisya, ukon maghatag sing pabor. Apang indi paghamham ang mag-tip ukon magregalo sa isa ka alagad sang publiko kon ginahimo niya ang iya katungdanan ukon agod tigayunon ang legal nga serbisyo ukon agod malikawan ang di-makatarunganon nga pagtratar.​​​—⁠⁠4/1, pahina 29.