Maglakat Paagi sa Pagtuo, Indi Paagi sa Panulok!

“Nagalakat kita paagi sa pagtuo, indi paagi sa panulok.”​—⁠2 CORINTO 5:7.

1. Ano ang nagapakita nga si Pablo naglakat paagi sa pagtuo, indi paagi sa panulok?

TUIG 55 C.⁠E. sadto. Mga 20 ka tuig na ang nakaligad kutob sang ang manughingabot sang mga Cristiano, nga Saulo anay ang ngalan, nagbaton sang Cristianismo. Wala niya gintugutan nga magluya ang iya pagtuo sa Dios sa pagligad sang tion. Bisan pa indi makita sang iya pisikal nga mga mata ang mga butang sa langit, malig-on ang iya pagtuo. Busa, sang ginsulatan niya ang hinaplas nga mga Cristiano nga may langitnon nga paglaum, si apostol Pablo nagsiling: “Nagalakat kita paagi sa pagtuo, indi paagi sa panulok.”​—⁠2 Corinto 5:7.

2, 3. (a) Paano naton mapakita nga nagalakat kita paagi sa pagtuo? (b) Ano ang kahulugan sang paglakat paagi sa panulok?

² Ang paglakat paagi sa pagtuo nagakinahanglan sing bug-os nga pagsalig sa ikasarang sang Dios sa pagtuytoy sang aton kabuhi. Dapat kumbinsido gid kita nga nahibaluan niya kon ano ang pinakamaayo para sa aton. (Salmo 119:66) Samtang nagahimo kita sing mga desisyon sa kabuhi kag nagapanghikot pasad sa sini, ginabinagbinag naton ‘ang mga pamatuod nga indi naton makita.’ (Hebreo 11:1) Nagalakip ini sa ginsaad nga “bag-ong mga langit kag bag-ong duta.” (2 Pedro 3:13) Sa pihak nga bahin, ang paglakat paagi sa panulok nagakahulugan sing pagsunod sa isa ka dalanon sang pagkabuhi nga ginatuytuyan lamang sang mahantop sang aton pisikal nga mga igbalatyag. Makatalagam ini bangod mahimo ini magdul-ong sa pagsikway naton sing bug-os sa kabubut-on sang Dios.​​—⁠Salmo 81:12; Manugwali 11:9.

³ Bahin man kita sang “diutay nga panong,” nga may langitnon nga pagtawag, ukon sang “iban nga mga karnero,” nga may dutan-on nga paglaum, dapat dumdumon sang kada isa sa aton ang laygay nga maglakat paagi sa pagtuo kag indi paagi sa panulok. (Lucas 12:32; Juan 10:16) Tan-awon naton kon paano ang pagsunod sa sining inspirado nga laygay makaamlig sa aton nga magpadala sa “umalagi nga pagpangalipay sa sala,” nga masiod sang materyalismo, kag nga malipat nga yara na kita sa katapusan sining sistema sang mga butang. Binagbinagon man naton ang mga katalagman sang paglakat paagi sa panulok.​​—⁠Hebreo 11:25.

Pagsikway sa “Umalagi nga Pagpangalipay sa Sala”

4. Ano nga pagpili ang ginhimo ni Moises, kag ngaa?

⁴ Handurawa ang kabuhi kuntani sang anak ni Amram nga si Moises. Bangod ginpadaku sa harianon nga pamilya sang dumaan nga Egipto, sarang kuntani matigayon ni Moises ang gahom, manggad, kag awtoridad. Nakapangatarungan kuntani si Moises: ‘Nakatuon ako sa ginapabugal nga kaalam sang Egipto, kag gamhanan ako sa pulong kag buhat. Kon magpabilin ako sa sining harianon nga pamilya, magamit ko ang akon posisyon agod buligan ang akon Hebreo nga mga kauturan!’ (Binuhatan 7:22) Sa baylo, ginpili ni Moises nga “pintasan upod sa katawhan sang Dios.” Ngaa? Ano ang nagpahulag kay Moises nga talikdan ang tanan nga gintanyag sang Egipto? Ang Biblia nagasabat: “Bangod sa pagtuo ginbayaan [ni Moises] ang Egipto, apang wala mahadlok sa kaakig sang hari, kay nagpabilin sia nga mabakod subong nga nagatan-aw sa Isa nga di-makita.” (Hebreo 11:24-27) Ang pagtuo ni Moises sa sigurado nga padya ni Jehova para sa pagkamatarong nagbulig sa iya nga pamatukan ang sala kag ang pagpatuyang kag ang umalagi nga kalipayan sini.

5. Paano nagapalig-on sa aton ang halimbawa ni Moises?

⁵ Masami man nga kinahanglan kita maghimo sing mabudlay nga mga desisyon may kaangtanan sa mga butang subong sang: ‘Dapat ko bala untatan ang pila ka buhat ukon batasan nga wala nagahisanto sa mga prinsipio sang Biblia? Dapat ko  bala batunon ang trabaho nga daw may materyal nga bentaha apang makaupang sa akon espirituwal nga pag-uswag?’ Ang halimbawa ni Moises nagapalig-on sa aton nga indi maghimo sing mga pagpili nga nagapabanaag sang pagkakitid-sing-panan-aw sining kalibutan; sa baylo, dapat magpakita kita sing pagtuo sa malayo-sing-panan-aw nga kaalam sang “Isa nga di-makita”​—⁠si Jehova nga Dios. Kaangay ni Moises, kabay nga pabaloran naton ang pagpakig-abyan ni Jehova nga labaw pa sangsa bisan ano nga mahatag sining kalibutan.

