Kon Paano Matun-an ang mga Dalanon ni Jehova

“Pahibalua ako . . . sang imo mga dalanon, agod makilala ko ikaw.”​—⁠EXODO 33:13.

1, 2. (a) Ano ang ginhimo ni Moises sang makita niya nga ginapintasan sang isa ka Egiptohanon ang isa ka Hebreo, kag ngaa? (b) Agod mangin nagakaigo sa pag-alagad kay Jehova, ano ang dapat matun-an ni Moises?

GINPADAKU si Moises sa panimalay ni Paraon kag gintudluan sing kaalam nga ginapakabahandi sang panimalay sang hari sa Egipto. Apang, nahibaluan ni Moises nga indi sia Egiptohanon. Ang iya mga ginikanan mga Hebreo. Sang 40 anyos sia, naglakat sia agod tan-awon ang kahimtangan sang iya mga utod, ang mga anak sang Israel. Sang makita niya nga ginapintasan sang isa ka Egiptohanon ang isa sa mga Hebreo, wala magpabaya si Moises. Ginpatay niya ang Egiptohanon. Nagdampig si Moises sa katawhan ni Jehova kag naghunahuna nga ginagamit sia sang Dios agod hilwayon ang iya mga utod. (Binuhatan 7:21-25; Hebreo 11:​24, 25) Sang maburuka ang hitabo, gintamod si Moises sang palasyo sang Egipto subong rebelde, amo nga nalagyo sia agod amligan ang iya kabuhi. (Exodo 2:11-15) Dapat matun-an ni Moises ang mga dalanon ni Jehova agod magamit sia sang Dios. Handa bala si Moises nga matudluan?​—⁠Salmo 25:9.

² Sang nagsunod nga 40 ka tuig, nagkabuhi si Moises subong isa ka tinapok kag manugbantay sang mga karnero. Sa baylo nga maghinakit bangod daw wala sia gin-apresyar sang iya Hebreo nga mga utod, naghulat sia sa Dios. Bisan pa nagligad ang madamong tinuig nga wala sia ginkilala, nagpadihon si Moises kay Jehova. Indi subong personal nga opinyon sa iya kaugalingon, kundi sa idalom sang impluwensia sang balaan nga espiritu sang Dios, nagsulat sia sang ulihi: “Ang lalaki nga si Moises amo ang labing mahagop sa tanan nga tawo nga yara sa kadaygan sang duta.” (Numeros 12:3) Gingamit ni Jehova si Moises sa talalupangdon nga mga paagi. Pakamaayuhon man kita ni Jehova kon magpakita kita sing pagkahagop.​—⁠Sofonias 2:3.

Ginhatagan si Moises sing Misyon

3, 4. (a) Ano ang ginpahimo ni Jehova kay Moises? (b) Ano nga bulig ang ginhatag kay Moises?

³ Isa ka adlaw ang anghel nga nagatiglawas kay Jehova nakighambal kay Moises malapit sa Bukid Horeb sa Sinai Peninsula. Ginsugiran si Moises: “Sing walay duhaduha nakita ko ang kapipit-an sang akon katawhan nga yara sa Egipto, kag nabatian ko ang ila pagtuaw bangod sa ila nga nagapilit sa ila sa pagpangabudlay; kay nahibaluan ko gid ang kasakit nga ila ginaantos. Kag manaug ako agod luwason sila gikan sa kamot sang mga Egiptohanon kag agod paguaon sila gikan sa sina nga duta padulong sa isa ka duta nga maayo kag malapad, sa duta nga nagailig ang gatas kag dugos.” (Exodo 3:​2, 7, 8) Sa sining bahin, may ipahimo ang Dios kay Moises, apang dapat ini himuon suno sa paagi ni Jehova.

⁴ Nagpadayon ang anghel ni Jehova: “Karon kari ka kag ipadala ko ikaw kay Paraon, kag paguaon mo sa Egipto ang akon katawhan nga mga anak sang Israel.” Nagpangalag-ag si Moises. Sa banta niya indi sia kalipikado, kag kon sa iya lang, wala sia sing ikasarang. Apang, ginpasalig ni Jehova si Moises: “Magaupod ako sa imo.” (Exodo 3:10-12) Ginhatagan ni Jehova si Moises sing gahom sa paghimo sing milagruso nga mga tanda nga magapamatuod nga ginpadala gid sia sang Dios. Ang utod ni Moises nga si Aaron magaupod sa iya subong humalambal niya. Itudlo sa ila ni Jehova kon ano ang isiling kag himuon. (Exodo 4:1-17) Matutom bala nga tumanon ni Moises ina nga hilikuton?

