Kon Paano Magamit sing Mapuslanon ang Kada Adlaw

“IPAKITA sa amon kon paano ang pag-isip sang amon mga adlaw agod nga makaagom kami sing tagipusuon nga may kaalam.” (Salmo 90:12) Amo ini ang mapainubuson nga pangamuyo sang manunulat sang Biblia nga si Moises. Ano gid bala ang ginapangabay niya? Dapat man bala kita maghimo sing kaanggid nga matinahuron nga pangabay?

Sa bersikulo 10, nagpanalabiton si Moises sa kalip-ot sang kabuhi sang tawo. Sa isa pa ka bes, ginsulat niya ang ginsiling ni Job: “Ang tawo, nga natawo sa babayi, malip-ot sing kabuhi kag puno sing kagamo.” (Job 14:1) Maathag nga nahibaluan gid ni Moises ang kalip-ot sang kabuhi sang di-himpit nga tawo kag nasubuan gid sia sa sini. Busa, ginkabig niya ang kada adlaw sang iya kabuhi subong isa ka hamili nga regalo. Sa pagpangamuyo sa Dios, ginpabutyag ni Moises ang iya handum nga magkabuhi sing maalamon sa nabilin niya nga mga inadlaw, sa paagi nga mapahamut-an niya ang iya Manunuga. Indi bala nga dapat man naton gamiton ang kada adlaw sang aton kabuhi sing mapuslanon? Amo sina ang aton hanuot nga determinasyon kon luyag naton nga kahamut-an kita sang Dios karon.

May isa pa ka butang nga nagpahulag kanday Moises kag Job, butang nga dapat man magpahulag sa aton. Lunsay nagapaabot ining diosnon nga mga tawo sang palaabuton nga padya​—⁠kabuhi sa duta sa mas maayo nga mga kahimtangan. (Job 14:​14, 15; Hebreo 11:26) Sa sina nga tion, indi na mapadulog sang kamatayon ang maayong mga binuhatan sang isa. Gintuyo sang aton Manunuga nga ang mga matutom magakabuhi sing dayon sa isa ka paraiso nga duta. (Isaias 65:21-​24; Bugna 21:​3, 4) Amo man ini ang palaabuton mo kon ‘ginaisip mo ang imo mga adlaw sa paagi nga makaagom ka sing tagipusuon nga may kaalam.’