“Padayon nga Pamatud-i Kon Ano Kamo”

“Padayon nga tilawi kon yara kamo sa pagtuo, padayon nga pamatud-i kon ano kamo.”​—⁠2 CORINTO 13:5.

1, 2. (a) Paano ang pagduhaduha sa aton mga ginatuuhan makaapektar sa aton? (b) Ano nga kahimtangan sa Corinto sang nahauna nga siglo ang mahimo nagpaduhaduha sa pila kon ano ang himuon?

ANG isa ka tawo nga nagalakbay sa gua sang banwa nagdangat sa isa ka ginsang-an sang dalan. Bangod indi sigurado kon diin ang dalan padulong sa iya kaladtuan, namangkot sia sa mga nagalalabay apang magkatuhay ang ila mga sabat. Gani, nag-alang-alang sia. Amo man sina ang epekto sa aton kon nagaduhaduha kita sa aton mga ginatuuhan. Ina nga pagduhaduha makaapektar sa aton pagdesisyon, amo nga nagaalang-alang kita kon ano ang himuon.

² Nag-utwas ang isa ka kahimtangan nga mahimo may subong sina nga epekto sa pila ka tawo sa Cristianong kongregasyon sa Corinto, Gresya, sang nahauna nga siglo. Ginduhaduhaan sang “lutaw nga mga apostoles” ang awtoridad ni apostol Pablo, nga nagasiling: “Ang iya mga sulat maunod kag mapuersa, apang ang iya presensia sa pisikal maluya kag ang iya pamulong talamayon.” (2 Corinto 10:7-12; 11:​5, 6) Ina nga pagtamod mahimo nga nagpaduhaduha sa pila sa kongregasyon sang Corinto kon ano ang himuon.

3, 4. Ngaa dapat kita mangin interesado sa laygay ni Pablo sa mga taga-Corinto?

³ Gintukod ni Pablo ang kongregasyon sa Corinto sang pagduaw niya didto sang 50 C.⁠E. Nagtener sia sa Corinto sing “isa ka tuig kag anom ka bulan, nga ginatudlo sa ila ang pulong sang Dios.” Sa pagkamatuod “madamo sa mga taga-Corinto nga nakabati ang nagtuo kag nagpabawtismo.” (Binuhatan 18:5-11) Interesado gid si Pablo sa espirituwal nga kaayuhan sang iya mga masigkatumuluo sa Corinto. Isa pa, nagsulat ang mga taga-Corinto kay Pablo nga nagapangayo sang iya laygay tuhoy sa pila ka butang. (1 Corinto 7:1) Gani ginhatagan niya sila sing maayo gid nga laygay.

⁴ “Padayon nga tilawi kon yara kamo sa pagtuo,” sulat ni Pablo, “padayon nga pamatud-i kon ano gid kamo.” (2 Corinto 13:5) Ang pagsunod sa sini nga laygay nag-amlig kuntani sa sadtong mga utod sa Corinto nga indi magduhaduha kon ano ang ila himuon. Makaamlig man ini sa aton karon. Paano naton, nian, masunod ang laygay ni Pablo? Paano naton matilawan kon yara kita sa pagtuo? Kag ano ang nadalahig sa pagpamatuod kon ano kita?

“Padayon nga Tilawi Kon Yara Kamo sa Pagtuo”

5, 6. Ano ang aton talaksan sang pagtilaw kon bala yara kita sa pagtuo, kag ngaa amo ina ang himpit nga talaksan?

⁵ Sa isa ka pagtilaw, masami nga isa ka tawo ukon butang ang ginatilawan, kag may isa ka talaksan nga ginabasihan sang pagtilaw. Sa sini nga kaso, ang butang nga ginatilawan indi ang pagtuo​—⁠ang mga pagtuluuhan nga ginbaton naton. Ang ginatilawan amo kita subong mga indibiduwal. Sa paghimo sang pagtilaw, may yara kita isa ka himpit nga talaksan. Ang ambahanon nga ginkomposo ni salmista David nagsiling: “Ang kasuguan ni Jehova himpit, nga nagapahauli sang kalag. Ang pahanumdom ni Jehova masaligan, nga nagapaalam sa isa nga indi eksperiensiado. Ang mga mando gikan kay Jehova matadlong, nga nagapasadya sang tagipusuon; ang sugo ni Jehova matinlo, nga nagapasanag sang mga mata.” (Salmo 19:​7, 8) Ang Biblia nagaunod sing himpit nga mga kasuguan kag matadlong nga mga mando ni Jehova, sang iya masaligan nga mga pahanumdom kag matinlo nga mga sugo. Ang  mensahe nga masapwan diri amo ang himpit nga talaksan sang pagtilaw.

