“Sarang Sila Mahilway sa Gilayon”

NAKILALA ni Geneviève de Gaulle, nga hinablos ni Charles de Gaulle, nga presidente anay sang Pransia, ang mga Saksi ni Jehova sa kampo konsentrasyon sang mga Nazi sa Ravensbrück, naaminhan nga Alemanya. Ginsiling niya ang mga pulong sa ibabaw sa isa ka sulat sang Agosto 1945.

Ginhilway ang mga bilanggo sa kampo konsentrasyon sa Auschwitz, Poland sang Enero 27, 1945. Sugod pa sang 1996, ini nga petsa nangin handumanan nga adlaw sa Alemanya para sa mga biktima sang Third Reich ni Hitler.

Sa tion sang opisyal nga pamulongpulong bilang paghinumdom sini sang Enero 27, 2003, ang presidente sang Parlamento sang Estado sang Baden-Württemberg, nga si Peter Straub, nagkomento: “Ang tanan nga nag-antos sang paghingabot bangod sang ila relihioso kag politikal nga mga pagpati kag handa nga mapatay sa baylo nga magpasakop takus gid sang aton daku nga pagtahod nga mabudlay gid ipabutyag sa mga pulong. Ang mga Saksi ni Jehova amo lamang ang relihion nga wala gid nagsunod sa mga ginapatuman sang rehimen ni Hitler: Wala sila magsaludo kay Hitler. Nagdumili sila sa pagsumpa nga mangin matutom sa ‘Führer kag sa Estado,’ subong sang pagdumili nila nga magsoldado kag magpangabudlay para sa militar. Kag ang ila mga kabataan wala mag-entra sa Hitler Youth Movement.”

Si Jesucristo nagsiling tuhoy sa iya mga sumulunod: “Indi sila bahin sang kalibutan, subong nga ako indi bahin sang kalibutan.” (Juan 17:16) Busa, ang panindugan sang mga Saksi ni Jehova bangod gid sa relihioso nga mga rason. Si Straub nagpadayon: “Ang mga Saksi ni Jehova, nga may purpura nga trianggulo sa ila mga uniporme sa kampo konsentrasyon, amo lamang ang makagua kuntani sa bilangguan kag makalikaw sa kamatayon kon pirmahan lang nila ang deklarasyon nga nagasikway sang ila pagtuo.”

Para sa kalabanan sang mga Saksi, indi gid nila pag-ikompromiso ang ila pagtuo. Busa, mga 1,200 sa ila ang napatay sang panahon sang mga Nazi. Duha ka gatos kag kapituan ang ginpatay bangod namatok sila sandig sa ila konsiensia. Wala lamang nila ginhambal kundi gintuman gid ang pinamulong nga: “Dapat namon tumanon ang Dios subong manuggahom sa baylo sang mga tawo.”​—⁠Binuhatan 5:29.

Indi pinasahi nga mga tawo ang mga Saksi ni Jehova, subong sang ginsiling ni Ulrich Schmidt, nga presidente sang Parlamento sang Estado sang North Rhine-Westphalia. Ginapatuhuyan ang iya ginpamulong, ang brosyur nga Landtag Intern nagtawag sa ila nga “ordinaryo nga mga tawo nga, subong pagsunod sa ila konsiensia, nagtindog nga malig-on tungod sa ila relihioso nga mga pagpati, nagpakita sing kaisog, kag nagpamatok sa ideolohiya sang Nazi bangod sang ila Cristianong kombiksion.” Mapat-od naton nga nalipay gid si Jehova nga Dios sa tanan nga nagaunong sa iya sing matutom sa mabudlay nga mga kahimtangan. Sa Hulubaton 27:​11, aton mabasa: “Magmaalam ka, anak ko, kag pahalipaya ang akon tagipusuon, agod nga masabat ko sia nga nagayaguta sa akon.”

[Credit Line sang retrato sa pahina 30]

Courtesy of United States Holocaust Memorial Museum