Si Jehova Amo “ang Manugpadya sa mga Hanuot nga Nagapangita sa Iya”

“Sia nga nagapalapit sa Dios dapat magpati nga nagaluntad sia kag nga sia ang manugpadya sa mga hanuot nga nagapangita sa iya.”​—⁠HEBREO 11:6.

1, 2. Ngaa negatibo kon kaisa ang ginabatyag sang pila sang mga alagad ni Jehova?

“HALOS 30 ka tuig na nga ako isa sa mga Saksi ni Jehova, apang sa pamatyagan ko daw indi gid ako nagakabagay,” tu-ad ni Barbara.⁠ * “Bisan pa nakapayunir na ako kag nakaangkon sing madamo nga pribilehiyo, daw indi gihapon ako makapati nga takus ako tawgon nga Saksi.” Kaanggid man nga mga panghunahuna ang ginpabutyag ni Keith. “Kon kaisa ginabatyag ko nga indi ako nagakabagay bangod may madamo nga rason ang mga alagad ni Jehova nga magmalipayon, apang indi ako malipayon,” siling niya. “Bangod sini ginbatyag ko nga may diperensia ako, nga nagpalain pa tapat sang akon kahimtangan.”

² Madamo sang matutom nga mga alagad ni Jehova, sang una kag karon, ang may amo man sini nga problema. Amo ka man bala sini kon kaisa? Mahimo nga mag-inasud-asod ang imo mga problema, samtang ang imo mga masigkatumuluo daw malipayon kag wala sing problema. Subong resulta, mahimo batyagon mo nga wala mahamuot si Jehova sa imo ukon indi ka takus nga talupangdon niya. Indi magpadasudaso sa sini nga paghinakop. Ang Biblia nagapasalig sa aton: “Wala [ni Jehova] gintamay ukon ginkangil-aran ang kapipit-an  sang napiutan; kag wala niya gintago ang iya nawong gikan sa iya, kag sang nagtuaw sia sa iya agod magpabulig nagpamati sia.” (Salmo 22:24) Ginapakita sining matagnaon nga mga pulong tuhoy sa Mesias nga wala lamang ginapamatian ni Jehova ang mga matutom sa iya kundi ginapadyaan man niya sila.

3. Ngaa indi kita hilway sa mga pag-ipit sining sistema sang mga butang?

³ Wala sing bisan sin-o ang hilway sa mga pag-ipit sining sistema sang mga butang​—⁠bisan ang katawhan ni Jehova. Nagakabuhi kita sa isa ka kalibutan nga ginagamhan sang panguna nga kaaway ni Jehova, si Satanas nga Yawa. (2 Corinto 4:⁠4; 1 Juan 5:19) Sa baylo nga amligan sing milagruso, ang mga alagad ni Jehova amo sa kamatuoran ang panguna nga puntariya ni Satanas. (Job 1:7-12; Bugna 2:10) Busa, samtang wala pa ang tion nga gintalana sang Dios, dapat kita ‘magbatas sa idalom sang kapipit-an’ kag ‘magpadayon sa pagpangamuyo,’ nagasalig nga si Jehova may pag-ulikid sa aton. (Roma 12:12) Indi gid naton paghunahunaon nga wala kita ginahigugma sang aton Dios nga si Jehova!

Dumaan nga mga Halimbawa sang Pagbatas

4. Maghatag sing pila ka halimbawa sang matutom nga mga alagad ni Jehova nga nagbatas sing mapiot nga mga kahimtangan.

⁴ Madamo sang mga alagad ni Jehova sang una ang nagbatas sing mapiot nga mga kahimtangan. Si Ana, halimbawa, nagbatyag sing “kapaitan sa kalag” bangod baog sia​—⁠isa ka kahimtangan nga ginkabig niya nga daw kasubong nga ginkalimtan na sia sang Dios. (1 Samuel 1:9-11) Sang ginalaas ni Reyna Jesebel si Elias agod patyon, hinadlukan sia kag nangamuyo kay Jehova: “Tuman na! Karon, O Jehova kuhaa ang akon kalag, kay indi ako maayo pa sa akon mga ginikanan.” (1 Hari 19:4) Kag mahimo gid nga natublag sing daku si apostol Pablo sa iya pagkadihimpit sang magbaton sia: “Kon luyag ko himuon ang maayo, ang malain yari sa akon.” Nagdugang pa sia: “Kailo ako nga tawo!”​—⁠Roma 7:21-24.

