Ang Paglaum nga Pagkabanhaw—Ano ang Kahulugan Sini Para sa Imo?

“Ginahumlad mo ang imo kamot kag ginabusog ang handum sang tagsa ka butang nga buhi.”—⁠SALMO 145:16.

1-3. Ano ang ginalauman sang pila sa palaabuton? Iilustrar.

GINHINGUYANG sang nuebe anyos nga si Christopher kag sang iya magulang nga lalaki ang aga upod sa iya tiyo, tiya, kag duha ka pakaisa, sa pagpamalaybalay sa ila Cristianong ministeryo malapit sa Manchester, Inglaterra. Ginpaathag sang amon kaupod nga magasin, nga Magmata!, kon ano ang natabo. “Sang hapon, namasyar sila sa Blackpool, isa ka malapit nga paliguan sa tupad sang dagat. Sila nga 6 nalakip sa 12 ka tawo nga napatay dayon sang makabunggo ang ila salakyan, nga ginlaragway sang pulisiya subong isa ka ‘bug-os nga pagkasunog.’”

² Sang gab-i antes matabo ang trahedya, nagtambong ang pamilya sa Pagtinuon Sang Kongregasyon sa Libro, nga ang topiko amo ang kamatayon. “Si Christopher madinumdumon gid nga bata,” siling sang iya amay. “Sadto nga gab-i, maathag nga naghambal sia nahanungod sa bag-ong kalibutan kag sang iya paglaum sa palaabuton. Nian, samtang nagapadayon ang amon paghambalanay, si Christopher hinali nga nagsiling: ‘Ang butang nga maayo subong isa ka Saksi ni Jehova amo nga bisan pa masakit ang kamatayon, nahibaluan naton nga magakitaay kita liwat sa duta sa pila ka adlaw.’ Wala gid sing isa sa amon nga nakatambong sadto ang nakarealisar nga yadtong mga pulong indi malipatan.”⁠ *

³ Mga tinuig antes sini, sang 1940, ang taga-Austria nga Saksi nga si Franz, nakahibalo nga pagapatyon sia paagi sa guillotine bangod nangindi sia nga mangin di-matutom kay Jehova. Ginsulatan ni Franz ang iya iloy gikan sa isa ka prisuhan sa Berlin: “Sa nahibaluan ko, kon nagsumpa [pangmilitar] ako, nakahimo ako sing sala nga takus sa kamatayon. Ginakangil-aran ko ina. Wala na ako sing pagkabanhaw. . . . Kag karon, pinalangga ko nga iloy kag mga kauturan, ginsugid sa akon karon nga adlaw ang akon sentensia, kag indi kamo magkakugmat, kamatayon ini, kag patyon ako buwas sa aga. May kabakod ako gikan sa Dios, subong nga amo man anay sa tanan nga matuod nga Cristiano sang una. . . . Kon magpakalig-on kamo tubtob sa kamatayon, magakitaay kita liwat sa pagkabanhaw. . . . Tubtob sa liwat naton nga pagkitaay.”⁠ *

4. Ano ang epekto sa imo sang mga eksperiensia nga ginsaysay diri, kag ano ang masunod nga binagbinagon naton?

⁴ Importante gid para kanday Christopher kag Franz ang paglaum nga pagkabanhaw. Matuod ini para sa ila. Makatalandog gid ining mga eksperiensia! Agod magtudok ang aton gugma kag pagkamapinasalamaton kay Jehova kag agod magbakod ang aton paglaum sa pagkabanhaw, binagbinagon naton kon ngaa may pagkabanhaw kag paano ini personal nga makaapektar sa aton.

Palanan-awon sa Pagkabanhaw sa Duta

5, 6. Ano ang ginapakita sang palanan-awon ni apostol Juan sa Bugna 20:​12, 13?

