“Ginhingabot Bangod sang Iya Pagtuo”
“Ginhingabot Bangod sang Iya Pagtuo”
NAGPATINDOG sing monumento sa isa ka parke ang banwa sang Cernobbio sa naaminhan nga Italya agod dumdumon ang mga biktima nga ginlapas ang ila mga kinamatarong. Para kay Narciso Riet ang isa sa mga plake nga makita sa monumento. Si Riet, nga natawo sa Alemanya kag Italyano ang iya mga ginikanan, nangin isa ka Saksi ni Jehova sang katuigan 1930. Sang naggahom si Hitler, ginhingabot ang mga Saksi ni Jehova bangod nangindi sila sa pagbayaw kay Hitler labaw sa matuod nga Dios, nga si Jehova.
Sang matukiban sang Gestapo nga nagabulig si Riet sa pagpasulod sing mga kopya sang Ang Lalantawan sa mga kampo konsentrasyon, nagpalagyo sia sa Cernobbio. Ginpangabay sia didto nga badbaron sa Italyano Ang Lalantawan kag ipanagtag ini sa iya mga masigkatumuluo sa malapit nga mga lugar. Natukiban ang iya makugi nga mga hilikuton. Hinali nga ginsulod sang isa ka SS nga opisyal kag sang iya mga tinawo ang balay ni Riet, gindakop sia, kag ginpanguha ang mga ebidensia sang “krimen”—duha ka Biblia kag pila ka sulat! Gintapok si Riet sa Alemanya, ginbilanggo sa kampo konsentrasyon sa Dachau, kag ginpatay antes matapos ang Bug-os Kalibutan nga Inaway II. ‘Ginhingabot sia bangod sang iya pagtuo,’ siling sang plake sa Cernobbio.
Ang pagtuo ni Narciso Riet kag sang ginatos pa ka mga Saksi nga ginhingabot sang mga Nazi isa ka pagpalig-on sa mga Cristiano karon nga magpabilin nga matutom kay Jehova, ang lamang nga Persona sa bug-os nga uniberso nga takus sang ila pagsimba. (Bugna 4:11) Si Jesus nagsiling: “Malipayon ang mga ginahingabot tungod sa pagkamatarong.” Dumdumon sang Dios ang ila mga binuhatan kag padyaan niya sila bangod sang ila kaisog.—Mateo 5:10; Hebreo 6:10.