Naisip Na ni Jehova “ang Mismo mga Buhok sa Inyo Ulo”

“Wala sing [maya] nga mahulog sa duta nga indi mahibaluan sang inyo Amay. Apang ang mismo mga buhok sa inyo ulo naisip na tanan.”​—⁠MATEO 10:​29, 30.

1, 2. (a) Ngaa ginbatyag ni Job nga ginbayaan sia sang Dios? (b) Nagakahulugan bala ang mga pulong ni Job nga nagbato na sia kay Jehova? Ipaathag.

“ODIOS, nagapanawag ako sa imo, pero wala gid ikaw nagasabat, kag kon magpangamuyo ako, wala ka nagasapak. Ginapintasan mo ako, ginahingabot mo ako sa bug-os mo nga gahom.” Ang tawo nga naghambal sadto nga mga pulong nagbatyag sing daku nga kalisang, kag indi katingalahan! Nadula ang iya palangabuhian, napatay ang iya mga anak sa isa ka indi kinaandan nga kalamidad, kag karon nagaantos sia bangod sang makapaluya nga balatian. Ang ngalan sini nga tawo amo si Job, kag nasulat sa Biblia ang iya makakalagha nga inagihan agod makabenepisyo kita.​—⁠Job 30:​20, 21, Maayong Balita nga Biblia.

² Daw ginapahangop sang mga pulong ni Job nga nagabato na sia sa Dios, apang indi subong sina. Naghambal lamang si Job gikan sa alibutod sang iya nagakagha nga tagipusuon. (Job 6:​2, 3) Wala sia makahibalo nga si Satanas ang kabangdanan sang mga pagtilaw sa iya, gani sayop nga naghinakop sia nga ginbayaan sia sang Dios. Isa ka bes, nagsiling pa gani si Job kay Jehova: “Ngaa ginatago mo ang imo nawong kag ginakabig ako nga kaaway mo?”⁠ *​—⁠Job 13:24.

3. Kon magbunal ang mga kalamidad, ano ang mahimo magsulod sa aton hunahuna?

³ Sa karon, madamo sa katawhan ni Jehova ang nagaantos sing walay untat nga mga kabudlayan subong resulta sang mga inaway, mga kinagubot sa politika ukon katilingban, kinaugali nga mga kalamidad, katigulangon, balatian, tuman nga kaimulon, kag mga pagdumili sang gobierno. Mahimo nga ikaw man nagaantos sing isa ka sahi sang pagtilaw. Mahimo nga kon kaisa ginahunahuna mo nga ginatago ni Jehova ang iya nawong gikan sa imo. Pamilyar ka sa ginasiling sang Juan 3:16: “Ginhigugma gid sang Dios ang kalibutan amo nga ginhatag niya ang iya bugtong nga Anak.” Apang, kon nagaantos ka kag daw wala ka sing makita nga paumpaw, mahimo nga magapalibog ka: ‘Ginahigugma gid bala ako sang Dios? Natalupangdan bala niya ang akon pag-antos? Ginaulikdan bala niya ako subong indibiduwal?’

4. Anong nagapadayon nga kahimtangan ang dapat batason ni Pablo, kag sa anong mga paagi ang subong sina nga kahimtangan makaapektar sa aton?

⁴ Binagbinaga ang natabo kay apostol Pablo. “Ginhatagan ako sing ungon sa unod, isa ka anghel ni Satanas, agod pirme magtampa sa akon,” sulat niya, kag nagdugang pa: “Makatlo ako nga nakitluoy sa Ginuo nga magbiya ini sa akon.” Nabatian ni Jehova ang iya mga pakiluoy. Apang, ginpahangop niya kay Pablo nga indi sia magpasilabot paagi sa isa ka milagruso nga solusyon. Sa baylo, dapat magsandig si Pablo sa gahom sang Dios sa pagbulig sa iya nga mabatas ang iya “ungon sa unod.”⁠ * (2 Corinto 12:7-9) Kaangay ni Pablo, mahimo nga nagaantos ka sing isa ka sahi sang pagtilaw nga nagapadayon gihapon. Ayhan nagapalibog ka, ‘Ang katunayan bala nga daw wala sing ginahimo si Jehova sa pagtilaw nga ginaantos ko nagakahulugan nga wala sia makahibalo sang akon kahimtangan ukon nga wala sia nagaulikid sa akon?’ Indi gid ang sabat! Ang  tudok nga kabalaka ni Jehova sa tagsatagsa sang iya matutom nga mga alagad ginapadaku sang ginsiling ni Jesus sa iya mga apostoles sa tapos niya mapili sila. Tan-awon naton kon paano ang iya ginsiling makapalig-on sa aton karon.

