Maglakat Upod sa Dios sa Sining Magamo nga mga Tion

“Si Enoc nagpadayon sa paglakat upod sa matuod nga Dios. Nian wala na sia, kay ginkuha sia sang Dios.”​—⁠GENESIS 5:24.

1. Ngaa mabudlay karon ang aton tion?

MAGAMO nga mga tion! Ginalaragway gid sining ekspresyon ang mga tinuig sang kinagubot kag kasingki nga naeksperiensiahan sang katawhan sugod sang mabun-ag ang Mesianikong Ginharian sang 1914. Sugod sadto, yara na ang katawhan sa “katapusan nga mga adlaw.” Ang mga kalamidad subong sang mga tiggulutom, peste, linog, kag inaway nagsalot sa ila sa di-matupungan nga kasangkaron. (2 Timoteo 3:⁠1; Bugna 6:​1-8) Indi hilway sa sini ang mga sumilimba ni Jehova. Sa pila ka kasangkaron, tanan kita kinahanglan magbatas sang mga kabudlayan kag pagkawalay kapat-uran sang aton panahon. Ang kapigaduhon, kagamo sa politika, krimen, kag balatian amo ang pila ka butang nga nagapabudlay gid sang kabuhi.

2. Anong mga hangkat ang ginaatubang sang mga alagad ni Jehova?

² Dugang pa, madamo sa mga alagad ni Jehova ang nagbatas sing madamong masingki nga paghingabot kay si Satanas padayon nga nagapakig-away sa mga “nagatuman sang mga sugo sang Dios kag may hilikuton sa pagpanaksi tuhoy kay Jesus.” (Bugna 12:17) Kag bisan pa kita tanan wala makaeksperiensia sing direkta nga paghingabot, ang tanan nga matuod nga Cristiano kinahanglan makig-away batok kay Satanas nga Yawa kag sa espiritu nga ginapalambo niya sa katawhan. (Efeso 2:⁠2; 6:12) Kinahanglan ang dalayon nga pagbantay agod indi kita maimpluwensiahan sina nga espiritu, bangod makita naton ini sa ulubrahan, sa eskwelahan, kag sa bisan diin nga lugar diin kinahanglan kita makig-angot sa mga tawo nga wala sing interes sa putli nga pagsimba.

Maglakat Upod sa Dios, Indi Upod sa mga Pungsod

3, 4. Sa anong paagi ang mga Cristiano tuhay sa kalibutan?

³ Sadtong unang siglo, nagpakig-away man sing lakas ang mga Cristiano batok sa espiritu sining kalibutan, kag bangod sini nangin tuhay gid sila sa mga tawo sa gua sang Cristianong kongregasyon. Ginlaragway ni Pablo ang kinatuhayan sang nagsulat sia: “Busa, ginasiling ko ini kag ginapamatud-an sa Ginuo, nga indi na kamo magpadayon sa  paglakat subong sang paglakat man sang mga pungsod sa pagkawalay pulos sang ila hunahuna, samtang ginadulman sila sa ila painuino, kag nahamulag sa kabuhi nga iya sang Dios, bangod sang ila pagkawalay ihibalo, bangod sang katig-a sang ila tagipusuon. Bangod nawad-an sang tanan nga igbalatyag sa moral, gintugyan nila ang ila kaugalingon sa malaw-ay nga paggawi sa pagbuhat sang tanan nga sahi sang kahigkuan nga may kakagod.”​—⁠Efeso 4:17-19.

⁴ Daw ano kaathag nga ginlaragway sining mga tinaga ang pitipit nga espirituwal kag moral nga kadudulman sining kalibutan​—⁠sang adlaw ni Pablo kag sang aton man adlaw! Kaangay sadtong unang siglo, ang mga Cristiano karon wala ‘nagalakat subong sang paglakat sang mga pungsod.’ Sa baylo, may dalayawon sila nga pribilehiyo nga maglakat upod sa Dios. Sa pagkamatuod, mahimo magduhaduha ang iban nga tawo kon bala makatarunganon isiling nga ang kubos kag di-himpit nga mga tawo makalakat upod kay Jehova. Apang, ginapakita sang Biblia nga posible ini. Dugang pa, ginapaabot ni Jehova nga himuon nila ini. Sang ikawalo nga siglo antes sang aton Kumon nga Dag-on, ginsulat ni manalagna Miqueas ang masunod nga inspirado nga pinamulong: “Ano bala ang ginapatuman ni Jehova sa imo kundi ang paghimo sing katarungan kag ang paghigugma sa kaayo kag ang paglakat sing maugdang upod sa imo Dios?”​—⁠Miqueas 6:8.

