Mga Pamatan-on, Dayawa Ninyo si Jehova!

“Dayawa ninyo si Jehova gikan sa duta, . . . kamo nga mga pamatan-on nga lalaki kag kamo man nga mga ulay.”​—⁠SALMO 148:​7, 12.

1, 2. (a) Ano nga mga pagdumili ang nahibaluan gid sang mga pamatan-on? (b) Ngaa indi dapat magsunggod ang mga pamatan-on sa mga pagdumili nga ginapahamtang sang ila mga ginikanan sa ila?

NAKAHIBALO gid ang mga pamatan-on kon ano ang indi pa nila puede himuon. Madamo sa ila ang magasugid sa imo kon ano dapat ang edad nila agod tugutan sila nga magtabok sa dalan nga sila lang ukon magpulaw ukon magmaneho sing salakyan. Kon kaisa, mahimo magbatyag ang isa ka pamatan-on nga madamo sang iya ginapangabay ang masami ginasabat sing, “Hulata lang kon daku ka na.”

² Kamo nga mga pamatan-on nakahibalo nga ang inyo mga ginikanan nagabatyag nga ining mga pagdumili maalamon gid agod maamligan kamo. Pat-od nga nahibaluan man ninyo nga nahamuot gid si Jehova kon ginatuman ninyo ang inyo mga ginikanan. (Colosas 3:20) Apang, nagbatyag na bala kamo nga daw wala pa kamo sing mahimo sa inyo kabuhi? Ang tanan bala nga importante nga butang ginadumili sa inyo bangod bata pa kamo? Indi gid ina matuod! May hilikuton karon nga mas importante pa sangsa bisan ano nga kahigayunan nga mahimo nga ginahulat  ninyo. Kamo nga mga pamatan-on ginatugutan bala sa pagpakigbahin sa sining hilikuton? Wala lamang kamo ginatugutan​—⁠sa katunayan ginaagda pa kamo sang Labing Mataas nga Dios mismo!

3. Ginaagda ni Jehova ang mga pamatan-on nga makigbahin sa ano nga pribilehiyo, kag ano nga mga pamangkot ang binagbinagon naton karon?

³ Ano nga hilikuton ang ginapatuhuyan naton? Talupangda ang mga tinaga sang aton tema nga teksto para sa sining artikulo: “Dayawa ninyo si Jehova gikan sa duta, . . . kamo nga mga pamatan-on nga lalaki kag kamo man nga mga ulay, kamo nga mga tigulang nga lalaki pati na ang mga bata nga lalaki.” (Salmo 148:​7, 12) Ginsambit sa sini nga teksto ang inyo daku nga pribilehiyo: Sarang ninyo madayaw si Jehova. Subong pamatan-on, nalipay bala kamo sa pagpakigbahin sa sining hilikuton? Madamo ang nalipay sa sini. Agod mahangpan naton kon ngaa, binagbinagon naton ang tatlo ka pamangkot. Una, ngaa dapat ninyo dayawon si Jehova? Ikaduha, paano ninyo sia madayaw sing epektibo? Ikatlo, san-o maayo magsugod sa pagdayaw kay Jehova?

Ngaa Dapat Dayawon si Jehova?

4, 5. (a) Suno sa ika-148 nga Salmo, yara kita sa anong dalayawon nga kahimtangan? (b) Paano ang mga tinuga nga indi makahambal ukon makapangatarungan makadayaw gihapon kay Jehova?

⁴ Ang panguna nga rason kon ngaa dapat dayawon si Jehova bangod sia amo ang Manunuga. Ang ika-148 nga Salmo nagabulig sa aton nga magkonsentrar sa sining kamatuoran. Hunahunaa lamang: Kon nagapalapit ka sa isa ka daku nga grupo sang mga tawo nga dulungan nga nagaamba sing isa ka matahom, makapahulag nga ambahanon, ano ang mabatyagan mo? Ano kon ang mga liriko sang ila ambahanon nahibaluan mo nga matuod, ginapabutyag ang mga panghunahuna nga nahibaluan mo nga importante, makalilipay, kag makapalig-on? Luyag mo bala tun-an ang liriko kag mag-entra sa pag-amba? Mahimo amo sina ang himuon sang kalabanan sa aton. Bueno, ginapakita sang ika-148 nga Salmo nga yara ka sa kahimtangan nga kaanggid sa sini apang mas labi pa ka dalayawon. Ginalaragway sining salmo ang isa ka daku nga kadam-an, nga ang tanan nagadayaw kay Jehova sing dungan. Apang, kon basahon mo ang salmo, may matalupangdan ka nga di-kinaandan. Ano ini?

