Isa ka Trahedya ang Hinali nga Natabo

SI Owen, nga duha ka tuig kag tunga ang edad, nagahampang sa banyo sang ila puluy-an. Nagsaka sia sa kabinet sang mga bulong nga pagdumdom sang iya mga ginikanan, indi gid niya malab-ot. Naganyat sia sa isa ka botelya sa kabinet. Ginbuksan niya kag gin-inom ang unod sini. Natabo ang trahedya.

Asido gali ang unod sang botelya, kag sing makapasubo, napatay si Owen. Nagkalisod gid ang iya mga ginikanan. Ang iya amay, si Percy, nangayo sing lugpay sa ila simbahan. “Ngaa natabo ini?” pamangkot niya. Nagsabat ang klero, “Luyag sang Dios ang isa pa ka bata nga anghel sa langit.” Nagapangalisod gid, para sa namatyan nga ginikanan indi ini makatarunganon. Gintuyo gid bala sang Dios nga mahanabo ini nga trahedya? Sa daku nga kabang-awan, nagdesisyon si Percy nga indi na makig-upod sa ila simbahan.

Samtang ginahunahuna ang natabo, nagpalibog si Percy: ‘Nagaantos bala gihapon ang akon bata? Makita ko pa bala sia liwat?’

Mahimo nga nagapalibog ka man kon ano ang nagakahanabo sa kamatayon kag kon bala posible nga makapakig-upod liwat sa napatay nga mga hinigugma sa palaabuton. Ginasabat sang Pulong sang Dios, ang Biblia, ini nga mga pamangkot. Mabasa sa Biblia ang maathag kag makapaumpaw nga mga sabat para sa tanan nga nakaeksperiensia sing kaanggid nga mga trahedya. Kapin pa sa sina, ginapaathag sini ang makalilipay nga paglaum nga ginsaad sang Dios​​—⁠⁠ang pagkabanhaw.

Basaha palihug ang masunod nga artikulo agod mahibaluan ang dugang pa tuhoy sining makalilipay nga paglaum.