Tuman Na Gid Bala ang Aton Nahibaluan?

Nagapungko sa isa ka baybayon sa Katundan nga Aprika ang mag-asawa nga misyonero nga nagatangla sa masanag nga bulan. “Daw ano na kadamo ang nahibaluan sang tawo tuhoy sa bulan, kag daw ano pa kadamo ang dapat matun-an?” pamangkot sang bana.

Nagsabat ang iya asawa: “Handurawa nga makita man naton ang planeta nga duta​​​—⁠⁠daw ano na kadamo ang nahibaluan sang mga tawo tuhoy sa duta, kag daw ano pa kadamo ang dapat matun-an? Kag hunahuna lamang ini! Indi lamang nga nagalibot ang duta sa adlaw kundi nagagiho man ang aton bug-os nga sistema solar. Nagakahulugan ini nga mahimo indi na gid kita makabalik sa sini gid nga bahin sang uniberso. Sa katunayan, nahibaluan naton ang aton nahamtangan pasad lamang sa nahamtangan sang adlaw kag mga bituon. Madamo kita sing nahibaluan sa pila ka butang, apang masiling naton, nga wala gid kita nakahibalo kon diin gid ang aton eksakto nga nahamtangan!”

INING mga panghunahuna nga nahinambitan na nagadalahig sa pila ka sadsaran nga mga kamatuoran. Daw kadamo pa gid sang dapat matun-an. Sa pagkamatuod, bag-o nga mga butang ang matun-an sang tagsatagsa sa aton kada adlaw. Apang, bisan pa daw ano kadamo na ang aton natun-an, indi gid kita makaarapal nga tun-an ang tanan nga luyag naton mahibaluan.

Matuod, dugang sa ikasarang nga makatuon sing bag-o nga impormasyon, ang kapasidad nga huptan ang natun-an na nag-uswag man sing daku. Ang nasupot nga ihibalo sang katawhan nagadugang pa gid paagi sa teknolohiya. Daku gid ang kapasidad sang mga hard disk sang kompyuter karon amo nga kinahanglan ang bag-o nga mga termino sa matematika agod ilaragway ini. Ang isa ka simple nga CD-ROM makatago sing madamo nga impormasyon; ang kapasidad sini ginalaragway subong 680 megabytes ukon kapin pa. Ang kinaandan nga DVD may pito ka pilo nga kapasidad sangsa CD-ROM, kag ang iban nga may mas daku pa nga kapasidad mahimo matigayon sa palaabuton.

Ang moderno nga paagi sang tawo sa pagpaalinton sing impormasyon daw indi gid naton matungkad. Tuman gid kadasig ang mga rotary press sa pag-imprinta sing mga pamantalaan, mga magasin, kag mga libro. Para sa mga nagagamit sing Internet matigayon dayon ang wala-untat nga impormasyon paagi sa isa lang ka pindot sa mouse sang kompyuter. Sa sini kag sa madamo pa nga paagi, ang pagpalapnag sing impormasyon mas madasig sangsa matun-an sang isa. Ang kadamuon sining impormasyon mapaanggid kon kaisa sa tubig sang dagat, nga tuman kalapad busa dapat kita magtuon sa paglangoy, kon sa  aton pa, apang tinguhaan gid naton nga indi ini pag-imnon tanan. Bangod sang tuman nga kadamuon sini, dapat kita mangin mapilion.

Ang isa pa ka rason nga mangin mapilion amo nga madamo nga impormasyon ang indi pirme mapuslanon. Sa pagkamatuod, ang pila sini indi gid halandumon, ukon indi gid takus hibaluon. Dumduma nga ang ihibalo nagapatuhoy sa impormasyon​​—⁠⁠maayo ukon malain, mapuslanon ukon indi. Makapagumon pa, ang ginakabig sang madamo nga mga katunayan indi gali sibu. Daw ano kasunson nga ang mga ginasiling sang ginatahod nga mga awtoridad napamatud-an sang ulihi nga sayop! Halimbawa, binagbinaga, ang manugrekord sang siudad sang dumaan nga Efeso, nga ginatamod nila subong maalam gid nga opisyal. Nagsiling sia: “Sin-o bala sa katawhan ang wala makahibalo nga ang siudad sang mga taga-Efeso amo ang manugbantay sang templo sang bantog nga Artemis, kag sang larawan nga nahulog gikan sa langit?” (Binuhatan 19:​35, 36) Bisan pa amo sini ang pagkahibalo sang tanan​​—⁠⁠indi pa gani masuay, mahimo isiling sang madamo​​—⁠⁠indi matuod nga ang larawan nahulog gikan sa langit. May maayo gid nga rason ang Balaan nga Biblia sa pagpaandam sa mga Cristiano nga magbantay batok sa “butig nga ginatawag nga ‘ihibalo’”​​—⁠⁠1 Timoteo 6:⁠20.

Ang mabakod gid nga rason nga mangin mapilion tuhoy sa ihibalo amo nga tuman gid kalip-ot ang aton kabuhi karon. Bisan pila man ang edad mo, walay duhaduha nga madamo ka sing luyag tun-an, apang nahantop mo nga indi mo ini mahimo bangod sang kalip-uton sang kabuhi.

Malubad bala ini nga problema? May ihibalo bala nga makapalawig sang kabuhi, ukon makahimo sang kabuhi nga walay katapusan? Nagaluntad na bala ini nga ihibalo? Kon amo, matigayon bala ini sang tanan? Magaabot ayhan ang tion nga ang tanan nga ihibalo puro na lang kamatuoran? Ang mag-asawa nga misyonero nga ginhinambit sa ibabaw nakasapo sing makaalayaw nga mga sabat sa mga pamangkot, kag ikaw man. Palihug basaha ang masunod nga artikulo, nga magatanyag sa imo sing paglaum sa pagkuha sing ihibalo sing dayon.