Tuguti ang Pulong sang Dios nga Mag-iwag sa Imo Banas

“Ang imo pulong . . . kapawa sa akon banas.”​​—⁠⁠SALMO 119:105.

1, 2. Sa anong mga kahimtangan ang pulong ni Jehova magaiwag sa aton banas?

ANG pulong ni Jehova magaiwag sa aton banas kon luyag naton. Agod makabenepisyo kita gikan sa sining espirituwal nga kapawa, dapat kita mangin maukod nga mga estudyante sang nasulat nga Pulong sang Dios kag iaplikar ang laygay sini. Sa amo lamang nga masiling man naton ang ginsiling sang salmista: “Ang imo pulong suga sa akon tiil, kag kapawa sa akon banas.”​​—⁠⁠Salmo 119:105.

² Binagbinagon naton karon ang Salmo 119:89-176. Bugana gid nga impormasyon ang ginaunod sini nga mga bersikulo nga naareglar sa 11 ka stansa! Makabulig ini sa aton sa pagpabilin sa dalanon padulong sa kabuhi nga walay katapusan.​​—⁠⁠Mateo 7:​13, 14.

Ngaa Dapat Kita Magkalipay sa Pulong sang Dios?

3. Paano ginapakita sang Salmo 119:​89, 90 nga masaligan gid naton ang pulong sang Dios?

³ Ang pagkalipay sa pulong ni Jehova makapapag-on sa espirituwalidad. (Salmo 119:89-96) Ang salmista nag-amba: “Tubtob sa walay latid nga tion, O Jehova, ang imo pulong malig-on sa langit. . . . Ginpasad mo sing mapag-on ang duta, agod nga  magpadayon ini.” (Salmo 119:​89, 90) Paagi sa pulong sang Dios​​—⁠⁠ang iya “mga palatukuran sang langit”​​—⁠⁠ang mga butang nga gintuga sa langit sibu gid nga nagalibot sa ila mga orbito kag ang duta mapag-on nga napasad tubtob sa walay katubtuban. (Job 38:31-33; Salmo 104:5) Masaligan gid naton ang tagsa ka pulong nga nagagua sa baba ni Jehova; ang ginasiling sang Dios “pat-od nga magamadinalag-on” sa pagtuman sang iya katuyuan.​​—⁠⁠Isaias 55:8-11.

4. Ano ang ginahimo sang pagkalipay sa pulong sang Dios para sa iya mga alagad nga nagaantos sing kapipit-an?

⁴ Napatay na kuntani ang salmista ‘sa iya kapipit-an kon wala niya ginkalipay ang kasuguan sang Dios.’ (Salmo 119:92) Indi mga dumuluong ang naghingabot sa iya; ang nagdumot sa iya amo ang mga Israelinhon nga naglapas sa kasuguan. (Levitico 19:17) Apang wala sia madaug sini, kay ginhigugma niya ang kasuguan sang Dios nga nagpabaskog sa iya. Sa Corinto, nabutang si apostol Pablo sa “mga katalagman sa tunga sang di-matuod nga mga kauturan,” ayhan lakip ang “lutaw nga mga apostoles” nga nagtinguha sa pagpangita sing panumbungon batok sa iya. (2 Corinto 11:​5, 12-14, 26) Apang, nakalampuwas si Pablo sa espirituwal bangod ginkalipay niya ang pulong sang Dios. Bangod ginakalipay naton ang nasulat nga Pulong ni Jehova kag ginaaplikar naton ang ginasiling sini, ginahigugma naton ang aton mga kauturan. (1 Juan 3:15) Bisan pa ginadumtan kita sang kalibutan, wala kita nagakalipat sa bisan ano nga instruksion sang Dios. Padayon nga ginahimo naton ang iya kabubut-on nga may mahigugmaon nga pagpakighiusa sa aton mga kauturan samtang ginapaabot naton ang makalilipay nga pag-alagad kay Jehova tubtob sa walay katubtuban.​​—⁠⁠Salmo 119:93.

