Ginaamligan ni Jehova ang mga Nagalaum sa Iya
Ginaamligan ni Jehova ang mga Nagalaum sa Iya
“Magtipig sa akon sing dalayon ang imo mahigugmaon nga kaayo kag ang imo pagkamaminatud-on.”—SALMO 40:11.
1. Ano ang ginpangabay ni Hari David kay Jehova, kag paano ina nga pangabay natuman sa karon?
SI HARI David sang dumaan nga Israel ‘malangkagon nga naghulat kay Jehova’ kag napahulag sa pagsiling nga si Jehova ‘nagalingig sang iya igdulungog sa iya kag nagapamati sang iya pagpangayo sing bulig.’ (Salmo 40:1) Pirme niya nasaksihan kon paano ginaamligan ni Jehova ang mga nagahigugma sa Iya. Busa, mapangabay ni David nga padayon sia nga amligan ni Jehova. (Salmo 40:11) Nalakip sa mga matutom nga mga tawo nga ginsaaran sing “isa ka mas maayo nga pagkabanhaw,” si David yara sa handumanan ni Jehova nga magabaton sa sina nga padya. (Hebreo 11:32-35) Pat-od na gid ang iya palaabuton. Nasulat na ang iya ngalan sa “tulun-an sang handumanan” ni Jehova.—Malaquias 3:16.
2. Paano kita ginabuligan sang Kasulatan nga mahangpan kon ano ang buot silingon nga ginaamligan kita ni Jehova?
2 Bisan pa nga ang mga matutom nga ginhinambitan sa Hebreo kapitulo 11 nabuhi antes sa pagkabuhi ni Jesucristo sa duta, nagkabuhi gid sila nahisanto sa gintudlo ni Jesus sang nagsiling sia: “Ang nagahigugma sang iya kalag nagadula sini, apang ang nagadumot sang iya kalag sa sining kalibutan magatipig sini sa kabuhi nga wala sing katapusan.” (Juan 12:25) Busa, maathag nga bisan ang ginaamligan ni Jehova mahimo magaantos kag pagahingabuton. Nagakahulugan ini nga ginaamligan ang isa sa espirituwal nga paagi agod mahuptan niya ang maayo nga tindog sa atubangan sang Dios.
3. Ano ang aton pamatuod nga gin-amligan ni Jehova si Cristo Jesus, kag ano ang resulta?
3 Nangin sentro mismo sang mapintas nga paghingabot kag pagpakahuya si Jesus, kag nagmadinalag-on sang ulihi ang iya mga kaaway sa makahuluya gid kag masakit nga pagpatay sa iya. Apang wala ini sing pagsumpakil sa saad sang Dios nga amligan ang Mesias. (Isaias 42:1-6) Ang pagkabanhaw ni Jesus sa ikatlo nga adlaw pagkatapos sang iya makahuluya nga kamatayon nagapamatuod nga ginpamatian ni Jehova ang iya pagpangayo sing bulig—subong nga ginpamatian ni Jehova si David. Bilang sabat, ginhatagan ni Jehova si Jesus sing kusog agod mahuptan ang iya integridad. (Mateo 26:39) Kay gin-amligan, natigayon ni Jesus ang di-mamalatyon nga kabuhi sa langit, kag minilyon ka tawo nga nagpakita sing pagtuo sa gawad ang posible nga makatigayon sing kabuhi nga walay katapusan.
4. Ano ang ginpasalig sa hinaplas nga mga Cristiano kag sa “iban nga mga karnero”?
4 Masaligan man naton nga handa kag masarangan ni Jehova nga amligan ang iya mga Santiago 1:17) Ang nagkalabilin nga hinaplas nga mga kauturan ni Jesus makasalig sa ginsaad ni Jehova: ‘Isa ka di-madinulunton kag walay dagta kag di-maalimunaw nga panublion ginatigana sa langit para sa inyo, nga gin-amligan sang gahom sang Dios paagi sa pagtuo para sa kaluwasan nga handa na nga ipabutyag sa ulihi nga bahin sang tion.’ (1 Pedro 1:4, 5) Ang “iban nga mga karnero,” nga may dutan-on nga paglaum, makasalig man sa Dios kag sa iya mga saad paagi sa salmista: “O higugmaa si Jehova, tanan kamo nga mainunungon sa iya. Ginaamligan ni Jehova ang mga matutom sa iya.”—Juan 10:16; Salmo 31:23.
alagad karon kaangay sang ginhimo niya sa tion nanday David kag Jesus. (Gin-amligan sa Espirituwal
5, 6. (a) Paano ang katawhan sang Dios ginaamligan karon? (b) Ano ang natigayon nga kaangtanan sang mga hinaplas kay Jehova, kag kamusta naman ang mga may dutan-on nga paglaum?
