‘Pagdala sing Maayong Balita Tuhoy sa Butang nga Maayo Pa’

“Daw ano katahom sa ibabaw sang mga bukid ang mga tiil sang isa . . . nga nagadala sing maayong balita tuhoy sa butang nga maayo pa.” —⁠Isaias 52:7.

1, 2. (a) Anong makakulugmat nga mga butang ang nagakatabo adlaw-adlaw? (b) Ano ang ginabatyag sang madamo nga tawo kon pirme sila makabati sing malain nga balita?

SA KARON, halos puro malain nga mga balita ang mabatian sang mga tawo sa bug-os nga kalibutan. Pagbukas nila sang radyo, mabatian nila ang makakulugmat nga mga balita tuhoy sa makamamatay nga mga balatian nga nagasalot sa duta. Pagtan-aw nila sang balita sa telebisyon, makita nila ang di-malimtan nga larawan sang gutom nga mga kabataan nga nagapakitluoy sing bulig. Pagpudyot nila sang pamantalaan, mabasa nila ang paglupok sang bomba nga nagaguba sang mga tinukod kag nagapatay sang madamong inosente nga tawo.

² Huo, nagakatabo adlaw-adlaw ang makakulugmat nga mga butang. Ang danyag sining kalibutan pat-od nga nagabalhin​​—⁠kag labi pa nga nagalain. (1 Corinto 7:31) Ang isa ka magasin sang mga balita sa Nakatundan nga Europa nagkomento nga kon kaisa ang bug-os nga kalibutan daw “lamunon na sang kalayo.” Indi katingalahan nga nagadamo ang mga tawo nga ginasit-an! Minilyon ang nagabatyag kaangay sang isa ka tawo, nga sang ginpamangkot sa isa ka surbe tuhoy sa mga balita sa telebisyon sa Estados Unidos, sia nagsiling: ‘Pagkatapos makatan-aw sing balita, ginapung-aw gid ako. Puro malain ini nga balita. Makapulung-aw gid ini.’

Ang Balita nga Dapat Mabatian sang Tanan

3. (a) Ano nga maayong balita ang ginabantala sang Biblia? (b) Ngaa ginapabaloran mo ang maayong balita sang Ginharian?

³ Sa sining makapulung-aw nga kalibutan, may maayo pa bala nga balita nga mabatian? Huo! Makalulugpay mahibaluan nga ang Biblia nagabantala sing maayong balita. Ini amo ang balita nga ang balatian, gutom, krimen, inaway, kag ang tanan nga sahi sang pagpamigos pagadulaon sang Ginharian sang Dios. (Salmo 46:⁠9; 72:12) Indi bala nga amo ini ang balita nga dapat mabatian sang tanan? Amo gid sina ang ginahunahuna sang mga Saksi ni Jehova. Gani, kilala sila bisan diin tungod sa dalayon nila nga pagpanikasog nga ibantala ang maayong balita sang Ginharian sang Dios sa mga tawo sa tanan nga kapungsuran.​—⁠Mateo 24:14.

4. Anong mga aspekto sang aton ministeryo ang binagbinagon naton sa sini kag sa masunod nga artikulo?

⁴ Apang, ano ang himuon naton agod padayon nga makapakigbahin sing makaalayaw kag makahulugan sa pagbantala sining maayong balita​​—⁠bisan sa mga teritoryo nga diutay lang ang nagapamati? (Lucas 8:15) Ang malip-ot nga pagrepaso sa tatlo ka importante nga aspekto sang aton pagbantala nga hilikuton pat-od gid nga makabulig. Mausisa naton (1) ang aton mga motibo, ukon kon ngaa nagabantala kita; (2) ang aton mensahe, ukon kon ano ang aton ginabantala; kag (3) ang aton mga pamaagi, ukon kon paano kita nagabantala. Paagi sa paghupot sang aton mga motibo nga putli, sang aton mensahe nga maathag, kag sang aton mga pamaagi nga epektibo, ginahatagan naton sing kahigayunan nga mabatian sang madamo nga sahi sang mga tawo ang pinakamaayo gid nga balita​​—⁠ang maayong balita sang Ginharian sang Dios.⁠ *

 Kon Ngaa Nagapakigbahin Kita sa Pagbantala sing Maayong Balita

5. (a) Labaw sa tanan, ano ang nagapahulag sa aton nga makigbahin sa ministeryo? (b) Ngaa ang pagtuman naton sa sugo sang Biblia nga magbantala isa ka pagpakita sing gugma sa Dios?

