Batui ang Sayop nga Panghunahuna!

SANG nagaatubang sing pagtilaw ang patriarka nga si Job, ginduaw sia sang tatlo niya ka abyan nga sanday Elifaz, Bildad, kag Zofar. Nagkadto sila sa pag-unong kag paglugpay sa iya. (Job 2:11) Si Elifaz amo ang labing impluwensiado kag mahimo amo ang pinakamagulang sa ila nga tatlo. Sia ang una kag ang may pinakadamo nga ginhambal. Ano nga panghunahuna ang ginapadayag sang tatlo ka pamulongpulong ni Elifaz?

Nagahinumdom sang iya anay labi sa kinaugali nga eksperiensia, si Elifaz nagsiling: “Isa ka espiritu ang naglabay sa akon nawong; nagpalanindog ang balahibo sang akon lawas. Nagdulog ini, apang wala ko makilala ang dagway sini; may dagway sa atubangan sang akon mga mata; may kalinong, kag nabatian ko ang isa ka tingog.” (Job 4:​15, 16) Ano nga sahi sang espiritu ang nag-impluwensia sa panghunahuna ni Elifaz? Ginapakita sang kasugpon nga mamulayon nga mga tinaga nga ang espiritu pat-od gid nga indi isa sang matarong nga mga anghel sang Dios. (Job 4:​17, 18) Isa ini ka malauton nga espiritu nga tinuga. Kay kon indi, ngaa abi ginsabdong ni Jehova si Elifaz kag ang iya duha ka kaupdanan sa paghambal sing kabutigan? (Job 42:7) Huo, naimpluwensiahan sang demonyo si Elifaz. Ang iya mga komento nagpadayag sing di-diosnon nga panghunahuna.

Ano nga mga ideya ang mahantop sa mga pulong ni Elifaz? Ngaa kinahanglan kita magbantay batok sa sayop nga panghunahuna? Ano ang himuon naton agod mabatuan ini?

“Wala Sia sing Pagtuo sa Iya mga Alagad”

Ginpakita sang tatlo ka pamulongpulong ni Elifaz nga ang Dios wala sing kaluoy kag bisan ano pa ang himuon sang iya mga alagad, indi sia mahamuot. “Yari karon! Wala sia sing pagtuo sa iya mga alagad,” siling ni Elifaz kay Job, “kag ang iya mga anghel ginapabangdan niya sing kabuangan.” (Job 4:18) Dayon nagsiling sia tuhoy sa Dios: “Yari karon, ang Dios wala nagasalig sa iya mga balaan, kag bisan pa ang mga langit indi matinlo sa iya igtululok.” (Job 15:15) Kag namangkot sia: “Nahamuot bala ang Labing Gamhanan nga ikaw matarong?” (Job 22:3) Ugyon man si Bildad sa sini nga pagtamod, kay sia nagsiling: ‘Bisan ang bulan wala sing kasanag, kag ang mga bituon indi matinlo sa panulok sang Dios.’​​—⁠Job 25:⁠5.

Dapat kita magbantay nga indi kita maimpluwensiahan sang amo nga sahi sang panghunahuna. Bangod basi magbatyag kita nga sobra ang ginapaabot sang Dios sa aton. Ini nga sahi sang pagtamod magaguba sang aton kaangtanan kay Jehova. Isa pa, kon amo sini ang aton pangatarungan, ano ang mangin reaksion naton kon hatagan kita sing kinahanglanon nga disiplina? Sa baylo nga batunon ini sing mapainubuson, ang aton tagipusuon mahimo “maakig kay Jehova mismo,” kag mahimo maghinakit kita sa iya. (Hulubaton 19:3) Makahalalit gid ini sa aton espirituwalidad!

“May Pulos Bala ang Mapagros nga Tawo sa Dios?”

Ang ideya nga ang Dios wala sing kaluoy kaanggid gid sa pagtamod nga ginakabig niya ang tawo  nga walay pulos. Ang ikatlo nga pamulongpulong ni Elifaz may pamangkot: “May pulos bala ang mapagros nga tawo sa Dios, nga ang sin-o man nga maalam mapuslanon sa iya?” (Job 22:2) Luyag ipahangop ni Elifaz nga ang tawo wala sing pulos sa Dios. Sing kaanggid, si Bildad nangatarungan man: “Gani paano ang mamalatyon nga tawo mangin husto sa atubangan sang Dios, ukon paano mangin matinlo ang isa nga ginpanganak sang isa ka babayi?” (Job 25:4) Pasad sa sina nga pangatarungan, paano ang isa lamang ka mamalatyon nga tawo kaangay kay Job, makapangangkon nga may yara sia sing matarong nga tindog sa atubangan sang Dios?