⁶ Tuhoy sinang inspirado sang Dios nga mensahe, si apostol Pablo nagsiling: “Ang pulong sang Dios buhi kag gamhanan kag matalom pa sa bisan ano nga espada nga duha sing sulab kag nagalapos tubtob sa nautlan sang kalag kag espiritu, kag sang mga lutalutahan kag ila utok, kag may ikasarang sa paghantop sang mga hunahuna kag mga tinutuyo sang tagipusuon.” (Hebreo 4:12) Huo, matilawan sang pulong sang Dios ang aton tagipusuon​—⁠kon ano gid kita sa sulod. Paano naton maaplikar ining matalom kag gamhanan nga mensahe? Maathag nga ginapakita sang salmista kon ano ang ginalakip sini. Nag-amba sia: “Malipayon ang tawo nga . . . ang iya kalipay yara sa kasuguan ni Jehova, kag sa iya kasuguan nagabasa sia sing mahinay sa adlaw kag gab-i.” (Salmo 1:​1, 2) Ang “kasuguan ni Jehova” masapwan sa nasulat nga Pulong sang Dios, ang Biblia. Dapat malipay kita sa pagbasa sang Pulong ni Jehova. Sa pagkamatuod, dapat kita mag-iskedyul sing tion sa pagbasa sini sing mahinay, ukon sa pagpamalandong sa sini. Samtang ginahimo naton ini, dapat naton ipadayag ang aton kaugalingon sa nasulat diri agod tilawan kon ano kita.

7. Ano ang panguna nga paagi sa pagtilaw kon bala yara kita sa pagtuo?

⁷ Kon amo, ang panguna nga paagi sa pagtilaw kon bala yara kita sa pagtuo amo ang pagbasa kag pagpamalandong sa Pulong sang Dios kag pag-usisa kon bala nagahisanto ang aton paggawi sa aton ginatun-an. Makalilipay nga madamo kita sing bulig agod mahangpan ang Pulong sang Dios.

8. Paano ang mga publikasyon sang “matutom kag mainandamon nga ulipon” makabulig sa aton sa pagtilaw kon bala yara kita sa pagtuo?

⁸ Nagaaman si Jehova sing mga panudlo kag instruksion paagi sa mga publikasyon nga ginabalhag sang “matutom kag mainandamon nga ulipon,” nga nagapaathag sang Kasulatan. (Mateo 24:45) Halimbawa, binagbinaga ang kahon nga natig-uluhan sing “Mga Pamangkot Para sa Pagpamalandong” sa katapusan sang kalabanan nga kapitulo sang libro nga Mangin Suod kay Jehova.⁠ * Maayo gid nga kahigayunan para sa personal nga pagpamalandong ang ginaaman sini nga bahin sang libro! Ang madamo nga topiko nga ginabinagbinag sa aton mga balasahon nga Ang Lalantawan kag Magmata! nagabulig man sa pagtilaw kon bala yara kita sa pagtuo. Tuhoy sa mga artikulo nga may kaangtanan sa tulun-an sang Mga Hulubaton sa mga gua sang Ang Lalantawan sining karon lang, ang isa ka Cristiano nga babayi nagsiling: “Praktikal gid ini nga mga artikulo. Nabuligan ako sini sa pag-usisa kon bala ang akon panghambal, paggawi, kag panimuot nagahisanto gid sa matarong nga mga talaksan ni Jehova.”

9, 10. Ano nga mga aman ni Jehova ang nagabulig sa aton sa padayon nga pagtilaw kon bala yara kita sa pagtuo?