⁵ Binagbinagon naton ang nahauna nga aspekto​​—⁠ang aton mga motibo. Ngaa ginabantala naton ang maayong balita? Bangod sang rason nga kaangay man sang kay Jesus. Nagsiling sia: “Ginahigugma ko ang Amay.” (Juan 14:31; Salmo 40:8) Labaw sa tanan, ginapahulag kita sang aton gugma sa Dios. (Mateo 22:​37, 38) Ginaangot sang Biblia ang gugma sa Dios sa ministeryo, kay nagasiling ini: “Amo ini ang kahulugan sang gugma sa Dios, nga sundon naton ang iya mga sugo.” (1 Juan 5:⁠3; Juan 14:21) Ang mga sugo sang Dios nagalakip bala sang ‘paglakat kag paghimo sing mga disipulo’? (Mateo 28:19) Huo. Matuod nga si Jesus ang nagpamulong sini, apang gikan ini kay Jehova. Paano? Si Jesus nagpaathag: “Wala ako nagahimo sing bisan ano sa akon kaugalingon nga pagbuot; kundi kon ano ang gintudlo sa akon sang Amay, amo ini ang mga butang nga ginapamulong ko.” (Juan 8:28; Mateo 17:5) Gani, kon ginatuman naton ang sugo nga magbantala, ginapakita naton kay Jehova nga ginahigugma naton sia.

6. Sa anong mga paagi ginapahulag kita sang gugma sa Dios nga magbantala?

⁶ Ang gugma kay Jehova nagapahulag man sa aton nga magbantala bangod luyag naton pamatud-an nga ang mga kabutigan nga ginapalapnag ni Satanas batok sa iya di-matuod. (2 Corinto 4:4) Ginduhaduhaan ni Satanas ang pagkamatarong sang paggahom sang Dios. (Genesis 3:1-5) Subong mga Saksi ni Jehova, handum gid naton nga makigbahin sa pagbuyagyag sang mga pagpasipala ni Satanas kag sa pagpakabalaan sang ngalan sang Dios sa katawhan. (Isaias 43:10-12) Dugang pa, nagapakigbahin kita sa ministeryo bangod nahibaluan naton ang mga kinaiya kag mga dalanon ni Jehova. Nangin suod kita sa iya kag luyag naton sugiran ang iban tuhoy sa aton Dios. Sa katunayan, ang pagkaayo ni Jehova kag ang iya matarong nga mga dalanon nagapahalipay gid sa aton amo nga indi naton mapunggan ang aton kaugalingon sa paghambal tuhoy sa iya. (Salmo 145:7-12) Napahulag kita nga isaysay ang iya kadayawan kag ihambal ang iya “pagkahalangdon” sa mga magapamati.​—⁠1 Pedro 2:⁠9; Isaias 43:21.

7. Magluwas sa gugma sa Dios, ano ang isa pa ka importante nga rason kon ngaa nagapakigbahin kita sa hilikuton nga pagbantala?

⁷ May isa pa ka importante nga rason kon ngaa padayon kita nga nagapakigbahin sa ministeryo: Luyag gid naton lugpayan ang mga napung-awan bangod sang pagdagsa sang malain nga mga balita kag ang mga nagaantos bangod sang nagkalainlain nga rason. Paagi sa sini, ginailog naton si Jesus. Halimbawa, tan-awon naton ang ginalaragway sa Marcos kapitulo 6.