5 Sa karon, may gin-aman si Jehova agod amligan ang iya katawhan sa espirituwal nga paagi. Bisan pa nga wala sila naamligan gikan sa paghingabot ukon mga kabudlayan kag mga trahedya nga kinaandan sa kabuhi, mainunungon sia nga nagahatag sa ila sing bulig kag pagpalig-on nga ila ginakinahanglan agod maamligan nila ang ila suod nga kaangtanan sa Iya. Gintukod nila ini nga kaangtanan paagi sa ila pagtuo sa mahigugmaon nga aman sang Dios nga amo ang gawad. Ang pila sa sining matutom nga mga Cristiano ginhaplas sang espiritu sang Dios agod mangin kaupod nga manuggahom ni Cristo sa langit. Gindeklarar sila nga matarong subong espirituwal nga mga anak sang Dios, kag sa ila nagapatuhoy ining pulong: “Sia nagluwas sa aton gikan sa awtoridad sang kadudulman kag nagliton sa aton sa ginharian sang Anak sang iya gugma, nga paagi sa iya ginhilway kita paagi sa gawad, ang kapatawaran sang aton mga sala.”—Colosas 1:13, 14.
6 Minilyon sang iban pa matutom nga Cristiano ang ginpasalig nga sila man makabenepisyo sa aman sang Dios nga gawad. Aton mabasa: “Nagkari ang Anak sang tawo, indi agod alagdon, kundi agod mag-alagad kag sa paghatag sang iya kalag para sa madamo.” (Marcos 10:45) Ini nga mga Cristiano nagapaabot nga sa nagakaigo nga tion makaangkon sila “sing mahimayaon nga kahilwayan sang mga anak sang Dios.” (Roma 8:21) Sa amo man nga tion, ginatipigan nila ang ila pagpakig-abyan sa Dios kag hanuot nga nagapanikasog nga mapabakod ina nga kaangtanan.
7. Sa anong paagi ginatatap ni Jehova ang espirituwal nga kaayuhan sang iya katawhan karon?
7 Ang isa ka paagi nga ginaamligan ni Jehova ang espirituwal nga kaayuhan sang iya katawhan amo ang pag-aman sing isa ka progresibo nga programa sa paghanas. Nagatugot ini sa ila nga mahangpan sing sibu pa gid ang ihibalo sang kamatuoran. Padayon man nga nagaaman si Jehova sing panuytoy paagi sa iya Pulong, organisasyon, kag iya balaan nga espiritu. Sa panuytoy sang “matutom kag mainandamon nga ulipon,” ang katawhan sang Dios sa bug-os nga kalibutan kaangay sang isa ka internasyonal nga pamilya. Ginatatap sang ulipon nga klase ang espirituwal nga mga kinahanglanon kag, kon kinahanglan gid, bisan Mateo 24:45.
ang pisikal man nga kinahanglanon sang mga alagad ni Jehova—ano man ang ila nasyonalidad ukon tindog sa katilingban.—8. Ano nga pagsalig ang ginpabutyag ni Jehova sa iya mga mainunungon, nga nagapasalig sa ila sang ano?
8 Subong nga indi pisikal nga pangamlig ang ginhatag ni Jehova sang patyon si Jesus sang iya mga kaaway, amo man sini ang himuon Niya sa mga Cristiano karon. Apang wala ini nagakahulugan nga wala sila ginakahamut-an sang Dios. Indi gid! Sa baylo, nagapadaku ini sang iya pagsalig nga magadampig sila sa Iya tuhoy sa daku nga hulusayon sa uniberso. (Job 1:8-12; Hulubaton 27:11) Indi gid pagbiyaan ni Jehova ang mga mainunungon sa iya, “kay si Jehova mahigugmaon sang katarungan, kag indi niya pagbiyaan ang mga mainunungon sa iya. Tubtob sa walay latid nga tion pat-od nga amligan sila.”—Salmo 37:28.
Gin-amligan sang Mahigugmaon nga Kaayo kag sang Pagkamaminatud-on
9, 10. (a) Paano maamligan sang pagkamaminatud-on ni Jehova ang iya katawhan? (b) Paano ginapakita sang Biblia nga ginaamligan ni Jehova ang iya mga mainunungon paagi sa iya mahigugmaon nga kaayo?