Ang pila ka tawo sa karon ginatublag sang negatibo nga mga balatyagon tuhoy sa ila kaugalingon. Ayhan bangod ini sang ila gindak-an nga pamilya, mga pag-ipit sa kabuhi, ukon nangin biktima sila sang pagdumot sa rasa ukon etniko nga grupo. Kag nalipay man si Satanas kag ang iya mga demonyo nga magluya ang buot sang isa ka tawo. Kon mapapati nila ang isa nga bisan ano pa ang iya himuon, indi gid niya mapahamut-an ang Labing Gamhanan nga Dios, mas madali sia nga maluyahan sing buot. Sa ulihi magapalayo sia, kag mahimo pa gani sia magbiya sa buhi nga Dios.​​—⁠Hebreo 2:⁠1; 3:⁠12.

Ang katigulangon kag mga balatian nagaupang sa aton. Mahimo daw diutay na lang ang maamot naton karon sa pag-alagad sa Ginharian kon ikumparar sa nahimo naton sang mas hoben, mas mapagros, kag mas mabaskog pa kita. Gani daw ano gid ka importante nga mahibaluan naton nga luyag ni Satanas kag sang iya mga demonyo nga magbatyag kita nga indi gid naton mapahamut-an ang Dios! Dapat naton batuan ini nga panghunahuna.

Kon Paano Batuan ang Negatibo nga Panghunahuna

Walay sapayan sang mga pagpaantos ni Satanas nga Yawa sa iya, si Job nagsiling: “Tubtob nga mapatay ako indi ko pag-isikway ang akon integridad gikan sa akon!” (Job 27:5) Bangod ginahigugma ni Job ang Dios, determinado sia nga huptan ang iya integridad bisan ano pa ang matabo, kag wala niya gintugutan ang bisan ano nga makaguba sini. Isa ini ka importante nga paagi agod mabatuan ang negatibo nga panghunahuna. Dapat mahangpan naton sing maayo ang gugma sang Dios kag palambuon ang tinagipusuon nga apresasyon sa sini. Kinahanglan man naton pabakuron ang aton gugma sa iya. Mahimo naton ini paagi sa isa ka regular nga pagtuon sa Pulong sang Dios kag paagi sa mapangamuyuon nga pagpamalandong sa aton natun-an.

Halimbawa, ang Juan 3:16 nagasiling: “Ginhigugma gid sang Dios ang kalibutan amo nga ginhatag niya ang iya bugtong nga Anak.” Ginahigugma gid ni Jehova ang kalibutan sang katawhan, kag ina nga gugma ginpakita niya sa malawig na nga tion nga nagpakig-angot siya sa katawhan. Ang pagpamalandong sa mga halimbawa sang una magapabakod sang aton apresasyon kay Jehova kag magapalambo sang aton gugma sa iya, gani makabulig ini nga mabatuan naton ang sayop ukon negatibo nga panghunahuna.

Binagbinaga ko paano nakig-angot si Jehova kay Abraham sang nagahilapit na ang kalaglagan sang Sodoma kag Gomorra. Walo ka beses nga namangkot si Abraham kay Jehova tuhoy sa Iya paghukom. Wala gid magpakita si Jehova sing kataka ukon kaakig. Sa baylo, ang iya mga sabat nagpasalig liwat kag naglugpay kay Abraham. (Genesis 18:22-​33) Sang ulihi, sang ginluwas sang Dios si Lot kag ang iya pamilya sa Sodoma, nangabay si Lot nga malagyo sa kaingod nga siudad sa baylo nga sa mga bukid. Si Jehova nagsabat: “Yari karon, nagpakita ako sa imo sing konsiderasyon bisan sa sini nga butang, nga wala ko ginlaglag ang siudad nga imo ginhambal.” (Genesis 19:18-22) Ginapakita bala sini nga kasaysayan nga si Jehova isa ka manuggahom nga walay kaluoy, di-mahigugmaon, kag tama ka estrikto? Wala. Ginapakita sini kon ano gid sia​—⁠isa ka mahigugmaon, mainayuhon, maluluy-on, kag mahinangpanon nga Soberano.

