Sa Ano nga Pundasyon Ikaw Nagapasad?

ANG kapag-on sang isa ka tinukod nagadepende gid sa kabakod sang iya sadsaran, ukon pundasyon. Ginagamit kon kaisa sang Biblia ini nga prinsipio sa isa ka malaragwayon nga kahulugan.

Halimbawa, ginapatuhuyan ni manalagna Isaias si Jehova nga Dios subong ang isa nga “nagapasad sang sadsaran sang duta.” (Isaias 51:13) Ini nga sadsaran ginahuman sang indi mabag-o nga mga kasuguan sang Dios nga nagakontrol sa pagtiyog sang duta kag pagpabilin sini sa iya nahamtangan. (Salmo 104:5) Nagahambal man ang Pulong sang Dios, ang Biblia, sang “mga pundasyon” nga sa sini napasad ang tawhanon nga katilingban. Ini amo ang hustisya, kasuguan, kag pagsulundan. Kon ini “maguba,” ukon maghuyang, bangod sang inhustisya, kagarukan, kag kasingki, nagakadula ang kahim-ong sang katilingban.​—⁠Salmo 11:2-6; Hulubaton 29:4.

Naaplikar man ini nga prinsipio sa mga tawo subong mga indibiduwal. Sang nagahinakop sa iya bantog nga Sermon sa Bukid, si Jesucristo nagsiling: “Ang tagsatagsa nga nagapamati sa sining mga pulong ko kag nagahimo sini mangin kaangay sang mainandamon nga tawo, nga nagtukod sang iya balay sa ibabaw sang igang. Kag nagbundak ang ulan kag nag-abot ang baha kag naghuyop ang hangin kag naghampak sa balay, apang wala ini mapukan, kay gintukod ini sa ibabaw sang igang. Dugang pa, ang tagsatagsa nga nagapamati sa sining pulong ko kag wala nagahimo sini mangin kaangay sang buangbuang nga tawo, nga nagtukod sang iya balay sa balas. Kag nagtupa ang ulan kag nag-abot ang baha kag naghuyop ang hangin kag naghampak sa balay kag napukan ini, kag daku ang pagkapukan sini.”​—⁠Mateo 7:24-27.

Sa ano nga pundasyon mo ginapasad ang imo kabuhi? Sa mahuyang bala nga balas sang di-diosnon nga pilosopiya sang tawo, nga mapukan? Ukon nagapasad ka bala sa mabakod nga igang sang pagkamatinumanon sa mga pulong ni Jesucristo, nga magabulig sa imo nga mabatas ang malaragwayon nga mga unos sa kabuhi?