8. Ano ang ginapakita sang rekord sa Marcos kapitulo 6 tuhoy sa balatyagon ni Jesus sa mga tawo?

⁸ Ang mga apostoles nagpauli gikan sa pagbantala kag ginsaysay nila kay Jesus ang tanan nga ginhimo nila kag gintudlo. Nakita ni Jesus nga ginakapoy ang mga apostoles, kag ginsingganan niya sila nga mag-upod sa iya agod “magpahuwayhuway.” Gani nagsakay sila sa bangka kag naglakbay padulong sa isa ka malinong nga duog. Ginsundan sila sang mga tawo, nga nagalagas sa baybayon, kag sang ulihi naabtan sila. Ano ang ginhimo ni Jesus? “Nakita niya ang dakung kadam-an,” siling sang rekord, “apang napahulag sia sang kaluoy sa ila, bangod subong sila sang mga karnero nga wala sing manugbantay. Kag nagsugod sia sa pagtudlo sa  ila sing madamo nga butang.” (Marcos 6:31-34) Bangod sang iya kaluoy, si Jesus padayon nga nagbantala sing maayong balita walay sapayan nga kapoy sia. Maathag gid nga si Jesus nahanuklog sa sining mga tawo. Nagbatyag sia sing kaawa sa ila.

9. Ano ang matun-an naton gikan sa rekord sa Marcos kapitulo 6 tuhoy sa husto nga motibo sa pagbantala?

⁹ Ano ang matun-an naton gikan sa sining rekord? Subong mga Cristiano, obligasyon naton nga magbantala sing maayong balita kag maghimo sing mga disipulo. Ginabaton naton ang aton responsibilidad nga ibantala ang maayong balita, kay kabubut-on sang Dios nga “ang tanan nga sahi sang mga tawo maluwas.” (1 Timoteo 2:4) Apang, wala naton ginahimo ang aton ministeryo bangod lamang nga obligasyon naton ini kundi bangod man sang aton pagkaawa. Kon nagabatyag gid kita sing kaawa sa mga tawo kaangay sa ginbatyag ni Jesus, ang aton tagipusuon magapahulag sa aton nga himuon ang tanan nga masarangan naton agod padayon nga ibantala ang maayong balita sa ila. (Mateo 22:39) Kon may amo kita sini nga maayong mga motibo sa pagpakigbahin sa ministeryo, mapahulag kita nga ibantala ang maayong balita sing walay langan.

Ang Aton Mensahe​—⁠Ang Maayong Balita sang Ginharian sang Dios

10, 11. (a) Paano ginlaragway ni Isaias ang mensahe nga aton ginabantala? (b) Paano ginbantala ni Jesus ang maayong balita tuhoy sa butang nga maayo pa, kag paano karon ginailog sang mga alagad sang Dios ang halimbawa ni Jesus?

¹⁰ Ano naman ang ikaduha nga aspekto sang aton ministeryo​—⁠ang aton mensahe? Ano ang aton ginabantala? Matahom nga ginlaragway ni manalagna Isaias ang mensahe nga ginabantala naton: “Daw ano katahom sa ibabaw sang mga bukid ang mga tiil sang isa nga nagadala sing maayong balita, ang isa nga nagabantala sing paghidait, ang isa nga nagadala sing maayong balita tuhoy sa butang nga maayo pa, ang isa nga nagabantala sing kaluwasan, ang isa nga nagasiling sa Sion: ‘Ang imo Dios nangin hari!’”​—⁠Isaias 52:7.

¹¹ Ang importante nga ekspresyon sa sining kasulatan, “ang imo Dios nangin hari,” nagapahanumdom sa aton sang mensahe nga dapat naton ibantala, nga amo, ang maayong balita sang Ginharian sang Dios. (Marcos 13:10) Talupangda man nga ginapakita sini nga bersikulo ang positibo nga kahulugan sang aton mensahe. Gingamit ni Isaias ang mga termino subong sang “kaluwasan,” “maayong balita,” “paghidait,” “butang nga maayo pa.” Mga siglo pagkatapos sang panahon ni Isaias, sang nahaunang siglo C.⁠E., talalupangdon nga gintuman ni Jesucristo ini nga tagna paagi sa pagpahamtang sing makugi nga halimbawa sa pagbantala sing balita tuhoy sa butang nga maayo pa​—⁠ang nagapakari nga Ginharian sang Dios. (Lucas 4:43) Sa karon, ilabi na sugod sang 1919, ginailog sang mga Saksi ni Jehova ang halimbawa ni Jesus paagi sa makugi nga pagbantala sing maayong balita tuhoy sa gintukod nga Ginharian sang Dios kag sa mga pagpakamaayo nga dala sini.

