Mga Ginikanan, Iaman ang mga Kinahanglanon sang Inyo Pamilya

“Kon ang bisan sin-o wala nagaaman para sa ila nga yara sa iya, . . . napanghiwala na niya ang pagtuo.”​—⁠1 TIMOTEO 5:8.

1, 2. (a) Ngaa makapalig-on nga makita ang mga pamilya nga nagatambong sing tingob sa Cristianong mga miting? (b) Ano ang pila ka hangkat nga ginaatubang sang mga pamilya agod makaabot sa mga miting sa husto nga oras?

KON panilagan mo ang Cristianong kongregasyon antes magsugod ang miting, mahimo makita mo ang matinlo kag napanaptan sing maayo nga mga kabataan nga nagapungko sa tupad sang ila mga ginikanan. Indi bala makalilipay tan-awon ang gugma nga dayag sa sina nga mga pamilya​—⁠ang ila gugma kay Jehova kag sa isa kag isa? Apang, dapat naton dumdumon nga daku nga panikasog ang ginahimo sang mga ginikanan agod madala sa mga miting ang ila pamilya sa husto nga oras.

² Ang kalabanan nga ginikanan masako gid sa bug-os nga adlaw, kag sa mga gab-i sang miting, labi na nga masako ang pamilya. Kinahanglan ihanda ang palanyapunon, mga hilimuson, kag mga homework nga kinahanglan tapuson. Ang mga ginikanan amo ang may pinakamabug-at nga lulan, ang pagpat-od nga ang tanan matinlo, nakakaon, kag nakahanda sa husto nga oras. Sa pagkamatuod, kon may kabataan masami nga may mga pagkaatrasar nga wala ginapaabot sa mga alang-alang gid nga tion. Nagisi ang delargo sang kamagulangan samtang nagahampang. Naula sang kinagot ang iya pagkaon. Nagbaisay ang mga kabataan. (Hulubaton 22:15) Ano ang resulta? Walay sapayan sang maayo gid nga pagplano sang mga ginikanan, mahimo may mga problema gihapon nga mag-utwas. Apang, ang pamilya halos yara pirme sa Kingdom Hall antes magsugod ang mga miting. Makapalig-on gid nga makita sila nga nagatambong kada semana, kada tuig samtang nagadaku ang ila mga kabataan sa pag-alagad kay Jehova!

3. Paano naton mahibaluan nga ginapabaloran gid ni Jehova ang mga pamilya?

³ Bisan pa ang imo hilikuton subong ginikanan mabudlay kon kaisa, makakalapoy pa gani, makasalig ka nga ginapabaloran gid ni Jehova ang imo mga panikasog. Si Jehova amo ang Tagtukod sang kahimusan sang pamilya. Amo kon ngaa, ang iya Pulong nagasiling nga ‘utang sang tagsa ka pamilya ang iya ngalan’​—⁠ang pagluntad sini​—⁠kay Jehova. (Efeso 3:​14, 15) Gani, mga ginikanan, kon ginatungdan ninyo sing husto ang inyo mga papel sa pamilya, ginapadunggan ninyo ang Soberanong Ginuo sang uniberso. (1 Corinto 10:31) Indi bala isa ina ka daku nga pribilehiyo? Nagakaigo, nian, nga binagbinagon naton ang katungdanan nga ginhatag ni Jehova sa mga ginikanan. Sa sini nga artikulo, binagbinagon naton ang katungdanan sang mga ginikanan may kaangtanan sa pag-aman para sa ila pamilya. Repasuhon naton ang tatlo ka paagi diin ginapaabot ni Jehova ang mga ginikanan nga mag-aman.

Pag-aman sing Materyal nga mga Kinahanglanon

4. Sa pamilya, ano nga kahimusan ang ginhimo ni Jehova agod iaman ang mga kinahanglanon sang mga kabataan?

⁴ Si apostol Pablo nagsulat: “Kon ang bisan sin-o wala nagaaman para sa ila nga yara sa iya, kag ilabi na para sa mga katapo sang iya panimalay, napanghiwala na niya ang pagtuo kag malain pa sa tawo nga wala sing pagtuo.” (1 Timoteo 5:8) Sin-o ang ginatumod  ni Pablo sa pagsambit niya sang “bisan sin-o”? Amo ang ulo sang pamilya, sa masami ang amay. Ginhatagan man sang Dios ang babayi sing isa ka dungganon nga papel subong kabulig sang iya bana. (Genesis 2:18) Ang mga babayi sang panahon nga ginsulat ang Biblia masami nagabulig sa ila bana sa pag-aman para sa pamilya. (Hulubaton 31:​13, 14, 16) Sa karon, nangin kinaandan na ang mga pamilya nga may nagasolo nga ginikanan.⁠ * Madamo sang nagasolo nga Cristianong ginikanan ang nangin maayo gid nga manug-aman sa ila panimalay. Siempre pa, mas maayo kon ang pamilya may duha ka ginikanan, nga ginapangunahan sang amay.

