Ang Pagpangita sang Kamatuoran sa Biblia sang mga Mennonite

ISA ka aga sang Nobiembre 2000, sang naggawa ang pila ka misyonero sa bintana sang ila gamay nga balay, nakita nila sa geyt ang isa ka grupo sang ginanerbios kag simple lamang sing panapot nga mga lalaki kag babayi. Sang ginbuksan sang mga misyonero ang geyt, ang una nga ginmitlang sang mga bisita amo, “Luyag namon mahibaluan ang kamatuoran sa Biblia.” Ang ila mga bisita amo ang mga Mennonite. Ang mga lalaki nagasuksok sing overall kag ang mga babayi naman sing daw maitom nga ipron, kag nagaistoryahanay sila sa isa ka dialekto sa Alemanya. Makita mo ang kahadlok sa ila mga mata. Nagalingaslingas sila sa kahangawa nga basi bala nasundan sila. Walay sapayan sini, bisan sang nagapasaka pa lang sa balay, ang isa sang bataon nga lalaki nagsiling, “Luyag ko makilala ang mga tawo nga nagagamit sang ngalan sang Dios.”

Napahamtang ang buot sang mga bisita sang nakasulod na sila kag ginpapamahawan. Naghalin pa sila sa malayo kag naligwin nga uma. Didto, mga anom ka tuig na sila nga nagabaton sing magasin nga Ang Lalantawan paagi sa koreo. “Nabasahan namon nga mangin paraiso ang duta. Matuod bala ini?” pamangkot nila. Ginpakita sa ila sang mga Saksi ang sabat sang Biblia. (Isaias 11:⁠9; Lucas 23:43; 2 Pedro 3:​7, 13; Bugna 21:​3, 4) “Nakita ninyo!” siling sang isa ka mangunguma sa iya mga upod. “Matuod ini. Mangin paraiso ang duta.” Ang iban nagsiling: “Sa banta ko amo na ini kamatuoran.”

Sin-o ang mga Mennonite? Ano ang ila ginapatihan? Agod masabat ining mga pamangkot, kinahanglan naton balikan ang ika-16 nga siglo.

Sin-o ang mga Mennonite?

Sang dekada 1500, ang hinali nga pagdamo sang pagbadbad kag pag-imprinta sang Biblia sa kinaandan nga mga lenguahe sa Europa nagpukaw sing interes sa pagtuon sang Biblia didto. Ginsikway ni Martin Luther kag sang iban pa nga mga Repormador ang madamo nga panudlo sang Katoliko nga Simbahan. Apang, ginpadayon gihapon sang bag-ong porma nga mga simbahan sang Protestante ang di-Biblikanhon nga mga buhat. Halimbawa, ginapaabot sang kalabanan nga ang tagsa ka bag-ong bun-ag nga lapsag dapat bunyagan sa simbahan. Apang, nahangpan sang pila ka nagatuon sa Biblia nga antes sia bawtismuhan kag mangin bahin sang Cristianong kongregasyon, kinahanglan sia anay magdesisyon pasad sa ihibalo. (Mateo 28:​19, 20) Ang makugi nga mga manugbantala nga nagapati sa sini naglakbay sa mga banwa kag mga minuro nga nagapanudlo sa Biblia kag  nagapangbawtismo sang mga adulto. Gani, gintawag sila nga mga Anabaptist, ukon mga “nagapangbawtismo liwat.”

Ang isa nga nagpangita sing kamatuoran sa mga Anabaptist amo si Menno Simons, isa ka Katoliko nga pari sa minuro sang Witmarsum sa naaminhan nga bahin sang Netherlands. Sang 1536 ginbugto niya ang iya kaangtanan sa simbahan, amo nga gin-ayam sia sang mga awtoridad sini. Sang 1542 si Emperador Charles V sang Balaan nga Roma nagpromisa sing 100 guilders (ang kuarta anay sang Netherlands) bilang padya sa makadakop kay Menno. Walay sapayan sini, gintipon ni Menno ang pila sang mga Anabaptist kag nagporma sila sing mga kongregasyon. Sang ulihi gintawag sila nga mga Mennonite.

