Madula Bala sang Tawo ang Kaimulon?

MINILYON ang nagdaku nga wala makaagi sang kaimulon. Wala gid nila maagihan nga magtulog nga gutom ukon matulugan nga nagakurog sa katugnaw. Apang, madamo gihapon sa sining mga indibiduwal ang nagakaluoy sa mga imol kag nagapanikasog sa pagbulig sa ila.

Apang, ang kaimulon nagapabilin nga mapait nga kamatuoran para sa mga tawo nga ginsalot sing inaway sibil, mga baha, mga tigpalamangag, kag iban pa nga palaligban. Nangin makahaladlok ini nga inagihan sang ultimo nga mga mangunguma sa Aprika. Napilitan ang pila sa pagbiya sang ila mga puluy-an kag magsaylo sa dalagku nga mga siudad ukon mangin mga refugee sa iban nga pungsod. Ang iban nga mga pumuluyo sa kaumhan nagsaylo sa mga siudad bangod abi nila mas magatin-ad ang ila pangabuhi.

Ang gutok nga mga siudad sa masami nangin pugad sang kaimulon. Kon may yara gid man, diutay lamang nga lugar ang puede matamnan. Sa masami mabudlay mangita sing trabaho. Bangod nadulaan sing paglaum, madamo ang nangin kriminal. Nagapangayo sing bulig ang mga pumuluyo sang siudad, apang ang tawhanon nga mga panguluhan indi gid makalubad sang nagalala nga problema sang kaimulon. Nagapatuhoy sa report sang Nasyones Unidas sang Nobiembre 2003, ang The Independent sang London nagsiling: “Nagadamo kag nagadamo pa gid ang ginagutom nga tawo sa kalibutan.” Ini nagdugang: “Sa bug-os nga kalibutan ginabulubanta nga mga 842 milyones ka tawo karon ang kulang sing masustansia nga pagkaon​​—⁠kag nagadamo pa gid ini, nga may nagadugang nga lima ka milyon ka gutom nga tawo sa kada tuig.”

Ang sanga talatapan sang mga Saksi ni Jehova sa Bagatnan nga Aprika makabaton kon kaisa sing mga sulat halin sa imol katama nga mga tawo. Halimbawa, isa ka tawo nga taga-Bloemfontein ang nagsulat: “Wala ako sing trabaho, kag kon may tsansa nagapangawat ako sa siudad. Kay kon indi, gutumon kami sa sulod sang pila ka adlaw​​—⁠wala labot sa sobra nga katugnaw. Wala gid sing maobrahan. Madamo ang nagalihuliho sa mga dalanon sa pagpangita sing trabaho kag sing bisan ano nga makaon. May pila gani ako ka kilala nga nagapangita sing pagkaon sa mga basurahan. Ang pila naghikog. Madamo ang pareho ko nga ginapung-awan kag nadulaan sing paglaum. Daw wala na gid sing paglaum. Ang Dios bala, nga nagtuga sa aton nga nagakinahanglan sing pagkaon kag panapton, wala makakita sini?”

May makapaumpaw nga mga sabat sa mga kabalaka sining tawo. Subong sang ipakita sa masunod nga artikulo, masapwan ini nga mga sabat sa Pulong sang Dios, ang Biblia.