“Ang Bulig sa Akon Nagagikan Kay Jehova”

Mga Pamilya nga Ginpabakod sang Ihibalo sa Dios

“PADER sang Berlin.” Amo sini ang tawag sang taga-Argentina nga mag-asawa sa dingding nga ginbutang nila sa pagtunga sang ila balay! Indi gid sila maghangpanay; naugot sila sa isa kag isa.

Makapasubo nga ang kahimtangan sini nga mag-asawa indi pinasahi. Madamo nga pamilya ang ginasit-an sang pinuyas, pagluib, kag kaawayon. Makapasubo gid ini, kay ang pamilya isa ka institusyon nga gintukod sang Dios mismo. (Genesis 1:​27, 28; 2:​23, 24) Ini nga dulot gikan sa Dios isa ka nagakaigo nga duog agod ipakita ang tudok nga gugma. (Rut 1:9) Paagi sa pagtuman sa ila hatag-Dios nga mga katungdanan, mapadunggan sang mga katapo sang pamilya si Jehova kag mangin ginhalinan sila sang kalipay sa isa kag isa.⁠ *

Bangod ang Dios ang nagtukod sang pamilya nga kahimusan, dapat naton dihunon ang aton paghangop sa kon paano magpanghikot ang mga pamilya nahisanto sa iya pagtamod. Ang iya Pulong nagahatag sing madamong mapuslanon nga laygay agod buligan ang mga pamilya nga magmadinalag-on, ilabi na kon mag-utwas ang mga problema. Tuhoy sa katungdanan sang mga bana, ang Biblia nagasiling: “Ang mga bana dapat maghigugma sang ila mga asawa subong sang ila kaugalingon nga mga lawas.” Kon sundon ini sang bana, ang iya asawa malipay sa ‘pagtahod sa iya sing tudok.’​—⁠Efeso 5:25-29, 33.

Nahanungod sa kaangtanan sang mga ginikanan kag sang ila mga anak, si apostol Pablo nagsulat: “Mga amay, dili ninyo pagpaakiga ang inyo mga anak, kundi padayon sila nga padakua sa disiplina kag sa nagatadlong nga panghunahuna ni Jehova.” (Efeso 6:4) Ini naman nagapaluntad sing isa ka malipayon nga kahimtangan sa pamilya, diin mas mahapos para sa mga anak nga tumanon ang ila mga ginikanan.​—⁠Efeso 6:1.

Ang nasambit nga mga punto mga halimbawa sang maalamon nga laygay sang Biblia tuhoy sa pamilya. Paagi sa pagtuman sa diosnon nga mga prinsipio, madamo ang nagaagom sing kalipay sa pamilya. Binagbinaga ang halimbawa sang taga-Argentina nga mag-asawa nga ginsambit sa panugod. Pagkatapos sang tatlo ka bulan nga pagtuon sa Biblia upod sa mga Saksi ni Jehova, gin-aplikar nila ang maalamon nga laygay sini tuhoy sa pag-asawahay. Nagpanikasog sila nga pauswagon ang komunikasyon, nangin mahinuklugon sila sa mga kinahanglanon sang isa kag isa, kag nangin mapinatawaron. (Hulubaton 15:22; 1 Pedro 3:⁠7; 4:8) Natun-an nila nga punggan ang ila kaakig kag magpangayo sing bulig sa Dios kon daw indi na makontrol ang kahimtangan. (Colosas 3:19) Wala madugay, ang “Pader sang Berlin” ginkuha!

Mapabakod sang Dios ang Pamilya

Ang pagtuon kag pag-aplikar sa mga talaksan sang Dios makapabakod sa pamilya sa paglandas sa mga pag-ipit. Kinahanglanon gid ini, kay gintagna nga ang pamilya nga kahimusan salakayon sa panahon naton. Gintagna ni Pablo ang karon nga pagkalusod sang moralidad kag tawhanon nga katilingban. Nagsiling sia nga sa “katapusan nga mga adlaw,” makita ang pagkadimainunungon, pagkadula sang “kinaugali nga pagpalangga,” kag pagkadimatinumanon sa mga ginikanan, bisan sa tunga sadtong “may dagway sang diosnon nga debosyon.”​—⁠2 Timoteo 3:1-5.