Ang mga Mennonite Karon

Sa pagligad sang tion, linibo ka Mennonite halin sa Nakatundan nga Europa ang nagsaylo sa Aminhan nga Amerika bangod sang paghingabot. Padayon nila didto nga ginpangita ang kamatuoran kag ginpalapnag ang ila mensahe sa madamo pa. Apang nagtahaw na ang nagadabdab nga kakugi sang ila mga katigulangan sa progresibo nga pagtuon sa Biblia kag sa publiko nga pagbantala. Ginhuptan gihapon sang kalabanan ang mga panudlo nga wala napasad sa Biblia, subong sang Trinidad, pagkadimamalatyon sang tawhanon nga kalag, kag kalayuhon nga impierno. (Manugwali 9:⁠5; Ezequiel 18:⁠4; Marcos 12:29) Sa karon, ang mga misyonero nga Mennonite nagakonsentrar sa paghatag sing medikal kag pisikal nga mga bulig sa baylo sangsa pag-ebanghelyo.

Ginabulubanta nga may yara karon mga 1,300,000 ka Mennonite nga nagapuyo sa 65 ka mga pungsod. Apang, ginakasubo sang mga Mennonite karon ang kakulang nila sing paghiusa, nga amo man anay ang ginbatyag ni Menno Simons siniglo ang nagligad. Sa tion sang Bug-os Kalibutan nga Inaway I, ang lainlain nga opinyon tuhoy sa isyu sang neutralidad ginbangdan sang daku nga pagbahinbahin. Madamo sa Aminhan nga Amerika ang nangindi sa pagsoldado bangod sang Makasulatanhon nga mga rason. Apang ang An Introduction to Mennonite History nagsiling: “Kutob sang 1914 ang pagpangindi sa pagsoldado isa na lamang ka maragtas sa mga simbahan sang Mennonite sa Nakatundan nga Europa.” Halos gin-adoptar na karon sang Mennonite nga mga grupo ang moderno nga mga paagi. Apang ang iban nagagamit gihapon sing mga hook and eye sa ila mga bayo sa baylo sang mga butones kag nagapati nga ang mga lalaki indi dapat mamarbas.

Bangod determinado ang pila sang Mennonite nga mga grupo nga magpain sa moderno nga kalibutan, ginsaylo nila ang ila komunidad sa mga duog diin wala sila ginahilabtan sang lokal nga mga panguluhan. Halimbawa, ginabulubanta nga mga 38,000 ka Mennonite sa Bolivia ang nagapuyo sa madamong nabaw-ing nga mga komunidad kag ang kada isa may yara kaugalingon nga mga kasuguan. Wala ginapahanugot sang iban nga mga komunidad ang de-motor nga mga salakyan kundi mga kabayo kag mga kalesa lamang. Wala naman ginapahanugot sang iban nga mga komunidad ang radyo, TV, kag musika. Ginadumili pa gani sang iban ang pagtuon sa hambal sang ila ginapuy-an nga pungsod. “Agod makontrol kami, wala kami ginatugutan sang mga manugwali nga magtuon sing Espanyol,” siling sang isa ka pumuluyo. Madamo ang nagabatyag nga ginapigos kag nagakabuhi sa kahadlok nga basi sikwayon sa komunidad⁠—butang nga ginakahadlukan gid sang isa nga wala makaeksperiensia sang kabuhi sa gua sang komunidad.

Kon Paano Natanom ang Binhi sang Kamatuoran

Amo sini ang kahimtangan sang nakita ni Johann, nga isa ka mangunguma nga Mennonite, ang isa ka kopya sang Lalantawan nga magasin sa balay sang iya kaingod. Halin sa Canada, ang pamilya  ni Johann nagsaylo sa Mexico kag sang ulihi sa Bolivia. Apang madugay na nga ginahandum ni Johann nga masapwan ang kamatuoran sa Biblia. Ginhulam niya ang magasin.

Sang ulihi, sang yara sia sa siudad sa pagbaligya sang iya mga produkto sa uma, ginpalapitan ni Johann ang isa ka Saksi nga nagatanyag sing Ang Lalantawan sa merkado. Gin-updan niya si Johann sa isa ka misyonero nga nagahambal sing Aleman, kag sang ulihi nagabaton na si Johann sing Aleman nga Ang Lalantawan paagi sa koreo. Ang tagsa ka gua sang magasin gintun-an sing maayo kag ginpasapasa sa nagkalainlain nga mga pamilya sa iya komunidad tubtob nga nagkalata-ta na ini. Kon kaisa ang mga pamilya nagatipon agod tun-an Ang Lalantawan tubtob magtungang-gab-i, nga ginabasa ang ginsitar nga mga teksto. Nakumbinsi gid si Johann nga ang mga Saksi ni Jehova amo ang nahiusa nga nagahimo sang kabubut-on sang Dios sa bug-os nga duta. Antes sia mapatay, ginsilingan ni Johann ang iya asawa kag mga anak: “Basaha gid ninyo pirme Ang Lalantawan. Magabulig ini sa inyo nga mahangpan ang Biblia.”