“Dili Kamo Mahadlok”​—⁠Ngaa?

5, 6. (a) Paano ginbuligan ni Jesus ang mga apostoles agod indi sila mahadlok sa kon ano ang mahanabo sa palaabuton? (b) Paano si Pablo nagpakita sing pagsalig nga may pag-ulikid sa iya si Jehova?

⁵ Nakabaton ang mga apostoles sing labaw sa kinaandan nga gahom gikan kay Jesus, lakip ang “awtoridad sa di-matinlo nga mga espiritu, agod tabugon sila kag ayuhon ang tanan nga sahi sang balatian kag tanan nga sahi sang masakit.” Apang, wala ini nagakahulugan nga mangin hilway sila sa mga pagtilaw kag kabudlayan. Sa kabaliskaran, detalyado nga ginlaragway ni Jesus ang pila sang mga butang nga mahanabo sa ila. Apang, ginpalig-on niya sila: “Dili kamo mahadlok sa mga nagapatay sang lawas apang indi makapatay sang kalag; kundi kahadlukan ninyo ang makalaglag sang kalag kag lawas sa Gehenna.”​—⁠Mateo 10:​1, 16-22, 28.

⁶ Agod mahangpan sang iya mga apostoles kon ngaa indi sila dapat mahadlok, naghatag si Jesus sing duha ka ilustrasyon. Nagsiling sia sa ila: “Wala bala ginabaligya ang duha ka maya sa isa ka sensilyo nga diutay sing balor? Apang wala sing isa sa ila nga mahulog sa duta nga indi mahibaluan sang inyo Amay. Apang ang mismo mga buhok sa inyo ulo naisip na tanan. Busa dili kamo mahadlok: mahal pa kamo sa madamo nga maya.” (Mateo 10:29-31) Talupangda nga gin-angot ni Jesus ang indi pagkahadlok sa atubangan sang kabudlayan kag ang pagsalig nga si Jehova nagaulikid sa aton mismo subong mga indibiduwal. Mahimo gid nga si apostol Pablo may subong sina nga pagsalig. Nagsulat sia: “Kon ang Dios apin sa aton, sin-o ang mangin batok sa aton? Sia nga wala magdingot bisan sang iya kaugalingon nga Anak kundi ginhatag sia para sa aton tanan, ngaa indi man niya mainayuhon nga ihatag sa aton ang tanan nga iban pa nga butang upod sa iya?” (Roma 8:​31, 32) Bisan ano pa ang imo problema, makasalig ka man nga si Jehova nagaulikid sa imo subong indibiduwal tubtob nagaunong ka sa iya. Magaathag pa ini samtang ginabinagbinag naton sing dugang pa ang ginlaygay ni Jesus sa iya mga apostoles.

Ang Balor sang Isa ka Maya

7, 8. (a) Paano ginatamod ang mga maya sang adlaw ni Jesus? (b) Ano, mahimo gid, ang rason kon ngaa gingamit sang Mateo 10:29 ang pinakagamay nga porma sang Griegong tinaga para sa “maya”?

⁷ Epektibo nga ginalaragway sang mga ilustrasyon ni Jesus ang kabalaka ni Jehova sa tagsatagsa sang Iya mga alagad. Binagbinaga anay ang tuhoy sa mga maya. Sang adlaw ni Jesus, ginakaon ang mga maya, apang bangod nagapanghalit ini sang mga tanom, masami ini ginatamod subong mga peste. Bugana gid anay kag barato ang mga maya amo kon ngaa ang presyo sang duha ka maya wala pa sa tatlo ka pesos karon. Ang doble sina nga kantidad makabakal indi sing apat lamang  kundi lima ka maya​—⁠ang panglima paaman lang, nga daw wala gid sing balor!​—⁠Lucas 12:6.

⁸ Hunahunaa man ang kadakuon sining ordinaryo nga pispis. Kon ipaanggid sa iban nga mga pispis, bisan gani ang hamtong na nga maya magamay gihapon. Apang, ang Griegong tinaga nga ginbadbad “maya” sa Mateo 10:29 espesipiko nga nagapatuhoy sa gamay nga mga maya. Mahimo gid nga luyag ni Jesus nga handurawon sang iya mga apostoles ang pinakagamay kag labing indi salapakon nga pispis.