5. Paano ginpangita ni Hari Asa si Jehova?

⁵ Sa aton pagpabutyag sing debosyon kay Jehova, mahimo mangamuyo kita: “Imo ako. O luwasa ako, kay ginpangita ko ang imo mga mando.” (Salmo 119:94) Ginpangita ni Hari Asa ang Dios kag ginpapas ang apostasya sa Juda. Sa isa ka daku nga asambleya sang ika-15 nga tuig sang paghari ni Asa (963 B.⁠C.⁠E.), ang mga pumuluyo sang Juda “nagpakigkatipan . . . agod pangitaon si Jehova.” Ang Dios “nagtugot . . . nga makita nila sia” kag “padayon nga naghatag sa ila sing kapahuwayan sa bug-os nga palibot.” (2 Cronica 15:10-15) Ini nga halimbawa dapat magpalig-on sa isa nga nagpalayo sa Cristianong kongregasyon nga pangitaon liwat ang Dios. Pakamaayuhon kag amligan niya ang isa nga magapakig-upod liwat sing aktibo sa iya katawhan.

6. Ano nga dalanon ang magaamlig sa aton gikan sa espirituwal nga kahalitan?

⁶ Ang pulong ni Jehova nagahatag sing kaalam nga makaamlig sa aton gikan sa espirituwal nga kahalitan. (Salmo 119:97-104) Ang mga sugo sang Dios nagahimo sa aton nga mas maalam sangsa aton mga kaaway. Ang pagtalupangod sang iya mga pahanumdom nagahatag sa aton sing paghantop, kag ‘ang pagtuman sa iya mga mando nagabulig sa aton sa paggawi nga may kapin nga paghangop sangsa tigulang nga mga lalaki.’ (Salmo 119:98-100) Kon ang mga pinamulong ni Jehova ‘mas suabe sa aton alingagngag sangsa dugos sa aton baba,’ dumtan naton kag likawan ang “tagsa ka dalanon nga di-matuod.” (Salmo 119:103, 104) Mangin proteksion ini sa aton gikan sa espirituwal nga kahalitan samtang ginaatubang naton ang matinaastaason, mabangis, di-diosnon nga mga tawo sa sining katapusan nga mga adlaw.​​—⁠⁠2 Timoteo 3:1-5.

Suga sa Aton Tiil

7, 8. Sa pagsunod sa Salmo 119:105, ano ang dapat naton himuon?

⁷ Ang pulong sang Dios dalayon nga nagahatag  sa aton sing masaligan nga espirituwal nga kapawa. (Salmo 119:105-112) Katapo man kita sang hinaplas nga mga Cristiano ukon sang ila mga kaupod nga “iban nga mga karnero,” nagasiling kita: “Ang imo pulong suga sa akon tiil, kag kapawa sa akon banas.” (Juan 10:16; Salmo 119:105) Ang pulong sang Dios kaangay sang isa ka suga nga nagaiwag sa aton dalanon, agod nga indi kita masandad kag matumba sa espirituwal. (Hulubaton 6:23) Apang, dapat naton tugutan ang pulong ni Jehova nga mangin suga sa aton tiil subong mga indibiduwal.

⁸ Dapat kita mangin malig-on subong sang manugkomposo sang Salmo 119. Nangin determinado sia nga indi magsipak sa mga mando sang Dios. “Nanumpa ako,” siling niya, ‘kag himuon ko ini, nga tumanon ko ang matarong nga hudisyal nga mga desisyon ni Jehova.’ (Salmo 119:106) Indi gid naton pagpakadiutayon ang balor sang regular nga pagtuon sa Biblia kag pagpakigbahin sa Cristianong mga miting.

9, 10. Paano naton nahibaluan nga ang mga indibiduwal nga nagdedikar kay Jehova mahimo ‘magsipak sa iya mga mando,’ apang paano ini malikawan?

⁹ Ang salmista wala ‘magsipak sa mga mando sang Dios,’ apang mahimo ini matabo sa isa ka tawo nga nagdedikar kay Jehova. (Salmo 119:110) Si Hari Solomon nagsipak, bisan pa katapo sia sang isa ka pungsod nga nagdedikar kay Jehova kag sang primero ginasunod pa niya ang kaalam nga ginhatag sa iya sang Dios. “Bisan sia man gani nakasala bangod sang iya dumuluong nga mga asawa” paagi sa pagsugyot sa iya nga magsimba sa butig nga mga dios.​​—⁠⁠Nehemias 13:26; 1 Hari 11:1-6.