Paano kag Ngaa Dapat Maglakat Upod sa Dios?

5. Paano makalakat upod sa Dios ang di-himpit nga mga tawo?

⁵ Paano bala kita makalakat upod sa labing gamhanan, di-makita nga Dios? Maathag nga indi kaangay sang paglakat naton upod sa pareho naton nga tawo. Sa Biblia ang ekspresyon nga “paglakat” mahimo magakahulugan sing “pagsunod sa isa ka partikular nga dalanon.”⁠ * Pasad sa sini, mahangpan naton nga ang isa nga nagalakat upod sa Dios nagasunod sa isa ka dalanon sang pagkabuhi nga ginapatuman sang Dios kag nagapahamuot sa iya. Ang pagsunod sa sining dalanon nagahimo sa aton nga tuhay sa kalabanan nga tawo sa palibot naton. Apang, amo lamang ini ang dapat pilion sang mga Cristiano. Ngaa? May yara madamo nga rason.

6, 7. Ngaa ang paglakat upod sa Dios amo ang labing maayo nga dalanon?

⁶ Una, si Jehova amo ang aton Manunuga, ang Tuburan sang aton kabuhi, kag ang Manug-aman sang tanan naton nga kinahanglanon agod mabuhi. (Bugna 4:11) Busa, sia lamang ang may kinamatarong sa pagsiling kon paano kita dapat maglakat. Dugang pa, ang paglakat upod sa Dios amo ang labing mapuslanon nga dalanon sang pagkabuhi nga puede matigayon. Para sa mga nagalakat upod sa iya, naghimo si Jehova sing kahimusan para sa kapatawaran sang sala, kag nagtanyag sia sing sigurado nga paglaum nga kabuhi nga walay katapusan. Ang aton mahigugmaon gid nga Amay nagaaman man sing maalamon nga laygay nga nagabulig sa mga nagalakat upod sa iya nga magmadinalag-on sa pagkabuhi karon, walay sapayan sang ila pagkadihimpit kag pagkabuhi sa kalibutan nga yara sa gahom ni Satanas. (Juan 3:​16; 2 Timoteo 3:​15, 16; 1 Juan 1:⁠8; 2:​25; 5:19) Ang isa pa ka rason sa paglakat upod sa Dios amo nga ang aton kahanda sa paghimo sini nagapauswag sing paghidait kag paghiusa sang kongregasyon.​​—⁠Colosas 3:​15, 16.

⁷ Sa katapusan, kag labing importante, kon maglakat kita upod sa Dios, ginapakita naton kon diin kita dampig sa dakung hulusayon nga nag-utwas didto pa sa hardin sang Eden​—⁠ang hulusayon sang pagkasoberano. (Genesis 3:​1-6) Ginapakita naton paagi sa aton dalanon sang pagkabuhi nga dampig gid kita kay Jehova, kag walay kahadlok nga ginabantala naton nga sia lamang ang may kinamatarong nga Soberano. (Salmo 83:18) Sa amo nagapanghikot kita nahisanto sa aton pangamuyo nga pakabalaanon ang ngalan sang Dios kag matuman ang iya kabubut-on. (Mateo 6:​9, 10) Maalamon gid ang mga nagpili nga maglakat upod sa Dios! Makapat-od gid sila nga nagalakat sila sa husto nga direksion, bangod si Jehova “ang lamang nga maalam.” Wala gid sia nagasayop.​​—⁠Roma 16:27.

8. Paano magkaanggid ang panahon ni Enoc kag ni Noe sa aton panahon?

⁸ Apang, paano kita posible nga magkabuhi subong mga Cristiano kon ang sitwasyon sa kalibutan  magamo katama kag ang kalabanan nga tawo wala sing interes sa pag-alagad kay Jehova? Makita naton ang sabat kon binagbinagon naton ang matutom nga mga lalaki sang una nga naghupot sang ila integridad sa mabudlay gid nga mga tion. Ang duha sa ila amo si Enoc kag si Noe. Pareho sila nga nagkabuhi sa tion nga daw kaangay sang tion naton. Lapnag gid ang kalautan. Sang adlaw ni Noe ang duta puno sing kasingki kag imoralidad. Apang, ginpamatukan ni Enoc kag ni Noe ang espiritu sang kalibutan sang panahon nila kag naglakat upod kay Jehova. Paano nila ini nahimo? Agod masabat ina nga pamangkot, binagbinagon naton sa sini nga artikulo ang halimbawa ni Enoc. Sa masunod nga artikulo, binagbinagon naman naton si Noe.