⁹ Nagabaton man kita sing bugana nga panuytoy kag pagpalig-on sa mga miting sa kongregasyon, mga asambleya, kag mga kombension. Pila ini sa espirituwal nga mga aman nga ginhimo sang Dios para sa ila nga gintagna ni Isaias: “Mahanabo gid sa ulihi nga bahin sang mga adlaw nga ang bukid sang balay ni Jehova tukuron sing malig-on nga mataas pa sa putukputukan sang kabukiran, kag pataason pa ini sa kabakuluran; kag magadugok sa sini ang tanan nga pungsod. Kag madamo nga tawo ang magalakat gid kag magasiling: ‘Kari kamo, kag magataklad kita sa bukid ni Jehova, . . . kag tudluan niya kita sang iya mga dalanon, kag magalakat kita sa iya mga banas.’” (Isaias 2:​2, 3) Isa gid ka pagpakamaayo nga may subong kita sina nga instruksion tuhoy sa mga dalanon ni Jehova.

¹⁰ Indi man pagkalipatan ang laygay gikan sa mga tawo nga may espirituwal nga mga kalipikasyon, lakip ang Cristianong mga gulang. Tuhoy sa ila, ang Biblia nagasiling: “Mga kauturan, bisan pa ang isa ka tawo makahimo sing sayop nga tikang antes niya matalupangdan ini, kamo nga may espirituwal nga mga kalipikasyon magtinguha nga pasibuon ina nga tawo sa espiritu sang pagkalulo, samtang ginabantayan sang kada isa ang iya kaugalingon, kay basi masulay man kamo.” (Galacia 6:1) Ginapasalamatan gid naton ining aman nga nagapasibu sa aton!

11. Ang pagtilaw kon bala yara kita sa pagtuo nagakinahanglan sing ano?

 ¹¹ Ang aton mga publikasyon, ang Cristianong mga miting, ang gintangdo nga mga lalaki​—⁠dalayawon ini nga mga aman gikan kay Jehova. Apang, sa pagtilaw kon bala yara kita sa pagtuo, kinahanglan ang pag-usisa sa kaugalingon. Gani kon nagabasa kita sang aton mga publikasyon ukon nagapamati sa Makasulatanhon nga laygay, dapat naton pamangkuton ang aton kaugalingon: ‘Ako bala ang ginalaragway sini? Ginahimo ko bala ini? Ginasunod ko bala ang Cristianong pagtuluuhan?’ Ang aton panimuot sa impormasyon nga ginabaton naton paagi sa sini nga mga aman may kaangtanan man sa aton espirituwal nga kahimtangan. “Ang tawo nga pisikal wala nagabaton sang mga butang sang espiritu sang Dios, kay kabuangan ini sa iya,” siling sang Biblia. “Apang, ang tawo nga espirituwal nagausisa gid sang tanan nga butang.” (1 Corinto 2:​14, 15) Indi bala kita dapat maghupot sing positibo, espirituwal nga pagtamod sa mga mabasa naton sa aton mga libro, mga magasin, kag iban pa nga publikasyon kag sa mga mabatian naton sa aton mga miting kag gikan sa mga gulang?

“Padayon nga Pamatud-i Kon Ano Kamo”

12. Ano ang nadalahig sa pagpamatuod kon ano kita?

¹² Ang pagpamatuod kon ano kita nagadalahig sang pagtimbangtimbang sa aton kaugalingon. Huo, mahimo nga yara kita sa kamatuoran, apang kamusta ang aton espirituwalidad? Ang pagpamatuod kon ano kita nagadalahig sang paghatag sing pamatuod sa aton pagkahamtong kag sing matuod gid nga apresasyon sa espirituwal nga mga aman.

13. Suno sa Hebreo 5:​14, ano ang pamatuod sa aton pagkahamtong?

¹³ Ano nga pamatuod sang Cristianong pagkahamtong ang mapangita naton sa aton kaugalingon? Nagsulat si apostol Pablo: “Ang pagkaon nga matig-a para sa hamtong nga mga tawo, sa ila nga paagi sa paggamit nahanas ang ila mga ikasarang sa paghantop nga makilala ang husto kag sayop.” (Hebreo 5:14) Nagahatag kita sing pamatuod sa aton pagkahamtong paagi sa paghanas sang aton ikasarang sa paghantop. Subong nga ang pila ka maskulo sang lawas sang isa ka atleta dapat pirme gamiton agod mahanas ini kag mangin sampaton sia, dapat naton gamiton ang aton ikasarang sa paghantop paagi sa pag-aplikar sang mga prinsipio sang Biblia agod mahanas ini.