⁵ Sa palanan-awon tuhoy sa mga hitabo sa tion sang Milenyo nga Paggahom ni Jesucristo, nakita ni apostol Juan ang pagkabanhaw sa duta. “Kag nakita ko ang mga patay, ang dalagku kag magamay,” siling niya. “Kag ginhatag sang dagat  ang mga patay nga yara sa iya, kag ginhatag sang kamatayon kag Hades ang mga patay nga yara sa ila.” (Bugna 20:​12, 13) Ano man ang kahimtangan sa kabuhi​​—⁠“dalagku” man ukon “magamay”​​—⁠ang tanan nga nabilanggo sa Hades (Sheol), ang kabilugan nga lulubngan sang tawo, pagabuy-an. Ang mga napatay sa dagat mabuhi man sa sina nga tion. Ining makatilingala nga hitabo bahin sang katuyuan ni Jehova.

⁶ Kon magsugod na ang isa ka libo ka tuig nga paggahom ni Cristo, gapuson kag itagbong niya sa kadadalman si Satanas. Indi mapatalang ni Satanas ang mga mabanhaw ukon ang mga makalampuwas sa daku nga kapipit-an bangod mangin di-aktibo sia sa sina nga tion. (Bugna 20:​1-3) Daw tuman na kalawig sa imo ang isa ka libo ka tuig, apang, sa katunayan, “isa ka adlaw” lang ini para kay Jehova.​​—⁠2 Pedro 3:⁠8.

7. Ano ang mangin sadsaran sa paghukom sa tion sang Milenyo nga Paggahom ni Cristo?

⁷ Suno sa palanan-awon, ang Milenyo nga Paggahom ni Cristo mangin tion sang paghukom. Si apostol Juan nagsulat: “Nakita ko ang mga patay, ang dalagku kag magamay, nga nagatindog sa atubangan sang trono, kag ang mga linukot ginbukad. Kag ang isa naman ka tulun-an ginbukad; amo ini ang tulun-an sang kabuhi. Kag ang mga patay ginhukman bangod sa nasulat sa mga tulun-an suno sa ila binuhatan. . . . Kag ginhukman ang tagsa ka tawo suno sa iya binuhatan.” (Bugna 20:​12, 13) Talupangda nga ang paghukom wala ginapasad sa kon ano ang ginhimo ukon wala ginhimo sang tawo antes sia napatay. (Roma 6:7) Sa baylo, ipasad ini sa “mga linukot” nga pagabukaron pa. Ang mga hinimuan sang isa ka tawo sa tapos niya mahibal-an ang mga kaundan sang mga linukot amo ang mangin sadsaran kon bala isulat ang iya ngalan sa “tulun-an sang kabuhi.”

“Pagkabanhaw nga sa Kabuhi” ukon “Pagkabanhaw nga sa Paghukom”

8. Ano ang duha ka posible nga resulta para sa mga mabanhaw?

⁸ Sa nahauna nga bahin sang palanan-awon ni Juan, ginlaragway si Jesus nga amo ang may “mga yabi sang kamatayon kag Hades.” (Bugna 1:18) Nagaalagad sia kay Jehova subong ang “Pangulo nga Ahente sang kabuhi,” nga ginhatagan sing gahom sa paghukom “sa mga buhi kag sa mga patay.” (Binuhatan 3:15; 2 Timoteo 4:1) Paano niya ini himuon? Paagi sa pagbanhaw sa mga napatay? “Indi kamo matingala sa sini,” siling ni Jesus sa mga ginbantalaan niya, “bangod ang oras magaabot nga ang tanan nga yara sa handumanan nga mga lulubngan makabati sang iya tingog kag magagua.” Nian nagdugang sia: “Ang mga nakahimo sing maayong mga butang sa pagkabanhaw nga sa kabuhi, yadtong nakahimo sing malaut nga mga butang sa pagkabanhaw nga sa paghukom.” (Juan 5:​28-​30) Kon amo, ano ang palaabuton sang matutom nga mga lalaki kag babayi sang una?