9. Ano ang mapuersa nga punto sang ilustrasyon ni Jesus tuhoy sa mga maya?

⁹ Mapuersa ang punto sang paanggid nga gingamit ni Jesus tuhoy sa mga maya: Ang daw wala sing balor sa mga tawo importante kay Jehova nga Dios. Dugang pa nga ginpadaku ni Jesus ini nga kamatuoran sa pagdugang nga ang isa ka gamay nga maya indi “mahulog sa duta” nga indi mahibal-an ni Jehova.⁠ * Maathag ang leksion. Kon ginatalupangod gani ni Jehova nga Dios ang pinakagamay kag labing indi salapakon nga pispis, labi pa nga magaulikid sia sa kahimtangan sang isa ka tawo nga nagdesisyon sa pag-alagad sa iya!

10. Ano ang buot silingon sang pinamulong nga: “Ang mismo mga buhok sa inyo ulo naisip na tanan”?

¹⁰ Dugang pa sa iya ilustrasyon tuhoy sa mga maya, nagsiling si Jesus: “Ang mismo mga buhok sa inyo ulo naisip na tanan.” (Mateo 10:30) Ining malip-ot apang madalom nga pinamulong nagapadaku sang punto sang ilustrasyon ni Jesus tuhoy sa mga maya. Binagbinaga ini: Ang kinaandan nga ulo sang tawo may yara mga 100,000 ka nahot sang buhok. Sa masami, halos palareho lang ang tagsa ka nahot sang buhok, kag daw wala sing isa ka nahot sang buhok ang talalupangdon. Apang, ang tagsa ka nahot sang buhok ginatalupangod kag naisip na ni Jehova nga Dios. Sanglit amo sini, may yara pa bala detalye sang aton kabuhi nga indi mahibaluan ni Jehova? Nahangpan gid ni Jehova ang tumalagsahon nga pagkahuman sang tagsatagsa sang iya mga alagad. Sa pagkamatuod, “nagatulok sia sa tagipusuon.”​—⁠1 Samuel 16:7.

11. Paano ginpabutyag ni David ang iya pagsalig nga si Jehova may pag-ulikid sa iya subong indibiduwal?

¹¹ Si David, nga nakaeksperiensia sing kabudlayan, nagsalig nga gintalupangod sia ni Jehova. “O Jehova, gin-usisa mo ako, kag nakilala mo ako,” sulat niya. “Nakilala mo ang akon paglingkod kag ang akon pagtindog. Ginbinagbinag mo ang akon panghunahuna gikan sa malayo.” (Salmo 139:​1, 2) Makasalig ka man nga kilala ikaw ni Jehova subong indibiduwal. (Jeremias 17:10) Indi maghinakop dayon nga indi gid ikaw salapakon nga matalupangdan pa sang mga mata ni Jehova nga makakita sang tanan!

“Isulod ang Akon mga Luha sa Imo Suludlan nga Panit”

12. Paano naton masiling nga nahibaluan ni Jehova ang mga kabudlayan nga ginaantos sang iya katawhan?

¹² Indi lamang nga kilala ni Jehova ang iya mga alagad subong mga indibiduwal kundi nahibaluan man niya ang mga kabudlayan nga ginaantos sang kada isa sa ila. Halimbawa, sang ginapigos ang mga Israelinhon subong mga ulipon, nagsiling si Jehova kay Moises: “Sing walay duhaduha nakita ko ang kapipit-an sang akon katawhan nga yara sa Egipto, kag nabatian ko ang ila pagtuaw bangod sa ila nga nagapilit sa ila sa pagpangabudlay; kay nahibaluan ko gid ang kasakit nga ila ginaantos.” (Exodo 3:7) Makalugpay gid ang mahibaluan nga kon nagabatas kita sing isa ka  pagtilaw, makita ni Jehova ang nagakatabo kag nagapamati sia sa aton mga pagtuaw! Wala niya ginabalewala ang aton mga pag-antos.

13. Ano ang nagapakita nga may empatiya gid si Jehova para sa iya mga alagad?

¹³ Ang pag-ulikid ni Jehova sa mga tawo nga may kaangtanan sa iya makita sing dugang pa sa empatiya nga ginpakita niya sa mga Israelinhon. Bisan pa ang ila pag-antos masami nga resulta sang ila mismo pagkabatinggilan, nagsulat si Isaias tuhoy kay Jehova: “Sa tanan nila nga kapipit-an ginpiutan sia.” (Isaias 63:9) Subong matutom nga alagad ni Jehova, mapat-od mo, kon amo, nga kon nasakitan ka, nasakitan man si Jehova. Wala bala ina nagapahulag sa imo nga atubangon ang kabudlayan sing walay kahadlok kag magpadayon sa paghimo sang imo labing masarangan sa pag-alagad sa iya?​—⁠1 Pedro 5:​6, 7.