¹⁰ “Ang manugpamispis” nga si Satanas, nagabutang sing madamo nga mga siod. (Salmo 91:3) Halimbawa, mahimo hayluhon ka sang imo anay kaupod nga sumilimba nga magsipak sa dalanon sang espirituwal nga kasanag padulong sa kadulom sang apostasya. Sa tunga anay sang mga Cristiano sa Tiatira, may isa ka “babayi nga si Jesebel,” ayhan isa ka grupo sang mga babayi nga nagatudlo sa iban sa pagbuhat sing idolatriya kag sa pagpakighilawas. Wala ginpabay-an ni Jesus ini nga mga kalautan, kag amo man dapat ang himuon naton. (Bugna 2:18-22; Judas 3, 4) Busa, dapat kita mangamuyo kay Jehova nga buligan kita agod nga indi kita magsipak sa iya mga mando kundi magpabilin sa kapawa sang Pulong sang Dios.​​—⁠⁠Salmo 119:111, 112.

Ginapabaskog sang Pulong sang Dios

11. Suno sa Salmo 119:119, paano ginatamod sang Dios ang mga malauton?

¹¹ Kon indi gid kita magsipak sa mga pagsulundan sang Dios, pabaskugon niya kita. (Salmo 119:113-120) Wala kita nagakahamuot sa “mga may pakulahaw nga tagipusuon,” subong nga wala ginakahamut-an ni Jesus ang mga nagapangangkon nga mga Cristiano nga maalabaab karon. (Salmo 119:113; Bugna 3:16) Bangod bug-os tagipusuon nga nagaalagad kita kay Jehova, sia ang ‘aton duog nga palanaguan’ kag pabaskugon niya kita. ‘Sikwayon niya ang tanan nga nagasipak sa iya mga pagsulundan’ paagi sa paglimbong kag kabutigan. (Salmo 119:114, 117, 118; Hulubaton 3:32) Ginatamod niya sila nga “buay”​​—⁠⁠ang mga higko nga ginasagyap gikan sa malahalon nga mga metal subong sang pilak kag bulawan. (Salmo 119:119; Hulubaton 17:3) Kabay nga magpakita kita pirme sing gugma sa mga pahanumdom sang Dios, kay pat-od nga indi naton luyag nga idugang kita sa tinumpok sang mga bu-ay sang kalaglagan!

12. Ngaa importante ang kahadlok kay Jehova?

¹² “Ang akon unod nagakurog sa kahadlok sa imo [Jehova],” siling sang salmista. (Salmo 119:120) Ang aton positibo nga kahadlok sa Dios, nga ginapakita paagi sa paglikaw naton sa butang nga wala niya ginakahamut-an, importante gid agod pabaskugon kita sang Dios subong mga alagad niya. Bangod sang masimbahon nga kahadlok ni Job kay Jehova, nagkabuhi sia nga matarong. (Job 1:⁠1; 23:15)  Ang diosnon nga kahadlok magabulig sa aton sa pagbatas sa dalanon nga nahamut-an sang Dios walay sapayan sang butang nga dapat naton batason. Apang, agod makabatas, kinahanglan naton ang hanuot nga mga pangamuyo nga may pagtuo.​​—⁠⁠Santiago 5:15.

Mangamuyo nga May Pagtuo

13-15. (a) Ngaa makatuo kita nga sabton ang aton mga pangamuyo? (b) Ano ang mahimo matabo kon indi naton mahibaluan kon ano ang isiling sa pangamuyo? (c) Iilustrar kon paano ang Salmo 119:121-128 mahimo nga magasibu sa aton ‘indi mabungat nga mga pag-ugayong’ sa pangamuyo.

¹³ Makapangamuyo kita nga may pagtuo nga magahikot ang Dios para sa aton. (Salmo 119:121-128) Kaangay sang salmista, mapat-od naton nga sabton ang aton mga pangamuyo. Ngaa? Bangod ginahigugma naton ang mga sugo sang Dios sing “labaw sa bulawan, labaw sa bulawan nga bus-og.” Dugang pa, ‘ginakabig naton nga matarong ang tanan nga mando ni Jehova nahanungod sa tanan nga butang.’​​—⁠⁠Salmo 119:127, 128.

¹⁴ Ginapamatian ni Jehova ang aton mga pangabay bangod nagapangamuyo kita nga may pagtuo kag ginatuman man naton ang iya mga mando. (Salmo 65:2) Apang ano kon ang aton mga problema makalilibog gid kon kaisa amo nga indi naton mahibaluan kon ano ang isiling sa pangamuyo? Nian “ang espiritu mismo nagapakiluoy para sa aton nga may mga pag-ugayong nga indi mabungat.” (Roma 8:​26, 27) Sa sina nga mga tion, ginabaton sang Dios ang mga pinamulong nga masapwan sa iya Pulong subong mga pangamuyo nga nagarepresentar sang aton mga kinahanglanon.