5. Ngaa nangin problema ni Moises ang panimuot sang Israel?

⁵ Ang gulang nga mga lalaki sang Israel nagpati sang primero kay Moises kag kay Aaron. (Exodo 4:29-31) Apang, wala magdugay, ang “mga manugdumala sang mga anak sang Israel” nagbasol  kay Moises kag sa iya utod kay bangod sa ila nangin ‘mabaho’ sila sa atubangan ni Paraon kag sa iya mga alagad. (Exodo 5:19-21; 6:9) Sang makagua na sa Egipto ang mga Israelinhon, hinadlukan sila sang makita nila ang nagalagas nga mga kangga sang mga Egiptohanon. Napikuta ang mga Israelinhon bangod sa atubangan nila amo ang Dagat nga Mapula kag sa likod nila amo ang mga kangga sa inaway, gani ginbasol nila si Moises. Ano ang himuon mo kon didto ka? Bisan pa wala sing mga sakayan ang mga Israelinhon, sa sugo ni Jehova ginpahanda ni Moises ang katawhan. Pagkatapos, ginpahawa sang Dios ang Dagat nga Mapula, kag ang dagat nangin mamala nga duta agod makatabok ang Israel.​—⁠Exodo 14:1-22.

Hulusayon nga Mas Importante Pa sa Kahilwayan

6. Ano ang ginpadaku ni Jehova sang ginpadala niya si Moises?

⁶ Sang ginpadala ni Jehova si Moises, ginpadaku niya ang importansia sang iya balaan nga ngalan. Importante nga tahuron ina nga ngalan kag ang Isa nga ginatiglawas sina. Sang mamangkot si Moises sang iya ngalan, si Jehova nagsiling: “Ako mangin amo kon ano ako mangin amo.” Dugang pa, dapat sugiran ni Moises ang mga anak sang Israel: “Si Jehova nga Dios sang inyo mga katigulangan, ang Dios ni Abraham, ang Dios ni Isaac kag ang Dios ni Jacob, nagpadala sa akon sa inyo.” Nagdugang si Jehova: “Amo ini ang akon ngalan tubtob sa tion nga walay latid, kag amo ini ang akon handumanan sa lainlain nga mga kaliwatan.” (Exodo 3:13-15) Si Jehova gihapon ang ngalan sang Dios nga kilala sang iya mga alagad sa bug-os nga duta.​—⁠Isaias 12:​4, 5; 43:10-12.

7. Ano ang ginpahimo sang Dios kay Moises walay sapayan sang pagkaarogante ni Paraon?

⁷ Sa atubangan ni Paraon, ginpahayag ni Moises kag ni Aaron ang ila mensahe sa ngalan ni Jehova. Apang arogante nga nagsiling si Paraon: “Sin-o si Jehova, nga tumanon ko sia kag palakton ang Israel? Wala gid ako makakilala kay Jehova, kag, labot pa, indi ko pagpalakton ang Israel.” (Exodo 5:​1, 2) Nangin matig-a sing tagipusuon kag madaya si Paraon, apang ginpalig-on ni Jehova si Moises nga ipahayag sa iya ang mensahe sing liwat kag liwat. (Exodo 7:14-16, 20-23; 8:​1, 2, 20) Nahibaluan ni Moises nga naugot na si Paraon. May pulos pa bala nga makig-atubang sia liwat kay Paraon? Nalangkag na ang mga Israelinhon nga hilwayon sila. Apang, matig-a nga nagapangindi si Paraon. Ano ang himuon mo kon ikaw si Moises?

8. Ano nga kaayuhan ang nangin resulta sang kon paano gin-atubang ni Jehova ang kahimtangan nga nagadalahig kay Paraon, kag paano ang mga natabo sadto dapat mag-apektar sa aton?

