Kaisog sa Atubangan sang Pagpamatok

GINPILIT sang isa ka panatiko nga guban sanday Gayo kag Aristarco, ang duha ka kaupdanan ni apostol Pablo, nga magsulod sa teatro sang Efeso. Didto, ang akig nga guban nagsinggit sa sulod sing duha ka oras: “Daku si Artemis sang mga taga-Efeso!” (Binuhatan 19:​28, 29, 34) Nagpabilin bala nga malig-on ang duha ka kaupdanan ni Pablo sa atubangan sang pagpamatok? Kag ngaa akig gid ang mga tawo?

Madinalag-on nga nagbantala si Pablo sa siudad sang Efeso sa sulod sang mga tatlo ka tuig. Subong resulta, madamo sa mga taga-Efeso ang wala na nagsimba sa mga idolo. (Binuhatan 19:26; 20:31) Ang kinaandan nga idolo sa Efeso amo ang magamay nga pilak nga templo ni Artemis, ang diosa sang pertilidad, nga ang iya daku nga templo kitaon gid sa siudad. Ining magamay nga mga representasyon sang templo ginasuksok subong anting-anting ukon ginadispley sa mga balay. Siempre, ang mga Cristiano wala nagabakal sining mga idolo.​​—⁠1 Juan 5:⁠21.

Si Demetrio nga isa sa mga platero, nagapati nga ang ministeryo ni Pablo upang gid sa ila mabakal nga negosyo. Paagi sa mga pinamulong nga indi bug-os nga matuod kag mga pagpasobra, ginkumbinsi niya ang iya masigkaplatero nga ang mga tawo sa bug-os nga Asia Minor indi na magsimba kay Artemis. Sang ang akig nga mga platero nagsugod sa pagsinggit sing pagdayaw kay Artemis, nag-utwas ang kinagubot kag napuno sing kinagumon ang bug-os nga siudad.​​—⁠Binuhatan 19:24-​29.

Linibo ka tawo ang nagtipon sa teatro, nga sarang makapapungko sing 25,000 ka tawo. Luyag ni Pablo magpamulong sa akig nga guban, apang ginkumbinsi sia sang mainabyanon nga mga opisyal nga indi na lang. Sang ulihi, napakalma sang mataas nga opisyal sa siudad ang kadam-an, sa amo nakapalagyo sanday Gayo kag Aristarco nga wala maano.​​—⁠Binuhatan 19:35-​41.

Sa karon, ang katawhan sang Dios mahimo man makaatubang sing mga pagpamatok kag sing kinagubot pa gani sa ila ministeryo. Masami nagabantala sila sing maayong balita sa mga siudad nga lapnag ang idolatriya, imoralidad, kag pagkadelingkwente. Walay sapayan, maisugon nila nga ginailog si apostol Pablo, nga wala ‘magpugong sa pagtudlo sa dayag kag sa pamalaybalay’ sa siudad sang Efeso. (Binuhatan 20:20) Kag nagakalipay man sila kon makita nila nga “ang pulong ni Jehova padayon nga nagatubo kag nagalandas.”​—⁠Binuhatan 19:20.

[Retrato sa pahina 30]

Kagulub-an sang teatro sa Efeso