⁵ Madamo sa mga dumalayaw nga ginlaragway sa Salmo 148 ang indi makahambal ukon makapangatarungan. Halimbawa, mabasa naton ang adlaw, bulan, mga bituon, niebe, hangin, mga bukid, kag mga bungyod nga nagadayaw kay Jehova. Paano madayaw sining walay-kabuhi nga mga tinuga si Jehova? (Bersikulo 3, 8, 9) Sa pagkamatuod, pareho man sa pagdayaw nga ginahimo sang mga kahoy, mga tinuga sa dagat, kag sang mga kasapatan. (Bersikulo 7, 9, 10) Nakakita ka na bala sing isa ka matahom nga pagtunod sang adlaw ukon sing ugsad nga nagalakbay sa kahawaan nga puno sing mga bituon ukon naham-ot sa nagahinampang nga mga kasapatan ukon nahayanghag sa isa ka matahom nga lugar? Kon amo “nabatian” mo ang ambahanon sang pagdayaw gikan sa mga tinuga. Ang tanan nga ginhimo ni Jehova nagapahanumdom sa aton nga sia ang labing gamhanan nga Manunuga, nga wala na sing iban pa sa uniberso ang mas gamhanan, mas maalam, ukon mas mahigugmaon sangsa iya.​—⁠Roma 1:20; Bugna 4:11.

6, 7. (a) Ginalaragway sang ika-148 nga Salmo ang anong intelihente nga mga tinuga nga nagadayaw kay Jehova? (b) Ngaa mahimo mapahulag kita nga dayawon si Jehova? Iilustrar.

⁶ Ginalaragway man sang ika-148 nga Salmo ang intelihente nga mga tinuga nga nagadayaw kay Jehova. Sa bersikulo 2 makita naton ang langitnon nga mga “hangaway” ni Jehova, ang mga anghel, nga nagadayaw sa Dios. Sa bersikulo 11, ang gamhanan kag maimpluwensia nga mga tawo, subong sang mga hari kag mga hukom, ginaagda nga magbuylog sa pagdayaw. Kon ang gamhanan nga mga anghel nalipay gani sa pagdayaw kay Jehova, sin-o nga tawo ang makasiling nga tuman sia ka importante para dayawon si Jehova? Nian, sa bersikulo 12 kag 13, kamo nga mga pamatan-on ginaagda nga magbuylog kag magdayaw man kay Jehova. Napahulag bala kamo sa paghimo sini?

⁷ Binagbinaga ining ilustrasyon. Kon may yara kamo suod nga abyan nga may tumalagsahon nga abilidad​—⁠ayhan sa isport, taliambong, ukon musika​—⁠sugiran mo bala ang imo pamilya kag ang imo mga abyan tuhoy sa iya? Wala sing duhaduha nga amo sina ang himuon mo. Ti, amo man sini ang mangin epekto sa aton kon tun-an naton ang mga ginhimo ni Jehova. Halimbawa, ang Salmo 19:​1, 2 nagasiling nga ang mabituon nga kalangitan “nagapahayag sing pulong.” Kon tuhoy sa aton, kon  hunahunaon naton ang makatilingala nga mga butang nga ginhimo ni Jehova, pat-od nga indi gid kita makapugong nga magpakigsugilanon sa iban tuhoy sa aton Dios.

8, 9. Ano ang mga rason ngaa luyag ni Jehova nga dayawon naton sia?

⁸ Ang isa pa ka rason kon ngaa dapat dayawon si Jehova amo bangod luyag niya nga himuon naton ini. Ngaa? Bangod bala kay nagakinahanglan sia sing pagdayaw gikan sa mga tawo? Indi. Kita nga mga tawo nagakinahanglan kon kaisa sing pagdayaw, apang mas mataas si Jehova sangsa aton. (Isaias 55:8) Wala sia sing mga pagduhaduha tuhoy sa iya kaugalingon ukon sa iya mga kinaiya. (Isaias 45:5) Apang, luyag niya nga dayawon naton sia kag nahamuot sia kon ginahimo naton ini. Ngaa? Binagbinaga ang duha ka rason. Una, nakahibalo sia nga kinahanglan naton sia dayawon. Gindesinyo niya kita nga may espirituwal nga kinahanglanon, isa ka kinahanglanon nga magsimba. (Mateo 5:3) Ang paghimo naton sini nga kinahanglanon nagapahamuot kay Jehova, kaangay sa kahamuot nga mabatyagan sang imo mga ginikanan kon makita nila nga ginakaon mo ang pagkaon nga maayo para sa imo.​—⁠Juan 4:34.