9. (a) Sa ila pagkabanhaw, ano ang pat-od nga matun-an sang madamo? (b) Anong masangkad nga edukasyunal nga hilikuton ang himuon?

⁹ Kon mabanhaw na ining mga matutom sang una, mahibaluan nila gilayon nga nangin matuod ang mga saad nga ila ginsaligan. Mangin interesado gid sila nga makilala kon sin-o ang Binhi sang babayi sang Dios, nga ginsambit sa una nga tagna sa Biblia, sa Genesis 3:​15! Malipay gid sila mamati nga ang ginsaad nga Mesias, nga si Jesus, nangin matutom tubtob sa iya kamatayon, sa amo nagahatag sang iya kabuhi subong halad nga gawad! (Mateo 20:28) Ang mga magaabiabi sa ila sa pagkabanhaw malipay gid sa pagpahangop sa ila nga ining gawad isa ka pagpahayag sang di-bagay nga kaayo kag kaluoy ni Jehova. Kon mahibaluan sang mga mabanhaw kon ano ang ginahimo sang Ginharian sang Dios sa pagtuman sang katuyuan ni Jehova sa duta, mapuno gid sing pagdayaw kay Jehova ang ila mga tagipusuon. May madamo sila nga kahigayunan agod ipakita ang ila debosyon sa ila mahigugmaon nga langitnon nga Amay kag sa iya Anak. Nian ang tanan nga nagakabuhi malipay sa pagpakigbahin sa masangkad nga edukasyunal nga hilikuton nga kinahanglan agod tudluan ang binilyon nga ginbanhaw, nga kinahanglan man magbaton sang aman sang Dios nga gawad.

10, 11. (a) Ano nga kahigayunan ang ihatag sang Milenyo sa tanan sa duta? (b) Paano kita dapat maapektuhan sini?

¹⁰ Mangin daku gid nga lugpay para sa  ginbanhaw nga si Abraham nga sia aktual nga magakabuhi sa idalom sa paggahom sinang “siudad” nga iya ginlauman. (Hebreo 11:10) Makunyag gid ang matutom nga si Job sang una kon mahibal-an niya nga ang iya pagkabuhi nagpalig-on sa iban nga mga alagad ni Jehova nga nag-atubang sing mga pagtilaw sa ila integridad! Kag si Daniel malangkag gid nga mahibaluan ang katumanan sang mga tagna nga gin-inspirar sia sa pagsulat!

¹¹ Sa pagkamatuod, ang tanan nga makaagom sing kabuhi sa matarong nga bag-ong kalibutan, paagi man sa pagkabanhaw ukon paagi sa pagkalampuwas sa daku nga kapipit-an, madamo sing matun-an tuhoy sa mga katuyuan ni Jehova para sa duta kag sa mga pumuluyo sini. Mangin makalilipay gid ang edukasyunal nga programa sa Milenyo bangod sa paglaum nga mabuhi sing dayon kag sa pagdayaw kay Jehova sa walay katubtuban. Apang, ang labing importante amo ang kon ano ang aton ginahimo subong indibiduwal samtang ginatun-an naton ang mga kaundan sang mga linukot. Iaplikar bala naton ang aton matun-an? Pamalandungan bala naton kag tumanon ang importante nga impormasyon nga makapabakod sa aton sa pagbato sa katapusan nga pagtinguha ni Satanas nga ipahilayo kita sa kamatuoran?

12. Ano ang makabulig sa tanan nga makapakigbahin sing bug-os sa edukasyunal nga hilikuton kag sa paghimo sa duta nga isa ka paraiso?