Ginsugid sang pila ka katapo sang pamilya ni Johann sa ila mga kaingod ang ila mga natun-an sa Biblia. “Ang duta indi malaglag. Sa baylo, himuon ini sang Dios nga isa ka paraiso,” siling nila. “Kag wala ginasilutan sang Dios ang mga tawo sa impierno.” Sang ulihi nakalab-ot ini sa mga manugwali sang simbahan, kag ginpahog sila nga sikwayon kon indi sila mag-untat. Sang ulihi, sang naghambalanay ang pamilya nahanungod sa pag-ipit sa ila sang Mennonite nga mga gulang, ang isa ka pamatan-on nga lalaki nagsiling. “Ambot ngaa sige pa kita reklamo tuhoy sa mga gulang sang simbahan,” siling niya. “Nahibaluan naton tanan kon ano ang matuod nga relihion, apang wala man gihapon kita nagahulag.” Natandog gid ang tagipusuon sang amay sang pamatan-on. Sang ulihi, pulo sa ila pamilya ang naglakbay sing patago agod pangitaon ang mga Saksi ni Jehova kag nakalab-ot sila sa balay sang mga misyonero, subong sang ginsambit sa umpisa.

Pagkasunod nga adlaw, ginduaw sang mga misyonero ang ila bag-o nga mga abyan sa ila komunidad. Ang salakyan sang mga misyonero amo gid lang ang de-motor nga salakyan sa dalan. Samtang ginalabayan nila ang mga karwahe, daw natingala sila sa mga residente kag ang mga residente daw natingala man sa ila. Nian, naglingkod sila sa lamesa upod sa napulo ka Mennonite nga nagarepresentar sa duha ka pamilya.

Sadto mismo nga adlaw, apat ka oras nga gintun-an nila ang kapitulo 1 sang libro nga Ang Ihibalo nga Nagadul-ong sa Kabuhi nga Walay Katapusan.⁠ * Sa tagsa ka parapo, ginabuksan sang mga mangunguma ang iban pa nga mga teksto sa Biblia agod tan-awon kon husto ang ila pag-aplikar sini. Antes sabton sang humalambal sang grupo ang tagsa ka pamangkot sa pagtuon sa Espanyol nga hambal, nagadulog anay sila sing mga pila ka minuto kag nagapamangkutay sa Aleman nga hambal. Isa yadto ka indi gid malipatan nga adlaw, apang may nagapakari nga paghingabot. Magaatubang sila sing mga pagtilaw, kaangay sang natabo kay Menno Simons sang ginpangita niya ang kamatuoran sang Biblia sang nagligad nga lima ka siglo.

Pag-atubang sing mga Pagtilaw Bangod sang Kamatuoran

Mga pila ka adlaw sang ulihi, ang mga gulang sang simbahan nagkadto sa balay nanday Johann kag ginpahog sila kag pati na ang mga interesado: “Nabatian namon nga ginduaw kamo diri sang mga Saksi ni Jehova. Indi na ninyo sila pagpabalika, kag kon indi ninyo pag-ihatag ang ila mga literatura agod sunugon, sikwayon kamo namon.” Makaisa pa lang sila magtuon sa mga Saksi, gani mabudlay gid ini nga pagtilaw.

“Indi namon mahimo ina,” sabat sang isa ka ulo  sang pamilya. “Nagkadto sila diri agod tudluan kami sa Biblia.” Ano ang ginhimo sang mga gulang? Bangod sang ila pagtuon sa Biblia, ginsikway sila! Wala gid ini sing kaluoy. Ginalabayan lang sang karito sang pabrika sang keso ang balay sang isa ka pamilya kag wala ginakolekta ang ila mga gatas, sa amo ginadingutan sila sang ila amoamo lang nga palangabuhian. Ang isa ka amay sang puluy-an ginpahalin sa trabaho. Ang isa pa gid ka amay wala gintugutan nga magbakal sa tiendahan sang ila komunidad, kag ang iya dies anyos nga bata nga babayi ginpahalin sa eskwelahan. Ang isa naman ka balay ginpalibutan sang mga kaingod kag ginkuha ang asawa sang isa sa mga bataon nga lalaki, kag nagpamilit sila nga indi sia puede magpuyo upod sa iya ginsikway nga bana. Walay sapayan sini tanan, ang mga pamilya nga nagtuon sa Biblia wala nag-untat sa pagpangita sing kamatuoran.