⁹ Ikaduha, nakahibalo si Jehova nga kinahanglan mabatian sang iban nga tawo nga ginadayaw naton sia. Ginsulat ni apostol Pablo ining mga pinamulong sa mas hoben nga si Timoteo: “Hatagi sing dalayon nga igtalupangod ang imo kaugalingon kag ang imo panudlo. Magpadayon ka sa sining mga butang, kay sa paghimo sini maluwas mo ang imo kaugalingon kag ang mga nagapamati sa imo.” (1 Timoteo 4:16) Huo, kon ginatudluan mo ang iban tuhoy kay Jehova nga Dios, nga ginadayaw sia, makilala man nila si Jehova. Ini nga ihibalo makadul-ong sa ila dayon nga kaluwasan!​—⁠Juan 17:3.

10. Ngaa ginapahulag kita nga dayawon ang aton Dios?

¹⁰ May isa pa ka rason kon ngaa dapat dayawon si Jehova. Nadumduman mo bala ang ilustrasyon tuhoy sa imo maabilidad nga abyan. Kon mabatian mo ang iban nga nagasugid sing kabutigan tuhoy sa iya, nga ginapasipalahan ang iya maayo nga ngalan, indi bala nga mangin kapin ka pa gid ka determinado nga dayawon sia? Si Jehova lapnag nga ginapasipalahan sa sining kalibutan. (Juan 8:44; Bugna 12:9) Busa ang mga nagahigugma sa iya napahulag sa pagsugid sing kamatuoran tuhoy sa iya, nga nagatadlong sing sayop nga impormasyon. Luyag mo man bala ipabutyag ang imo gugma kag apresasyon kay Jehova kag ipakita nga luyag mo sia mangin Manuggahom sa baylo sang iya panguna nga kaaway, si Satanas? Mahimo mo ini tanan paagi sa pagdayaw kay Jehova. Nian, ang masunod nga pamangkot amo ang kon paano mo sia madayaw.

Kon Paano Ginadayaw sang mga Pamatan-on si Jehova

11. Ano nga mga halimbawa sa Biblia ang nagapakita nga ang mga pamatan-on mahimo mangin epektibo gid sa pagdayaw kay Jehova?

¹¹ Ginapakita sang Biblia nga sa masami epektibo gid ang mga pamatan-on sa pagdayaw kay Jehova. Halimbawa, may isa ka Israelinhon nga bata nga babayi nga ginbihag anay sang mga Sirianhon. Maisugon nga nagpanaksi sia sa iya agalon nga babayi tuhoy sa manalagna ni Jehova nga si Eliseo. Ang iya ginsiling nagdul-ong sa isa ka milagro, kag isa ka daku nga panaksi ang nahatag. (2 Hari 5:1-17) Si Jesus nagpanaksi man sing maisugon sang bata pa sia. Sa tanan nga hitabo nga mahimo kuntani narekord sa Kasulatan tuhoy sa iya pagkapamatan-on, isa lang ang ginpili ni Jehova, ang natabo sang ang 12-anyos nga si Jesus maisugon nga  nagpamangkot sa relihioso nga mga manunudlo sa templo sa Jerusalem kag natingala sila sa iya paghangop sa mga dalanon ni Jehova.​—⁠Lucas 2:46-49.

12, 13. (a) Ano ang ginhimo ni Jesus sa templo pila ka adlaw antes sang iya kamatayon, kag ano ang nangin epekto sini sa mga tawo nga yara didto? (b) Ano ang ginbatyag ni Jesus sa pagdayaw sang mga bata nga lalaki?

