“Ang Bulig sa Akon Nagagikan kay Jehova”

Ang Kadam-an Nagabaton sang Pagsimba kay Jehova

TUHOY sa aton adlaw, ang Biblia nagatagna nga ang mga tawo gikan sa tanan nga pungsod magadugok sa mataas nga pagsimba kay Jehova. Halimbawa, paagi kay manalagna Hageo, si Jehova nga Dios nagsiling: “Uyugon ko ang tanan nga pungsod, kag ang kalahamut-an nga mga butang sang tanan nga pungsod [magaabot]; kag pun-on ko ining balay sing himaya.” (Hageo 2:7) Si Isaias kag si Miqueas lunsay nagtagna nga sa aton tion​—⁠“sa ulihi nga bahin sang mga adlaw”​—⁠ang mga pungsod kag katawhan magasimba kay Jehova sa kalahamut-an nga paagi.​—⁠Isaias 2:2-4; Miqueas 4:1-4.

Nagakatuman gid bala karon ini nga mga tagna? Usisaon naton ang mga katunayan. Sa sulod sang nagligad nga napulo ka tuig lamang, kapin sa 3,110,000 ka bag-uhan ang nagdedikar sang ila kaugalingon kay Jehova sa kapin sa 230 ka kadutaan. Sa pagkamatuod, 6 sa kada 10 ka Saksi ni Jehova nga nagaalagad karon sa bug-os nga kalibutan ang nabawtismuhan sang nagligad nga dekada. Sang 2004, sa promedyo, isa ka bag-ong dedikado nga alagad sang Dios ang gindugang sa Cristianong kongregasyon kada duha ka minuto!⁠ *

Kaangay sang nahaunang siglo, ‘madamo kaayo ang nangin mga tumuluo kag nagliso sa Ginuo’ karon. Bisan pa nga ang pagdamo indi mismo pamatuod sang pagpakamaayo sang Dios, isa ini ka ebidensia nga ang ‘kamot ni Jehova’ yara sa iya katawhan. (Binuhatan 11:21) Ano ang nagabuyok sa minilyon nga simbahon si Jehova? Kag paano ka personal nga naapektuhan sini nga hitabo?

Ang Matarong sing Tagipusuon nga mga Tawo Naganyat

Sa talangkod nga hambal, si Jesus nagsiling: “Wala sing tawo nga makakari sa akon luwas kon buyukon sia sang Amay, nga nagpadala sa akon.” (Juan 6:44) Busa, si Jehova amo gid ang nagabuyok sa mga tawo nga “husto nga nahuyog sa kabuhi nga walay katapusan.” (Binuhatan 13:48) Ang espiritu sang Dios makapabugtaw sa mga tawo sa ila espirituwal nga kinahanglanon. (Mateo 5:3) Ang natublag nga konsiensia, desperado nga pagpangita sing paglaum, ukon mabug-at nga problema mahimo magbuyok sa iban nga pangitaon ang Dios kag sa amo matun-an ang iya katuyuan para sa katawhan.​—⁠Marcos 7:26-30; Lucas 19:2-10.

Madamo nga indibiduwal ang naganyat nga simbahon si Jehova bangod ang ila ginapaligban nga mga pamangkot nasabat paagi sa programa sang Cristianong kongregasyon may kaangtanan sa pagtudlo sa Biblia.

“Kon may Dios, ngaa ang mga tawo padayon nga nagaantos sing inhustisya?” Amo ina ang pamangkot nga nagtublag kay Davide, isa ka manugbaligya sing droga sa Italya. Indi gid sia interesado sa relihion, gani ginpamangkot niya ini agod makigbais lamang. “Wala gid ako maglaum nga makabaton ako sing makatarunganon kag makakumbinsi nga sabat,” siling niya. “Apang ang Saksi nga nasugilanon ko mapailubon katama kag ginsuportahan niya ang iya ginasiling sing mga teksto gikan sa Biblia. Yadto nga paghambalanay may daku gid nga epekto sa akon.” Gintadlong ni Davide ang iya kabuhi kag nagaalagad na sia karon kay Jehova.