⁸ Ginpahayag ni Moises ang isa pa ka mensahe, nga nagasiling: “Amo ini ang ginsiling ni Jehova nga Dios sang mga Hebreo: ‘Palakta ang akon katawhan agod nga alagdon nila ako.’” Nagsiling man ang Dios: “Kay karon nauntay ko na kuntani ang akon kamot agod pestihon ikaw kag ang imo katawhan kag mawala ka sa duta. Apang, ang matuod, bangod sini gintipigan ko ikaw nga buhi, agod ipakita sa imo ang akon gahom kag agod mapahayag ang akon ngalan sa bug-os nga duta.” (Exodo 9:13-16) Paagi sa paghukom batok sa matig-a sing tagipusuon nga si Paraon, katuyuan ni Jehova nga ipakita ang iya gahom sa isa ka paagi nga magapaandam sa tanan nga nagapamatok sa iya. Lakip sa sini amo si Satanas nga Yawa, ang isa nga gintawag sang ulihi ni Jesucristo nga “manuggahom sang kalibutan.” (Juan 14:30; Roma 9:17-24) Subong sang gintagna, ang ngalan ni Jehova ginbantala sa bug-os nga duta. Bangod sang iya pagkamainantuson, naluwas ang mga Israelinhon  kag ang isa ka daku nga nagasalakot nga kadam-an nga nagbuylog sa ila pagsimba sa iya. (Exodo 9:​20, 21; 12:​37, 38) Sugod sadto, ang pagbantala sang ngalan ni Jehova naghatag sing kaayuhan sa minilyon pa nga nagbaton sang matuod nga pagsimba.

Pagpakig-angot sa Mabudlay Pakig-angutan nga Katawhan

9. Paano ang mga kasimanwa ni Moises wala magpakita sing pagtahod kay Jehova?

⁹ Nahibaluan sang mga Hebreo ang ngalan sang Dios. Gingamit ni Moises ina nga ngalan sang nakighambal sia sa ila, apang kon kaisa wala sila nagapakita sing nagakaigo nga pagtahod sa Isa nga tag-iya sina nga ngalan. Wala madugay pagkatapos sang milagruso nga paghilway ni Jehova sa mga Israelinhon gikan sa Egipto, ano ang natabo sang wala sila dayon makakita sing matinlo nga tubig nga ilimnon? Nagkumodkumod sila batok kay Moises. Pagkatapos, ginreklamo nila ang pagkaon. Ginpaandaman sila ni Moises nga ang ila pagkumod indi lamang batok sa iya kag kay Aaron kundi batok man kay Jehova. (Exodo 15:22-24; 16:2-12) Sa Bukid Sinai, ginhatag ni Jehova sa mga Israelinhon ang Kasuguan, kag gin-updan ini sing labaw sa kinaugali nga mga pasundayag. Apang, ang katawhan rebelyuso nga naghimo sing bulawan nga tinday nga baka agod simbahon kag nagsiling nga nagahiwat sila sing ‘piesta para kay Jehova.’​—⁠Exodo 32:1-9.

10. Ngaa interesado gid ang Cristianong mga manugtatap karon sa pangabay ni Moises nga nasulat sa Exodo 33:13?

¹⁰ Paano dapat pakig-angutan ni Moises ang katawhan nga ginlaragway ni Jehova mismo nga tingkuyan? Nagpangabay si Moises kay Jehova: “Karon, palihug, kon nakasapo ako sing kahamuot sa imo mga mata, pahibalua ako, palihug, sang imo mga dalanon, agod makilala ko ikaw, agod makasapo ako sing kahamuot sa imo mga mata.” (Exodo 33:13) Sa pag-atipan sa mga Saksi ni Jehova karon, mas mapainubuson nga panong ang ginabantayan sang Cristianong mga manugtatap. Apang, nagapangamuyo man sila: “Ipahibalo sa akon ang imo mga dalanon, O Jehova; tudlui ako sang imo mga banas.” (Salmo 25:4) Ang ihibalo sa mga dalanon ni Jehova nagabulig sa mga manugtatap agod maatubang nila ang mga kahimtangan sa isa ka paagi nga nagahisanto sa Pulong sang Dios kag sa iya personalidad.