9 Sa iya pangamuyo nga narekord sa Salmo 40, nangabay si David nga amligan sia sang mahigugmaon nga kaayo kag sang pagkamaminatud-on ni Jehova. Ang pagkamaminatud-on kag paghigugma ni Jehova sa matarong nagakinahanglan nga ipahamtang niya sing maathag kon ano ang iya mga talaksan. Yadtong nagasunod sa sining mga talaksan naamligan gid gikan sa mga kahuol, mga kahadlok, kag mga problema nga naeksperiensiahan sadtong wala nagasapak sa sini. Halimbawa, sarang naton maamligan ang aton kaugalingon kag ang aton mga hinigugma gikan sa madamo makahalanusbo nga mga problema kon likawan naton ang pag-abuso sa droga kag sa alkohol, seksuwal nga imoralidad, kag masingki nga pagkabuhi. Kag bisan yadtong nagapalayo sa pagkamaminatud-on sang dalanon ni Jehova—subong sa nahimo ni David sa pila ka higayon—makasalig nga ang Dios “duog nga mapanaguan” gihapon sang mahinulsulon nga mga makasasala. Ini sila makasinggit sing malipayon: “Amligan mo ako mismo gikan sa kahuol.” (Salmo 32:7) Daw ano ka hamili nga ekspresyon sang mahigugmaon nga kaayo sang Dios!
10 Ang isa pa ka halimbawa sang mahigugmaon nga kaayo sang Dios amo nga ginpaandaman niya ang iya mga alagad nga magpabilin nga napain gikan sa malaut nga kalibutan, nga iya laglagon sa dili madugay. Aton mabasa: “Indi ninyo paghigugmaa ang kalibutan ukon ang mga butang sa kalibutan. Kon ang bisan sin-o nagahigugma sang kalibutan, ang gugma sa Amay wala sa iya; bangod ang tanan nga butang sa kalibutan—ang kailigbon sang unod kag ang kailigbon sang mga mata kag ang pagpadayawdayaw sang palangabuhian sang isa—wala maghalin sa Amay, kundi naghalin sa kalibutan.” Paagi sa pagsunod sini nga paandam, maamligan naton sing literal ang aton kabuhi tubtob sa walay katubtuban, kay ang teksto nagapadayon: “Dugang pa, ang kalibutan nagataliwan kag amo man ang kailigbon sini, apang sia nga nagahimo sang kabubut-on sang Dios nagapabilin sing dayon.”—1 Juan 2:15-17.
Gin-amligan sang Ikasarang sa Paghunahuna, Paghantop, kag Kaalam
11, 12. Ipaathag kon paano ang ikasarang sa paghunahuna, paghantop, kag kaalam makaamlig sa aton.
11 Sa mga nagalaum nga mahamut-an sang Dios, ang anak ni David nga si Solomon gin-inspirar sa pagsulat: “Ang ikasarang sa paghunahuna magabantay sa imo, ang pagkamahinantupon magaamlig sa imo.” Sia man nagpalig-on: “Magtigayon ka sing kaalam . . . Indi mo ini pagbayaan, kag magatipig ini sa imo. Higugmaa ini, kag magaamlig ini sa imo.”—Hulubaton 2:11; 4:5, 6.
12 Magamit naton ang ikasarang sa paghunahuna kon mamalandong kita sa aton natun-an sa Pulong sang Dios. Ang paghimo sini magabulig sa aton nga mapalambo ang dugang nga paghantop agod makapahamtang kita sang nagakaigo nga mga prioridad. Importante ini, bangod ang kalabanan sa aton nakahibalo—ayhan paagi sa aton nga eksperiensia—nga ang mga problema magaluntad kon ang tawo hungod ukon di-hungod nga magpahamtang sing di-maalamon nga mga prioridad. Ginapahamtang sa aton sang kalibutan ni Satanas ang manggad, pagkaprominente, kag gahom subong mga tulumuron, samtang ginapadaku ni Jehova ang labing importante nga mga tulumuron sa espirituwal. Kon indi paghatagan sing prioridad ang espirituwal nga mga tulumuron, mahimo tunaan ini sang pagkabungkag sang mga pamilya, pagkaguba sang mga pag-abyanay, kag pagburon sang mga tulumuron sa espirituwal. Bilang resulta, matigayon lamang sang isa ang masubo nga kamatuoran nga ginpakita sang mga pinamulong ni Jesus: “Ano ang benepisyo kon matigayon sang isa ang bug-os nga kalibutan apang madula niya ang iya kalag?” (Marcos 8:36) Ang kaalam nagadikta nga dapat naton pamatian ang laygay ni Jesus: “Padayon, nian, nga pangitaa anay ang ginharian kag ang iya pagkamatarong, kag ining tanan iban pa nga mga butang idugang sa inyo.”—Mateo 6:33.