5. (a) Paano ginpadyaan sanday Ana, Elias, kag Pablo? (b) Ano nga lugpay ang makuha naton gikan sa Pulong sang Dios kon nagapakigbato kita sa negatibo nga mga emosyon?

⁵ Sa pagkamatuod, nahibaluan naton nga sanday Ana, Elias, kag Pablo nagbatas samtang nagaalagad kay Jehova, kag bugana nga ginpadyaan Niya sila. (1 Samuel 1:20; 2:21; 1 Hari 19:5-18; 2 Timoteo 4:8) Walay sapayan sini, nakigbato sila sa tanan nga sahi sang tawhanon nga emosyon, lakip ang kasubo, pagkawalay paglaum, kag kahadlok. Busa, indi kita dapat makibot kon magbatyag kita sing negatibo nga mga emosyon kon kaisa. Apang, ano ang imo mahimo kon bangod sang mga problema sa kabuhi, nagapalibog ka kon bala ginahigugma gid ikaw ni Jehova? Makakuha ka sing lugpay gikan sa Pulong sang Dios. Halimbawa, sa nagligad nga artikulo, ginbinagbinag naton ang ginsiling ni Jesus nga naisip na ni Jehova ‘ang mismo mga buhok sa imo ulo.’ (Mateo 10:30) Ginapakita sining makapalig-on nga mga pulong nga interesado gid si Jehova sa tagsatagsa sang iya mga alagad. Dumduma man ang ilustrasyon ni Jesus tuhoy sa mga maya. Kon wala sining magamay nga mga pispis ang mahulog sa duta nga indi matalupangdan ni Jehova, paano masiling nga ginapabulagbulagan niya ang imo kahimtangan?

6. Paano ang Biblia isa ka kuluhaan sing lugpay sang mga nagapakigbato sa negatibo nga mga balatyagon?

⁶ Posible gid bala nga kita nga di-himpit nga mga tawo mangin hamili sa mga mata sang gamhanan gid nga Manunuga, si Jehova nga Dios? Huo! Sa katunayan, madamo nga dinalan sa Biblia ang nagapasalig sa aton sini. Kon hunahunaon naton ini, masiling man naton ang mga pulong sang salmista nga nagsiling: “Sang ang akon nagakabalaka nga mga panghunahuna nagdamo sa sulod nakon, ang imo mga paglipay naghapuhap sa akon kalag.” (Salmo 94:19) Binagbinagon naton ang pila sining makalipay nga mga pinamulong gikan sa Pulong sang Dios nga magabulig sa aton sa paghangop sing dugang pa nga ginapabaloran kita sang Dios kag padyaan niya kita samtang padayon nga ginahimo naton ang iya kabubut-on.

“Pinasahi nga Propiedad” ni Jehova

7. Anong makapalig-on nga tagna ang ginhatag ni Jehova paagi kay Malaquias sa malaut nga pungsod?

⁷ Malaut gid ang kahimtangan sa tunga sang mga Judiyo sang ikalima nga siglo B.⁠C.⁠E. Ginabaton sang mga saserdote ang indi nagakabagay nga mga sapat kag ginadulot ini subong mga halad sa altar ni Jehova. May ginadampigan ang  mga hukom. Lapnag ang binabaylan, pagbinutig, pagpangdaya, kag pagpanghilahi. (Malaquias 1:⁠8; 2:⁠9; 3:5) Makapakibot ang gintagna ni Malaquias sa sining tuman kalaut nga pungsod. Sa ulihi, ipasag-uli ni Jehova ang iya katawhan sa isa ka nahamut-an nga kahimtangan. Ang tagna amo: “‘Sila pat-od nga mangin akon,’ siling ni Jehova sang mga kasuldadusan, ‘sa adlaw nga magpaluntad ako sing isa ka pinasahi nga propiedad. Kag kaluy-an ko sila, subong sang pagkaluoy sang tawo sa iya anak nga lalaki nga nagaalagad sa iya.’”​—⁠Malaquias 3:17.