5, 6. (a) Ano ang pila sa mga hangkat nga ginaatubang sang mga nagatinguha nga amanan sing materyal nga mga kinahanglanon ang ila panimalay? (b) Ang paghupot sing ano nga pagtamod sa sekular nga trabaho ang makabulig sa Cristianong mga manug-aman sa pagbatas?

⁵ Ano nga sahi sang pag-aman ang ginapatuhuyan ni Pablo sa 1 Timoteo 5:8? Ginapakita sang konteksto nga direkta niya nga ginapatuhuyan ang materyal nga mga kinahanglanon sang pamilya. Sa karon, madamo sing mga balagbag nga maatubang ang ulo sang pamilya agod maaman ang materyal nga mga kinahanglanon sang pamilya. Lapnag ang kapigaduhon sa bug-os nga kalibutan, subong man ang mga pagpahalin sa trabaho, madamo ang wala sing trabaho, kag nagamahal nga bili sang mga balaklon. Ano ang makabulig sa isa ka manug-aman sa pag-atubang sining mga hangkat?

⁶ Dapat dumdumon sang manug-aman nga ginatuman niya ang isa ka katungdanan nga gikan kay Jehova. Ginapakita sang inspirado nga mga pulong ni Pablo nga ang tawo nga makasarang magtuman sini nga sugo apang wala ini ginahimo kaanggid sa isa nga “wala sing pagtuo.” Indi gid luyag sang isa ka Cristiano nga mangin amo sini ang iya tindog sa atubangan sang iya Dios. Apang, sing makapasubo, madamo nga tawo sa karon nga kalibutan ang “wala sing kinaugali nga gugma.” (2 Timoteo 3:​1, 3) Sa pagkamatuod, madamo nga amay ang nagapalagyo sa ila responsibilidad, kag ginapatumbayaan na lamang ang ila pamilya. Indi gid ugyon ang Cristianong mga bana sa sining walay kaluoy kag di-serioso nga pagtamod sa pag-aman para sa ila kaugalingon nga panimalay. Indi kaangay sang madamo nila nga mga katrabaho, ginatamod sang Cristianong mga manug-aman ang bisan manubo sing klase nga trabaho subong talahuron kag importante, isa ka paagi nga mapahamut-an si Jehova nga Dios, bangod nagabulig ini sa ila sa pag-aman para sa ila mga hinigugma.

7. Ngaa nagakaigo nga hunahunaon sang mga ginikanan ang halimbawa ni Jesus?

⁷ Makabulig man kon hunahunaon sang mga ulo sang pamilya ang himpit nga halimbawa ni Jesus. Dumduma nga matagnaon nga ginapatuhuyan sang Biblia si Jesus subong aton “Dayon nga Amay.” (Isaias 9:​6, 7) Subong “ang katapusan nga Adan,” ginbuslan ni Jesus “ang una nga tawo nga si Adan” subong ang amay sang katawhan nga may pagtuo. (1 Corinto 15:45) Indi kaangay ni Adan, nga nangin isa ka makagod kag maiyaiyahon nga amay, si Jesus amo gid ang maayo nga amay. Ang Biblia nagasiling tuhoy sa iya: “Sa sini nakilala naton ang gugma, bangod ginhatag niya ang iya kalag tungod sa aton.” (1 Juan 3:16) Huo, kinabubut-on nga ginhalad ni Jesus ang iya kaugalingon nga kabuhi para sa iban. Apang, ginauna man niya sa matag-adlaw ang mga kinahanglanon sang iban sangsa iya kaugalingon sa magagmay nga mga paagi. Mga ginikanan, magabenepisyo gid kamo kag ang inyo pamilya kon ilugon ninyo inang masinakripisyuhon nga espiritu.

8, 9. (a) Ano ang matun-an sang mga ginikanan sa masinakripisyuhon nga pag-aman sang mga pispis sa ila mga boto? (b) Paano nagapakita sing pagkamasinakripisyuhon ang madamo nga Cristianong mga ginikanan?