Ang Katalagman nga Mangin Maiyaiyahon
13, 14. Ano ang buot silingon nga mangin maiyaiyahon, kag ngaa indi maalamon nga mangin amo sini?
13 Kinaugali sang mga tawo nga mangin interesado sa ila kaugalingon. Apang kon mangin panguna sa kabuhi ang mga handum kag mga intereses, mangin malain ang resulta. Busa, agod maamligan ang aton pagpakig-abyan sa iya, nagsugo si Jehova nga likawan naton nga mangin maiyaiyahon. Ini nga termino nagakahulugan sing “pagkabalaka lamang sang isa sa iya mga handum, mga kinahanglanon, ukon mga intereses.” Indi bala nga sibu nga nagalaragway ini sa madamo nga tawo karon? Talalupangdon gid nga ang Biblia nagtagna nga sa “katapusan nga mga adlaw” sang malaut nga sistema ni Satanas, “ang mga tawo mangin mahigugmaon sa kaugalingon,” ukon mangin maiyaiyahon.—2 Timoteo 3:1, 2.
Lucas 10:27; Filipos 2:4) Mahimo nga tamdon ini sang kalabanan nga tawo nga indi praktikal, apang importante ini kon luyag naton nga magmadinalag-on ang mga pag-asawahay, mangin malipayon ang pamilya, kag mangin makaalayaw ang mga pag-abyanay. Sa amo, ang isa ka matuod nga alagad ni Jehova indi dapat magtugot nga mangibabaw ang iya natural nga interes sa kaugalingon sangsa mas importante nga mga intereses. Ang labing importante amo ang mga intereses ni Jehova, ang Dios nga iya ginasimba.
14 Nahangpan sang mga Cristiano ang bentaha sa pagtuman sang sugo sa Biblia nga mangin interesado sa iban, nga nagapalangga sa ila subong sang pagpalangga sang isa sa iya kaugalingon. (15, 16. (a) Sa diin nagapadulong ang panimuot nga pagkamaiyaiyahon, subong sang halimbawa nanday sin-o? (b) Sa katunayan, ano ang ginahimo sang isa kon maabtik sia sa paghukom sa iban?
15 Ang pagkamaiyaiyahon magadul-ong sa isa nga pakamatarungon ang kaugalingon, nga sa ulihi magapahulag sa isa nga mangin makitid sing panghunahuna kag bugalon. Ang Biblia nagakaigo nga nagasiling: “Wala ka sing balibad, O tawo, bisan sin-o ka pa, kon ikaw maghukom; kay sa butang nga nagahukom ka sa iban, ginapakamalaut mo ang imo kaugalingon, kay ikaw nga nagahukom nagahimo sing amo man nga mga butang.” (Roma 2:1; 14:4, 10) Kumbinsido gid ang relihiosong mga lider sang panahon ni Jesus sang ila pagkamatarong amo nga nagbatyag sila nga kalipikado agod bantayan si Jesus kag ang iya mga sumulunod. Sa paghimo sini, ginhimo nila ang ila kaugalingon nga mga hukom. Bangod nabulagan sang ila mga kakulangan, ginpakamalaut nila mismo ang ila kaugalingon.
16 Si Judas, ang sumulunod ni Jesus nga nagluib sa iya, nangin mahinukmanon sa iban. Sa okasyon sa Betania sang si Maria, nga utod ni Lazaro, naghaplas kay Jesus sang mahumot nga lana, namatok gid si Judas. Ginpabutyag niya ang iya kaakig paagi sa pagpangatarungan: “Ngaa bala wala pag-ibaligya ining inughaplas sing tatlo ka gatos ka denario kag ihatag sa mga imol?” Apang ang report nagpadayon sa pagpaathag: “Nagsiling [si Judas] sini, indi kay nabalaka sia sa mga imol kundi kay makawat sia, kag bangod nga yara sa iya ang puyo sang kuarta ginakuha niya ang sulod sini.” (Juan 12:1-6) Indi gid kita dapat mangin kaangay ni Judas ukon sang relihioso nga mga lider, nga madasig maghukom sa iban, nga nagapakamalaut sang ila mismo kaugalingon.