12. Ano ang epekto sang maayong balita sang Ginharian sa mga nagabaton sini?

¹² Ano ang epekto sang maayong balita sang Ginharian sa mga nagapamati sa sini? Kaangay sang panahon ni Jesus, ang maayong balita nagahatag man karon sing paglaum kag lugpay. (Roma 12:12; 15:4) Nagahatag ini sing paglaum sa mga bunayag  sing tagipusuon bangod nahibaluan nila nga may mabakod gid nga mga rason sa pagpati nga may maayo pa nga tion nga magaabot. (Mateo 6:​9, 10; 2 Pedro 3:13) Ini nga paglaum nagabulig gid sa mga mahinadlukon sa Dios nga huptan ang positibo nga pagtamod. Ang salmista nagsiling nga “indi [sila] mahadlok bisan sa malain nga balita.”​—⁠Salmo 112:​1, 7.

Ang Mensahe nga ‘Magabugkos sa mga Buong sing Tagipusuon’

13. Paano ginlaragway ni manalagna Isaias ang insigida nga mga pagpakamaayo nga maagom sang mga nagabaton sing maayong balita?

¹³ Dugang pa, ang maayong balita nga ginabantala naton nagahatag sing insigida nga kaumpawan kag kaayuhan sa mga nagapamati sa sini. Paano? Ginpakita ni manalagna Isaias ang pila sa mga pagpakamaayo sang nagtagna sia: “Ang espiritu sang Soberanong Ginuong Jehova yari sa akon, bangod nga ginhaplas ako ni Jehova sa pagwali sing maayong balita sa mga mahagop. Ginpadala niya ako sa pagbugkos sa mga buong sing tagipusuon, sa pagbantala sing kahilwayan sa mga bihag kag sa bug-os nga pagpamuklat sang mga mata bisan sa mga bilanggo; sa pagbantala sang tuig sang maayong kabubut-on ni Jehova kag sang adlaw sang pagtimalos sang aton Dios; sa paglugpay sa tanan nga nagalalaw.”​—⁠Isaias 61:​1, 2; Lucas 4:16-21.

14. (a) Ano ang ginapakita sang ekspresyon nga ‘magabugkos sa mga buong sing tagipusuon’ tuhoy sa mensahe sang Ginharian? (b) Paano naton mapabanaag ang pagkabalaka ni Jehova sa mga buong sing tagipusuon?

¹⁴ Suno sa sini nga tagna, paagi sa pagbantala sing maayong balita, si Jesus ‘magabugkos sa mga buong sing tagipusuon.’ Daw ano gid ka makatalandog nga paglaragway ang gingamit ni Isaias! Suno sa isa ka diksionaryo sa Biblia, ang Hebreong tinaga nga ginbadbad “pagbugkos” “masami ginagamit sa ‘pagbendahe,’ kag busa nagapatuhoy sa pagbulong kag sa pagpaayo sa napilasan.” Mahimo bugkusan sing bendahe ukon tela sang isa ka matinatapon nga nars ang nasamad nga bahin sang lawas sang biktima agod suportahan ini. Sa amo man nga paagi, kon nagabantala sing mensahe sang Ginharian, ginasuportahan ukon ginabuligan sang matinatapon nga mga manugbantala ang tanan nga nagapamati nga sa bisan paano nagaantos. Kag paagi sa pagbulig sa mga nagakinahanglan, ginapabanaag nila ang pagkabalaka ni Jehova. (Ezequiel 34:​15, 16) Ang salmista nagsiling tuhoy sa Dios: “Ginaayo niya ang mga may buong nga tagipusuon, kag ginabugkusan niya ang ila masakit nga mga bahin.”​—⁠Salmo 147:3.

Kon Paano Makabulig ang Mensahe sang Ginharian

15, 16. Anong matuodtuod nga mga halimbawa ang nagapakita kon paano ginabuligan kag ginapabakod sang mensahe sang Ginharian ang mga nagakinahanglan?