¹² Indi man naton dapat pagkalipatan ang makalilipay nga mga pagpakamaayo bangod sa pag-aplikar sang mga benepisyo sang halad gawad ni Cristo. Ang mga ginbanhaw wala na sing ano man nga balatian ukon mga kasablagan kaangay karon. (Isaias 33:24) Ang mapagros nga lawas kag ang paglaum nga mangin himpit sa kapagros magatugot sa tanan nga pumuluyo sang bag-ong kalibutan nga makapakigbahin sing bug-os sa edukasyunal nga hilikuton sa pagtudlo sa binilyon nga ginbanhaw sa dalanon sang kabuhi. Makigbahin man ining mga pumuluyo sa labing daku nga proyekto nga pagahimuon sa duta​​—⁠nga amo ang paghimo sa bug-os nga planeta nga isa ka paraiso sa kadayawan ni Jehova.

13, 14. Ngaa buy-an si Satanas sa katapusan nga pagtilaw, kag ano ang posible nga resulta sa kada isa sa aton?

¹³ Kon buy-an na si Satanas gikan sa kadadalman para sa katapusan nga pagtilaw, magatinguha sia nga limbungan liwat ang mga tawo. Suno sa Bugna 20:​7-9, ang tanan nga ‘nalimbungan nga mga pungsod,’ ukon mga grupo sang katawhan nga nasulay sa malaut nga impluwensia ni Satanas, hukman nga takus sa kalaglagan: ‘mahulog ang kalayo gikan sa langit kag magalamon sa ila.’ Para sa ila nga nabanhaw sa tion sang Milenyo, ini nga kalaglagan magahimo sang ila pagkabanhaw nga pagkabanhaw sa nagapakamalaut nga paghukom. Sa kabaliskaran, ang mga ginbanhaw nga naghupot sang ila integridad magabaton sang dulot nga kabuhi nga walay katapusan. Sa pagkamatuod, ang ila pagkabanhaw mangin isa ka “pagkabanhaw nga sa kabuhi.”​​—⁠Juan 5:⁠29.

¹⁴ Paano kita malugpayan sang paglaum nga pagkabanhaw bisan karon? Labi ka importante, ano ang aton himuon agod mapat-od naton nga makapanginpulos kita sa sini sa palaabuton?

Mga Leksion nga Matun-an Naton Karon

15. Paano makabulig karon ang pagpati sa pagkabanhaw?

¹⁵ Mahimo nga namatyan ka sing hinigugma sining karon lang kag nagahimo sing daku nga pagpasibu bangod sining daku nga kadulaan. Ang paglaum nga pagkabanhaw magabulig sa imo nga makaagom sang nasulod nga kakalma kag kabakod nga indi matigayon sang wala makahibalo sing kamatuoran. “Indi namon luyag nga wala kamo sing nahibaluan nahanungod sa mga nagakatulog sa kamatayon,” paumpaw ni Pablo sa mga taga-Tesalonica, “agod nga indi kamo magkasubo subong sang iban nga walay paglaum.” (1 Tesalonica 4:13) Ginapanan-aw mo bala ang imo kaugalingon sa bag-ong kalibutan, nga nagasaksi sa pagkabanhaw? Kon amo, magtigayon sing lugpay karon paagi sa pagpamalandong sa paglaum nga makitaay kamo liwat sang imo mga hinigugma.

16. Ano ayhan ang imo mangin balatyagon kon matabo na ang pagkabanhaw?

¹⁶ Mahimo nga nagaantos ka karon bangod sa pisikal nga mga resulta sang pagrebelde ni Adan, ayhan paagi sa balatian. Indi pagtuguti nga ining kalisdanan makadula sang imo makalilipay nga paglaum nga personal nga maeksperiensiahan  ang pagkabanhaw kag mabuhi liwat nga may napasag-uli nga kapagros kag kapagsik sa bag-ong kalibutan. Nian kon sa pagmuklat mo sang imo mga mata kag makita mo ang malipayon nga mga nawong nga nalangkag nga ipaambit sa imo ang ila kalipay sa imo pagkabanhaw, pat-od nga magapasalamat ka sa Dios bangod sa iya mahigugmaon nga kaayo.