Ang iban nabuyok sa dutan-on nga bahin sang organisasyon ni Jehova bangod sang pagpangita nila  sing kahulugan kag katuyuan. Agod mabulong ang iya emosyonal nga mga problema, isa ka saykayatris sa Zagreb, Croatia, ang nagpakonsulta sa isa man ka kilala nga saykayatris. Nakibot gid sia sang ginhatag sang doktor ang numero sang telepono sang sanga talatapan sang mga Saksi ni Jehova sa Zagreb, kag subong man ang ngalan sang iya kilala nga Saksi. “Sa banta ko,” siling niya, “ini nga mga tawo ang makabulig sa imo. Kon pakadtuon ko ikaw sa simbahan, imo lang makita ang walay kabuhi nga mga istatwa​—⁠wala sing nagahambal, kag indi ka gihapon masanagan. Sa banta ko ang simbahan indi makabulig sa imo. Ginpakadto ko na ang iban nga mga pasyente sa mga Saksi ni Jehova, kag sa banta ko amo man ini ang pinakamaayo para sa imo.” Kinabubut-on nga ginduaw sia sang mga Saksi kag sang ulihi, isa ka pagtuon sa Biblia ang nasugdan sa iya. Sa sulod sang pila ka semana, ang saykayatris malipayon nga nagsiling nga ang ihibalo tuhoy sa katuyuan sang Dios naghatag sing kahulugan sa iya kabuhi.​—⁠Manugwali 12:13.

Kon may personal nga problema, nasapwan sang madamo nga ang kamatuoran lamang sang Biblia ang makahatag sing matuod nga lugpay. Sa Gresya, isa ka siete-anyos nga bata nga lalaki ang nahulog sa atop sang ila eskwelahan kag napatay. Pagligad sang pila ka bulan, nasugilanon sang duha ka Saksi ang iloy sang bata kag ginlugpayan sia paagi sa pagpaathag sang paglaum nga pagkabanhaw. (Juan 5:​28, 29) Sang mabatian ini, naghibi ang iloy sang bata. Ang mga utod nga babayi namangkot: “Kon luyag mo nga makatuon sing dugang pa tuhoy sa Biblia, san-o ka namon mahimo maduaw?” “Karon na mismo,” sabat niya. Gin-upod niya sila sa iya puluy-an, kag isa ka pagtuon sa Biblia ang nasugdan. Sa karon, ang iya bug-os nga pamilya nagaalagad na kay Jehova.

Nagapakigbahin Ka Bala?

Ini nga mga eksperiensia kinaandan nga nagakatabo sa bug-os nga kalibutan. Ginatipon kag ginahanas ni Jehova ang isa ka daku nga kadam-an sang matuod nga mga sumilimba gikan sa madamo nga pungsod. Ining internasyonal nga grupo may makalilipay nga paglaum nga makalampuwas sa nagapakari nga kalaglagan sining malauton nga sistema sang mga butang kag magkabuhi sa matarong nga bag-ong kalibutan.​—⁠2 Pedro 3:13.

Subong resulta sang pagpakamaayo ni Jehova, ining di-matupungan nga hilikuton sang pagtipon di-mapunggan nga nagapadulong sa madinalag-on nga katapusan sini. (Isaias 55:​10, 11; Mateo 24:​3, 14) Makugi ka bala nga nagapakigbahin sa sining pagbantala sang Ginharian nga hilikuton? Kon amo, makasalig ka sa pagsakdag sang Dios kag mapalanog mo ining mga pinamulong sang salmista: “Ang bulig sa akon nagagikan kay Jehova.”​—⁠Salmo 121:2.

[Nota]

[Blurb sa pahina 9]

“Wala sing tawo nga makakari sa akon luwas kon buyukon sia sang Amay, nga nagpadala sa akon.”​—⁠JUAN 6:44

[Kahon sa pahina 8]

SIN-O ANG SA LIKOD SINI NGA PAG-USWAG?

“Kon indi si Jehova ang magpatindog sang balay, walay pulos ang pagpangabudlay sing lakas sang mga nagapatindog sini.”​—⁠Salmo 127:1.

“Ang Dios ang nagapatubo sini; gani sia nga nagatanom wala sing bisan ano ukon sia nga nagabunyag, kundi ang Dios nga nagapatubo sini.”—⁠1 Corinto 3:​6, 7.