Mga Pamangkot Gikan sa mga Bumalasa

Ngaa wala pagpatya sanday David kag Batseba tungod sa ila pagpakighilahi, apang napatay ang ila bag-ong bun-ag nga bata nga lalaki?

Ang Mosaikong Kasuguan nagsiling: “Kon ang isa ka lalaki masapwan nga nagahulid sa isa ka babayi nga ginapanag-iyahan sang isa ka tag-iya, nian sila nga duha dapat mapatay, ang lalaki nga naghulid sa babayi kag ang babayi. Sa amo pagakuhaon mo ang malaut gikan sa Israel.” (Deuteronomio 22:22) Kon gintugutan ni Jehova nga Dios nga uyatan sang tawhanon nga mga hukom sa idalom sang Kasuguan ang hudisyal nga kaso sang pagpakasala nanday David kag Batseba, ining mga makihilahion ginpatay kuntani. Sanglit indi mabasa sang tawhanon nga mga hukom ang tagipusuon, magapadapat sila sang paghukom pasad sa ginhimo sang mga nakasala subong ginpamatud-an sang mga ebidensia. Suno sa Kasuguan patyon ang nagapakighilahi. Indi awtorisado ang mga hukom sa Israel nga magpatawad sa sining sala.

Sa pihak nga bahin, mabasa sang matuod nga Dios ang tagipusuon kag mapatawad ang mga sala kon may basihan sia nga himuon ini. Sanglit ang kaso nagdalahig kay David, nga sa iya nakigkatipan si Jehova para sa Ginharian, naghimo Sia sing eksepsion kag gin-uyatan mismo ang kaso. (2 Samuel 7:12-16) “Ang Hukom sang bug-os nga duta” may kinamatarong sa paghimo sini.​—⁠Genesis 18:25.

Ano ang nakita ni Jehova samtang gin-usisa niya ang tagipusuon ni David? Ang superskripsion sa Salmo 51 nagasiling nga ining salmo nagapahayag sang mga balatyagon ni David “sang si Natan nga manalagna nagkadto sa iya sa tapos nga nakighulid sia kay Batseba.” Ang Salmo 51:1-4 nagasiling: “Kaluuyi ako, O Dios, suno sa imo mahigugmaon nga kaayo. Suno sa kabuganaan sang imo kaluoy panasa ang akon mga paglapas. Hugasi ako sing bug-os gikan sa akon kasaypanan, kag tinlui ako gikan sa akon sala. Kay nahibaluan ko ang akon mga paglapas, kag ang akon sala yara pirme sa akon atubangan. Batok sa imo, sa imo lamang, nakasala ako, kag nakahimo ako sing malain sa imo itululok.” Mahimo nga ginkabig ni Jehova ining tuman gid nga kasubo sa tagipusuon ni David subong pamatuod sang tunay nga paghinulsol kag namat-od nga may yara basihan sa pagpakita sing kaluoy sa mga nakasala. Dugang pa, si David mismo isa ka maluluy-on nga tawo, kag nagakaluoy si Jehova sa mga maluluy-on. (1 Samuel 24:4-7; Mateo 5:⁠7; Santiago 2:13) Busa, sang gin-ako ni David ang iya sala, si Natan nagsiling sa iya: “Si Jehova man nagsikway sang imo sala. Indi ka mapatay.”​—⁠2 Samuel 12:13.

Wala malikawan nanday David kag Batseba ang tanan nga resulta sang ila sala. “Bangod nga wala ka magtahod kay Jehova sa sini nga butang,” siling ni Natan kay David, “ang bata man, nga bag-o lang natawo sa imo, pat-od nga mapatay.” Nagbalatian ang ila bata kag napatay bisan pa nga pito ka adlaw nga nagpuasa kag naglalaw si David.​—⁠2 Samuel 12:14-18.

Ang iban nabudlayan sa paghangop kon ngaa dapat mapatay ang bata nga lalaki, kay ang Deuteronomio 24:16 nagasiling: “Ang mga anak indi pagpatyon tungod sa mga amay.” Apang dapat naton dumdumon nga kon gin-uyatan sang tawhanon nga mga hukom ang kaso, ang mga ginikanan subong man ang wala pa mabun-ag nga bata sa tiyan mapatay. Ang pagkapatay sang bata mahimo nagbulig man kay David nga marealisar nga wala gid nahamuot si Jehova sa iya sala upod kay Batseba. Makasalig kita nga ginhusay ni Jehova sing makatarunganon ang kaso, bangod “ang iya dalanon himpit.”​—⁠2 Samuel 22:31.

[Retrato sa pahina 31]

Nagpakita si David sing matuod nga paghinulsol