¹⁵ Ginapakita sang madamong matuodtuod nga mga halimbawa kon paano ginabuligan kag ginapabakod sang mensahe sang Ginharian ang mga buong sing tagipusuon. Binagbinaga si Oreanna, isa ka tigulang nga babayi sa Bagatnan nga Amerika, nga indi na luyag mabuhi. Ginduaw si Oreanna sang isa ka Saksi ni Jehova kag ginbasahan sia sang Biblia kag sang publikasyon nga Ang Akon Libro Sang mga Sugilanon sa Biblia.⁠ * Sang primero, samtang ginabasahan sia, ang ginapung-aw nga babayi nagapamati lamang nga nagahigda sa katre kag nagapiyong sang iya mga mata, nga nagapanghayhay sa tion kag tion. Apang, wala magdugay nagpanikasog sia sa pagpungko sa iya katre samtang ginabasahan. Sang ulihi, nagpungko na sia sa siya sa salas, kag nagahulat sa pag-abot sang nagatudlo sing Biblia sa iya. Nian, nagsugod sia sa pagtambong sa Cristianong mga miting sa Kingdom Hall. Bangod napalig-on sia sang mga natun-an niya sa mga miting, nagsugod sia sa pagtanyag sing mga literatura sa Biblia sa tanan nga nagalabay sa iya balay. Nian, sa edad nga 93, si Oreanna gintugmawan subong isa sa mga Saksi ni Jehova. Ang mensahe sang Ginharian nagpasag-uli sang iya handum nga mabuhi.​—⁠Hulubaton 15:30; 16:24.

¹⁶ Daku gid nga bulig ang mensahe sang Ginharian bisan sa mga tawo nga nakahibalo nga malapit na sila mapatay bangod sang ila balatian. Binagbinaga ang halimbawa ni Maria gikan sa Nakatundan nga Europa. Ilisipon na lang ang iya inadlaw bangod sang iya balatian kag nadulaan na sia sing paglaum. Ginapung-aw gid sia sang nasugilanon sia sang mga Saksi ni Jehova. Apang, sang matun-an niya ang tuhoy sa mga katuyuan sang Dios, ang iya kabuhi nakatigayon liwat sing katuyuan. Gintugmawan sia kag nangin aktibo sa pagbantala. Sa katapusan nga duha ka tuig sang iya kabuhi,  nagakilan ang iya mga mata sa paglaum kag kalipay. Napatay si Maria nga may mabakod nga paglaum sa pagkabanhaw.​—⁠Roma 8:​38, 39.

17. (a) Ano ang epekto sang mensahe sang Ginharian sa kabuhi sang mga nagabaton sini? (b) Sa anong mga paagi personal nga naeksperiensiahan mo nga si Jehova “nagapabangon sang tanan nga nagadungok”?

¹⁷ Ini nga mga report nagapamatuod kon ano ang mahimo sang mensahe sang Ginharian sa kabuhi sang mga tawo nga nagahandum nga mahibaluan ang kamatuoran sang Biblia. Ang mga indibiduwal nga nagapangalisod sa pagkapatay sang isa ka hinigugma makatigayon sing bag-ong kusog kon mahibaluan nila ang paglaum nga pagkabanhaw. (1 Tesalonica 4:13) Ang imol nga mga tawo nga nagahimakas agod mapakaon ang ila pamilya makasapo sing bag-ong dignidad kag kaisog kon mahibaluan nila nga indi gid sila pagpabay-an ni Jehova kon magmatutom sila sa iya. (Salmo 37:28) Sa bulig ni Jehova, madamong nagaantos sing depresyon ang amat-amat nga nakatigayon sing kusog nga kinahanglanon gid nila agod mabatas ini kag sa pila ka hitabo nalandas pa gani nila ina nga balatian. (Salmo 40:​1, 2) Sa pagkamatuod, paagi sa gahom nga ginaaman paagi sa iya Pulong, si Jehova karon “nagapabangon sang tanan nga nagadungok.” (Salmo 145:14) Paagi sa pagtalupangod kon paano ginalugpayan sang maayong balita sang Ginharian ang mga buong sing tagipusuon sa aton teritoryo kag sa Cristianong kongregasyon, ginapahanumdom kita sa liwat kag liwat nga yara sa aton ang pinakamaayo nga balita!​—⁠Salmo 51:17.

