‘Punggi ang Imo Kaugalingon sa Idalom sang Kalautan’

“Ang ulipon sang Ginuo indi dapat makig-away, kundi dapat magmalulo sa tanan, . . . nagapugong sang iya kaugalingon sa idalom sang kalautan.”​—⁠2 TIMOTEO 2:24.

1. Kon nagapakigbahin sa Cristianong hilikuton, ngaa makasumalang kita kon kaisa sing mga tawo nga matigdas maghambal?

ANO ang reaksion mo kon makasumalang ka sing mga tawo nga naugot sa imo ukon sa ginarepresentar mo? Sa iya paglaragway sang katapusan nga mga adlaw, gintagna ni apostol Pablo nga ang mga tawo mangin “mapasipalahon, . . . mapatupatuon, wala sing pagpugong sa kaugalingon, mabangis.” (2 Timoteo 3:1-5, 12) Mahimo masumalang mo ini nga mga indibiduwal sa imo ministeryo ukon sa iban nga ginahimo mo.

2. Ano nga mga teksto ang makabulig sa aton sa pagpakig-angot sing maalamon sa mga tawo nga matigdas manghambal sa aton?

² Indi tanan nga matigdas maghambal wala gid sing interes sa kon ano ang husto. Ang tuman nga kabudlayan ukon kapaslawan mahimo nga ginabangdan sang pagsing-al sang mga tawo sa tanan nga masumalang nila. (Manugwali 7:7) Madamo ang subong sini bangod nagapuyo sila kag nagaobra sa isa ka palibot nga kinaandan na ang pag-insultuhanay. Indi buot silingon nga nagaugyon kita nga mga Cristiano sa sini nga panghambal, apang nagabulig ini sa aton sa paghangop kon ngaa amo sini ang iban nga mga tawo. Ano ang himuon naton sa matigdas nga panghambal? Ang Hulubaton 19:11 nagasiling: “Ang paghantop sang tawo nagapahinay gid sang iya kaakig.” Ang Roma 12:​17, 18 nagalaygay sa aton: “Dili magbalos sing malaut sa malaut kay bisan sin-o. . . . Kon mahimo, sa masarangan ninyo, magpakighidait sa tanan nga tawo.”

3. Paano nadalahig ang pagkamahidaiton sa mensahe nga aton ginabantala?

 ³ Kon mahidaiton gid kita, makita ini sa aton panimuot. Makita ini sa aton ginahambal kag ginahimo, subong man sa aton pangguyahon kag sa tono sang aton tingog. (Hulubaton 17:27) Sang ginpadala ni Jesus ang iya mga apostoles sa pagbantala, naglaygay sia sa ila: “Kon nagasulod kamo sa balay, tamyawa ninyo ang tagbalay [“magsiling kamo, ‘Ang paghidait sa inyo.’” Maayong Balita nga Biblia]; kag kon ang balay takus, ang inyo paghidait magdangat sa sini; apang kon indi ini takus, pabalika sa inyo ang inyo paghidait.” (Mateo 10:​12, 13) Ang mensahe naton isa ka maayong balita. Ginatawag ini sang Biblia “maayong balita sang paghidait,” “maayong balita tuhoy sa di-bagay nga kaayo sang Dios,” kag “maayong balita sang ginharian.” (Efeso 6:15; Binuhatan 20:24; Mateo 24:14) Ang aton tulumuron, indi ang pagmulay sa ginatuuhan sang isa ka tawo ukon makigbais sa iya tuhoy sa iya mga pagtamod, kundi ipaambit sa iya ang maayong balita gikan sa Pulong sang Dios.

4. Ano ang isiling mo kon singganan ka dayon “Indi ako interesado” antes mo masambit ang rason kon ngaa nakaduaw ka?

⁴ Mahimo nga wala gid nagapamati ang tagbalay kag magasiling lang dayon, “Indi ako interesado.” Sa masami, posible nga makasiling ka, “Luyag ko kuntani basahon sa imo ang isa ka malip-ot lang nga teksto gikan sa Biblia.” Mahimo nga indi sia mamatok sa sina. Kon kaisa, ayhan nagakaigo nga magsiling ka: “Luyag ko kuntani isugid sa imo ang tuhoy sa isa ka tion nga wala na sing inhustisya kag ang tanan nga tawo magatuon sa paghigugmaanay.” Kon ang tagbalay nagahipos lang kag daw indi interesado, mahimo idugang mo: “Apang mahimo nga masako ka subong.” Bisan pa indi mahidaiton ang isabat sang tagbalay, dapat bala kita maghinakop nga sia ‘indi takus’? Walay sapayan sang reaksion, dumduma ang laygay sang Biblia nga dapat kita ‘magmalulo sa tanan, nagapugong sang kaugalingon sa idalom sang kalautan.’​—⁠2 Timoteo 2:24.