Padayon gihapon nga nagdumala sing pagtuon sa Biblia ang mga misyonero walay sapayan nga malayo ang ila ginalakbay kada semana. Yadtong mga pagtuon nagpalig-on gid sa mga pamilya. Agod makatuon sa Biblia, ang iban nga mga katapo sang pamilya naglakbay sing duha ka oras paagi sa kalesa. Makatalandog gid ang una nga kahigayunan nga ginpangabay sang mga pamilya ang isa sa mga misyonero nga mangamuyo. Sa sini nga komunidad ang mga Mennonite wala nagapangamuyo sing matunog, gani wala pa gid sila nakabati nga may isa nga nangamuyo para sa ila. Nagtulo gid ang luha sang mga lalaki. Kag mahanduraw mo gid ang ila katingala sang nagdala sing tape recorder ang mga misyonero! Sa ila komunidad wala gid ginatugot ang musika. Nanamian gid sila sa matahom nga Kingdom Melodies amo nga namat-od sila sa pagkanta sing ambahanon sang Ginharian pagkatapos sang tagsa ka pagtuon! Apang, yara gihapon ang pamangkot, Paano nila mabatas ang ila nagbag-o nga kahimtangan?

Pagsapo sa Mahigugmaon nga Kauturan

Bangod ginsikway sila sa komunidad, naghimo na lang sila sang ila kaugalingon nga keso. Ginbuligan sila sang mga misyonero sa pagpangita sing mga manugbakal. Nabalitaan sang isa ka madugay na nga Saksi sa Aminhan nga Amerika nga nagdaku man sa komunidad sang Mennonite sa Bagatnan nga Amerika ang natabo sa mga pamilya. Luyag gid niya nga buligan sila. Sadto mismo nga semana, naglakbay sia pa Bolivia para duawon sila. Magluwas sa espirituwal nga pagpalig-on, ginbuligan man niya ang mga pamilya nga makabakal sang ila kaugalingon nga pickup agod makatambong sila sa mga miting sa Kingdom Hall kag madala nila sa merkado ang ila mga produkto sa uma.

“Ginbudlayan gid kami sang ginsikway kami sa komunidad. Nagakadto kami sa Kingdom Hall nga masinulub-on,” hinumdom sang isa ka katapo sang pamilya, “apang nagapauli kami nga malipayon.” Sa pagkamatuod, ang lokal nga mga Saksi handa gid sa pagbulig. Ang iban nagtuon sing Aleman, kag ang pila ka nagahambal sing Aleman nga mga Saksi halin sa Europa nagpa-Bolivia agod magbulig sa pagdumala sing Cristianong mga miting sa Aleman nga hambal. Wala magdugay, 14 gikan sa Mennonite nga komunidad ang nagabantala sing maayong balita sang Ginharian sa iban.

Sang Oktubre 12, 2001 wala matuigi pagkatapos sang una nga pagduaw sa puluy-an sang mga misyonero, 11 sa sining anay Anabaptist ang ginbawtismuhan liwat, sa sini nga tion bilang simbulo sang ila dedikasyon kay Jehova. Kutob sadto, madamo pa ang nagpabawtismo. Ang isa ka lalaki nagkomento sang ulihi: “Sugod sang matun-an namon ang kamatuoran sa Biblia, daw kaangay kami sang mga ulipon nga ginhilway.” Ang isa pa nagsiling man: “Madamo nga Mennonite ang nagareklamo bangod sang kakulang sang gugma sa ila komunidad. Apang ang mga Saksi ni Jehova nagapakita gid sing interes sa isa kag isa. Nagabatyag ako sing kalig-unan kon upod ko sila.” Kon luyag mo mahangpan sing labi pa ang kamatuoran sa Biblia, mahimo magaatubang ka man sing mga kabudlayan. Apang kon mangayo ka sing bulig kay Jehova kag magpakita sing pagtuo kag kaisog subong sang ginhimo sining mga pamilya, magamadinalag-on ka man kag makasapo sing kalipay.

[Nota]

[Retrato sa pahina 25]

Nalipay sa pagbaton sing mga literatura sa Biblia sa Aleman nga hambal

[Retrato sa pahina 26]

Walay sapayan nga ginadumili ang musika, nagaamba na sila karon pagkatapos sang tagsa ka pagtuon sa Biblia