Mga Pamangkot Gikan sa mga Bumalasa

Sang mabatian sang mga disipulo nga ang ginbilanggo nga si Pedro yara sa ganhaan, ngaa nagsiling sila: “Anghel niya ina”?​—⁠Binuhatan 12:15.

Mahimo nga sayop nga ginhaumhaum sang mga disipulo nga isa ka mensahero nga anghel nga nagarepresentar kay Pedro amo ang nagtindog sa gawang. Binagbinaga ang konteksto sining dinalan.

Si Pedro ginpadakop ni Herodes, nga amo man ang nagpapatay kay Santiago. Amo nga may rason gid ang mga disipulo sa pagpati nga mahimo man patyon si Pedro. Sang ginbilanggo si Pedro, ginkadenahan sia kag ginbantayan sing apat ka relyebo sing tig-apat ka soldado. Nian, isa ka gab-i milagruso sia nga ginbuy-an kag gintuytuyan pagua sa bilangguan sang isa ka anghel. Sang narealisar sang ulihi ni Pedro ang natabo, nagsiling sia: “Nahibaluan ko gid karon nga ginpadala ni Jehova ang iya anghel kag ginluwas ako gikan sa kamot ni Herodes.”​—⁠Binuhatan 12:1-11.

Nagkadto gilayon si Pedro sa balay ni Maria nga iloy ni Juan Marcos, diin madamo nga disipulo ang nagtipon. Sang nanuktok sia sa ganhaan sang gawang, ang suluguon nga babayi nga si Roda ang nagsabat. Sang nakilal-an niya ang tingog ni Pedro, nagdalagan sia agod sugiran ang iban bisan wala pa gani niya sia mapasulod! Sa primero, indi makapati ang mga disipulo nga yara si Pedro sa gawang. Sa baylo, sayop nga ginhaumhaum nila: “Anghel niya ina.”​​—⁠Binuhatan 12:12-​15.

Nagpati bala ang mga disipulo nga ginpatay na si Pedro kag ang iya na lamang espiritu amo ang yara sa gawang? Indi gid, kay ang mga sumulunod ni Jesus nakahibalo sang kamatuoran sa Kasulatan tuhoy sa mga patay​—⁠nga “wala sila makahibalo sing bisan ano.” (Manugwali 9:​5, 10) Ano, nian, ang buot silingon sang mga disipulo sang nagsiling sila: “Anghel niya ina”?

Nakahibalo ang mga disipulo ni Jesus nga sa bug-os nga maragtas, naghatag ang mga anghel sing personal nga bulig sa katawhan sang Dios. Halimbawa, nagsambit si Jacob tuhoy sa “anghel nga nagtubos sa akon gikan sa tanan nga katalagman.” (Genesis 48:16) Kag tuhoy sa isa ka bata sa tunga nila, ginsilingan ni Jesus ang iya mga sumulunod: “Andam kamo nga indi ninyo pagtamayon ang isa sining mga magamay; kay nagasiling ako sa inyo nga ang ila mga manugtunda sa langit nagatulok pirme sa nawong sang akon Amay nga yara sa langit.”​—⁠Mateo 18:10.

Sing makawiwili, ginbadbad sang Young’s Literal Translation of the Holy Bible ang tinaga nga agʹge·los (“anghel”) subong “mensahero.” Daw ginapakita nga nagapati anay ang pila ka Judiyo nga ang kada alagad sang Dios may iya kaugalingon nga anghel​—⁠daw subong bala, isa ka “anghel de la guardia.” Siempre pa, ining pagtamod wala direkta nga ginatudlo sa Pulong sang Dios. Sa gihapon, posible nga sang ang mga disipulo nagsiling, “Anghel niya ina,” ginhaumhaum nila nga isa ka mensahero nga anghel nga nagarepresentar kay Pedro ang nagtindog sa gawang.