Ang Ginapaabot ni Jehova sa Iya Katawhan

11. Ano nga mga panuytoy ang ginhatag ni Jehova kay Moises, kag ngaa interesado kita sa sini?

¹¹ Ginpahayag sa Bukid Sinai kon ano ang ginapaabot ni Jehova sa iya katawhan. Nakabaton si Moises sing duha ka tapitapi nga bato nga nasulatan sing Napulo ka Sugo. Pagdulhog niya gikan sa bukid, naakig gid sia sang makita niya ang mga Israelinhon nga nagasimba sa tinunaw nga tinday nga baka, amo kon ngaa ginpusdak niya kag nabuka ang mga tapitapi. Ginsulat liwat ni Jehova ang Napulo ka Sugo sa mga tapitapi nga bato nga ginbasbas ni Moises. (Exodo 32:19; 34:1) Ini nga mga sugo wala magbag-o sugod sang una nga ginhatag ini. Dapat ini sundon ni Moises. Maathag nga ginpakita sang Dios kay Moises kon ano Sia nga sahi sang persona, agod mahibaluan ni Moises kon paano sia dapat maggawi subong tiglawas ni Jehova. Ang mga Cristiano wala sa idalom sang Mosaikong Kasuguan, apang ang ginsiling ni Jehova kay Moises nagaunod sing madamong sadsaran nga mga prinsipio nga wala magbag-o kag naaplikar gihapon sa tanan nga nagasimba kay Jehova. (Roma 6:14; 13:8-10) Binagbinagon naton ang pila sini.

12. Ano ang dapat mangin epekto sa Israel sang pagkinahanglan ni Jehova sing eksklusibo nga debosyon?

¹² Maghatag kay Jehova sing eksklusibo nga debosyon. Nagapamati ang pungsod sang Israel sang nagsiling si Jehova nga nagakinahanglan sia sing eksklusibo nga debosyon. (Exodo 20:2-5) Madamo nga ebidensia ang nasaksihan sang mga Israelinhon nga si Jehova amo ang matuod nga Dios. (Deuteronomio 4:33-35) Maathag nga ginpahibalo ni Jehova nga walay sapayan sang ginahimo sang iban nga mga pungsod, indi niya pagtugutan ang bisan ano nga porma sang idolatriya ukon espiritismo sa tunga sang iya katawhan. Indi dapat mangin pormalidad lamang ang ila debosyon sa iya. Dapat nila tanan higugmaon si Jehova sing bug-os tagipusuon, bug-os kalag, kag bug-os kusog. (Deuteronomio 6:5 ,6) Nalakip sa sini ang ila panghambal, ang ila paggawi​—⁠sa pagkamatuod, ang tanan nga aspekto sang ila kabuhi. (Levitico 20:27; 24:​15, 16; 26:1) Maathag man nga ginpakita  ni Jesucristo nga nagakinahanglan si Jehova sing eksklusibo nga debosyon.​—⁠Marcos 12:28-30; Lucas 4:8.

13. Ngaa dapat gid tumanon sang Israel ang Dios, kag ano ang dapat magpahulag sa aton sa pagtuman sa iya? (Manugwali 12:13)

¹³ Tumanon gid ang mga sugo ni Jehova. Dapat pahanumdumon ang katawhan sang Israel nga sang nakigkatipan sila kay Jehova, nanumpa sila nga magatuman gid sila. Hilway sila sa ila personal nga kabuhi, apang tuhoy sa mga butang nga ginsugo sa ila ni Jehova, dapat gid sila magtuman. Pamatuod ini sang ila gugma sa Dios kag makabenepisyo sila kag ang ila mga anak bangod para sa ila kaayuhan ang tanan nga ginpatuman sa ila ni Jehova.​—⁠Exodo 19:5-8; Deuteronomio 5:27-33; 11:​22, 23.

14. Paano ginpadaku sang Dios sa Israel ang importansia sang pag-una sa espirituwal nga mga hilikuton?

¹⁴ Unahon ang espirituwal nga mga butang. Indi dapat pagtugutan sang pungsod sang Israel nga mauna pa ang pag-atipan sa pisikal nga mga kinahanglanon sangsa espirituwal nga mga hilikuton. Ang kabuhi sang mga Israelinhon indi dapat ihugod lamang sa mga butang nga ginahimud-usan nila sa adlaw-adlaw. Gintalana ni Jehova ang partikular nga tion kada semana subong sagrado, tion nga gamiton lamang para sa hilikuton may kaangtanan sa pagsimba sa matuod nga Dios. (Exodo 35:1-3; Numeros 15:32-36) Tagsa ka tuig, dugang pa nga tion ang gintalana para sa espesipiko nga balaan nga mga kombension. (Levitico 23:4-44) Magahatag ini sing mga kahigayunan agod hambalan ang gamhanan nga mga binuhatan ni Jehova, agod mapahanumdom sang iya mga dalanon, kag agod ipabutyag ang pasalamat sa tanan nga kaayo niya. Samtang ginapabutyag sang katawhan ang ila debosyon kay Jehova, magalambo ang ila diosnon nga kahadlok kag gugma kag mabuligan sila sa paglakat sa iya mga dalanon. (Deuteronomio 10:​12, 13) Ang maayo nga mga prinsipio sini nga mga instruksion nagahatag sing kaayuhan sa mga alagad ni Jehova karon.​—⁠Hebreo 10:​24, 25.