17, 18. Anong duha ka importante nga leksion ang dapat naton dumdumon?

¹⁷ Samtang wala pa ini, binagbinaga ang duha ka leksion nga dapat naton dumdumon. Ang isa amo ang importansia sang bug-os kalag nga pag-alagad kay Jehova karon mismo. Bilang pag-ilog sa aton Agalon, si Jesucristo, ang masinakripisyuhon naton nga pagkabuhi nagapakita sang aton gugma kay Jehova kag sa aton mga isigkatawo. Kon madula ang aton palangitan-an ukon kahilwayan bangod sa pagpamatok ukon paghingabot, determinado kita nga magpabilin nga malig-on sa pagtuo bisan ano pa man nga mga pagtilaw ang aton maatubang. Kon mamahog ang mga manugpamatok nga patyon kita, nian ang paglaum nga pagkabanhaw magalugpay kag magapabakod sa aton nga magpabilin nga matutom kay Jehova kag sa iya Ginharian. Huo, ang aton kakugi sa pagbantala sing Ginharian kag paghimo-disipulo nga hilikuton nagahatag sing paglaum sa aton nga matigayon ang dayon nga mga pagpakamaayo nga ginatigana ni Jehova sa mga matarong.

¹⁸ Ang ikaduha nga leksion may kaangtanan sa kon paano naton atubangon ang mga pagsulay bangod sa pagkadihimpit. Ang aton ihibalo sa paglaum nga pagkabanhaw kag ang aton apresasyon sa di-bagay nga kaayo ni Jehova nagapabakod sang aton determinasyon nga magpabilin nga malig-on sa pagtuo. “Indi ninyo paghigugmaa ang kalibutan ukon ang mga butang sa kalibutan,” paandam ni apostol Juan. “Kon ang bisan sin-o nagahigugma sang kalibutan, ang gugma sa Amay wala sa iya; bangod ang tanan nga butang sa kalibutan​—⁠ang kailigbon sang unod kag ang kailigbon sang mga mata kag ang pagpadayawdayaw sang palangabuhian sang isa​—⁠wala maghalin sa Amay, kundi naghalin sa kalibutan. Dugang pa, ang kalibutan nagataliwan kag amo man ang kailigbon sini, apang sia nga nagahimo sang kabubut-on sang Dios nagapabilin sing dayon.” (1 Juan 2:​15-​17) Ang pangganyat sang materyalismo sang kalibutan indi makaganyat sa aton kon ipaanggid naton ini sa “matuod nga kabuhi.” (1 Timoteo 6:​17-​19) Kon ginasulay sa paghimo  sing imoralidad, malig-on gid kita nga nagapangindi. Narealisar naton nga kon mapatay kita antes sang Armagedon, mangin kaangay kita sa mga wala sing paglaum nga pagkabanhaw kon padayon kita nga nagagawi sing di-kalahamut-an kay Jehova.

19. Anong daku nga pribilehiyo ang indi naton dapat pagkalipatan?

¹⁹ Labaw sa tanan, indi gid naton pagkalipatan ang daku nga pribilehiyo nga pahalipayon ang tagipusuon ni Jehova karon kag sa palaabuton. (Hulubaton 27:11) Ang aton katutom tubtob sa kamatayon ukon ang aton padayon nga paghupot sing integridad tubtob sa katapusan sining malaut nga sistema amo ang magapakita kay Jehova nga dampig kita sa iya sa hulusayon sang bug-os uniberso nga pagkasoberano. Nian daku gid nga kalipay nga magkabuhi sa Paraiso sa duta paagi man sa paglampuwas sa daku nga kapipit-an ukon paagi sa milagruso nga pagkabanhaw!

Pagbusog sang Aton mga Handum

20, 21. Ano ang makabulig sa aton nga magpabilin nga matutom bisan pa wala masabat ang pila naton ka pamangkot tuhoy sa pagkabanhaw? Ipaathag.