14. Ano ang mga kahimtangan sang ginakomposo ang Salmo 56?

¹⁴ Ang pagpati gid ni Hari David nga si Jehova may pag-ulikid kag empatiya sa iya maathag nga makita sa Salmo 56, nga ginkomposo ni David samtang nagapalagyo sia gikan kay Hari Saul nga luyag magpatay sa iya. Nalagyo si David pa Gat, apang hinadlukan sia nga basi bihagon sia sang makilal-an sia sang mga Filistinhon. Nagsulat sia: “Ang akon mga kaaway buot maglamon sa akon sa bug-os nga adlaw, kay madamo ang nagapakig-away sing binugal sa akon.” Bangod sang iya makatalagam nga kahimtangan, nagdangop si David kay Jehova. “Sa bug-os nga adlaw ginagamo nila ang akon mga ginahimo,” siling niya. “Ang tanan nila nga panghunahuna batok sa akon sa kalainan.”​—⁠Salmo 56:​2, 5.

15. (a) Ano ang buot silingon ni David sang ginpangabay niya si Jehova nga isulod ang iya mga luha sa isa ka suludlan nga panit ukon sa isa ka tulun-an? (b) Kon nagabatas kita sing isa ka kahimtangan nga nagatilaw sang aton pagtuo, ano ang mapat-od naton?

¹⁵ Nian, subong sang nasulat sa Salmo 56:​8, nagbungat si David sining makawiwili nga mga pulong: “Ang akon pagkalaaslaas imo ginsulat. Isulod ang akon mga luha sa imo suludlan nga panit. Indi bala yara ini sa imo tulun-an?” Daw ano ka makatalandog nga paglaragway sang mapinalanggaon nga pag-ulikid ni Jehova! Kon yara kita sa idalom sang kapiot, mahimo nga magatuaw kita kay Jehova nga may pagluha. Natabo ini bisan sa himpit nga tawo nga si Jesus. (Hebreo 5:7) Nakumbinsi si David nga ginabantayan sia ni Jehova kag dumdumon ang iya pag-antos, nga subong bala ginatago ang iya mga luha sa isa ka suludlan nga panit ukon ginasulat ini sa isa ka tulun-an.⁠ * Ayhan ginabatyag mo nga ang imo mga luha magapuno sa sinang suludlan nga panit ukon masulat sa madamo nga pahina sina nga tulun-an. Kon subong sina, makabatyag ka sing lugpay. Ang Biblia nagapasalig sa aton: “Si Jehova malapit sa mga buong sing tagipusuon; kag ginaluwas niya ang mga nadugmok sa espiritu.”​—⁠Salmo 34:18.

Mangin Suod nga Kaupod sang Dios

16, 17. (a) Paano naton nahibaluan nga wala ginabale-wala ni Jehova ang mga problema nga ginaatubang sang iya katawhan? (b) Ano ang nahimo na ni Jehova agod mangin suod sa iya ang iya katawhan?

¹⁶ Ang katunayan nga naisip na ni Jehova ‘ang mismo mga buhok sa aton ulo’ nagahatag sa aton sing ideya kon daw ano ka matinalupangdon kag mainulikdon nga Dios ang ginasimba naton nga isa gid ka pribilehiyo. Bisan pa hulaton pa naton ang ginsaad nga bag-ong kalibutan antes madula ang tanan nga kasakit kag pag-antos, may ginahimo si Jehova karon mismo nga isa ka makatilingala nga butang para sa iya katawhan. Nagsulat si David: “Ang pagpakigsuod kay Jehova ila sang mga nahadlok sa iya, amo man ang iya katipan, agod mahibaluan nila ini.”​—⁠Salmo 25:14.

¹⁷ “Pagpakigsuod kay Jehova.” Ang ideya mismo daw indi mapatihan sang di-himpit nga mga tawo! Apang, ginaagda ni Jehova ang bisan sin-o nga nahadlok sa iya nga mangin dumuluaw sa iya layanglayang. (Salmo 15:1-5) Kag ano ang ginahimo ni Jehova para sa iya mga dumuluaw? Ginapahibalo niya sa ila ang iya katipan, suno kay David. Si Jehova nagatu-ad sa ila, ginapahayag ang iya “kompidensial nga butang” sa mga manalagna agod mahibaluan nila kon ano ang iya mga katuyuan kag kon ano ang dapat nila himuon nahisanto sa sini.​—⁠Amos 3:7.