6, 7. (a) Paano ginpakita ni Esau nga ginpili niya ang paglakat paagi sa panulok? (b) Anong nagapaandam nga halimbawa ang makita naton kay Esau?

⁶ Ipaanggid si Moises kay Esau, ang anak sang patriarka nga si Isaac. Ginpili ni Esau ang insigida nga kalipayan. (Genesis 25:30-​34) “Wala nagaapresyar sa sagrado nga mga butang,” ginhatag ni Esau ang iya kinamatarong subong panganay “sa baylo sang isa ka pagkaon.” (Hebreo 12:16) Sa desisyon niya nga ibaligya ang iya pagkapanganay, wala niya ginbinagbinag ang epekto sini sa iya kaangtanan kay Jehova ukon sa iya kaliwat. Kulang sia sing espirituwal nga panan-aw. Ginpiyong ni Esau ang iya mga mata sa hamili nga mga saad sang Dios, kag ginpakadiutay ang balor sini. Naglakat sia paagi sa panulok, indi paagi sa pagtuo.

⁷ Si Esau isa ka nagapaandam nga halimbawa para sa aton karon. (1 Corinto 10:11) Kon kinahanglan nga maghimo kita sing daku ukon gamay man nga mga desisyon, indi kita dapat magpasulay sa propaganda sang kalibutan ni Satanas, nga nagasiling nga dapat mo tigayunon karon gid ang imo gusto. Dapat naton pamangkuton ang aton kaugalingon: ‘Makita bala ang kaangay Esau nga mga kinaiya sa akon mga desisyon? Ang akon bala pagpaninguha nga tigayunon karon ang akon gusto nagakahulugan nga ikaduha na lamang ang espirituwal nga mga intereses? Ang akon bala mga desisyon nagabutang sa katalagman sa akon pagpakig-abyan sa Dios kag sa akon palaabuton nga padya? Ano nga halimbawa ang akon ginapakita sa iban?’ Kon ang aton mga desisyon nagapakita sing apresasyon sa sagrado nga mga butang, pakamaayuhon kita ni Jehova.​​—⁠Hulubaton 10:22.

Paglikaw sa Siod sang Materyalismo

8. Ano nga paandam ang nabaton sang mga Cristiano sa Laodicea, kag ngaa interesado kita sa sini?

⁸ Sa isa ka bugna kay apostol Juan sa hingapusan sang nahaunang siglo, naghatag sing mensahe ang ginhimaya nga si Jesucristo sa kongregasyon sa Laodicea, Asia Minor. Isa yadto ka mensahe sang paandam batok sa materyalismo. Bisan pa manggaranon sila sa materyal, ang mga Cristiano sa Laodicea imol sa espirituwal. Sa baylo nga magpadayon sa paglakat paagi sa pagtuo, gintugutan nila nga mabulag sang materyal nga pagkabutang ang ila espirituwal nga panan-aw. (Bugna 3:​14-​18) Amo man sini ang epekto sang materyalismo karon. Nagapaluya ini sang aton pagtuo kag nagapauntat sa aton sa ‘pagdalagan nga may pagbatas sang dalaganon’ sang kabuhi. (Hebreo 12:1) Kon indi kita maghalong, ang “mga kalipayan sining kabuhi” mahimo magtabon sa espirituwal nga mga hilikuton tubtob sa punto nga ‘malumos ini sing bug-os.’​​—⁠Lucas 8:⁠14.

9. Paano ang pagkakontento kag apresasyon sa espirituwal nga pagkaon makaamlig sa aton?

⁹ Agod maamligan sa espirituwal, kinahanglan ang pagkakontento sa baylo nga gamiton sing bug-os ining kalibutan kag magpamanggad sa materyal. (1 Corinto 7:​31; 1 Timoteo 6:​6-8) Kon nagalakat kita paagi sa pagtuo kag indi paagi sa panulok,  makasapo kita sing kalipay sa nagaluntad karon nga espirituwal nga paraiso. Samtang nagakaon kita sing masustansia nga espirituwal nga pagkaon, wala bala kita napahulag nga ‘maghugyaw sa kalipay bangod sa maayo nga kahimtangan sang tagipusuon’? (Isaias 65:​13, 14) Dugang pa, nagakalipay kita sa pagpakig-upod sa mga nagapadayag sing mga bunga sang espiritu sang Dios. (Galacia 5:​22, 23) Daw ano gid ka importante nga makasapo kita sing kaayawan kag kaumpawan sa espirituwal nga mga aman ni Jehova!