¹² Sang hamtong na si Jesus, gin-inspirar man niya ang mga kabataan nga dayawon si Jehova. Halimbawa, mga pila ka adlaw antes sang iya kamatayon, naghinguyang sing tion si Jesus sa templo sa Jerusalem. Naghimo sia sing “makatilingala nga mga butang” didto, siling sang Biblia. Gintabog niya ang mga nagahimo sa sagrado nga duog nga lungib sang mga kawatan. Gin-ayo man niya ang mga bulag kag mga piang. Ang tanan nga yara didto, ilabi na ang mga relihiosong lider, dapat napahulag kuntani sa pagdayaw kay Jehova kag sa iya Anak, ang Mesias. Apang, sing makapasubo, madamo sadto nga panahon ang wala nagsambit sing amo nga mga pagdayaw. Nakahibalo sila nga si Jesus ginpadala sang Dios, apang nahadlok sila sa relihioso nga mga lider. Apang, isa ka grupo sang mga tawo ang naghambal sing maisugon. Nakahibalo bala kamo kon sin-o sila? Ang Biblia nagsiling: “Sang nakita sang mga pangulong saserdote kag mga escriba ang makatilingala nga mga butang nga iya [ni Jesus] ginhimo kag ang mga bata nga lalaki nga nagasinggit sa templo kag nagasiling: ‘Magluwas ka, pangamuyo namon, sa Anak ni David!’ naakig sila kag nagsiling [kay Jesus]: ‘Nabatian mo bala ang ginasiling nila sini?’”​—⁠Mateo 21:​15, 16; Juan 12:42.

¹³ Nagalaum ang mga saserdote nga pahipuson ni Jesus ang mga bata nga nagdayaw sa iya. Ginpahipos bala niya sila? Wala gid! Ginsabat ni Jesus ang mga saserdote: “Huo. Wala bala ninyo mabasahi, ‘Gikan sa baba sang kabataan kag mga nagasuso magaaman ka sing pagdayaw’?” Maathag nga nahamuot gid si Jesus kag ang iya Amay sa pagdayaw sang mga bata nga lalaki. Ginhimo sadtong mga kabataan ang dapat kuntani ginhimo sang mga adulto. Sa ila lamharon nga mga panghunahuna, maathag ini katama. Nakita nila ining tawo nga nagahimo sing makatilingala nga mga butang, nagahambal nga may kaisog kag pagtuo, kag nagapakita sing daku nga gugma sa Dios kag sa iya katawhan. Husto gid ang ginsiling niya tuhoy sa kon sin-o sia​—⁠ang ginsaad nga “Anak ni David,” ang Mesias. Ginpadyaan ang pagtuo sang mga bata nga lalaki kag nangin pribilehiyo pa gani nila ang pagtuman sing tagna.​—⁠Salmo 8:2.

14. Paano ang mga dulot nga ginaangkon sang mga pamatan-on makasangkap sa ila sa pagdayaw sa Dios?

¹⁴ Ano ang matun-an naton sa sining mga halimbawa? Nga mahimo gid mangin epektibo nga mga dumalayaw ni Jehova ang mga pamatan-on. Masami nga may pribilehiyo sila nga makita sing maathag kag sing simple ang kamatuoran, nga ginapabutyag ang ila pagtuo nga may pagkahanuot kag kakugi. May dulot man sila nga ginsambit sa Hulubaton 20:29: “Ang katahom sang pamatan-on nga mga lalaki amo ang ila kusog.” Huo, kamo nga mga pamatan-on may yara kusog kag enerhiya​—⁠matuod gid nga mga ikasarang sa pagdayaw kay Jehova. Paano ninyo magamit sing epektibo ining mga dulot?

Paano Mo Madayaw si Jehova?

15. Agod madayaw si Jehova sing epektibo, ano nga motibo ang kinahanglanon?

¹⁵ Ang pagkaepektibo nagahalin sa tagipusuon. Indi mo madayaw sing epektibo si Jehova kon ginahimo mo lamang ini bangod luyag sang iban nga himuon mo ini. Dumduma nga ang labing  daku sa tanan nga sugo amo ini: “Higugmaa si Jehova nga imo Dios sa bug-os mo nga tagipusuon kag sa bug-os mo nga kalag kag sa bug-os mo nga hunahuna.” (Mateo 22:37) Nakilala mo bala si Jehova sing personal paagi sa imo kaugalingon nga pagtuon sang iya Pulong? Subong resulta sa sinang pagtuon mapalambo mo ang gugma kay Jehova. Ang kinaugali nga paagi sa pagpabutyag sinang gugma amo ang pagdayaw sa iya. Kon ang imo motibo putli kag makusog, handa ka na sa pagdayaw kay Jehova nga may kapagsik.

16, 17. Ano ang papel sang paggawi sa pagdayaw kay Jehova? Iilustrar.