18. Paano naton nahibaluan nga luyag ni Jehova nga makaangkon kita sing suod nga kaangtanan sa iya?

 ¹⁸ Sa pagkamatuod, makalilipay ang mahibaluan nga kita nga di-himpit nga mga tawo mahimo mangin suod nga mga kaupod sang Labing Mataas, si Jehova nga Dios. Ang matuod, ginapalig-on niya kita nga himuon ina gid. “Magpalapit kamo sa Dios, kag magapalapit sia sa inyo,” siling sang Biblia. (Santiago 4:8) Luyag ni Jehova nga makaangkon kita sing suod nga kaangtanan sa iya. Sa katunayan, nakahimo na sia sing mga tikang agod mangin posible ina nga kaangtanan. Ginbuksan sang halad nga gawad ni Jesus ang ganhaan agod makapakig-abyan kita sa Labing Gamhanan nga Dios. Ang Biblia nagasiling: “Tuhoy sa aton, nagahigugma kita, bangod sia ang una nga naghigugma sa aton.”​—⁠1 Juan 4:19.

19. Paano ang pagbatas makapabakod sang aton kaangtanan kay Jehova?

¹⁹ Inang suod nga kaangtanan nagabakod pa kon nagabatas kita sa idalom sang mabudlay nga mga kahimtangan. Ang disipulo nga si Santiago nagsulat: “Ipatapos sa pagbatas ang hilikuton sini, agod nga kamo mangin bug-os kag maayo sa tanan nga bahin, nga wala ginakulang sa bisan ano.” (Santiago 1:4) Ano nga “hilikuton” ang ginahimo paagi sa pagbatas sang kabudlayan? Dumduma ang “ungon sa unod” ni Pablo. Paano ang pagbatas nakabulig sa iya? Tuhoy sa mga pagtilaw nga gin-atubang ni Pablo, nagsiling sia: “Busa, malipay gid ako nga magpabugal pa gani tuhoy sa akon mga kaluyahon, agod ang gahom ni Cristo magapabilin kaangay sang isa ka tolda sa ibabaw ko. Gani nagakalipay ako sa mga kaluyahon, sa mga insulto, sa mga kaiwat, sa mga paghingabot kag sa mga kabudlayan, tungod kay Cristo. Kay kon maluya ako, nagabaskog ako.” (2 Corinto 12:​9, 10) Naeksperiensiahan ni Pablo nga si Jehova nagahatag sing kusog nga ginakinahanglan​—⁠“ang gahom nga labaw sa kinaandan” kon kinahanglanon​—⁠agod makabatas sia. Bangod sina, labi pa nga nangin suod sia kay Cristo kag kay Jehova nga Dios.​—⁠2 Corinto 4:⁠7; Filipos 4:11-13.

20. Paano naton mapat-od nga buligan kag lugpayan kita ni Jehova sa atubangan sang kabudlayan?

²⁰ Mahimo ginatugutan ni Jehova nga magpadayon ang mga pagtilaw sa imo. Kon amo, dumduma ang iya saad sa mga nagakahadlok sa iya: “Indi ko gid kamo pagbayaan ukon pagpatumbayaan.” (Hebreo 13:5) Maeksperiensiahan mo ina nga bulig kag lugpay. Naisip na ni Jehova ‘ang mismo mga buhok sa imo ulo.’ Makita niya ang imo pagbatas. May empatiya sia sa imo kasakit. Nagaulikid gid sia sa imo. Kag indi gid sia ‘malipat sa imo binuhatan kag sa gugma nga ginpakita mo tungod sa iya ngalan.’​—⁠Hebreo 6:10.

[Mga nota]

Madumduman Mo Bala?

• Ano nga mga kahimtangan ang mahimo magpabatyag sa isa ka tawo nga ginbayaan sia sang Dios?

• Ano nga leksion ang matun-an naton gikan sa mga ilustrasyon ni Jesus tuhoy sa mga maya kag sa pag-isip sa mga buhok sa aton ulo?

• Ano ang buot silingon sang pagbutang sang mga luha sang isa sa iya ni Jehova “suludlan nga panit” ukon sa iya “tulun-an”?

• Paano kita mangin ‘suod kay Jehova’?

Mga Pamangkot sa Pagtinuon]

[Retrato sa pahina 22]

Ngaa wala ginkuha ni Jehova ang “ungon sa unod” ni Pablo?

[Retrato sa pahina 23]

Ano ang matun-an naton gikan sa ilustrasyon ni Jesus tuhoy sa mga maya?

[Credit Line]

© J. Heidecker/VIREO

[Retrato sa pahina 25]

Paagi sa pagbasa sang Biblia sing regular, makasapo kita sing pasalig nga nagaulikid ang Dios sa aton subong mga indibiduwal