⁸ Daku ang matun-an sang mga ginikanan tuhoy sa di-makagod nga gugma sa ginsiling ni Jesus sa balingag nga katawhan sang Dios: “Makapila kuntani nga luyag ko tipunon ang imo mga anak, subong sang isa ka munga nga nagatipon sang iya mga piso sa idalom sang iya mga pakpak!” (Mateo 23:37) Maathag ang paglaragway diri ni Jesus sa isa ka munga nga nagatabon sa iya mga piso sang iya mga pakpak. Sa pagkamatuod, daku ang matun-an sang mga ginikanan sa maamligon nga kinaugali sang munga, nga handa sa pagrisgo sang iya kabuhi agod amligan ang iya mga piso gikan sa katalagman. Apang, dalayawon man ang ginahimo sang munga nga mga pispis adlaw-adlaw. Nagalupad sila pakadto pakari sa pagpangita sing pagkaon. Bisan pa kapoy na sila, ginahulog nila gihapon ang pagkaon sa naganganga nga mga tuktok sang ila mga boto, nga nagatulon naman sini kag sa masami nagasiyak gihapon sa pagpangayo sing dugang pa. Madamo sa mga tinuga ni Jehova ang “duna nga maalam” sa pag-atipan nila sang mga kinahanglanon sang ila mga boto.​​—⁠Hulubaton 30:24.

 ⁹ Sing kaanggid, dalayawon ang pagkamasinakripisyuhon nga ginapakita sang Cristianong mga ginikanan sa bug-os nga kalibutan. Mas gustuhon pa ninyo nga kamo na lang ang mahalitan sangsa mahalitan ang inyo kabataan. Dugang pa, handa kamo magsakripisyo adlaw-adlaw agod maamanan ang inyo panimalay. Madamo sa inyo ang nagabugtaw sing temprano agod magtrabaho sa makakalapoy ukon makatalaka nga trabaho. Nagapangabudlay kamo agod makaaman sing masustansia nga pagkaon sa lamesa. Nagapanikasog kamo agod mapat-od nga ang inyo kabataan may matinlo nga panapton, nagakaigo nga ilistaran, kag edukasyon. Kag padayon kamo nga nagapanikasog nga ihatag ini adlaw-adlaw, tuig-tuig. Pat-od nga ini nga pagkamasinakripisyuhon kag pagbatas nagapahamuot gid kay Jehova! (Hebreo 13:16) Apang, sa amo man nga tion, nahibaluan ninyo nga may mas importante pa nga mga butang nga dapat iaman para sa inyo pamilya.

Pag-aman sing Espirituwal nga mga Kinahanglanon

10, 11. Ano ang labing importante nga kinahanglanon sang tawo, kag ano anay ang dapat himuon sang Cristianong mga ginikanan agod mahatag ining kinahanglanon sa ila mga kabataan?

¹⁰ Ang mas importante sangsa pag-aman sing materyal nga mga kinahanglanon amo ang pag-aman sing espirituwal nga mga kinahanglanon. Si Jesus nagsiling: “Ang tawo mabuhi, indi lamang sa tinapay, kundi sa tagsa ka pulong nga nagagua sa baba ni Jehova.” (Mateo 4:⁠4; 5:3) Mga ginikanan, ano ang mahimo ninyo agod makaaman sing espirituwal nga mga kinahanglanon?

¹¹ Tuhoy sa sining topiko, wala na sing teksto nga mas labi nga ginakutlo sangsa Deuteronomio 6:​5-7. Palihug buksi ang inyo Biblia kag basaha ining mga bersikulo. Talupangda nga ginhambalan ang mga ginikanan nga palambuon anay nila ang ila kaugalingon nga espirituwalidad, pabakuron ang ila gugma kay Jehova kag ipatudok sa ila tagipusuon ang iya mga pulong. Huo, kinahanglan mangin serioso kamo nga estudyante sang Pulong sang Dios, nga ginabasa ang Biblia sing regular kag ginapamalandungan ini agod nga makapalambo kamo sing husto nga paghangop kag gugma sa mga dalanon, mga prinsipio, kag mga kasuguan ni Jehova. Subong resulta, ang inyo tagipusuon mapuno sing makawiwili gid nga mga kamatuoran sa Biblia nga magapabatyag sa inyo sing kalipay, pagtahod, kag gugma kay Jehova. Makatigayon kamo sing bugana nga maayong butang nga mapaambit ninyo sa inyo mga kabataan.​​—⁠Lucas 6:⁠45.