Manugtampalas Apang Napatalang Lamang

5, 6. Paano nakig-angot si Saulo sa mga sumulunod ni Jesus, kag ngaa amo sia sadto?

⁵ Sang nahauna nga siglo, ang tawo nga si Saulo kilala nga walay katahuran maghambal, kag mapintas. Ang Biblia nagasiling nga sia ‘nagasilabo sa pagpahog kag pagpatay sa mga disipulo sang Ginuo.’ (Binuhatan 9:​1, 2) Ginbaton niya sang ulihi nga sia nangin “mapasipalahon  anay kag manughingabot kag isa ka tawo nga manugtampalas.” (1 Timoteo 1:13) Bisan pa nangin Cristiano na ang iban sang iya mga paryente, nagsiling sia tuhoy sa iya mismo panimuot sa mga sumulunod ni Cristo: “Bangod akig gid ako sa ila, ginhingabot ko pa sila bisan tubtob sa iban nga mga siudad.” (Binuhatan 23:16; 26:11; Roma 16:​7, 11) Wala sing ebidensia nga nakigdebate sa publiko kay Saulo ang mga disipulo samtang ginahimo niya ini.

⁶ Ngaa amo sadto si Saulo? Pila ka tuig sang ulihi, nagsulat sia: “Wala ako sing hinalung-ong kag nagpanghikot nga kulang sing pagtuo.” (1 Timoteo 1:13) Isa sia ka Fariseo, gintudluan “suno sa pagkaestrikto sang Kasuguan sang mga katigulangan.” (Binuhatan 22:3) Bisan pa ang manunudlo ni Saulo nga si Gamaliel daw bukas sing hunahuna, ang mataas nga saserdote nga si Caifas, nga nakaupod ni Saulo, isa ka panatiko. Si Caifas ang namuno sang buko nga nagdul-ong sa pagpatay kay Jesucristo. (Mateo 26:​3, 4, 63-66; Binuhatan 5:34-39) Pagkatapos sadto, ginsigurado ni Caifas nga bunalon sila, kag matigdas nga ginmanduan sila nga mag-untat sa pagbantala sa ngalan ni Jesus. Si Caifas ang nagdumala sa Sanhedrin sa isa ka kasaba nga napuno sing kaakig amo nga gindala pagua si Esteban agod batuhon. (Binuhatan 5:​27, 28, 40; 7:1-60) Nagatan-aw si Saulo samtang ginabato si Esteban, kag ginsugo sia ni Caifas nga himuon ang dugang pa nga mga panikasog agod punggan ang mga sumulunod ni Jesus paagi sa pagdakop sa ila sa Damasco. (Binuhatan 8:⁠1; 9:​1, 2) Sa idalom sini nga impluwensia ni Caifas, naghunahuna si Saulo nga ang iya ginahimo isa ka ebidensia sang kakugi para sa Dios, apang ang matuod, kulang sia sing matuod nga pagtuo. (Binuhatan 22:3-5) Amo kon ngaa, wala marealisar ni Saulo nga si Jesus amo ang matuod nga Mesias. Apang, namarasmasan si Saulo sang milagruso nga nakighambal sa iya ang ginbanhaw nga si Jesus samtang nagalakbay sia padulong sa Damasco.​—⁠Binuhatan 9:3-6.

7. Ano ang natabo kay Saulo pagkatapos sang pagmilagro ni Jesus sa iya sa dalanon padulong sa Damasco?

⁷ Wala madugay pagkatapos sini, ginpadala ang disipulo nga si Ananias agod magpanaksi kay Saulo. Kon ikaw ang sa lugar ni Ananias, luyag mo bala himuon ina? Nahangawa si Ananias, apang nakighambal sia kay Saulo sing mainayuhon. Nagbag-o na si Saulo pagkatapos sang pagmilagro ni Jesus sa iya sa dalanon padulong sa Damasco. (Binuhatan 9:10-22) Nakilala sia sang ulihi subong si apostol Pablo, isa ka makugi nga Cristianong misyonero.