8. Ngaa maaplikar ang prinsipio sang Malaquias 3:17 sa dakung kadam-an?

⁸ Ang tagna ni Malaquias nagakatuman karon may kaangtanan sa hinaplas sang espiritu nga mga Cristiano, nga nagahuman sing isa ka espirituwal nga pungsod nga may 144,000 ka katapo. Ina nga pungsod isa gid ka “pinasahi nga propiedad,” ukon “katawhan nga pinasahi nga ginapanag-iyahan,” ni Jehova. (1 Pedro 2:9) Makapalig-on man ang tagna ni Malaquias sa “dakung kadam-an,” nga “nagatindog sa atubangan sang trono kag sang Kordero, nga napanaptan sing malaba nga mga panapton nga maputi.” (Bugna 7:​4, 9) Ini sila nagahuman sing isa ka panong upod sa mga hinaplas, sa idalom sang isa ka Manugbantay, si Jesucristo.​—⁠Juan 10:16.

9. Ngaa ginatamod ni Jehova ang iya katawhan subong “pinasahi nga propiedad”?

⁹ Paano ginatamod ni Jehova ang mga nagadesisyon sa pag-alagad sa iya? Subong sang ginsambit sa Malaquias 3:​17, ginatamod niya sila kasubong sang pagtamod sang isa ka mahigugmaon nga amay sa iya anak. Kag talupangda ang mapinalanggaon nga paglaragway niya sa iya katawhan​—⁠“isa ka pinasahi nga propiedad.” Ginbadbad sang iban nga mga badbad ini nga prase nga “ang akon gid,” “ang akon labing bilidhon nga ginapanag-iyahan,” kag “ang akon mga hiyas.” Ngaa tamdon ni Jehova ang mga nagaalagad sa iya sing subong sina ka pinasahi? Ang isa ka rason amo nga isa sia ka mainapresyahon nga Dios. (Hebreo 6:10) Nagapakigsuod sia kag ginatamod niya subong pinasahi ang mga nagaalagad sa iya sing tinagipusuon.

10. Paano ginaamligan ni Jehova ang iya katawhan?

¹⁰ May ginapanag-iyahan ka bala nga isa ka butang nga imo ginatamod subong isa ka pinasahi nga propiedad? Indi bala nga nagatinguha ka nga amligan ina? Amo man sina ang ginahimo ni Jehova sa iya “pinasahi nga propiedad.” Matuod, wala niya ginatamingan ang iya katawhan gikan sa tanan nga pagtilaw kag trahedya sa kabuhi. (Manugwali 9:11) Apang maamligan ni Jehova ang iya matutom nga mga alagad sa espirituwal. Nagahatag sia sing kusog sa ila nga ginakinahanglan nila agod mabatas ang bisan ano nga pagtilaw. (1 Corinto 10:13) Busa, ginsingganan ni Moises ang katawhan sang Dios sang una, ang mga Israelinhon: “Magpakaisog kag magpakabakod. . . . Si Jehova nga imo Dios amo ang magaupod sa imo. Indi ka niya pagbayaan ukon pagpatumbayaan sing bug-os.” (Deuteronomio 31:6) Mapinadyaon nga nagapakig-angot si Jehova sa iya katawhan. Ginakabig niya sila subong “isa ka pinasahi nga propiedad.”

Si Jehova “ang Manugpadya”

11, 12. Paano ang pag-apresyar kay Jehova sa iya papel subong Manugpadya naton makabulig sa aton sa pagpakigbato sa aton pagpangduhaduha?