12. Paano mailog sang mga ginikanan ang halimbawa ni Jesus kon tuhoy sa pagpatudok sang mga kamatuoran sang Biblia sa ila mga kabataan?

¹² Ang mga ginikanan nga malig-on sa espirituwal handa sa pag-aplikar sang laygay nga masapwan sa Deuteronomio 6:​7, nga “ipatudok” ang mga pulong ni Jehova sa ila mga anak sa tagsa ka kahigayunan. Ang ‘pagpatudok’ nagakahulugan sing pagtudlo kag pagpadaku paagi sa pagsulitsulit. Nakahibalo gid si Jehova nga kita tanan​—⁠ilabi na ang mga kabataan​—⁠nagakinahanglan sing pagsulitsulit agod makatuon. Amo nga si Jesus naggamit sing pagsulitsulit sa iya ministeryo. Halimbawa, sang gintudluan niya ang iya mga disipulo nga mangin mapainubuson sa baylo nga mangin bugalon kag mapaindis-indison, nakakita sia sing nanuhaytuhay nga mga paagi sa pagsulit sang  amo lang nga prinsipio. Nagtudlo sia paagi sa pagpangatarungan, pag-ilustrar kag pagpasundayag pa gani. (Mateo 18:1-4; 20:25-27; Juan 13:12-15) Apang, sing talalupangdon, wala gid naubusan sing pasensia si Jesus. Sing kaanggid, kinahanglan man mangita sing mga paagi ang mga ginikanan nga itudlo ang sadsaran nga mga kamatuoran sa ila kabataan, mapailubon nga ginasulitsulit sa ila ang mga prinsipio ni Jehova tubtob nga mahangpan kag maaplikar ini sang mga kabataan.

13, 14. Ano ang pila ka kahigayunan diin mapatudok sang mga ginikanan ang mga kamatuoran sang Biblia sa ila mga kabataan, nga nagagamit sing ano nga mga materyal?

¹³ Maayo gid nga kahigayunan sa pagtudlo ang mga pagtuon sang pamilya. Sa pagkamatuod, ang regular, makapalig-on kag malipayon nga pagtuon sang pamilya sa Biblia importante gid para sa espirituwalidad sang pamilya. Nagakalipay gid ang Cristianong mga pamilya sa bug-os nga kalibutan sa sining mga pagtinuon, nga ginagamit ang literatura nga gin-aman paagi sa organisasyon ni Jehova kag ginapasibu ini sa mga kinahanglanon sang kabataan. Ang libro nga Magtuon Gikan sa Daku nga Manunudlo nangin isa ka daku gid nga pagpakamaayo sa sining bahin, subong man ang libro nga Questions Young People Ask​​—⁠Answers That Work.⁠ * Apang, indi lamang ang mga pagtuon sang pamilya ang panahon agod tudluan ang kabataan.

¹⁴ Subong sang ginapakita sang Deuteronomio 6: 7, madamo sing mga kahigayunan nga mahinun-anunan ninyo nga mga ginikanan ang espirituwal nga mga butang upod sa inyo mga kabataan. Nagalakbay man kamo nga magkaupod, nagaobra sing magkaupod sa mga ulubrahon sa balay, ukon nagaliwaliwa nga magkaupod, makapangita kamo sing mga kahigayunan nga makaaman sing espirituwal nga mga kinahanglanon sa inyo kabataan. Siempre pa, indi kinahanglan nga “magwali” kamo pirme sa inyo mga kabataan tuhoy sa mga kamatuoran sa Biblia. Sa baylo, tinguhai nga huptan ang paghinun-anon sang inyo pamilya nga makapalig-on kag napatuhoy sa espirituwal nga mga butang. Halimbawa, ang Magmata! nga magasin nagaunod sing madamo nga artikulo tuhoy sa nanuhaytuhay nga mga topiko. Ining mga artikulo mahimo mangin basihan sang inyo mga paghinun-anon tuhoy sa tinuga ni Jehova nga mga kasapatan, mga lugar nga may kinaugali nga katahom sa bilog nga kalibutan, kag dalayawon nga pagkananuhaytuhay sang mga kultura kag mga pagkabuhi sang tawo. Ining mga pagsugilanunay mahimo magpahulag sa mga pamatan-on nga magbasa sing labi pa sang literatura nga gin-aman sang matutom kag mainandamon nga ulipon nga klase. —Mateo 24:45-​47.

15. Paano mabuligan sang mga ginikanan ang ila kabataan nga tamdon ang Cristianong ministeryo subong makawiwili kag makapaladya?