Ginpamatud-an sang mga halimbawa nanday Aaron, David, kag Manases sang dumaan nga Israel nga sayop ang pagpati nga ang Dios nagapamantay sang sala kag mabudlay pahamut-an. Si Aaron nakahimo sing tatlo ka mabug-at nga sala. Naghimo sia sing bulawan nga tinday nga baka, ginmulay nila nga duha ni Miriam si Moises, kag wala niya ginpakabalaan kag ginpadunggan ang Dios sa Meriba. Walay sapayan sina, nakita ni Jehova ang iya maayo nga mga kinaiya kag gintugutan sia nga mag-alagad gihapon bilang mataas nga saserdote  tubtob sa iya kamatayon.​​—⁠Exodo 32:​3, 4; Numeros 12:​1, 2; 20:​9-​13.

Si Hari David nakahimo sing mabug-at nga mga sala sa tion sang iya paggahom. Lakip sa sini amo ang pagpakighilawas, pagpahito nga mapatay ang isa ka inosente nga tawo, kag ilegal nga pagpaisip sang mga pumuluyo. Apang, nakita ni Jehova nga mahinulsulon si David, gani mainunungon niya nga ginhuptan ang katipan sang Ginharian paagi sa pagtugot kay David nga maghari tubtob sa iya kamatayon.​​—⁠2 Samuel 12:⁠9; 1 Cronica 21:​1-7.

Si Hari Manases sang Judea nagpatindog sing altar para kay Baal, nagpaagi sang iya mga anak sa kalayo, nagbuhat sing espiritismo, kag nagtukod sing mga altar para sa butig nga pagsimba sa mga luwang sang templo. Apang, sang naghinulsol sia sing tinagipusuon, ginpatawad sia ni Jehova, ginhilway sia sa pagkabihag, kag ginbalik sia sa pagkahari. (2 Cronica 33:​1-​13) Amo bala sini ang ginahimo sang isa ka Dios nga mabudlay pahamut-an? Indi gid!

Nahuy-an ang Butig nga Manugsumbong

Indi kita makibot nga yara mismo kay Satanas ang mga kinaiya nga ginasumbong niya kay Jehova. Si Satanas mapintas kag wala sing kaluoy. Makita ini sing maathag sa kinabatasan nga paghalad sang bata may kaangtanan sa butig nga pagsimba sang una. Ginapaagi sang apostata nga mga Israelinhon ang ila mga anak nga lalaki kag babayi sa kalayo​—⁠butang nga wala gani nagsulod sa hunahuna ni Jehova.​​—⁠Jeremias 7:⁠31.

Si Satanas, indi si Jehova, ang nagapamantay sang sala. Ginapatuhuyan sang Bugna 12:10 si Satanas subong “ang manugsumbong sang aton mga kauturan, nga nagasumbong sa ila sa atubangan sang aton Dios sa adlaw kag gab-i!” Sa pihak nga bahin, ang salmista nag-amba tuhoy kay Jehova: “Kon ang mga sayop amo ang imo ginabantayan, O Jah, O Jehova, sin-o bala ang makatindog? Kay may matuod nga pagpatawad sa imo.”​​—⁠Salmo 130:​3, 4.

Kon Madula Na ang Sayop nga Panghunahuna

Daw ano gid nga kalipay ang ginbatyag sang mga anghel sang gintagbong si Satanas nga Yawa kag ang iya mga demonyo sa duta! (Bugna 12:​7-9) Kutob sadto, indi na maimpluwensiahan sining malauton nga mga espiritu ang mga hilikuton sang mga anghel ni Jehova sa langit.​​—⁠Daniel 10:13.

Magakalipay man ang mga pumuluyo sang duta sa malapit nga palaabuton. Sa dili madugay, si Satanas kag ang iya mga demonyo gapuson sang isa ka anghel halin sa langit nga may yabi sang kadadalman kag daku nga kadena sa iya kamot kag itagbong sila sa kadadalman nga indi na makapanghikot. (Bugna 20:​1-3) Kon mahanabo na ini, daw ano gid nga kaumpawan para sa aton!

Samtang wala pa ini, dapat kita magbantay batok sa sayop nga panghunahuna. Kon mabatyagan naton nga daw nagapamensar na kita sing sayop ukon negatibo nga mga butang, dapat naton batuan ini paagi sa paghunahuna nga ginahigugma kita ni Jehova. Nian ‘ang paghidait sang Dios nga nagalabaw sa tanan nga panghunahuna magabantay sa aton tagipusuon kag sa aton ikasarang sa paghunahuna.’​—⁠Filipos 4:​6, 7.

[Retrato sa pahina 26]

Ginbatuan ni Job ang negatibo nga panghunahuna

[Retrato sa pahina 28]

Napamatud-an ni Lot nga si Jehova isa ka mahinangpanon nga Soberano