Mga Pamangkot Gikan sa mga Bumalasa

Ang tinaga bala nga “ayhan” sa Sofonias 2:3 nagakahulugan nga indi sigurado ang mga alagad sang Dios nga mabaton nila ang kabuhi nga walay katapusan?

Ini nga teksto nagasiling: “Pangitaa ninyo si Jehova, kamo tanan nga mga mahagop sang duta, nga nagahimo sang Iya hudisyal nga desisyon. Pangitaa ang pagkamatarong, pangitaa ang pagkahagop. Ayhan malipdan kamo sa adlaw sang kaakig ni Jehova.” Ngaa nagasiling ini nga teksto nga “ayhan”?

Agod mahangpan kon ano ang himuon ni Jehova sa mga matutom sa iya sa Armagedon, makabulig kon dumdumon naton ang ginatudlo sang Biblia kon ano ang himuon sang Dios sa mga mapatay antes sinang tion sang paghukom. Banhawon ang iban padulong sa di-mamalatyon nga kabuhi subong espiritu nga mga tinuga sa langit, samtang ang iban naman banhawon sa duta nga may paglaum nga mabuhi sing walay katapusan sa Paraiso. (Juan 5:​28, 29; 1 Corinto 15:​53, 54) Kon dumdumon kag padyaan ni Jehova ang mga matutom nga mapatay antes sang Armagedon, pat-od gid nga amo man sina ang himuon niya sa iya mga alagad nga buhi sa adlaw sang iya kaakig.

Makapalig-on man ang inspirado nga mga pulong ni apostol Pedro. Nagsulat sia: “Gintipigan [sang Dios] si Noe, isa ka manugbantala sang pagkamatarong, kaupod sang pito pa nga iban sang gin-anaw niya ang kalibutan sang di-diosnon nga mga tawo; kag paagi sa pag-abo sa mga siudad sang Sodoma kag Gomorra ginhukman niya sila, . . . kag ginluwas niya ang matarong nga si Lot . . . Makahibalo si Jehova kon paano luwason ang mga tawo nga may diosnon nga debosyon gikan sa pagtilaw, apang magtigana sang di-matarong nga mga tawo para sa adlaw sang paghukom agod laglagon.” (2 Pedro 2:5-9) Bisan pa ginlaglag ni Jehova ang mga malauton sang una nga panahon, ginluwas niya si Noe kag si Lot, nga nag-alagad sa iya sing matutom. Luwason man ni Jehova ang mga tawo nga may diosnon nga debosyon kon laglagon na niya ang mga malauton sa Armagedon. Makalampuwas ang “dakung kadam-an” sang mga matarong.​—⁠Bugna 7:​9, 14.

Kon amo, gingamit ang tinaga nga “ayhan” sa Sofonias 2:3 indi bangod indi masaligan ang ikasarang sang Dios sa pagluwas sa iya mga ginakahamut-an. Sa baylo, indi pa sigurado ang isa nga maluwas sia sa adlaw ni Jehova kon magsugod sia sa pagpangita sa pagkamatarong kag pagkahagop. Ang kaluwasan magadepende sa pagpadayon niya sa pagpangita sa pagkahagop kag pagkamatarong.​—⁠Sofonias 2:3.

[Retrato sa pahina 31]

“Makahibalo si Jehova kon paano luwason ang mga tawo nga may diosnon nga debosyon gikan sa pagtilaw”