¹¹ Ang isa pa ka ebidensia nga ginapabaloran ni Jehova ang iya mga alagad amo nga ginapadyaan niya sila. Ginsingganan niya ang mga Israelinhon: “‘Tilawi ako, palihug, sa sini nga butang,’ siling ni Jehova sang mga kasuldadusan, ‘kon indi ko pagbuksan sa inyo ang mga talambuan sang langit kag ibubo sa inyo ang pagpakamaayo tubtob nga wala na sing kakulang.’” (Malaquias 3:10) Sa ulihi, sa pagkamatuod, pagapadyaan ni Jehova ang iya mga alagad sing kabuhi nga walay katapusan.  (Juan 5:24; Bugna 21:4) Ginapakita sining bilidhon nga padya ang kadakuon sang gugma kag kaalwan ni Jehova. Ginapakita man sini nga ginapabaloran gid niya ang mga nagadesisyon sa pag-alagad sa iya. Ang pagtuon nga tamdon si Jehova subong isa ka maalwan nga Manugpadya makabulig sa aton sa pagpakigbato kon nagaduhaduha kita tuhoy sa aton panindugan sa Dios. Sa kamatuoran, ginapalig-on kita ni Jehova nga tamdon sia subong isa ka Manugpadya! Nagsulat si Pablo: “Sia nga nagapalapit sa Dios dapat magpati nga nagaluntad sia kag nga sia ang manugpadya sa mga hanuot nga nagapangita sa iya.”​—⁠Hebreo 11:6.

¹² Sa pagkamatuod, nagaalagad kita kay Jehova bangod ginahigugma naton sia​—⁠indi lamang bangod nagapanaad sia nga pagapadyaan niya kita. Apang, ang pagdumdom pirme sang aton ginalauman nga padya indi di-nagakaigo ukon kakagod. (Colosas 3:​23, 24) Bangod sang iya gugma sa ila kag sang daku nga pagpabalor sa ila, si Jehova ang una nga nagahulag kag ginapadyaan niya ang bisan sin-o nga hanuot nga nagapangita sa iya.

13. Ngaa ang gawad nga aman amo ang labing daku nga ebidensia sang gugma ni Jehova sa aton?

¹³ Ang labing daku nga ebidensia sang bug-os nga balor sang katawhan sa panulok ni Jehova amo ang gawad nga aman. Nagsulat si apostol Juan: “Ginhigugma gid sang Dios ang kalibutan amo nga ginhatag niya ang iya bugtong nga Anak, agod nga ang bisan sin-o nga magtuo sa iya indi malaglag kundi may kabuhi nga walay katapusan.” (Juan 3:16) Ang pag-aman sing halad nga gawad ni Jesucristo nagasumpakil sa ideya nga kita wala sing balor ukon indi takus higugmaon sa panulok ni Jehova. Sa pagkamatuod, sanglit daku gid nga bili ang ginbayad ni Jehova para sa aton​—⁠ang paghalad sang kabuhi sang iya bugtong nga Anak​—⁠pat-od gid nga tudok ang iya paghigugma sa aton.

14. Ano ang nagapakita kon paano gintamod ni Pablo ang gawad?

¹⁴ Busa, kon magbatyag ka nga daw wala ka sing pulos, pamalandungi ang gawad. Huo, tamda ini subong isa ka personal nga regalo ni Jehova para sa imo. Amo sina ang ginhimo ni apostol Pablo. Dumduma nga nagsiling sia: “Kailo ako nga tawo!” Apang nagpadayon sia sa pagsiling: “Salamat sa Dios paagi kay Jesucristo nga aton Ginuo,” nga, siling ni Pablo, “naghigugma sa akon kag nagtugyan sang iya kaugalingon para sa akon.” (Roma 7:​24, 25; Galacia 2:20) Sa pagsiling sini, wala nagapanikal si Pablo. May pagsalig gid sia nga ginapabaloran sia ni Jehova subong isa ka indibiduwal. Kaangay ni Pablo, tun-i man nga tamdon ang gawad subong isa ka personal nga regalo gikan sa Dios. Si Jehova indi lamang isa ka gamhanan nga Manluluwas kundi isa man ka mahigugmaon nga Manugpadya.