Pag-apresyar sa mga Kinaiya ni Jehova

15. (a) Ngaa mapuslanon nga apresyahon ni Moises ang mga kinaiya ni Jehova? (b) Ano nga mga pamangkot ang makabulig sa aton agod mapamalandungan naton ang tagsatagsa sang mga kinaiya ni Jehova?

¹⁵ Ang apresasyon sa mga kinaiya ni Jehova nakabulig man kay Moises sa pagpakig-angot sa katawhan. Ang Exodo 34:5-7 nagsiling nga naglabay ang Dios sa atubangan ni Moises kag nagsiling: “Si Jehova, si Jehova, isa ka Dios nga maluluy-on kag mainayuhon, mahinay sa pagpangakig kag bugana sa mahigugmaon nga kaayo kag sa kamatuoran, nagatipig sing mahigugmaon nga kaayo para sa linibo, nagapatawad sang kasaypanan kag kalapasan kag kasal-anan, apang indi gid sia magahatag sing pasaylo sa silot, nga nagasilot sa kasaypanan sang mga amay sa mga anak kag sa mga apo, sa ikatlo nga kaliwatan kag sa ikap-at nga kaliwatan.” Pamalandungi ini nga mga pulong. Pamangkuta ang imo kaugalingon: ‘Ano ang kahulugan sang tagsa ka kinaiya? Paano ini ginpakita ni Jehova? Paano mapakita sang Cristianong manugtatap ini nga kinaiya? Paano dapat maimpluwensiahan sang isa ka partikular nga kinaiya ang ginahimo sang tagsatagsa sa aton?’ Binagbinaga ang pila lamang ka halimbawa.

16. Paano naton mapalambo ang aton apresasyon sa kaluoy sang Dios, kag ngaa importante ini?

 ¹⁶ Si Jehova “isa ka Dios nga maluluy-on kag mainayuhon.” Kon may libro ka nga Insight on the Scriptures, ngaa indi mo basahon ang ginasiling sini sa idalom sang tig-ulo nga “Mercy”? Ukon mahimo ka magpanalawsaw sa sina nga topiko nga ginagamit ang Watch Tower Publications Index ukon ang programa sa kompyuter nga Watchtower Library (CD-ROM).⁠ * Gamita ang konkordansia sa pagpangita sang mga teksto nga nagapatuhoy sa kaluoy. Makita mo nga wala labot sa pagpamag-an sang silot kon kaisa, ang kaluoy ni Jehova nagalakip man sang mapinalanggaon nga kaawa. Nagapahulag ini sa Dios agod paumpawan ang iya katawhan. Subong pamatuod sini, ginhatag sang Dios ang pisikal kag espirituwal nga mga kinahanglanon sang mga Israelinhon sang nagapanglakaton sila padulong sa Ginsaad nga Duta. (Deuteronomio 1:30-33; 8:4) Si Jehova maluluy-on nga nagpatawad sang mga nakasala. Ginpakitaan niya sing kaluoy ang iya dumaan nga katawhan. Labi na nga dapat magmainawaon sa isa kag isa ang iya mga alagad karon!​—⁠Mateo 9:13; 18:21-35.