²⁰ Wala masabat ang pila ka pamangkot sa aton pagbinagbinag sang pagkabanhaw. Ano ang kahimusan ni Jehova sa mga mag-asawa nga napatay? (Lucas 20:​34, 35) Mabanhaw bala ang mga tawo sa duog diin sila napatay? Mabanhaw bala sila malapit sa ila mga pamilya? Madamo pa nga pamangkot tuhoy sa mga kahimusan sa pagkabanhaw ang wala masabat. Walay sapayan sini, dapat naton dumdumon ang mga pulong ni Jeremias: “Maayo si Jehova sa isa nga nagalaum sa iya, sa kalag nga padayon nga nagapangita sa iya. Maayo kon ang isa maghulat, sing hipos, sang pagluwas ni Jehova.” (Panalabiton 3:​25, 26) Sa nagakaigo nga tion ni Jehova, makontento gid kita sa sabat sa tanan naton nga pamangkot. Ngaa mapat-od naton ini?

²¹ Binagbinaga ang inspirado nga mga pulong sang Salmista sang nagsulat sia tuhoy kay Jehova: “Ginahumlad mo ang imo kamot kag ginabusog ang handum sang tagsa ka butang nga buhi.” (Salmo 145:16) Samtang nagatigulang kita, nagabag-o ang aton mga handum. Tuhay ang aton handum karon sangsa sadtong mga bata pa kita. Ang aton pagtamod sa kabuhi apektado sang aton mga eksperiensia kag sang aton man mga paglaum. Walay sapayan kon ano man ang nagakaigo naton nga mga handum sa bag-ong kalibutan, pat-od nga busgon ini ni Jehova.

22. Ngaa may maayo kita nga rason sa pagdayaw kay Jehova?

²² Ang importante sa kada isa sa aton karon amo ang pagkamangin matutom. “Ang ginapangita sa mga tulugyanan amo nga ang isa ka tawo masapwan nga matutom.” (1 Corinto 4:2) Mga tulugyanan kita sang mahimayaon nga maayong balita sang Ginharian sang Dios. Ang aton kaukod sa pagbantala sining maayong balita sa tanan nga masugilanon naton nagabulig agod magpabilin kita sa dalan padulong sa kabuhi. Panumduma pirme ang katunayan nga ang “tion kag wala ginapaabot nga hitabo” nagakahanabo sa aton tanan. (Manugwali 9:11) Agod maghaganhagan ang ano man nga di-nagakaigo nga kabalaka bangod sa mga pagkawalay kapat-uran sa kabuhi, magkapyot sing malig-on sa makalilipay nga paglaum nga pagkabanhaw. Mangin kumbinsido nga bisan pa kon mapatay ka antes magsugod ang Milenyo nga Paggahom ni Cristo, malugpayan ka kay napat-od mo nga maabot ang paumpaw. Sa gintangdo nga tion ni Jehova masulit mo ang mga tinaga ni Job para sa Manunuga: “Magapanawag ka, kag ako magasabat sa imo.” Ang tanan magdayaw kay Jehova, nga nagahandum nga banhawon ang tanan nga yara sa iya handumanan!​​—⁠Job 14:⁠15.

[Mga Nota]

Madumduman Mo Bala?

• Ano ang sadsaran sang paghukom sa mga tawo sa Milenyo?

• Ngaa ang pila may “pagkabanhaw nga sa kabuhi” kag ang iban may “pagkabanhaw nga sa paghukom”?

• Paano makalugpay sa aton karon ang paglaum nga pagkabanhaw?

• Paano makabulig sa aton ang mga pulong sa Salmo 145:16 sa pag-atubang sa wala masabat nga mga pamangkot tuhoy sa pagkabanhaw?

[Mga Pamangkot sa Pagtinuon]

[Mga retrato sa pahina 21]

Paano makabulig sa aton karon ang pagpati sa pagkabanhaw?