Gindayaw ang Interes sa Biblia

SI Marianna isa sa mga Saksi ni Jehova sa nabagatnan nga Italya, 18 anyos kag manuggradwar na sa hayskul. Nagaeskwela sia sa ginaeskwelahan man sang iban pa nga pamatan-on nga mga Saksi.

“Sing mga pila ka tuig na karon,” sulat ni Marianna, “ang pila sa amon nagabasa sang adlaw-adlaw nga teksto sang Biblia gikan sa Pag-usisa sa Kasulatan sa Adlaw-adlaw sa tion sang pahuway. Sarang lang namon mahimo ini sa isa sang mga koridor malapit sa hulot sang mga manunudlo. Indi gid man ini malinong nga duog. Makit-an kami sang kalabanan nga manunudlo kon maglabay sila, kag ang iban nagadulog agod tan-awon kon ano ang amon ginahimo. Masami nga nagahatag ini sa amon sing kahigayunan agod masabat ang ila mga pamangkot. Sa promedyo, isa ka manunudlo ang nagadulog kada adlaw agod makigsugilanon sa amon. Ang pila nagpamati sa amon pagbinagbinag sang teksto sa Biblia kag nagdayaw sa interes naton nga mga Saksi sa espirituwal nga mga butang. Isa ka bes, gin-agda kami sang kabulig nga prinsipal nga hiwaton namon ang amon paghambalanay sa hulot sang mga manunudlo.

“Pagkatapos makita kon diin kami nagabinagbinag sang teksto, ang akon manunudlo nagpangabay sa prinsipal kon sarang namon ini mahimo sa isa sang mga hulot-klasehan, diin mas malinong. Nagpahanugot ang prinsipal, kag gindayaw kami sang akon manunudlo sa atubangan sang bug-os nga klase bangod sang maayo nga halimbawa nga amon ginpakita. Malipayon gid kami bangod sang daku nga pribilehiyo nga ginhatag ni Jehova sa amon.”