¹⁵ Ang makapalig-on nga pagpakigsugilanon sa imo kabataan makabulig sa imo agod mahatag ang isa pa ka espirituwal nga kinahanglanon. Kinahanglan tun-an sang Cristianong mga kabataan ang pagpaambit sang ila pagtuo sing epektibo sa iban. Samtang nagahambalanay kamo tuhoy sa pila ka interesante nga punto sa Ang Lalantawan ukon Magmata! mahimo ka mangita sing mga kahigayunan nga maangot ang materyal sa ministeryo.  Halimbawa, mahimo ka mamangkot: “Indi bala maayo nga mas madamo nga tawo ang makahibalo sini tuhoy kay Jehova? Sa banta mo paano naton maganyat ang isa ka tawo nga mangin interesado sa sini nga topiko?” Ini nga mga paghinun-anon mahimo magabulig sa mga pamatan-on nga magpalambo sing dugang pa nga interes sa pagpaambit sa iban sang ila natun-an. Nian, kon mag-upod sa imo ang imo mga kabataan sa ministeryo, makita nila kon paano mo ginaaplikar ang inyo mga paghinun-anon. Mahimo man nila matun-an nga ang ministeryo isa ka makawiwili kag makalilipay nga buluhaton, nga nagahatag sing daku nga kaayawan kag kalipay.—Binuhatan 20:35.

16. Ano ang mahimo matun-an sang mga kabataan paagi sa pagpamati sa mga pangamuyo sang ila mga ginikanan?

¹⁶ Nagaaman man ang mga ginikanan sing espirituwal nga mga kinahanglanon sang ila kabataan kon nagapangamuyo sila. Gintudluan ni Jesus ang iya mga disipulo kon paano mangamuyo, kag nangamuyo sia kaupod nila sa madamo nga okasyon. (Lucas 11:1-13) Hunahunaa lamang kon daw ano kadamo ang ila natun-an paagi sa pag-upod sa Anak mismo sang Dios sa pangamuyo! Sing kaanggid, madamo sing matun-an ang inyo kabataan sa inyo mga pangamuyo. Halimbawa, mahimo nila matun-an nga luyag ni Jehova nga makigsugilanon kita sa iya sing hilway kag tinagipusuon, nga ginasugid sa iya ang bisan ano nga problema nga ginaatubang naton. Huo, ang imo mga pangamuyo makatudlo sa imo kabataan sing isa ka importante nga espirituwal nga kamatuoran: Mahimo sila makatukod sing kaangtanan sa ila langitnon nga Amay.​—⁠1 Pedro 5:7.

Pag-aman sing Emosyonal nga mga Kinahanglanon

17, 18. (a) Paano ginapahayag sang Biblia ang importansia sang pagpakita sing gugma sa kabataan? (b) Paano mailog sang mga amay si Jehova sa pagpabutyag sing gugma sa ila mga kabataan?

¹⁷ Sa pagkamatuod, ang mga kabataan may importante man nga emosyonal nga mga kinahanglanon. Ginasilingan sang Pulong sang Dios ang mga ginikanan kon daw ano ka importante nga mag-aman sining kinahanglanon. Halimbawa, ang lamharon nga mga iloy ginalaygayan nga “higugmaon ang ila mga anak.” Ang paghimo nila sini naangot sa pagpahanumdom sa lamharon nga mga iloy sang ila pagkamakatarunganon. (Tito 2:4) Sa pagkamatuod, isa ka makatarunganon nga butang ang pagpakita sing gugma sa bata. Nagatudlo ini sa bata nga maghigugma kag nagahatag ini sing tubtob-buhi nga mga benepisyo. Sa pihak nga bahin, isa ka kabuangan ang indi pagpakita sing gugma sa bata. Nagatuga ini sing daku nga kasakit kag isa ka kapaslawan sa pag-ilog kay Jehova, nga nagapakita sa aton sing daku nga gugma walay sapayan sang aton pagkadihimpit.​—⁠Salmo 103:8-14.