Malulo Apang Maisugon

8. Paano ginpakita ni Jesus ang panimuot sang iya Amay sa mga tawo nga nakahimo sing malain?

⁸ Si Jesus isa ka makugi nga manugbantala sang Ginharian nga malulo apang maisugon sa pagpakig-angot sa mga tawo. (Mateo 11:29) Ginpakita niya ang panimuot sang iya langitnon nga Amay, nga nagpalig-on sa mga malauton nga magtalikod gikan sa ila malaut nga mga dalanon. (Isaias 55:​6, 7) Sa pagpakig-angot sa mga makasasala, matalupangdan ni Jesus kon may ebidensia sang pagbag-o, kag ginapalig-on niya ini nga mga indibiduwal. (Lucas 7:37-50; 19:2-10) Sa baylo nga hukman ang iban pasad sa ila nagua nga mga panagway, gin-ilog ni Jesus ang kaayo, pagpailob, kag pagkamainantuson sang iya Amay sa tuyo nga mapahulag sila sa paghinulsol. (Roma 2:4) Kabubut-on ni Jehova nga maghinulsol ang tanan nga sahi sang mga tawo kag maluwas.​—⁠1 Timoteo 2:​3, 4.

9. Ano ang matun-an naton gikan sa kon paano natuman kay Jesus ang Isaias 42:1-4?

⁹ Tuhoy sa panimuot ni Jehova kay Jesucristo, ginbalikwat sang manunulat sang Ebanghelyo nga si Mateo ining matagnaon nga mga pulong: “Yari karon! Ang akon alagad nga ginpili ko, ang akon hinigugma, nga nahamut-an sang akon kalag! Ibutang ko sa iya ang akon espiritu, kag kon ano ang katarungan himuon niya nga maathag sa mga pungsod. Indi sia makigbais, ukon magsinggit, kag wala sing bisan sin-o nga makabati sang iya tingog sa malapad nga mga dalan. Wala sing tabun-ak nga basag ang balion niya, kag wala sing lino nga pabilo nga nagairaw nga palungon niya, tubtob magpagua sia sing katarungan nga may kadalag-an. Sa pagkamatuod, sa iya ngalan magalaum ang mga pungsod.” (Mateo 12:17-21; Isaias 42:1-4) Nahisanto sa sining matagnaon nga mga pulong, wala mag-entra si Jesus sa magahod nga mga pagbaisay. Bisan sang ginaipit sia, ginpamulong niya ang kamatuoran sa isa ka paagi nga nagganyat sa mga bunayag sing tagipusuon.​—⁠Juan 7:​32, 40, 45, 46.

10, 11. (a) Bisan pa ang mga Fariseo isa sa dayag nga mga kasumpong ni Jesus, ngaa nagpanaksi sia sa pila sa ila? (b) Ano, kon kaisa, nga sahi sang mga sabat ang ginhatag ni Jesus sa mga kasumpong niya, apang ano ang wala niya ginhimo?

 ¹⁰ Sa tion sang iya ministeryo, nakighambal si Jesus sa madamo nga Fariseo. Bisan pa ang iban sa ila nagtinguha nga siuron sia sa iya panghambal, wala maghinakop si Jesus nga sila tanan may malain nga mga motibo. Mahimo luyag gid ni Simon, isa ka Fariseo nga palamulay, nga maatubang mismo si Jesus, amo nga gin-imbitar niya si Jesus nga magkaon upod sa iya. Ginbaton ni Jesus ang imbitasyon kag nagpanaksi sa mga tawo nga nagkadto didto. (Lucas 7:36-50) Sa lain naman nga okasyon, ang prominente nga Fariseo nga si Nicodemo patago nga nagkadto kay Jesus isa ka gab-i. Wala sia ginsaway ni Jesus kon ngaa nagpagab-i pa sia. Sa baylo, nagpanaksi sia kay Nicodemo tuhoy sa gugma nga ginpakita sang Dios paagi sa pagpadala sang iya Anak agod buksan ang dalan sang kaluwasan para sa mga magatuo sa iya. Mainayuhon man nga ginpakita ni Jesus ang pagkaimportante sang pagtuman sa kahimusan sang Dios. (Juan 3:1-21) Sa isa ka okasyon sang ulihi, gin-apinan ni Nicodemo si Jesus sang ginpakanubo sang iban nga mga Fariseo ang isa ka maayo nga report tuhoy kay Jesus.​—⁠Juan 7:46-51.