¹⁵ Ang Kasulatan madamo sing mga pangamuyo kag mga panghunahuna nga magasibu sa aton ‘indi mabungat nga mga pag-ugayong.’ Halimbawa, binagbinaga ang Salmo 119:121-128. Ang paagi kon paano ang mga butang ginpabutyag diri mahimo nga magabagay sa aton kahimtangan. Halimbawa, kon nahadlok kita nga madayaan, mahimo kita mangayo sing bulig sa Dios suno sa paagi sang salmista. (Bersikulo 121-123) Pananglit kinahanglan kita maghimo sing isa ka mabudlay gid nga desisyon. Nian mahimo kita mangamuyo kay Jehova agod magpabulig sa iya espiritu nga madumduman kag iaplikar ang iya mga pahanumdom. (Bersikulo 124, 125) Bisan pa ‘ginadumtan naton ang tagsa ka dalanon nga di-matuod,’ mahimo nga kinahanglan gihapon nga magpabulig kita sa Dios agod  nga indi kita madaug sang pagsulay nga lapason ang iya sugo. (Bersikulo 126-128) Kon basahon naton ang Biblia adlaw-adlaw, mahimo nga madumduman naton ining makabulig nga mga dinalan kon nagapangamuyo kita kay Jehova.

Ginabuligan sang mga Pahanumdom ni Jehova

16, 17. (a) Ngaa kinahanglan naton ang mga pahanumdom sang Dios, kag paano naton dapat tamdon ini? (b) Paano kita mahimo tamdon sang iban, apang ano ang importante gid?

¹⁶ Agod pamatian ang aton mga pangamuyo kag kahamut-an kita sang Dios, dapat naton talupangdon ang mga pahanumdom sang Dios. (Salmo 119:129-136) Bangod malipaton kita, kinahanglan naton ang dalayawon nga mga pahanumdom ni Jehova nga nagapahanumdom sa aton sang iya mga instruksion kag mga sugo. Sa pagkamatuod, ginaapresyar naton ang tagsa ka bag-o nga espirituwal nga kapawa nga mahangpan naton sa mga pulong sang Dios. (Salmo 119:129, 130) Nagapasalamat man kita nga ‘ginpasilak ni Jehova ang iya nawong sa aton’ sa kahamuot, bisan pa ang ‘mga ilig sang tubig nagailig sa aton mga mata’ bangod wala gintuman sang iban ang iya kasuguan.​​—⁠⁠Salmo 119:135, 136; Numeros 6:25.

¹⁷ Pat-od nga padayon kita nga kahamut-an sang Dios kon tumanon naton ang iya matarong nga mga pahanumdom. (Salmo 119:137-144) Subong mga alagad ni Jehova, ginakilala naton nga may kinamatarong sia nga ipatalupangod sa aton ang iya matarong nga mga pahanumdom kag ihatag ini sa aton subong mga sugo nga dapat naton tumanon. (Salmo 119:138) Sanglit gintuman sang salmista ang mga sugo sang Dios, ngaa nagsiling sia: “Wala ako sing kabilinggan kag talamayon”? (Salmo 119:141) Mahimo gid nga ginpatuhuyan niya kon paano sia gintamod sang iya mga kaaway. Kon wala naton ginakompromiso ang aton panindugan sa pagkamatarong, mahimo nga tamayon kita sang iban. Apang, ang importante gid amo nga ginatamod kita ni Jehova nga may kahamuot bangod nagakabuhi kita suno sa iya matarong nga mga pahanumdom.

May Kalig-unan kag May Paghidait

18, 19. Ano ang mangin mga resulta kon tumanon naton ang mga pahanumdom sang Dios?