¹⁶ Karon, antes mo binagbinagon kon ano ang imo ihambal, binagbinaga anay kon paano ka dapat maggawi. Kon ang Israelinhon nga bata nga babayi sang panahon ni Eliseo di-maayo ang batasan, di-matinahuron, ukon di-bunayag, sa banta mo mamati ayhan ang mga Sirianhon nga nagbihag sa iya sa iya ginsugid tuhoy sa manalagna ni Jehova? Mahimo nga indi gid. Sing kaanggid, mas pamatian ka sang mga tawo kon makita nila nga matinahuron ka, bunayag kag maayo sing batasan. (Roma 2:21) Binagbinaga ining halimbawa.

¹⁷ Ang isa ka 11-anyos nga bata nga babayi sa Portugal nakaatubang sing pag-ipit sa eskwelahan nga magselebrar sing mga kapiestahan nga supak sa iya nahanas sa Biblia nga konsiensia. Matinahuron nga ginpaathag niya sa iya maestra kon ngaa nagapangindi sia, apang ginyubit sia sang iya maestra. Pagligad sang tion, sulitsulit nga gintinguhaan sang maestra nga pakahuy-an sia kag ginayubit ang iya relihion. Apang, nagpabilin nga matinahuron ang bata nga babayi. Pagligad sang mga tinuig, ining pamatan-on nga utod nga babayi nag-alagad subong regular payunir, isa ka bug-os tion nga ministro. Sa isa ka kombension, nagtan-aw sia sa mga ginabawtismuhan kag kilala niya ang isa sa ila. Ang iya anay maestra! Pagkatapos sang ila paghaksanay samtang nagahinibi, nagsiling ang maestra nga wala gid niya malipatan ang matinahuron nga paggawi sang iya estudyante. May isa ka Saksi nga nagduaw sa iya, kag ginsugid sang maestra ang paggawi sang iya anay estudyante. Subong resulta, nasugdan ang isa ka pagtuon sa Biblia, kag ginbaton sining babayi ang kamatuoran. Huo, ang inyo paggawi mahimo gid mangin isa ka mabaskog nga paagi sa pagdayaw kay Jehova!

18. Ano ang puede himuon sang isa ka pamatan-on kon nagapangalag-ag sia sa pagsugod sing mga pagsugilanunay tuhoy sa Biblia kag kay Jehova nga Dios?

¹⁸ Nabudlayan ka bala kon kaisa sa pagsugod sing mga pagpakigsugilanon sa eskwelahan tuhoy sa imo pagtuo? Amo man sina ang ginabatyag sang iban nga mga pamatan-on. Apang, mahimo mo nga ang iban ang magapamangkot sa imo tuhoy sa imo pagtuo. Halimbawa, kon legal kag ginatugutan ini, ngaa indi ka magdala sing pasad sa Biblia nga mga publikasyon kag basahon ini sa tion sang tigpalanyaga ukon sa iban pa nga tion nga puede magbasa? Mahimo nga mamangkot ang imo mga kaeskwela kon ano ang imo ginabasa. Paagi sa pagsabat sa ila kag pagsugid sa ila sing makawiwili nga punto sa artikulo ukon sa libro nga imo ginabasa, masapwan mo nga mahapos lang magsugod sing pagpakigsugilanon. Dumduma nga magpamangkot, agod mahibaluan mo kon ano ang ginapatihan sang imo kaeskwela. Mamati sing matinahuron kag ipaambit kon ano ang imo natun-an sa Biblia. Subong sang ginapakita sang mga eksperiensia sa pahina 29, madamo nga pamatan-on ang nagadayaw sa Dios sa eskwelahan. Nagapahalipay gid ini sa ila kag nagabulig sa madamo nga makilala si Jehova.

19. Paano mangin labi ka epektibo ang mga pamatan-on sa pamalaybalay nga ministeryo?

¹⁹ Ang pamalaybalay nga ministeryo amo ang labing epektibo nga paagi sa pagdayaw kay Jehova. Kon wala ka pa nagapakigbahin sa sini, ngaa indi ini himuon nga tulumuron? Kon nagapakigbahin  ka na, makapahamtang ka bala sing dugang pa nga mga tulumuron? Halimbawa, sa baylo nga amo lang gihapon nga introduksion ang isiling mo sa kada balay, mangita sing paagi nga mag-uswag paagi sa pagpangayo sing panugda sa imo mga ginikanan ukon sa iban pa nga mga eksperiensiado. Tun-i kon paano magamit ang Biblia sing kapin, makahimo sing epektibo nga mga pagduaw liwat, kag makasugod sing pagtuon sa Biblia. (1 Timoteo 4:15) Kon padayon mo nga dayawon si Jehova sa sining mga paagi, mangin labi ka pa ka epektibo, kag labi nga mangin malipayon ka sa imo ministeryo.