¹¹ Nahibaluan ni Jesus ang pagkasalimpapaw sang mga nagtinguha sa pagsiod sa iya. Wala sia magpadala sa mga kasumpong niya nga luyag sang walay pulos nga pagbaisay. Apang, kon nagakaigo gani, nagahatag sia sing malip-ot, apang mapuersa nga mga sabat paagi sa pagsambit sing isa ka prinsipio, nga nagagamit sing isa ka ilustrasyon, ukon nagabalikwat sing isa ka teksto. (Mateo 12:38-42; 15:1-9; 16:1-4) Kon kaisa, nagahipos lamang si Jesus kon maathag nga wala sing pulos kon magsabat pa sia.​—⁠Marcos 15:2-5; Lucas 22:67-70.

12. Bisan sang ginsinggitan si Jesus, paano niya ginbuligan ang mga tawo?

¹² May mga tion nga ginsinggitan si Jesus sang mga tawo nga kontrolado sang di-matinlo nga mga espiritu. Sang natabo ina, ginpunggan ni Jesus ang iya kaugalingon kag gingamit pa gani niya ang gahom nga ginhatag sa iya sang Dios agod maghatag sing paumpaw. (Marcos 1:23-28; 5:2-8, 15) Kon mangakig kag maninggit sa aton ang iban nga mga tawo sa tion sang aton ministeryo, dapat man naton punggan ang aton kaugalingon, kag dapat naton atubangon ini nga kahimtangan sa isa ka mainayuhon kag mataktikanhon nga paagi.​—⁠Colosas 4:6.

Sa Sulod sang Pamilya

13. Ngaa ginapamatukan kon kaisa sang mga tawo ang ila kapamilya nga nagasugod sa pagtuon sa Biblia upod sa mga Saksi ni Jehova?

¹³ Masami nga kinahanglan sang mga sumulunod ni Jesus ang pagpugong sa kaugalingon sa sulod sang pamilya. Luyag gid sang isa ka tawo nga natandog sang kamatuoran sang Biblia nga magbaton man ang iya pamilya. Apang subong sang ginsiling ni Jesus, mahimo nga mamatok ang mga kapamilya. (Mateo 10:32-37; Juan 15:​20, 21) May lainlain ini nga mga rason. Halimbawa, bisan pa ang panudlo sang Biblia makabulig sa aton nga mangin bunayag, responsable, kag matinahuron, ginatudlo man sang Kasulatan nga bisan ano man ang kahimtangan, una kita nga may salabton sa aton Manunuga. (Manugwali 12:1, 13; Binuhatan 5:29) Mahimo nga masaklaw ang isa ka katapo sang pamilya kon sa banta niya nabuhinan ang iya awtoridad sa sulod sang pamilya bangod sang aton katutom kay Jehova. Sa pag-atubang sini nga kahimtangan, importante gid nga ilugon naton ang halimbawa ni Jesus sa pagpugong sa kaugalingon!​—⁠1 Pedro 2:21-23; 3:​1, 2.

14-16. Paano nagbag-o ang iban nga nagapamatok anay sa ila mga kapamilya?

 ¹⁴ Madamo sang nagaalagad kay Jehova karon ang may tiayon ukon kapamilya nga nagpamatok anay sa mga pagbag-o nga ila ginhimo sang nagsugod sila sa pagtuon sa Biblia. Mahimo nga nakabati ang mga nagapamatok sing negatibo nga mga komento tuhoy sa mga Saksi ni Jehova, kag ayhan nahadlok sila nga basi mangin indi maayo nga impluwensia ini sa ila panimalay. Ngaa nagbag-o ang ila panimuot? Sa masami, daku ang nangin epekto sang maayo nga halimbawa. Bangod malig-on nga gin-aplikar sang tumuluo ang laygay sang Biblia​—⁠regular nga pagtambong sa Cristianong mga miting kag pagpakigbahin sa ministeryo samtang ginaatipan man ang mga salabton sa pamilya kag pagpakita sing pagpugong sa kaugalingon walay sapayan sang mga pagpakalain​—⁠ang pagpamatok sang pamilya nagahaganhagan kon kaisa.​—⁠1 Pedro 2:12.