 Ang pagtinguha nga pahamut-an ang Dios makabulig nga mabatuan ining malain nga mga epekto sa pamilya. Nakita sang madamo nga pamilya nga kinahanglan nila ang solusyon gikan sa Dios agod maatubang nila sing madinalag-on ang madamo nga hangkat. Kon luyag sang mga katapo sang pamilya nga mahuptan ang maayo nga kaangtanan sa Dios, dapat nila, una sa tanan, iaplikar ang mga prinsipio sang Biblia kag batunon nga “luwas kon si Jehova ang magpatindog sang balay, nagapangabudlay sa wala sing pulos ang mga nagapatindog sini.” (Salmo 127:1) Agod mangin malipayon ang pamilya, dapat unahon ang Dios sa kabuhi sang pamilya.​—⁠Efeso 3:​14, 15.

Nasapwan sang taga-Hawaii nga si Dennis nga matuod gid ini. Bisan pa nagapangangkon sia nga Cristiano, kinaandan na sa iya ang pagpamuyayaw kag pagpakig-away. Pagkatapos mangin soldado, nangin mas palaaway kag madinumtanon sia. “Pirme anay ako nagapakig-away,” hinumdom niya. “Balewala sa akon kon ano man ang matabo sa akon, kag wala ako nahadlok mapatay. Padayon ako nga nagapamuyayaw kag nagapakig-away. Ginpalig-on ako sang akon asawa, nga isa sa mga Saksi ni Jehova, nga magtuon sa Biblia.”

Ginpamatukan ni Dennis ang mga paninguha sang iya asawa. Apang, naghumok sia bangod sang Cristiano nga paggawi sang iya asawa. Sang ulihi, nag-upod si Dennis sa iya asawa kag mga anak sa Cristianong miting. Pagkatapos sini, nagtuon si Dennis sa Biblia, kag nag-uswag. Gin-untatan niya ang iya 28-ka-tuig nga bisyo nga panigarilyo kag wala na makig-upod sa iya mga abyan nga nagahimo sang tanan nga butang nga ginatinguhaan niya nga untatan. Bilang pagpasalamat kay Jehova, si Dennis nagsiling: “Nag-uswag ang kahimtangan sang amon pamilya. Nagtambong kami sa mga miting kag nagpakigbahin sa ministeryo subong pamilya. Ang akon duha ka anak nga lalaki wala na mahadlok sa akon, kay natun-an ko na nga punggan ang akon kaakig kag wala na ako nagapamuyayaw. Makahambalanay na kami kag nalipay kami sa paghinun-anon sa Biblia. Kon wala ako magtuon sa Biblia, kuntani wala ako diri; madali gid ako maakig.”

Mangin malipayon ang mga pamilya kon manikasog gid sila nga himuon ang kabubut-on ni Jehova. Ginapakita sang eksperiensia nga bisan pa isa lang ka katapo sang pamilya ang nagaaplikar sang mga prinsipio sang Biblia, ang mga kahimtangan mas maayo sangsa kon wala gid sing isa nga nagaaplikar sini. Ang pagtukod sing isa ka Cristiano nga panimalay nagakinahanglan sing lakas nga pagpanikasog, kalantip, kag tion. Apang makasalig gid ang mga katapo sang amo sini nga mga pamilya nga padyaan ni Jehova ang ila mga panikasog. Mapalanog nila ang ginsiling sang salmista: “Ang bulig sa akon nagagikan kay Jehova.”​—⁠Salmo 121:2.

[Nota]

[Blurb sa pahina 9]

Sa Dios “utang sang tagsa ka pamilya sa langit kag sa duta ang iya ngalan.”​—⁠EFESO 3:15

[Kahon sa pahina 8]

GINAPAKABAHANDI NI JEHOVA ANG PAMILYA NGA KAHIMUSAN

“Ginpakamaayo sila sang Dios kag ang Dios nagsiling sa ila: ‘Magmabungahon kamo kag magbuad kag pun-a ninyo ang duta.’”—⁠Genesis 1:28.

“Malipayon ang tagsatagsa nga nagakahadlok kay Jehova . . . Ang imo asawa mangin subong sang mabungahon nga balagon sa nasulod gid nga mga bahin sang imo balay.”—⁠Salmo 128:​1, 3.