¹⁸ Padayon kita nga mangin suod sa Dios kon tumanon naton ang iya mga pahanumdom. (Salmo 119:145-152) Bangod ginatalupangod naton ang mga pahanumdom ni Jehova, makapalapit kita sa iya sing bug-os tagipusuon, kag mapaabot naton nga mamati sia sa aton. Mahimo nga magbugtaw kita “sa pamanagbanag sang kaagahon” kag mangayo sing bulig. Maayo gid ini nga tion sa pagpangamuyo! (Salmo 119:145-147) Malapit man sa aton ang Dios bangod ginalikawan naton ang lugak nga mga paggawi kag ginatamod ang iya pulong subong kamatuoran, kaangay sang ginhimo ni Jesus. (Salmo 119:150, 151; Juan 17:17) Ang aton kaangtanan kay Jehova nagapabaskog sa aton sa sining magamo nga kalibutan kag tubtob sa iya dakung inaway nga Armagedon.​​—⁠⁠Bugna 7:​9, 14; 16:13-16.

¹⁹ Bangod sang aton tudok nga pagtahod sa pulong sang Dios, may yara kita matuod nga kalig-unan. (Salmo 119:153-160) Indi kaangay sang mga malauton, ‘wala kita nagasipak sa mga pahanumdom ni Jehova.’ Ginahigugma naton ang mga mando sang Dios, amo kon ngaa may kalig-unan kita sa iya mahigugmaon nga kaayo. (Salmo 119:157-159) Ginapukaw sang mga pahanumdom ni Jehova ang aton memorya agod nga madumduman naton kon ano ang ginapatuman niya sa aton sa espesipiko nga mga kahimtangan. Sa pihak nga bahin, ang mga mando sang Dios mga direktiba, kag dapat naton kilalahon gilayon ang kinamatarong sang aton Manunuga sa pagtuytoy sa aton. Sanglit nahibaluan naton nga ‘ang kaundan sang pulong sang Dios kamatuoran’ kag wala kita sing ikasarang nga tuytuyan ang aton mga tikang kon sa aton lamang, malipayon nga ginabaton naton ang pagtuytoy sang Dios.​​—⁠⁠Salmo 119:160; Jeremias 10:23.

20. Ngaa may yara kita “bugana nga paghidait”?

²⁰ Ang aton gugma sa kasuguan ni Jehova nagahatag sa aton sing bugana nga paghidait. (Salmo 119:161-168) Indi madula sa aton sang paghingabot ang walay kaanggid nga “paghidait sang Dios.” (Filipos 4:​6, 7) Ginaapresyar gid naton ang hudisyal nga mga desisyon ni Jehova amo nga pirme naton sia ginadayaw tungod sini​​—⁠⁠“makapito sa isa ka adlaw.” (Salmo 119:161-164) “May bugana nga paghidait ang mga nagahigugma sang imo kasuguan,” amba sang salmista, “kag wala sila sing kasandaran.” (Salmo 119:165) Kon subong mga indibiduwal, higugmaon kag tumanon naton ang kasuguan ni Jehova, indi kita masandad sa espirituwal sa himuon sang iban ukon sa bisan ano nga butang.

21. Anong Makasulatanhon nga mga halimbawa ang nagapakita nga indi kita dapat masandad kon may mga problema nga mag-utwas sa sulod sang kongregasyon?

 ²¹ Madamo nga indibiduwal nga ginasambit sa Biblia ang wala magtugot sa bisan ano nga butang nga magpasandad sa ila sing dayon. Halimbawa, wala masandad ang Cristiano nga si Gayo kundi ‘padayon sia nga naglakat sa kamatuoran’ walay sapayan sang di-diosnon nga paggawi ni Diotrefes. (3 Juan 1-3, 9, 10) Ginlaygayan ni Pablo ang Cristianong mga babayi nga si Eudias kag si Sintique nga “maghilisugot sila sa panghunahuna sa Ginuo,” ayhan bangod may problema nga nag-utwas sa ulot nila. Mahimo gid nga nabuligan sila nga husayon ang ila problema, kag padayon sila nga nag-alagad kay Jehova sing matutom. (Filipos 4:​2, 3) Gani, indi kita dapat masandad kon may pila ka problema nga mag-utwas sa sulod sang kongregasyon. Mag-ukod kita sa pagtuman sang mga sugo ni Jehova, ginadumdom nga ‘ang tanan naton nga dalanon yara sa atubangan niya.’ (Salmo 119:168; Hulubaton 15:3) Nian, indi madula sing dayon ang aton “bugana nga paghidait” bisan ano pa ang matabo.

22. (a) Kon tumanon naton ang Dios, ano nga pribilehiyo ang matigayon naton? (b) Paano naton dapat tamdon ang pila nga nagbiya sa Cristianong kongregasyon?