14, 15. Ngaa dapat kita magmaukod sa pagtuon sang madalom nga mga butang sang Pulong sang Dios?

¹⁴ Apang, antes naton mahanas ang aton ikasarang sa paghantop, dapat kita makatigayon sing ihibalo. Agod maangkon ini, kinahanglanon gid ang maukod nga personal nga pagtuon. Kon regular nga ginatun-an naton​—⁠ilabi na ang madalom nga mga butang sang Pulong sang Dios⁠—​magauswag ang aton ikasarang sa paghantop. Sa nagligad nga mga tinuig, madamo nga madalom nga mga topiko ang ginbinagbinag sa Ang Lalantawan. Ano ang ginahimo naton kon makasumalang kita sing mga artikulo nga nagabinagbinag sing madalom nga mga kamatuoran? Ginalikawan bala naton ini bangod nagaunod ini sing “pila ka butang nga mabudlay hangpon”? (2 Pedro 3:16) Sa kabaliskaran, nagapanikasog kita sing dugang pa agod mahangpan ang ginasiling.​—⁠Efeso 3:18.

¹⁵ Ano kon nabudlayan kita sa pagtuon? Importante gid nga magtinguha kita nga maangkon  ukon mapalambo ang pagkaluyag sa sini.⁠ * (1 Pedro 2:2) Ang pagtubo padulong sa pagkahamtong nagakinahanglan nga magtuon kita sa pagkuha sing sustansia gikan sa matig-a nga mga pagkaon, ang madalom nga mga kamatuoran sang Pulong sang Dios. Kay kon indi, magapabilin nga limitado lamang ang aton ikasarang sa paghantop. Apang, ang paghatag sing pamatuod sa aton pagkahamtong nagakinahanglan sing kapin pa sa pag-angkon sing ikasarang sa paghantop. Sa aton adlaw-adlaw nga pagkabuhi dapat naton gamiton ang ihibalo nga matigayon naton gikan sa maukod nga personal nga pagtuon.

16, 17. Ano nga laygay ang ginhatag ni disipulo Santiago tuhoy sa pagkamangin “manugtuman sang pulong”?

¹⁶ Ang pamatuod kon ano kita makita man sa aton pagpakita sing apresasyon sa kamatuoran​—⁠ang aton mga binuhatan sang pagtuo. Sa paglaragway sini nga paagi sa pagtimbangtimbang sa kaugalingon, naggamit si disipulo Santiago sing isa ka mapuersa nga ilustrasyon sa pagsiling: “Mangin mga manugtuman sang pulong, kag indi manugpalamati lamang, nga nagadaya sang inyo kaugalingon paagi sa butig nga pangatarungan. Kay kon ang bisan sin-o manugpamati sang pulong, kag indi manugtuman, kaangay sia sang isa ka tawo nga nagatan-aw sang iya kinaugali nga nawong sa salaming. Kay ginatan-aw niya ang iya kaugalingon, kag nagahalin sia kag sa gilayon malipat kon ano sia nga sahi sang tawo. Apang, sia nga nagatan-aw sa himpit nga kasuguan nga iya sang kahilwayan kag nagapadayon sa sini, ini nga tawo, bangod sia nangin, indi malipaton nga manugpamati, kundi manugtuman sang hilikuton, mangin malipayon sa paghimo niya sini.”​—⁠Santiago 1:22-25.

¹⁷ Si Santiago nagasiling: ‘Magpang-espeho sa pulong sang Dios, kag timbangtimbanga ang imo kaugalingon. Padayon nga himua ini, kag usisaa ang imo kaugalingon paagi sa imo nabasa sa pulong sang Dios. Pagkatapos, indi pagkalimti dayon ang imo nakita. Himua ang kinahanglanon nga mga pagtadlong.’ Mahimo nga mabudlay kon kaisa sundon ini nga laygay.