Si Enoc Naglakat Upod sa Dios sa Magamo nga mga Tion

9. Ano ang aton impormasyon tuhoy kay Enoc?

⁹ Si Enoc amo ang una nga tawo nga ginlaragway sang Kasulatan nga naglakat upod sa Dios. Ang rekord sang Biblia nagasiling: “Pagkatapos nga natawo si Metusela si Enoc nagpadayon sa paglakat upod sa matuod nga Dios.” (Genesis 5:22) Nian, pagkatapos mareport ang kalawigon sang kabuhi ni Enoc​—⁠nga bisan pa malawig kon ipaanggid sa aton kabuhi karon, malip-ot ini sadto nga panahon​—⁠ang rekord nagasiling: “Si Enoc nagpadayon sa paglakat upod sa matuod nga Dios. Nian wala na sia, kay ginkuha sia sang Dios.” (Genesis 5:24) Maathag nga ginliton ni Jehova si Enoc gikan sa duta sang mga buhi pakadto sa pagtulog sa kamatayon antes sia mahalitan sang mga nagapamatok sa iya. (Hebreo 11:​5, 13) Luwas sa sining malip-ot nga mga teksto, pila ka beses lang nga ginsambit sa Biblia si Enoc. Walay sapayan sini, gikan sa mga impormasyon nga matigayon naton kag gikan sa iban pa nga mga ebidensia, may rason kita nga magsiling nga ang panahon ni Enoc magamo.

10, 11. (a) Paano naglapnag ang kalainan pagkatapos sang pagrebelde ni Adan kag ni Eva? (b) Anong matagnaon nga mensahe ang ginbantala ni Enoc, kag ano ang nangin reaksion sang mga tawo?

¹⁰ Binagbinaga, halimbawa, kon daw ano kadasig naglapnag ang kalainan sa bug-os nga rasa sang tawo pagkatapos makasala si Adan. Ang Biblia nagasugid sa aton nga ang panganay nga anak ni Adan nga si Cain, amo ang una nga tawo nga manugpatay sing tawo sang ginpatay niya ang iya utod nga si Abel. (Genesis 4:​8-​10) Pagkatapos sang masingki nga kamatayon ni Abel, isa pa ka anak nga lalaki ang natawo kay Adan kag Eva, kag sia amo si Set. Tuhoy sa iya, mabasa naton: “Kay Set nabun-ag man ang isa ka anak nga lalaki kag gintawag niya ang iya ngalan nga Enos. Sadto nga tion ang pagtawag sa ngalan ni Jehova ginsugdan.” (Genesis 4:​25, 26) Sing makapasubo, yadto nga “pagtawag sa ngalan ni Jehova” isa ka pagtalikod sa  matuod nga pagsimba.⁠ * Madamo nga tinuig pagkatapos matawo si Enos, ang kaliwat ni Cain nga si Lamec nagkomposo sing isa ka ambahanon para sa iya duha ka asawa nga nagasiling nga ginpatay niya ang isa ka lamharon nga lalaki nga nagpilas sa iya. Nagpaandam man sia: “Kon si Cain timalusan sing makapito, nian si Lamec sing kapituan kag pito.”​—⁠Genesis 4:​10, 19, 23, 24.

¹¹ Ining malip-ot nga mga katunayan subong sang nasambit na nagapakita nga ang kalainan nga ginsugdan ni Satanas sa hardin sang Eden madasig nga nagdul-ong sa paglapnag sang kalautan sa mga kaliwatan ni Adan. Sadto anay, si Enoc isa ka manalagna ni Jehova nga may mabaskog nga inspirado nga mga pulong nga maaplikar gihapon bisan sa karon. Si Judas nagreport nga si Enoc nagtagna: “Tan-awa! si Jehova nag-abot upod ang iya balaan nga linaksa, agod ipatuman ang paghukom batok sa tanan, kag agod hukman ang tanan nga di-diosnon nahanungod sa tanan nila nga di-diosnon nga mga buhat nga ginhimo nila sa di-diosnon nga paagi, kag nahanungod sa tanan makakilibang nga mga butang nga ginpamulong sang di-diosnon nga mga makasasala batok sa iya.” (Judas 14, 15) Ining mga pulong matuman sa ulihi sa Armagedon. (Bugna 16:​14, 16) Apang, makapat-od kita nga bisan sang adlaw ni Enoc, madamo nga “di-diosnon nga mga makasasala” ang naakig sang mabatian nila ang tagna ni Enoc. Daw ano gid ka mahigugmaon si Jehova nga ginkuha niya ang manalagna agod indi nila sia mahalitan!

