Mga Pamangkot Gikan sa mga Bumalasa

Wala bala ginkompromiso ni apostol Pablo ang iya Cristianong pagtuo sang nagsiling sia sa atubangan sang Sanhedrin: “Fariseo ako”?

Agod mahangpan ang ginsiling ni Pablo, nga masapwan sa Binuhatan 23:​6, dapat naton binagbinagon ang konteksto sini.

Sa tapos ginsalakay sang akig nga mga Judiyo sa Jerusalem, nagpamulong si Pablo sa kadam-an. Ginsambit niya nga sia “gintudluan sa [Jerusalem] sa tiilan ni Gamaliel, gintudluan suno sa tul-id nga paagi sa Kasuguan sang mga ginikanan.” Bisan pa namati sa makadali ang kadam-an sa iya paathag, sang naakig sila sang ulihi, gindala si Pablo sang nagaguardia nga kumandante sang militar sa kuwartel sang mga soldado. Sang buot na sia bunalon, si Pablo nagsiling: “Tugot bala sa inyo ang pagbunal sa isa ka tawo nga Romano kag wala pa mapamatbatan?”—Binuhatan 21:27–22:29.

Pagkadason nga adlaw, gindala si Pablo sang kumandante sa mataas nga hukmanan sang mga Judiyo, ang Sanhedrin. Gintulok sila sing maayo ni Pablo kag nakita niya nga ang Sanhedrin ginatapuan sang mga Saduceo kag mga Fariseo. Nian nagsiling sia: “Mga kauturan, Fariseo ako, anak sang mga Fariseo. Nahanungod sa paglaum sa pagkabanhaw sang mga patay ginhukman ako.” Subong resulta, nag-utwas ang binanggianay sa tunga sang mga Fariseo kag mga Saduceo, “kay ang mga Saduceo nagasiling nga walay pagkabanhaw ukon anghel ukon espiritu, apang ang mga Fariseo nagapahayag sini tanan.” Ang iban nga katapo sang sekta sang mga Fariseo akig nga nangatarungan: “Wala kami sing nakita nga malain sa sini nga tawo.”—Binuhatan 23:​6-​10.

Bangod kilala sia subong isa ka makugi gid nga Cristiano, indi mahimo nga ginkumbinsi ni Pablo ang Sanhedrin nga isa sia ka aktibo nga katapo sang sekta sang mga Fariseo. Ang mga Fariseo didto mahimo nga indi man magbaton sang bisan sin-o nga Fariseo nga wala nagapati sang tanan nila nga panudlo. Gani ang ginsiling ni Pablo tuhoy sa iya pagka-Fariseo may yara limitado nga kahulugan, kag mahimo nga ang mga Fariseo nga yara didto naghangop sang mga ginsiling ni Pablo pasad sa sina nga konteksto.

Sa pagsiling nga sia ginhukman bangod sang paglaum sa pagkabanhaw sang mga patay, maathag nga buot silingon ni Pablo nga sa sina nga bahin kaangay sia sa mga Fariseo. Sa bisan ano nga kontrobersiya tuhoy sa sini nga topiko, ang pagpati ni Pablo maangot sa mga Fariseo sa baylo nga sa mga Saduceo, nga wala nagapati sa pagkabanhaw.

Ang ginapatihan ni Pablo bilang isa ka Cristiano wala nagasumpakil sa mga ginapatihan sang mga Fariseo tuhoy sa sina nga mga butang kaangay sang pagkabanhaw, mga anghel, kag sang pila ka punto sang Kasuguan. (Filipos 3:5) Sa sini nga limitasyon, maangot ni Pablo ang iya kaugalingon sa mga Fariseo, kag sa sining limitado nga kahulugan ginhangop sang Sanhedrin nga yara didto ang iya mga ginsiling. Busa, ginpanginpuslan niya ang iya Judiyo nga ginhalinan sa pag-atubang sa di-makatarunganon nga mataas nga hukmanan sang mga Judiyo.

Apang, ang pinakamabaskog nga pamatuod nga wala ginkompromiso ni Pablo ang iya pagtuo makit-an sa padayon nga kahamuot ni Jehova sa iya. Sang gab-i pagkatapos ginsiling ni Pablo nga “Fariseo ako”, si Jesus nagsiling sa iya: “Magpakaisog ka! Kay subong nga nagpanaksi ka nahanungod sa akon sa Jerusalem, sa amo man dapat ka magpanaksi sa Roma.” Bangod sa sini nga kahamuot sang Dios, makahinakop kita nga wala ginkompromiso ni Pablo ang iya Cristianong pagtuo.—Binuhatan 23:11.