17. Paano ang aton pag-apresyar sa pagkamainayuhon ni Jehova nagasakdag sa matuod nga pagsimba?

¹⁷ Ang kaluoy ni Jehova ginaupdan sang pagkamainayuhon. Kon may diksionaryo ka, basaha kon ano ang ginasiling sini sa tinaga nga “gracious” ukon mainayuhon. Ipaanggid ini sa mga teksto nga nagalaragway kay Jehova subong mainayuhon. Ginapakita sang Biblia nga ang pagkamainayuhon ni Jehova nagalakip sang mahigugmaon nga kabalaka sa mga imol sa tunga sang iya katawhan. (Exodo 22:​26, 27) Sa bisan ano nga pungsod, mahimo masapwan sang mga dumuluong kag sang iban man nga may disbentaha ang ila kahimtangan. Sang gintudluan ni Jehova ang iya katawhan nga indi sila dapat magpakita sing pagpasulabi kag dapat sila magpakita sing kaayo sa sini nga mga tawo, ginpahanumdom sila ni Jehova nga nangin mga dumuluong man sila anay​—⁠sa Egipto. (Deuteronomio 24:17-22) Kamusta naman kita subong katawhan sang Dios karon? Ang aton pagkamainayuhon nagapahiusa sa aton kag nagaganyat man sa iban nga magsimba kay Jehova.​—⁠Binuhatan 10:​34, 35; Bugna 7:​9, 10.

18. Ano ang matun-an naton sa mga butang nga ginpalikawan ni Jehova sa Israel may kaangtanan sa mga dalanon sang katawhan sang iban nga mga pungsod?

¹⁸ Apang, ang kabalaka sa katawhan sang iban nga mga pungsod indi dapat maglabaw pa sa gugma sang Israel para kay Jehova kag sa iya talaksan sa moralidad. Busa, gintudluan ang mga Israelinhon nga indi nila dapat pagsundon ang mga dalanon kag relihioso nga mga kinabatasan kag imoral nga pagkabuhi sang mga pungsod sa palibot nila. (Exodo 34:11-16; Deuteronomio 7:1-4) Naaplikar man ini sa aton karon. Dapat kita mangin balaan nga katawhan, subong nga ang aton Dios, si Jehova, balaan.​—⁠1 Pedro 1:​15, 16.

19. Paano ang paghangop kon paano ginatamod ni Jehova ang pagpakasala makaamlig sa iya katawhan?

¹⁹ Agod mahangpan ni Moises ang mga dalanon  ni Jehova, maathag nga ginpakita Niya nga bisan pa wala sia nahamuot sa sala, mahinay sia sa pagpangakig. Ginahatagan niya ang katawhan sing tion nga tun-an ang iya mga ginapatuman kag tumanon ini. Ginapatawad ni Jehova ang nakasala nga nagahinulsol, apang wala niya ginapaiway ang silot nga nagakadapat sa mabug-at nga mga sala. Ginpaandaman niya si Moises nga ang himuon sang mga Israelinhon makahatag sing maayo ukon malain nga epekto sa ila palaabuton nga mga kaliwatan. Ang apresasyon sa mga dalanon ni Jehova makaamlig sa katawhan sang Dios agod indi nila pagbasulon ang Dios sa ila mga madangatan ukon maghinakop sila nga mahinay sia.

20. Ano ang makabulig sa aton agod makapakig-angot kita sing nagakaigo sa mga masigkatumuluo kag sa mga masumalang naton sa aton ministeryo? (Salmo 86:11)

²⁰ Kon luyag mo mapauswag ang imo ihibalo tuhoy kay Jehova kag sa iya mga dalanon, padayon nga magpanalawsaw kag magpamalandong kon nagabasa ka sing Biblia. Binagbinaga sing maayo ang makawiwili nga mga aspekto sang personalidad ni Jehova. Mapangamuyuon nga binagbinaga kon paano mo mailog ang Dios kag mapahisanto sing dugang pa ang imo kabuhi sa iya katuyuan. Makabulig ini sa imo agod malikawan ang mga tugalbong, makig-angot sing nagakaigo sa mga masigkatumuluo, kag buligan ang iban pa nga makilala kag higugmaon ang aton dalayawon nga Dios.

[Nota]

Ano ang Imo Natun-an?

• Ngaa importante kay Moises ang pagkahagop, kag ngaa importante man ini sa aton?

• Ano nga kaayuhan ang natigayon sang sulitsulit nga ginpahayag ang pulong ni Jehova kay Paraon?

• Ano ang pila ka talalupangdon nga mga prinsipio ang gintudlo kay Moises nga naaplikar man sa aton karon?

• Paano naton mapauswag ang aton paghangop sa mga kinaiya ni Jehova?

[Mga Pamangkot sa Pagtinuon]

[Retrato sa pahina 21]

Matutom nga ginpahayag ni Moises ang pulong ni Jehova kay Paraon

[Retrato sa pahina 23]

Ginpahibalo ni Jehova kay Moises kon ano ang iya mga ginapatuman

[Retrato sa pahina 24, 25]

Pamalandungi ang mga kinaiya ni Jehova