²² Kon pirme naton tumanon si Jehova, may pribilehiyo kita nga dayawon sia tubtob san-o. (Salmo 119:169-176) Paagi sa pagtuman sang mga pagsulundan sang Dios, indi lamang kita makatigayon sing espirituwal nga kalig-unan kundi ‘padayon nga magamitlang ang aton mga bibig sing pagdayaw kay Jehova.’ (Salmo 119:169-171, 174) Amo ini ang labing daku nga pribilehiyo nga matigayon naton sa sining katapusan nga mga adlaw. Luyag sang salmista nga magpadayon sa pagkabuhi kag magdayaw kay Jehova, apang sa isa ka paagi nga wala ginbuyagyag sa aton ‘nagtalang sia kaangay sang nadula nga karnero.’ (Salmo 119:175, 176) Ang iban nga nagbiya sa Cristianong kongregasyon mahimo nga nagahigugma gihapon sa Dios kag luyag pa magdayaw sa iya. Busa, himuon naton ang tanan nga masarangan naton nga buligan sila agod nga makasapo sila liwat sing espirituwal nga kalig-unan kag makaeksperiensia sing kalipay sa pagdayaw kay Jehova upod sa iya katawhan.​​—⁠⁠Hebreo 13:15; 1 Pedro 5:​6, 7.

Dayon nga Kapawa Para sa Aton Banas

23, 24. Ano nga mga benepisyo ang natigayon mo gikan sa Salmo 119?

²³ Makabenepisyo kita gikan sa Salmo 119 sa nanuhaytuhay nga mga paagi. Halimbawa, makapahulag ini sa aton nga labi pa nga magsandig sa Dios, kay ginapakita sini nga ang matuod nga kalipay nagagikan sa ‘paglakat sa kasuguan ni Jehova.’ (Salmo 119:1) Ginapahanumdom kita sang salmista nga ‘ang kaundan sang pulong sang Dios kamatuoran.’ (Salmo 119:160) Dapat ini magpadaku pa sang aton apresasyon sa bug-os nga nasulat nga Pulong sang Dios. Ang pagpamalandong sa Salmo 119 dapat magpahulag sa aton nga tun-an sing maukod ang Kasulatan. Ang salmista makapila nga nagpakiluoy sa Dios: “Tudlui ako sang imo mga palatukuran.” (Salmo 119:​12, 68, 135) Nagpakiluoy man sia: “Tudlui ako sing kaayuhan, pagkamahinantupon kag sing ihibalo mismo, kay nagatuo ako sa imo mga sugo.” (Salmo 119:66) Dapat man kita mangamuyo sing subong sini.

²⁴ Paagi sa pagtudlo ni Jehova, posible nga makatigayon kita sing suod nga kaangtanan sa iya. Makapila nga gintawag sang salmista ang iya kaugalingon nga alagad sang Dios. Sa katunayan, makatalandog nga nagsiling sia kay Jehova: “Imo ako.” (Salmo 119:​17, 65, 94, 122, 125; Roma 14:8) Daw ano nga kadungganan nga mag-alagad kag magdayaw kay Jehova subong isa sang iya mga Saksi! (Salmo 119:7) Malipayon ka bala nga nagaalagad sa Dios subong isa ka manugbantala sang Ginharian? Kon amo, saligi nga si Jehova padayon nga magasakdag kag magapakamaayo sa imo sa sining dungganon nga hilikuton kon pirme ka magsalig sa iya pulong kag tugutan ini nga mag-iwag sa imo banas.

Paano Mo Sabton?

• Ngaa dapat kita malipay sa pulong sang Dios?

• Paano kita ginapabaskog sang pulong sang Dios?

• Sa anong mga paagi ginabuligan kita sang mga pahanumdom ni Jehova?

• Ngaa may kalig-unan kag paghidait ang katawhan ni Jehova?

[Mga Pamangkot sa Pagtinuon]

[Retrato sa pahina 16]

Ang pulong sang Dios nagahatag sing espirituwal nga kapawa

[Retrato sa pahina 17]

Kon higugmaon naton ang mga pahanumdom ni Jehova, indi gid niya kita pagkabigon nga “buay”

[Mga retrato sa pahina 18]

Kon basahon naton ang Biblia adlaw-adlaw, madali naton madumduman ang makabulig nga mga dinalan kon nagapangamuyo kita