Mga Pamangkot Gikan sa mga Bumalasa

Ngaa nagsulat si Pablo tuhoy sa Cristiano nga asawa: “Maamligan sia paagi sa pagpanganak”?—1 Timoteo 2:15.

Ano ang ginapakita sang konteksto sini nga bersikulo sa kon ano ang buot silingon ni Pablo? Sa pag-inspirar sang balaan nga espiritu, naglaygay sia tuhoy sa katungdanan sang Cristianong babayi sa kongregasyon. Nagsulat sia: “Luyag ko nga ang mga babayi magpamuni sing panapton nga nagakaigo, nga may kaugdang kag kaligdong, indi nga may sinalapid nga buhok kag bulawan ukon mga perlas ukon malahalon nga mga panapton, kundi sa paagi nga nagakabagay sa mga babayi nga matinahaon sa Dios, kon sayuron, paagi sa maayong mga buhat.” (1 Timoteo 2:​9, 10) Ginlaygayan ni Pablo ang iya Cristianong mga utod nga babayi nga mangin maugdang, mangin balanse sa pagpili sing personal nga pagpamuni, kag “magpamuni” sing maayong mga buhat.

Pagkatapos sini, ginpaathag ni Pablo ang kahimusan sang pagkaulo sa kongregasyon, nga nagasiling: “Wala ako nagatugot sa babayi nga magpanudlo, ukon magpakita sing awtoridad sa lalaki, kundi maghipos.” (1 Timoteo 2:12; 1 Corinto 11:3) Ginpaathag niya ang basihan sini nga kahimusan paagi sa pagpakita nga samtang si Adan wala ginlimbungan ni Satanas, si Eva “ginlimbungan kag naglapas.” Paano maamligan ang isa ka Cristianong asawa batok sa sala ni Eva? Si Pablo nagsabat: “Apang, maamligan sia paagi sa pagpanganak, kon magpabilin sila sa pagtuo kag paghigugma kag pagkabalaan upod ang maligdong nga hunahuna.” (1 Timoteo 2:​14, 15) Ano ang buot silingon ni Pablo sa sining mga pulong?

Daw ginapahangop sang pila ka manugbadbad nga ang kaluwasan sang babayi nasandig sa iya pagpanganak. Halimbawa, ang PBS nga Biblia nagasiling: “Ang babayi maluwas paagi sa pagpanganak.” Apang, indi ini husto nga pagpatpat sa ginsiling ni Pablo. Ginapakita sang madamong kasulatan nga agod maluwas, dapat makilala sang isa ka tawo si Jehova, dapat sia magtuo kay Jesus, kag dapat niya ipakita ini nga pagtuo paagi sa mga buhat. (Juan 17:⁠3; Binuhatan 16:​30, 31; Roma 10:10; Santiago 2:26) Dugang pa, indi buot silingon ni Pablo nga ang nagatuo nga mga babayi ginagarantiyahan sing pagpanganak nga hilway gid sa katalagman. Madinalag-on nga nakapanganak ang mga babayi, mga tumuluo man sila ukon indi. Kag makapasubo nga ang iban napatay sa pagpanganak, mga tumuluo man sila ukon indi.​​—⁠Genesis 35:16-18.

Ang dugang pa nga laygay ni Pablo sang ulihi tuhoy sa mga babayi sa sini man nga sulat nagabulig sa aton nga mahangpan ang buot niya silingon. Ginpaandaman niya ang pila ka bataon nga balong babayi nga “wala sing ginahimo, nagapamalaybalay; huo, indi lamang nga wala sing ginahimo, kundi mga palakutsokutso man kag mga mahilabtanon sa ginahimo sang iban nga mga tawo, nagahambal sing mga butang nga indi dapat.” Ano ang laygay ni Pablo? Nagsiling pa sia: “Gani buot ko nga ang bataon nga mga balo magpamana, mag-anak, magdumala sang ila mga panimalay, indi maghatag sing kahigayunan sa kasumpong sa pagpasipala sa aton.”​—⁠1 Timoteo 5:​13, 14.

Ginapatalupangod ni Pablo ang mapuslanon nga katungdanan sang babayi sa pamilya nga kahimusan. Bangod masako sa mga hilikuton subong sang ‘pagpanganak kag pagdumala sa panimalay,’ ang isa ka babayi nga nagapadayon “sa pagtuo kag paghigugma kag pagkabalaan upod ang maligdong nga hunahuna” indi mahuyog sa paggawi nga indi makapalig-on. Ang iya espirituwalidad pagatipigan, ukon ‘pagaamligan.’ (1 Timoteo 2:15) Ang paghimo sini magabulig sa madamong lamharon nga mga babayi nga malikawan ang mga siod ni Satanas.

Ang ginsiling ni Pablo kay Timoteo nagapahanumdom sa aton tanan, mga lalaki kag mga babayi, nga mangin masako sa mapuslanon nga paagi. Ang Pulong sang Dios nagalaygay sa tanan nga Cristiano: “Magpadayon kamo sa pagbantay sing maayo nga ang inyo paglakat indi subong sang di-maalam kundi subong sang mga tawo nga maalamon.”​—⁠Efeso 5:15.