“Ang Akon Pagpangabay sa Dios Tungod sa Ila”

18. Paano naapektuhan si Pablo bangod sang pagsikway sang mga Judiyo sa maayong balita, kag ngaa?

¹⁸ Bisan pa ang aton mensahe nagaunod sing pinakamaayo nga balita, madamo ang nagasikway sini. Paano kita mahimo nga maapektuhan sini? Kaangay man kay apostol Pablo. Masunson sia nga nagbantala sa mga Judiyo, apang ginsikway sang kalabanan sa ila ang mensahe sang kaluwasan. Naapektuhan gid si Pablo bangod sang pagsikway nila. Ginbaton niya: “May daku ako nga kasubo kag kasakit nga walay langan sa akon tagipusuon.” (Roma 9:2) Naluoy si Pablo sa mga Judiyo nga ginbantalaan niya. Nagkasubo sia nga ginsikway nila ang maayong balita.

19. (a) Ngaa natural lang nga magkasubo kita kon kaisa? (b) Ano ang nakabulig kay Pablo agod padayon nga magbantala?

¹⁹ Ginabantala man naton ang maayong balita bangod sang aton pagkaawa. Gani, natural lang nga magkasubo kita kon ginasikway sang madamo nga tawo ang mensahe sang Ginharian. Ginapakita sini nga reaksion nga nabalaka gid kita sa espirituwal nga kaayuhan sang mga ginabantalaan naton. Apang, dapat naton dumdumon ang halimbawa ni apostol Pablo. Ano ang nakabulig sa iya agod padayon nga magbantala? Bisan pa nga nagkasubo kag nagkalisod sia bangod sang pagsikway sang mga Judiyo sa maayong balita, si Pablo wala magpangampo sa tanan nga Judiyo paagi sa paghunahuna nga indi na sila matabangan.  Naglaum sia nga may pila gihapon nga magabaton kay Cristo. Gani, tuhoy sa balatyagon niya sa indibiduwal nga mga Judiyo, si Pablo nagsulat: “Ang maayong kabubut-on sang akon tagipusuon kag ang akon pagpangabay sa Dios tungod sa ila para gid sa ila kaluwasan.”​—⁠Roma 10:1.

20, 21. (a) Tuhoy sa aton ministeryo, paano naton mailog ang halimbawa ni Pablo? (b) Ano nga aspekto sang aton ministeryo ang binagbinagon sa masunod nga artikulo?

²⁰ Talupangda ang duha ka butang nga ginpadaku ni Pablo. Handum gid niya nga ang pila ka indibiduwal makasapo sing kaluwasan, kag ginpangabay niya ini sa Dios. Ginailog naton karon ang halimbawa ni Pablo. Handum gid naton nga pangitaon ang bisan sin-o nga mahimo nahuyog sa pagpamati sa maayong balita. Padayon kita nga nagapangamuyo kay Jehova nga kabay nga makita naton ini nga mga indibiduwal agod mabuligan naton sila sa paglakat sa dalanon nga magadul-ong sa ila kaluwasan.​—⁠Hulubaton 11:30; Ezequiel 33:11; Juan 6:44.

²¹ Apang, agod mapalab-utan ang mas madamo nga indibiduwal sing mensahe sang Ginharian, dapat naton hatagan sing igtalupangod indi lamang kon ngaa nagabantala kita kag kon ano ang aton ginabantala kundi kon paano man kita nagabantala. Binagbinagon ini sa masunod nga artikulo.

[Mga nota]

Ano ang Imo Natun-an?

• Ano ang mga rason kon ngaa nagapakigbahin kita sa ministeryo?

• Ano ang panguna nga mensahe nga ginabantala naton?

• Ano nga mga pagkamaayo ang naeksperiensiahan sang mga nagabaton sa mensahe sang Ginharian?

• Ano ang magabulig sa aton agod makapadayon sa aton ministeryo?

[Mga Pamangkot sa Pagtinuon]

[Mga retrato sa pahina 18]

Ang mensahe sang Ginharian nagapabakod sa mga buong sing tagipusuon

[Mga retrato sa pahina 20]

Ang pangamuyo nagabulig sa aton sa pagbatas sa aton ministeryo