Mag-andam sa Malalangon nga mga Buhat ni Satanas

15-17. (a) Paano ginahingalitan sang Yawa ang negatibo nga mga balatyagon? (b) Ano nga pagpalig-on ang makuha naton gikan sa naeksperiensiahan ni Job?

¹⁵ Apang, mahimo nga daw indi ka gihapon makapati nga ang inspirado nga mga paglipay gikan sa Pulong sang Dios naaplikar gid sa imo. Mahimo batyagon mo nga ang padya nga magkabuhi sing dayon sa bag-ong kalibutan sang Dios isa ka butang nga matigayon sang iban, apang indi ka takus sa sini. Kon amo sini ang ginabatyag mo, ano ang imo mahimo?

¹⁶ Walay duhaduha nga pamilyar ka sa ginlaygay ni Pablo sa mga taga-Efeso: “Isuklob ang kompleto nga hinganib gikan sa Dios agod makatindog kamo sing malig-on batok sa mga pahito sang Yawa.” (Efeso 6:11) Kon hunahunaon naton ang mga padihot ni Satanas, mahimo nga ang madumduman naton dayon amo ang materyalismo kag imoralidad kag amo matuod. Madamo sa katawhan sang Dios sang dumaan nga mga tion kag sa aton adlaw ang nasiod sini nga mga pagsulay. Apang, indi naton pagkalipatan ang isa pa ka malalangon nga buhat ni Satanas​—⁠ang iya panikasog nga kumbinsihon ang mga tawo nga wala sila ginahigugma ni Jehova nga Dios.

¹⁷ Lantip ang Yawa sa paghingalit sina nga mga balatyagon sa iya pagtinguha nga patalikuron ang mga tawo gikan sa Dios. Dumduma ang ginsiling ni Bildad kay Job: “Paano ang mamalatyon nga tawo mangin husto sa atubangan sang Dios, ukon paano mangin matinlo ang isa nga ginpanganak sang isa ka babayi? Tan-awa! Bisan ang bulan indi masanag; kag ang mga bituon indi putli sa iya itululok. Daw ano pa gid kakubos ang tawo, nga isa  ka ulod, kag ang anak sang tawo, nga isa ka lago!” (Job 25:4-6; Juan 8:44) Mahanduraw mo bala kon daw ano ka makapaluya sang buot yadto nga mga pulong? Gani indi pagtuguti si Satanas nga paluyahon ang imo buot. Sa baylo, hibalua ang mga pahito ni Satanas agod makaangkon ka sing kaisog kag kusog nga magpakig-away sing labi pa sa paghimo sang kon ano ang husto. (2 Corinto 2:11) Tuhoy kay Job, bisan pa kinahanglan nga tadlungon sia, ginpadyaan ni Jehova ang iya pagbatas paagi sa pagpasag-uli sa iya sang tanan nga nadula sa iya sing doble pa.​—⁠Job 42:10.

Si Jehova “Labaw Pa sa Aton Tagipusuon”

18, 19. Paano ang Dios “labaw pa sa aton tagipusuon,” kag sa anong paagi ‘nahibaluan niya ang tanan’?

¹⁸ Matuod, mabudlay landason ang maluya nga buot kon tudok gid ini. Apang, ang espiritu ni Jehova progresibo nga makabulig sa imo sa pagbaliskad sang “mga butang nga natukod sing malig-on . . . nga ginpautwas batok sa ihibalo sang Dios.” (2 Corinto 10:​4, 5) Kon daw madaug ka na sang negatibo nga mga panghunahuna, binagbinaga ang ginsiling ni apostol Juan: “Sa sini mahibaluan naton nga kita gikan sa kamatuoran, kag mapasalig naton ang aton tagipusuon sa atubangan niya kon ang aton tagipusuon nagakondenar sa aton, kay ang Dios labaw pa sa aton tagipusuon kag nakahibalo sang tanan.”​—⁠1 Juan 3:​19, 20.