San-o Ka Dapat Magsugod sa Pagdayaw kay Jehova?

20. Ngaa indi dapat magbatyag ang mga pamatan-on nga bata pa sila agod magdayaw kay Jehova?

²⁰ Sa tatlo ka pamangkot sa sining paghinun-anon, ang sabat sa sining pinakaulihi amo ang pinakasimple. Talupangda ang direkta nga sabat sang Biblia: “Dumduma, karon, ang imo Dakung Manunuga sa mga adlaw sang imo pagkapamatan-on.” (Manugwali 12:1) Huo, karon na ang tion sa pagsugod sa pagdayaw kay Jehova. Mahapos lang magsiling: “Kabata pa sa akon para magdayaw kay Jehova. Wala pa ako sing eksperiensia. Hulaton ko lang anay tubtob magdaku na ako.” Indi lang ikaw ang nagabatyag sina. Halimbawa, ang pamatan-on nga si Jeremias, nagsiling kay Jehova: “Abaw, O Soberanong Ginuong Jehova! Yari karon indi gid ako makahibalo maghambal, kay bata pa ako.” Ginpasalig sia ni Jehova nga indi sia dapat magkahadlok. (Jeremias 1:​6, 7) Gani man, wala kita sing dapat kahadlukan kon ginadayaw naton si Jehova. Wala sing halit nga maabot sa aton nga indi mabaliskad ni Jehova.​—⁠Salmo 118:6.

21, 22. Ngaa ginpaanggid sa tun-og ang mga pamatan-on nga nagadayaw kay Jehova, kag ngaa makapalig-on ining pagpaanggid?

²¹ Busa, ginalaygayan namon kamo nga mga pamatan-on: Indi kamo mangalag-ag sa pagdayaw kay Jehova! Karon na ang pinakamaayo nga tion sa pagpakigbahin sa labing importante nga hilikuton sa duta karon samtang bata pa kamo. Kon himuon ninyo ini, mangin bahin kamo sang isa ka dalayawon​—⁠bug-os uniberso nga pamilya sang mga nagadayaw kay Jehova. Nalipay si Jehova nga nalakip kamo sa sini nga pamilya. Talupangda ining inspirado nga mga pulong nga ginpatuhoy sang salmista kay Jehova: “Ang imo katawhan magahalad sang ila kaugalingon sing kinabubut-on sa adlaw sang imo puwersa militar. Sa himaya sang pagkabalaan, gikan sa pamanagbanag sang kaagahon, kaupod mo ang mga pamatan-on kaangay sang mga tulo sang tun-og.”​—⁠Salmo 110:3.

²² Ang mga tun-og nga nagainggat kon kaagahon matahom nga talan-awon, indi bala? Makarepresko ini, nagabulubadlak, kag indi maisip ang kadamuon. Amo sina ang pagtan-aw ni Jehova sa inyo nga mga pamatan-on nga matutom nga nagadayaw sa iya sa sining makahalanguyos nga mga tion. Maathag nga ang inyo pagpili nga dayawon si Jehova nagapahalipay sa iya tagipusuon. (Hulubaton 27:11) Busa, kamo nga mga pamatan-on, dayawa ninyo si Jehova!

Paano Mo Sabton?

• Ano ang pila ka importante nga rason sa pagdayaw kay Jehova?

• Ano ang mga halimbawa sa Biblia nga nagapakita nga ang mga pamatan-on mahimo mangin epektibo nga mga dumalayaw ni Jehova?

• Paano madayaw sang mga pamatan-on si Jehova karon?

• San-o dapat magsugod sa pagdayaw kay Jehova ang mga pamatan-on, kag ngaa?

[Mga Pamangkot sa Pagtinuon]

[Mga retrato sa pahina 25]

Kon may abyan ka nga maabilidad, indi mo bala ini isugid sa iban?

[Retrato sa pahina 27]

Basi mangin interesado ang imo mga kaeskwela sa imo mga pagtuluuhan

[Retrato sa pahina 28]

Kon luyag mo mag-uswag sa imo ministeryo, mangayo sing mga panugda sa mas eksperiensiado nga mga Saksi