17. Iilustrar ang katalagman nga nalakip sa pagkamatinaastaason ukon ang sobra nga kompiansa sa kaugalingon.
17 Sing makapasubo, ang pila sa unang mga Cristiano, bisan indi sila kaangay ni Judas, nangin biktima man sila sang bugal, nangin matinaastaason. Si Santiago nagsulat tuhoy sa ila: “Ginapabugal ninyo ang inyo nagapabugal-sang-kaugalingon nga mga pagpadayawdayaw.” Nian sia nagdugang: “Ina tanan nga pagpabugal malaut.” (Santiago 4:16) Ang pagpabugal tuhoy sa aton hinimuan ukon tuhoy sa aton mga pribilehiyo sa pag-alagad kay Jehova malaglagon. (Hulubaton 14:16) Madumduman naton ang natabo kay apostol Pedro, nga bangod sang sobra nga pagsalig sa kaugalingon nagpahambog: “Bisan nga ang tanan masandad may kaangtanan sa imo, indi gid ako masandad! . . . Bisan mapatay man ako kaupod nimo, indi ko gid ikaw pag-ipanghiwala.” Ang matuod, wala kita sing dapat ipabugal sa aton kaugalingon. Ang tanan natigayon naton paagi lamang sa mahigugmaon nga kaayo ni Jehova. Ang pagdumdom sini nagapugong sa aton nga magpabugal.—Mateo 26:33-35, 69-75.
18. Ano ang ginabatyag ni Jehova tuhoy sa bugal?
18 “Ang bugal nagauna sa kalaglagan, kag ang palabilabihon nga espiritu nagauna sa pagkasandad,” ginasilingan kita. Ngaa? Si Jehova nagasabat: “Ang pagbayaw sa kaugalingon kag bugal . . . ginadumtan ko.” (Hulubaton 8:13; 16:18) Wala sing duhaduha nga naakig si Jehova sa “bugalon nga tagipusuon sang hari sang Asiria kag sang pagpaimportante-sa-kaugalingon sang iya matinaastaason nga mga mata”! (Isaias 10:12) Ginsilutan sia ni Jehova. Sa dili madugay ang kalibutan ni Satanas, lakip ang mga lider nga bugalon kag nagapaimportante-sa-kaugalingon, makita kag di-makita, pagahukman man. Kabay nga indi gid naton pag-ipabanaag ang batinggilan nga panimuot sang mga kaaway ni Jehova!
19. Sa ano nga bahin nga nagapabugal ang mga Cristiano apang mapainubuson gihapon sila?
19 Ginapabugal gid sang matuod nga mga Cristiano nga nangin alagad sila ni Jehova. (Jeremias 9:24) Apang dapat man sila nga magpabilin nga mapainubuson. Ngaa? “Kay ang tanan nagpakasala kag nakulangan sing himaya sang Dios.” (Roma 3:23) Busa agod maamligan ang aton kahimtangan subong alagad ni Jehova, dapat may panimuot kita ni apostol Pablo, nga nagsiling nga “si Cristo Jesus nagkari sa kalibutan sa pagluwas sang mga makasasala,” kag sia nagdugang: “Sa ila ako amo ang nagapanguna.”—1 Timoteo 1:15.
20. Paano ginaamligan karon ni Jehova ang iya katawhan, kag paano niya sila amligan sa palaabuton?
20 Bangod nalipay ang katawhan ni Jehova nga unahon ang mga intereses sang Dios, makasalig kita nga magapadayon sa pag-amlig sa ila si Jehova sa espirituwal. Makasalig man kita nga kon mag-abot ang dakung kapipit-an, amligan ni Jehova ang iya katawhan indi lamang sa espirituwal kundi sa pisikal man. Sa pagsulod sa bag-ong kalibutan sang Dios, makasinggit sila: “Yari karon! Ini amo ang aton Dios. Nagalaum kita sa iya, kag luwason niya kita. Ini amo si Jehova. Nagalaum kita sa iya. Magkalipay kita kag magkasadya sa iya pagluwas.”—Isaias 25:9.
Madumduman Mo Bala?
• Paano gin-amligan sanday Hari David kag Jesucristo?
• Paano ginaamligan ang katawhan ni Jehova karon?
• Paano naton malikawan nga mangin maiyaiyahon?
• Ngaa puede kita magpabugal apang mapainubuson gihapon?
[Mga Pamangkot sa Pagtinuon]
[Mga retrato sa pahina 9]
Paano gin-amligan ni Jehova sanday David kag Jesus?
[Mga retrato sa pahina 10, 11]
Sa ano nga mga paagi nga ginaamligan sa espirituwal ang katawhan sang Dios karon?
[Mga retrato sa pahina 12]
Bisan pa nga ginapabugal naton nga mag-alagad kay Jehova, dapat mapainubuson kita pirme