Madinalag-on sa Pinasahi nga Paagi

GINPAMATUKAN na bala ang imo pagtuo—⁠ayhan sa ulubrahan, sa eskwelahan, sa pamilya, ukon bangod sa pagdumili sang gobierno? Nian, indi ka dapat maluyahan sing buot. Madamo nga Saksi ni Jehova ang nakaagi man sing amo nga mga pagtilaw, apang nagmadinalag-on sila. Binagbinaga ang halimbawa ni Erna Ludolph.

Si Erna natawo sa Lübeck, Alemanya, sang 1908. Sia lamang ang nag-alagad kay Jehova sa ila pamilya. Sang naggahom si Hitler sang 1933, nangin mabudlay ang pagkabuhi sang mga Saksi ni Jehova. Dayag nga ginmulay si Erna sang iya mga katrabaho bangod sang iya pagpangindi nga magsaludo kay Hitler, kag nagdul-ong ini sa pagdakop sa iya sang mga Nazi. Ginbilanggo sia sing walo ka tuig sa nanuhaytuhay nga mga bilangguan kag sa mga kampo konsentrasyon sa Hamburg-Fuhlsbüttel, Moringen, Lichtenburg, kag Ravensbrück. Sang yara si Erna sa Ravensbrück, may natabo nga nagdul-ong sa ulihi sa iya kadalag-an.

Isa ka Pinasahi nga Timbang sa Balay

Si Propesor Friedrich Holtz kag ang iya asawa nga si Alice nagaistar sa Berlin. Indi sila katapo sang partido sang Nazi kag wala sila nagasuportar sa mga ideolohiya sini. Apang, paryente sila sang isa ka mataas sing ranggo nga opisyal sang SS nga nagadumala sa pila ka bilanggo sa kampo konsentrasyon. Amo nga sang nangita sing timbang ang propesor kag ang iya asawa, ginpapili sila sining opisyal sang SS sing isa ka babayi nga bilanggo. Busa, sang Marso 1943, nagkadto si Alice sa Ravensbrück agod magpili sing timbang. Sin-o ang iya napilian? Si Erna Ludolph. Nag-istar si Erna upod sa pamilya Holtz, nga nagtratar sa iya sing maayo. Pagkatapos sang inaway, nagsaylo sia upod sa amo gihapon nga pamilya sa Halle sa ubay sang suba sang Saale. Didto, ginpamatukan liwat si Erna, sini nga tion sang Sosyalista nga mga awtoridad sa Sidlangan nga Alemanya. Sang 1957 ang pamilya gintapok sa Katundan nga Alemanya, kag nag-upod si Erna sa ila. Sa katapusan hilway na si Erna sa pagpahayag sang iya pagtuo.

Paano nangin madinalag-on si Erna sa pinasahi nga paagi? Bangod sang maayo nga paggawi kag malantipon nga pagbantala sang mensahe sang Biblia ni Erna, si Alice Holtz kag ang iya lima ka kabataan nangin bawtismado nga mga Saksi ni Jehova. Dugang pa, 11 ka mga apo ni Alice ang nangin mga Saksi man. Duha ang nagaalagad karon sa sanga talatapan sang mga Saksi ni Jehova sa Selters, Alemanya. “Madamo sa amon pamilya ang yara sa kamatuoran bangod sang halimbawa ni Erna,” siling ni Susanne, isa sa mga anak nga babayi ni Alice. Ginpadyaan gid sing bugana ang pagbatas ni Erna. Kamusta naman ang imo kahimtangan? Ang imo matutom nga pagbatas sa mabudlay nga mga kahimtangan mahimo man makaangkon sing makapaladya nga mga resulta. Huo, ang maayong paggawi kag ang malantipon nga pagbantala makabulig sa imo nga mangin madinalag-on sa pinasahi nga paagi. *

[Nota]

[Retrato sa pahina 31]

Si Erna Ludolph (nagapungko) upod sa pamilya Holtz