¹⁹ Ano ang buot silingon sang prase nga ang “Dios labaw pa sa aton tagipusuon”? Kon kaisa, mahimo nga ginakondenar kita sang aton tagipusuon, ilabi na kon nahibaluan naton ang aton mga di-kahimpitan kag mga kakulangan. Ukon mahimo nga bangod sang aton gindak-an, mahuyugon gid kita nga mangin negatibo sa aton kaugalingon, nga subong bala bisan ano pa ang himuon naton, indi gid mahamuot si Jehova. Ang ginsiling ni apostol Juan nagapasalig sa aton nga si Jehova labaw pa sa sina! Walay sapayan sang aton mga kasaypanan, makita niya ang aton matuod nga masarangan. Nahibaluan man niya ang aton mga motibo kag mga intension. Nagsulat si David: “Kay sia gid nakahibalo sang aton pagkahuman, nagadumdom nga kita yab-ok.” (Salmo 103:14) Huo, kilala kita ni Jehova sing labi pa sa pagkakilala naton sa aton kaugalingon!

“Isa ka Korona Sang Katahom” kag “Isa ka Harianon nga Turbante”

20. Ano ang ginapahayag sang tagna ni Isaias tuhoy sa pagpasag-uli kon tuhoy sa kon paano ginatamod ni Jehova ang iya mga alagad?

²⁰ Paagi kay manalagna Isaias, ginhatag ni Jehova sa iya dumaan nga katawhan ang paglaum tuhoy sa pagpasag-uli. Sang tinapok sila sa Babilonia, ining lugpay kag pasalig amo gid ang ginakinahanglan sang mga nadulaan na sing paglaum! Ginapanan-aw ang tion nga ipasag-uli sila sa ila dutang natawhan, nagsiling si Jehova: “Ikaw mangin isa ka korona sang katahom sa kamot ni Jehova, kag isa ka harianon nga turbante sa palad sang imo Dios.” (Isaias 62:3) Paagi sa sining mga pulong, ginpanaptan ni Jehova ang iya katawhan sing dignidad kag pagkahalangdon. Amo man ang iya ginhimo sa pungsod sang espirituwal nga Israel karon. Daw subong bala nga ginbayaw niya sila agod dayawon sang tanan.

21. Paano ka makaangkon sing pagsalig nga pagapadyaan ni Jehova ang imo matutom nga pagbatas?

²¹ Bisan pa ini nga tagna una nga natuman sa mga hinaplas, ginalaragway sini ang dignidad nga ginahatag ni Jehova sa tanan nga nagaalagad sa iya. Busa, kon nagapangduhaduha ka, dumduma nga bisan pa di-himpit ka, mahimo ikaw mangin subong ka bilidhon sa “isa ka korona sang katahom” kag “isa ka harianon nga turbante” para kay Jehova. Gani padayon nga pahalipaya ang iya tagipusuon paagi sa hanuot nga pagtinguha nga himuon ang iya kabubut-on. (Hulubaton 27:11) Sa paghimo sini, makasalig ka nga pagapadyaan ni Jehova ang imo matutom nga pagbatas!

[Nota]

Madumduman Mo Bala?

• Paano kita isa ka “pinasahi nga propiedad” ni Jehova?

• Ngaa importante nga tamdon si Jehova subong ang Manugpadya?

• Batok sa anong malalangon nga mga buhat ni Satanas dapat kita magbantay?

• Sa anong paagi ang Dios “labaw pa sa aton tagipusuon”?

[Mga Pamangkot sa Pagtinuon]

[Retrato sa pahina 26]

Si Pablo

[Retrato sa pahina 26]

Si Elias

[Retrato sa pahina 26]

Si Ana

[Retrato sa pahina 28]

Bugana ang Pulong sang Dios sa makalipay nga mga panghunahuna