¹⁸ Si Jehova naghimo pa gani sang una nga tikang sa paghigugma sa iya dutan-on nga mga kabataan. Subong sang ginasiling sang 1 Juan 4:​19, “sia ang una nga naghigugma sa aton.” Kamo nga mga amay ilabi na nga dapat mag-ilog sang halimbawa ni Jehova, nga maghimo sing una nga tikang sa pagtukod sing mahigugmaon nga higot upod sa inyo mga kabataan. Ginalaygayan sang Biblia ang mga amay nga indi pagpaakigon ang ila kabataan, “agod nga indi magluya ang ila buot.” (Colosas 3:21) Makapaluya gid sa buot sang mga kabataan ang impresyon nga wala sila ginahigugma ukon ginapabaloran sang ila ginikanan. Ang mga amay nga wala nagapabutyag sang ila balatyagon dapat gid magdumdom sa halimbawa ni Jehova. Naghambal pa gani si Jehova gikan sa langit sa pagpabutyag sang iya kahamuot kag paghigugma sa iya Anak. (Mateo 3:17; 17:5) Daw ano gid nga pagpalig-on ang mahimo nga nabatyagan ni Jesus! Sing kaanggid, ang mga kabataan nagalig-on man kag nagabakod kon mabatian nila ang ila mga ginikanan nga bunayag nga nagapabutyag sing gugma kag kahamuot.

19. Ngaa importante ang disiplina, kag ano nga pagkabalanse ang dapat panikasugan sang Cristianong mga ginikanan?

¹⁹ Sa pagkamatuod, ang gugma sang mga ginikanan indi lamang mapabutyag paagi sa mga pulong.  Ang gugma ilabi na nga ginapabutyag paagi sa buhat. Ang pag-aman sing materyal kag espirituwal nga mga kinahanglanon mahimo mangin pagpabutyag sang gugma sang ginikanan, ilabi na kon ginahimo ini sang mga ginikanan sa mahigugmaon nga paagi. Dugang pa, ang pagdisiplina isa ka importante nga pagpabutyag sang gugma sang ginikanan. Sa pagkamatuod, “ang ginahigugma ni Jehova ginadisiplina niya.” (Hebreo 12:6) Sa pihak nga bahin, ang indi pagdisiplina isa ka pagpabutyag sing kaugot sang ginikanan! (Hulubaton 13:24) Pirme balanse si Jehova sa pagpadapat sing disiplina “sa nagakaigo nga kabaskugon.” (Jeremias 46:28) Ining pagkabalanse indi pirme mahapos para sa di-himpit nga mga ginikanan. Walay sapayan, takus gid ang tanan nga panikasog nga huptan ining pagkabalanse. Ang malig-on kag mahigugmaon nga disiplina nagabulig sa bata nga magtubo agod mangin malipayon kag mabungahon ang iya kabuhi kon magdaku sia. (Hulubaton 22:6) Indi bala nga amo sini ang luyag sang kada Cristianong ginikanan para sa iya bata?

20. Paano mahatagan sang mga ginikanan ang ila kabataan sing daku nga posibilidad nga “pilion ang kabuhi”?

²⁰ Mga ginikanan, kon himuon ninyo ang importante nga buluhaton nga ginhatag ni Jehova sa inyo​—⁠ang pag-aman sing materyal, espirituwal, kag emosyonal nga mga kinahanglanon sang inyo mga kabataan​—⁠daku gid ang padya. Nian, ginahatag ninyo sa inyo kabataan ang daku nga posibilidad nga ‘pilion ang kabuhi’ kag busa ‘padayon nga mabuhi.’ (Deuteronomio 30:19) Ang mga kabataan nga nagapili nga alagaron si Jehova kag nagapabilin sa dalanon padulong sa kabuhi samtang nagahamtong sila, nagahatag gid sa ila mga ginikanan sing daku katama nga kalipay. (Salmo 127:3-5) Ining kalipay magapadayon tubtob sa walay katubtuban! Apang, paano madayaw sang mga pamatan-on si Jehova karon? Binagbinagon ining topiko sa masunod nga artikulo.

[Mga nota]

Paano Mo Sabton?

• Ano ang mahimo sang mga ginikanan agod maaman ang mga kinahanglanon sang ila kabataan sa

• materyal?

• espirituwal?

• emosyon?

[Mga Pamangkot sa Pagtinuon]

[Retrato sa pahina 18]

Madamo nga pispis ang maukod nga nagapangabudlay agod maamanan ang ila mga boto

[Retrato sa pahina 20]

Dapat anay magpalambo sang ila kaugalingon nga espirituwalidad ang mga ginikanan

[Retrato sa pahina 20, 21]

Dapat mangita sing mga kahigayunan ang mga ginikanan nga matudluan ang ila kabataan tuhoy sa Manunuga

[Retrato sa pahina 22]

Ang mga kabataan nagalig-on kon mabatyagan nila ang kahamuot sang ila ginikanan