Ano ang Nagpalig-on kay Enoc nga Maglakat Upod sa Dios?

12. Ngaa tuhay si Enoc sa iya mga katubotubo?

¹² Didto anay sa hardin sang Eden, namati si Adan kag si Eva kay Satanas, kag nagrebelde si Adan kay Jehova. (Genesis 3:​1-6) Tuhay nga dalanon ang ginlaktan sang ila anak nga si Abel, sa amo ginkahamut-an sia ni Jehova. (Genesis 4:​3, 4) Sing makapasubo, ang kalabanan sang mga kaliwatan ni Adan indi kaangay ni Abel. Apang, si Enoc, nga natawo ginatos ka tuig sang ulihi, nangin kaangay niya. Ano ang kinatuhayan sa ulot ni Enoc kag sang madamo nga kaliwatan ni Adan? Ginsabat ni apostol Pablo ining pamangkot sang nagsulat sia: “Bangod sa pagtuo si Enoc ginliton agod nga indi makakita sing kamatayon, kag indi sia makita bisan diin bangod ginliton sia sang Dios; kay sang wala pa sia ginliton napamatud-an niya nga ginpahamut-an niya sing maayo ang Dios.” (Hebreo 11:5) Si Enoc bahin sang daku nga “panganod sang [antes-Cristianong] mga saksi” nga talalupangdon gid nga mga halimbawa sang pagtuo. (Hebreo 12:1) Bangod sa pagtuo, nahuptan ni Enoc ang husto nga paggawi sa kapin sa 300 ka tuig nga pagkabuhi​—⁠nga mas malawig sing kapin sa tatlo ka pilo sa kabuhi sangsa kalabanan sa aton karon!

13. Ano nga sahi ang pagtuo ni Enoc?

¹³ Ginlaragway ni Pablo ang pagtuo ni Enoc kag sang iban pa nga saksi sang nagsulat sia: “Ang pagtuo amo ang masaligan nga pagpaabot sang mga butang nga ginalauman, ang maathag nga pagpasundayag sang mga katunayan bisan nga di-makita.” (Hebreo 11:1) Huo, ang pagtuo amo ang masinaligon nga pagpaabot, pasad sa mga pagpasalig, nga ang mga butang nga aton ginalauman matuman. Nagadalahig ini sing pat-od gid nga pagpaabot amo nga naapektuhan sini ang aton pagtamod sa kon ano ang labing importante sa aton kabuhi. Ini nga sahi sang pagtuo nagbulig kay Enoc sa paglakat upod sa Dios bisan pa nga ang mga tawo sa palibot niya wala maglakat upod sa Dios.

14. Sa anong sibu nga ihibalo mahimo napasad ang pagtuo ni Enoc?

¹⁴ Ang matuod nga pagtuo napasad sa sibu nga ihibalo. Ano nga ihibalo ang natigayon ni Enoc? Pat-od gid nga nahibaluan ni Enoc ang natabo sa hardin sang Eden. Mahimo nga nabatian man niya kon ano anay ang pagkabuhi sa hardin sang Eden​ —⁠nga ayhan nagaluntad pa gihapon sadto, apang ginadumilian na sa mga tawo. (Genesis 3:​23, 24) Kag nahibaluan niya ang katuyuan sang Dios nga pun-on sang kaliwatan ni Adan ang duta kag himuon ang bug-os nga planeta kaangay sadtong orihinal nga Paraiso. (Genesis 1:28) Dugang pa, pat-od gid nga pirme niya ginadumdom ang saad ni Jehova nga may isa ka Binhi nga magadugmok sang ulo ni Satanas kag magadula sang tanan nga pag-antos kag kasisit-an nga resulta sang paglimbong ni Satanas. (Genesis 3:15) Sa pagkamatuod, ang inspirado nga tagna mismo ni Enoc, nga gintipigan sa tulun-an sang Judas, may yara kaangtanan sa kalaglagan sang binhi ni Satanas. Sanglit may pagtuo si Enoc, nahibaluan naton nga ginsimba niya si Jehova subong ang isa nga “manugpadya sa mga hanuot nga nagapangita sa iya.” (Hebreo 11:6) Busa, bisan pa mas diutay ang nahibaluan ni Enoc sangsa aton, bastante na ini agod makapasad sia sing malig-on nga pagtuo. Paagi sa sini nga pagtuo, nahuptan niya ang iya integridad sa magamo nga mga tion.