¹⁵ Mahimo man nga nangindi mamati ang isa nga nagapamatok sa bisan ano nga paathag gikan sa Biblia bangod sang walay kabangdanan nga kaugot ukon bugal. Amo sini anay ang isa ka tawo nga taga-Estados Unidos nga nagsiling nga sia nasyonalistiko gid. Isa ka bes, sang nagtambong sa kombension ang iya asawa, namutos sia kag naglakat. Sang isa pa gid ka bes, naglakat sia nga may pusil kag namahog nga manginmatay. Relihion sang iya asawa ang ginabasol niya sa bisan anong di-makatarunganon nga butang nga ginahimo niya. Apang nagtinguha ang asawa nga iaplikar ang laygay sang Biblia. Pagligad sang 20 ka tuig, nangin isa man sa mga Saksi ni Jehova ini nga bana. Sa Albania, naakig ang isa ka iloy bangod ang iya anak nga babayi nagtuon sa Biblia upod sa mga Saksi ni Jehova kag pagkatapos nagpabawtismo. Dose ka Biblia sang iya anak ang iya ginguba. Nian, isa ka adlaw ginbuksan niya ang bag-o nga Biblia nga ginbilin sang iya anak sa ibabaw sang lamesa. Natabuan nga nabuksan ini sa Mateo 10:​36, kag narealisar sang iloy nga ang ginasiling diri naaplikar sa iya. Walay sapayan sini, bangod sang kabalaka sa kaayuhan sang anak, gindul-ong sia sang iya iloy sa barko sang manuglakat sia upod sa iban nga mga Saksi agod magtambong sa isa ka kombension sa Italya. Sang makita sang iloy ang gugma, mga paghaksanay, kag mga pagyuhum sang grupo kag mabatian ang ila malipayon nga pagkinadlaw, nagsugod sa pagbag-o ang iya balatyagon. Wala madugay pagkatapos sini, nagsugot sia nga magtuon sa Biblia. Karon, nagatinguha sia nga buligan man ang iban nga nagapamatok sa umpisa.

¹⁶ Sa isa ka hitabo, ginkomprontar sang isa ka bana nga nagauyat sing sundang ang iya asawa, nga nagapakalain sa iya samtang nagahinampot sia sa Kingdom Hall. Malulo nga nagsabat ang asawa: “Sulod ka anay sa Kingdom Hall agod makita mo mismo.” Nagsulod sia, kag sang ulihi sia man nangin isa ka Cristiano nga gulang.

17. Kon mag-utwas kon kaisa ang indi paghangpanay sa sulod sang isa ka Cristianong puluy-an, anong Makasulatanhon nga laygay ang makabulig?

¹⁷ Bisan pa kon ang tanan sa inyo panimalay Cristiano, mahimo may mga tion nga mag-utwas ang indi paghangpanay sa sulod sang pamilya kag mahimo pa gani nga masakit nga mga tinaga ang mahambal bangod sang pagkadihimpit. Talalupangdon nga ginlaygayan ang mga Cristiano sa dumaan nga Efeso: “Ang tanan nga madinumtanon nga kapaitan kag kaakig kag kasingkal kag sininggitanay kag maparas nga hambal kuhaon gikan sa inyo kaupod sang tanan nga kalainan.” (Efeso 4:31) Mahimo gid nga naimpluwensiahan ang mga Cristiano sa Efeso sang ila palibot, sang ila pagkadihimpit mismo  kag, kon kaisa, sang ila nagligad nga pagkabuhi. Ano ang makabulig sa ila sa pagbag-o? Dapat sila ‘magbag-o sa puersa nga nagapahikot sa ila hunahuna.’ (Efeso 4:23) Samtang ginatun-an nila ang Pulong sang Dios, ginapamalandungan kon paano ini dapat mag-impluwensia sa ila kabuhi, nagapakig-upod sa ila mga masigka-Cristiano, kag hanuot nga nagapangamuyo, dugang pa nga makita sa ila kabuhi ang mga bunga sang espiritu sang Dios. Makatuon sila nga “mangin malulo sa isa kag isa, mainawaon sing malum-ok, hilway nga nagapinatawaray sa isa kag isa subong nga ang Dios man paagi kay Cristo hilway nga nagpatawad sa [ila].” (Efeso 4:32) Bisan ano man ang himuon sang iban, dapat kita magpakita sing pagpugong sa kaugalingon, mangin mainayuhon, mainawaon, kag mapinatawaron. Sa pagkamatuod, “dili [kita] magbalos sing malaut sa malaut kay bisan sin-o.” (Roma 12:​17, 18) Ang pagpakita sing tunay nga gugma bilang pag-ilog sa Dios amo pirme ang husto nga himuon.​—⁠1 Juan 4:8.