18. Ngaa mabudlay sundon ang laygay ni Santiago?

¹⁸ Halimbawa, binagbinaga ang aton obligasyon nga magpakigbahin sa hilikuton nga pagbantala sang Ginharian. “Paagi sa tagipusuon ang isa nagatuo para sa pagkamatarong,” sulat ni Pablo, “apang paagi sa baba ang isa nagapahayag sing dayag para sa kaluwasan.” (Roma 10:10) Ang dayag nga pagpahayag para sa kaluwasan paagi sa aton baba nagakinahanglan sing pila ka pagpasibu. Indi mahapos para sa kalabanan sa aton ang pagpakigbahin sa pagbantala nga hilikuton. Ang kakugi sa sini kag ang paghatag sa sini sing importante nga bahin sa aton kabuhi nagakinahanglan sing dugang pa nga mga pagbag-o kag mga pagsakripisyo. (Mateo 6:33) Apang kon ginatuman naton ining hilikuton nga ginhatag sang Dios, malipayon kita bangod nagahatag ini sing kadayawan kay Jehova. Busa, makugi bala kita nga mga manugbantala sang Ginharian?

19. Ano ang dapat nalakip sa aton mga binuhatan sang pagtuo?

¹⁹ Ano ang dapat nalakip sa aton mga binuhatan sang pagtuo? Nagsiling si Pablo: “Ang mga butang nga inyo natun-an kag ginbaton kag nabatian kag nakita sa akon, buhata ini; kag ang  Dios sang paghidait mangin kaupod ninyo.” (Filipos 4:9) Ginapamatud-an naton kon ano kita paagi sa pagbuhat sang aton natun-an, nabaton, nabatian, kag nakita​—⁠ang bug-os nga kasangkaron sang Cristianong dedikasyon kag pagkadisipulo. “Amo ini ang dalan. Lakat sa sini,” amo ang instruksion ni Jehova paagi kay manalagna Isaias.​—⁠Isaias 30:21.

20. Ano nga sahi sang mga indibiduwal ang daku nga pagpakamaayo sa kongregasyon?

²⁰ Ang mga lalaki kag mga babayi nga maukod nga mga estudyante sang Pulong sang Dios, makugi nga mga manugbantala sing maayong balita, himpit sa ila integridad, kag matutom nga mga sumalakdag sang Ginharian isa ka daku nga pagpakamaayo sa kongregasyon. Ang ila presensia nagadugang sing kalig-on sa kongregasyon nga ila ginapakig-updan. Isa sila ka daku gid nga bulig, ilabi na bangod madamo sing mga bag-uhan nga alatipanon. Kon sundon naton ang laygay ni Pablo nga ‘padayon nga tilawi kon yara kita sa pagtuo, padayon nga pamatud-i kon ano kita,’ mangin maayo man kita nga impluwensia sa iban.

Magkalipay sa Paghimo sang Kabubut-on sang Dios

21, 22. Paano kita malipay sa paghimo sang kabubut-on sang Dios?

²¹ “Sa paghimo sang imo kabubut-on, O Dios ko, nagakalipay ako,” amba ni Hari David sang dumaan nga Israel, “kag ang imo kasuguan yari sa akon nasulod nga mga bahin.” (Salmo 40:8) Ginkalipay ni David ang paghimo sang kabubut-on sang Dios. Ngaa? Bangod ang kasuguan ni Jehova yara sa tagipusuon ni David. Wala magduhaduha si David kon ano ang iya himuon.

²² Kon ang kasuguan sang Dios yara sa aton nasulod nga mga bahin, wala kita nagaduhaduha kon ano ang himuon naton. Nagakalipay kita sa paghimo sang kabubut-on sang Dios. Gani, nian, ‘magpanikasog kita sing lakas’ samtang nagaalagad kita kay Jehova sing tinagipusuon.​—⁠Lucas 13:24.

[Mga Nota]

Madumduman Mo Bala?

• Paano naton matilawan kon bala yara kita sa pagtuo?

• Ano ang nadalahig sa pagpamatuod kon ano kita?

• Ano nga pamatuod ang mahatag naton sa Cristianong pagkahamtong?

• Paano ang aton mga binuhatan sang pagtuo nagabulig sa aton sa pagtimbangtimbang kon ano kita?

[Mga Pamangkot sa Pagtinuon]

[Retrato sa pahina 23]

Nahibaluan mo bala ang panguna gid nga paagi sa pagtilaw kon bala yara ka sa pagtuo?

[Retrato sa pahina 24]

Nagahatag kita sing pamatuod sa aton Cristianong pagkahamtong kon ginagamit naton ang aton ikasarang sa paghantop

[Mga retrato sa pahina 25]

Ginapamatud-an naton kon ano kita kon kita ‘indi malipaton nga mga manugpalamati, kundi mga manugtuman sang pulong’