Iluga ang Halimbawa ni Enoc

15, 16. Paano naton mailog ang dalanon ni Enoc?

¹⁵ Bangod, kaangay ni Enoc, luyag naton pahamut-an si Jehova sa sining magamo nga mga tion, dapat naton sundon ang iya halimbawa. Dapat kita magkuha kag maghupot sing sibu nga ihibalo tuhoy kay Jehova kag sa iya katuyuan. Apang kapin pa ang kinahanglan naton. Dapat naton tugutan inang sibu nga ihibalo nga magtuytoy sa aton dalanon. (Salmo 119:101; 2 Pedro 1:19) Dapat kita magpatuytoy sa panghunahuna sang Dios, nga nagapanikasog pirme nga pahamut-an sia sa tanan naton nga ginahunahuna kag ginabuhat.

¹⁶ Wala kita sing rekord kon may iban pa nga nagaalagad kay Jehova sang panahon ni Enoc, apang maathag nga mahimo nagaisahanon ukon bahin sia sang magamay nga grupo. Kita man magamay nga grupo sa kalibutan, apang wala ina nagapaluya sang aton buot. Suportahan kita ni Jehova bisan sin-o pa ang magapamatok sa aton. (Roma 8:31) Maisugon nga nagpaandam si Enoc tuhoy sa nagapakari nga kalaglagan sang di-diosnon nga mga tawo. Maisugon man naton nga ginabantala “ining maayong balita sang ginharian” walay sapayan sang mga pagyaguta, pagpamatok, kag paghingabot. (Mateo 24:14) Si Enoc wala nagkabuhi sing pareho kalawig sa iya mga katubotubo. Walay sapayan sini, ang iya paglaum wala sa sadto nga kalibutan. Gintuon niya ang iya mata sa isa ka butang nga mas daku. (Hebreo 11:​10, 35) Ginatuon man naton ang aton mata sa katumanan sang katuyuan ni Jehova. Busa, wala naton ginagamit sing bug-os ining kalibutan. (1 Corinto 7:31) Sa baylo, ginagamit naton ang aton kusog kag mga pagkabutang ilabi na sa pag-alagad kay Jehova.

17. Ano nga ihibalo ang yara sa aton nga wala natigayon ni Enoc, gani ano dapat ang aton himuon?

¹⁷ Nagtuo si Enoc nga ang Binhi nga ginsaad sang Dios magaabot sa gintalana nga tion ni Jehova. Halos 2,000 ka tuig na karon ang nagligad sugod sang nag-abot ina nga Binhi​​—⁠nga si Jesucristo​​—⁠nga nag-aman sang gawad, kag nagbukas sang dalan para sa aton, subong man sa matutom nga mga saksi sang una kaangay ni Enoc, agod makapanubli sang kabuhi nga walay katapusan. Inang Binhi, nga Hari na karon sa Ginharian sang Dios, nagtagbong kay Satanas sa duta gikan sa langit, kag nakita naton ang resulta nga kapipit-an sa palibot naton. (Bugna 12:12) Huo, mas madamo karon ang ihibalo nga matigayon naton sangsa matigayon anay ni Enoc. Kabay, nian, nga may malig-on kita nga pagtuo kaangay niya. Kabay nga ang aton pagsalig sa katumanan sang mga saad sang Dios magaimpluwensia sa tanan naton nga ginahimo. Kabay nga maglakat kita upod sa Dios kaangay ni Enoc, bisan pa nagakabuhi kita sa magamo nga mga tion.

[Mga nota]

Paano Mo Sabton?

• Ano ang buot silingon sang paglakat upod sa Dios?

• Ngaa ang paglakat upod sa Dios amo ang pinakamaayo nga dalanon?

• Ano ang nakabulig kay Enoc sa paglakat upod sa Dios walay sapayan sang magamo nga mga tion?

• Paano naton mailog si Enoc?

[Mga Pamangkot sa Pagtinuon]

[Retrato sa pahina 15]

Paagi sa pagtuo, “si Enoc nagpadayon sa paglakat upod sa matuod nga Dios”

[Retrato sa pahina 17]

Nagapati gid kita nga matuman ang mga saad ni Jehova

[Credit Lines sang retrato sa pahina 13]

Woman, far right: FAO photo/B. Imevbore; collapsing building: San Hong R-C Picture Company