Ginabudlayan Ka Bala sa Imo Ginabatyag?

SA HALOS bug-os nga kabuhi ni Lena, wala sia sing pagtahod sa kaugalingon. “Bangod sang tinuig nga seksuwal nga pag-abuso sa akon sang bata pa ako, halos nadula ang akon pagtahod sa kaugalingon,” siling niya. “Pamatyag ko wala gid ako sing pulos.” Nadumduman man ni Simone ang iya pagkapamatan-on kag nagsiling, “Sa sulod nakon may yara kulang kag nagabatyag ako nga wala sing kabilinggan.” Ang daku nga kasubo nga resulta sining mga balatyagon daw lapnag gid karon. Ang isa ka serbisyo sa paglaygay paagi sa telepono para sa mga tin-edyer nagsiling nga halos katunga sang mga nagatawag sa ila nagapautwas sang “padayon nga pagbatyag nga wala sing kabilinggan.”

Suno sa pila ka eksperto, ang mga tawo nagabatyag nga di-sangkol kon ginapabatyag sa ila sang iban nga wala sila sing kabilinggan. Mahimo ini mabatyagan sang isa kon pirme sia ginasing-alan, ginamulay, ukon ginaabusuhan. Ano man ang rason, ang mga resulta sini makapaluya gid sang buot kag makahalalit pa gani. Nasapwan sang isa ka pagtuon sa medisina nga ang mga indibiduwal nga may negatibo nga pagtamod sa ila  kaugalingon may huyog nga indi magsalig sa kaugalingon kag sa iban, sa amo nagaguba sang suod nga mga kaangtanan kag pag-abyanay. Ang report nagsiling, “Daw subong bala nga ‘ginatuga’ nila ang mga kahimtangan mismo nga ginakahadlukan gid nila.”

Ang mga tawo nga nagabatyag kaangay sini masami nga mga biktima sang “nagakabalaka nga mga panghunahuna” nga ginasiling sang Biblia. (Salmo 94:19) Pamatyag nila wala gid sila sang ginahimo nga maayo. Kon may matabo nga indi maayo, ginabasol nila gilayon ang ila kaugalingon. Bisan pa ginadayaw sila sang iban tungod sa ila mga hinimuan, ginabatyag gid nila nga kaangay sila sang isa ka malimbungon nga tawo nga mabuko sa ulihi. Bangod nagapati sila nga indi sila dapat magmalipayon, madamo ang nagagawi nga nagahalit sa ila kaugalingon kag daw wala sila sing mahimo agod tadlungon ini. Si Lena, nga ginsambit kaina, nagkaproblema sa iya nga pangaon bangod wala sia sing pagtahod sa kaugalingon. Ginbaton niya, “Wala ako sing mahimo agod bag-uhon ang bisan anong butang.”

Ang mga nagaantos bala sa sining “nagakabalaka nga mga panghunahuna” gintalana nga magabatyag sini sa bug-os nila nga kabuhi? May mahimo pa bala agod matapna ini nga mga balatyagon? Ang Biblia nagahatag sing mga prinsipio kag praktikal nga mga laygay nga nakabulig sa madamo agod malandas ini. Ano ang pila sa sini nga mga prinsipio, kag paano ini nakabulig sa mga nagabatyag sini nga makasapo sing kalipay sa kabuhi? Ipaathag ini sang masunod nga artikulo.