Laygay Para sa Tanan nga Cristiano

18. Ngaa nagakaigo ang laygay nga masapwan sa 2 Timoteo 2:24 para sa isa ka gulang sa dumaan nga Efeso, kag paano ini makahatag sing benepisyo sa tanan nga Cristiano?

¹⁸ Ang laygay nga ‘punggan ang kaugalingon sa idalom sang kalautan’ naaplikar sa tanan nga Cristiano. (2 Timoteo 2:24) Apang una ini nga ginpatuhoy kay Timoteo, nga nagkinahanglan sini sang nagpangalagad sia subong isa ka gulang sa Efeso. Ang iban sa kongregasyon didto prangka gid sa pagpautwas sang ila mga pagtamod kag nagatudlo sing sayop nga doktrina. Bangod wala nila mahantop sing bug-os ang katuyuan sang Mosaikong Kasuguan, wala nila mahangpan ang importansia sang pagtuo, gugma, kag maayong konsiensia. Ang bugal nagtuga sing pinuyas samtang nagabaisay sila tuhoy sa mga tinaga, kag wala nila mahangpan ang punto sang mga panudlo ni Cristo kag ang importansia sang diosnon nga debosyon. Sa pag-atubang sini nga kahimtangan, dapat mangin malig-on si Timoteo sa Makasulatanhon nga kamatuoran apang malulo sa pagpakig-angot sa iya mga kauturan. Kaangay sang mga gulang karon, nahibaluan niya nga indi iya ang panong kag dapat sia makig-angot sa iban sa isa ka paagi nga magapalambo sang Cristianong gugma kag paghiusa.​—⁠Efeso 4:1-3; 1 Timoteo 1:3-11; 5:​1, 2; 6:3-5.

19. Ngaa importante para sa aton tanan nga ‘pangitaon ang pagkahagop’?

¹⁹ Ginapalig-on sang Dios ang iya katawhan nga ‘pangitaon ang pagkahagop.’ (Sofonias 2:3) Ang Hebreo nga ekspresyon para sa “pagkahagop” nagakahulugan sing disposisyon nga nagabulig sa isa ka tawo sa pagbatas sang halit sing mapailubon, nga wala nagakaugot kag wala nagabalos. Kabay nga hanuot nga magpangayo kita sing bulig kay Jehova agod makapakita kita sing pagpugong sa kaugalingon kag marepresentar naton sia sing nagakaigo, bisan sa idalom sang mabudlay nga mga kahimtangan.

Ano ang Natun-an Mo?

• Ano nga teksto ang makabulig sa imo kon insultuhon ka?

• Ngaa nangin matampalason si Saulo?

• Paano ang halimbawa ni Jesus nagabulig sa aton sa pagpakig-angot sing nagakaigo sa tanan nga sahi sang tawo?

• Ano ang mga kaayuhan kon magpakita kita sing pagpugong sa kaugalingon sa aton pagpakighambal sa aton mga kapamilya?

[Mga Pamangkot sa Pagtinuon]

[Retrato sa pahina 26]

Walay sapayan sang reputasyon ni Saulo, mainayuhon nga nakig-angot sa iya si Ananias

[Retrato sa pahina 29]

Ang matutom nga pag-atipan sang isa ka Cristiano sang iya mga salabton mahimo nga makapahaganhagan sang pagpamatok sang kapamilya

[Retrato sa pahina 30]

Ginapalambo sang mga Cristiano ang gugma kag paghiusa