10. Ano nga mga pamangkot ang dapat naton ipamangkot sa aton kaugalingon?

¹⁰ Ang pila ka pamangkot nga dapat naton nga ipamangkot sa aton kaugalingon amo: ‘Daw ano bala ka importante ang materyal nga mga butang sa akon kabuhi? Ginagamit ko bala ang akon materyal nga pagkabutang sa paglipaylipay sa kabuhi ukon sa pagsakdag sa matuod nga pagsimba? Ano ang nagahatag sa akon sing daku gid nga kalipay? Ang pagtuon bala sa Biblia kag pagpakig-upod sa Cristianong mga miting, ukon ang mga talipuspusan sang semana nga malayo sa Cristianong mga responsibilidad? Ginapain ko bala ang madamo nga talipuspusan sang semana para sa paglingawlingaw sa baylo nga gamiton ini nga tion sa ministeryo sa latagon kag sa iban pa nga hilikuton may kaangtanan sa putli nga pagsimba?’ Ang paglakat paagi sa pagtuo nagakahulugan nga masako kita pirme sa hilikuton sang Ginharian, nga nagasalig sing bug-os sa mga saad ni Jehova.​​—⁠1 Corinto 15:58.

Pagdumdom Pirme nga ang Katapusan Malapit Na

11. Paano ang paglakat paagi sa pagtuo nagabulig sa aton nga dumdumon pirme nga malapit na ang katapusan?

¹¹ Ang paglakat paagi sa pagtuo nagabulig sa aton nga isikway ang undanon nga mga pagtamod nga ang katapusan malayo pa ukon indi na gid magaabot. Indi kaangay sang mga maduhaduhaon nga nagatamay sang tagna sang Biblia, nahantop naton kon paano ang mga hitabo sa kalibutan nagatuman sang ginatagna sang Pulong sang Dios nga mahanabo sa aton adlaw. (2 Pedro 3:​3, 4) Halimbawa, indi bala nga ang panimuot kag paggawi sang mga tawo sa kabug-usan nagapamatuod nga nagakabuhi na kita sa “katapusan nga mga adlaw”? (2 Timoteo 3:​1-5) Paagi sa mga mata sang pagtuo, makita naton nga ang mga nagakatabo karon sa kalibutan indi lamang pagsulit sang maragtas. Sa baylo, ‘tanda ini sang presensia ni Cristo kag sang katapusan sang sistema sang mga butang.’​—⁠Mateo 24:1-14.

12. Paano natuman ang mga pulong ni Jesus nga narekord sa Lucas 21:​20, 21 sang nahaunang siglo?

¹² Binagbinaga ang isa ka hitabo sang nahaunang siglo sang aton Kumon nga Dag-on nga may pagkaanggid sa aton adlaw. Sang yari si Jesucristo sa duta, ginpaandaman niya ang iya mga sumulunod: “Kon makita ninyo ang Jerusalem nga nalikupan sang nagkampo nga mga hangaway, nian hibalua ninyo nga ang paghapay sa iya malapit na. Nian ang mga sa Judea magpalagyo sa mga bukid, kag ang mga sa tunga niya maggua.” (Lucas 21:​20, 21) Bilang katumanan sining tagna, ginsakop sang Romanong  hangaway sa pagpanguna ni Cestius Gallus ang Jerusalem sang 66 C.⁠E. Apang gulpi lang nga nag-atras ang mga hangaway, kag nangin senyales ini kag kahigayunan sa mga Cristiano didto nga ‘magpalagyo sa mga bukid.’ Sang 70 C.⁠E., nagbalik ang Romanong mga hangaway, kag ginsalakay ang siudad sang Jerusalem, kag ginlaglag ang templo sini. Suno kay Josephus, kapin sa isa ka milyon ka Judiyo ang napatay, kag 97,000 ang gindala nga bihag. Ginhukman sang Dios yadtong Judiyo nga sistema sang mga butang. Yadtong mga naglakat paagi sa pagtuo kag nagpamati sa paandam ni Jesus nakalampuwas sa kalaglagan.

13, 14. (a) Ano ang mahanabo sa dili madugay? (b) Ngaa dapat kita magpabilin nga alerto sa katumanan sang tagna sang Biblia?

¹³ May kaanggid man nga butang nga mahanabo sa aton adlaw. Ang mga elemento sang Nasyones Unidas madalahig sa pagpatuman sa paghukom sang Dios. Subong nga ang Romanong hangaway sang nahaunang siglo gintuyo agod huptan ang Pax Romana (Romanong Paghidait), ang Nasyones Unidas karon gintuyo man subong isa ka instrumento sa paghupot sang paghidait. Bisan pa gintinguhaan sang Romanong mga hangaway nga huptan ang relatibo nga paghidait sa kalibutan sadto anay, nangin manuglaglag sila sang Jerusalem. Sa karon, ginapakita man sang tagna sang Biblia nga ang puersa militar sa sulod sang Nasyones Unidas magakabig sa relihion subong isa ka makatulublag nga elemento kag magahulag agod laglagon ang modernong-adlaw nga Jerusalem​—⁠ang Cristiandad​—⁠subong man ang nabilin nga bahin sang Babilonia nga Daku. (Bugna 17:12-17) Huo, ang bug-os kalibutan nga emperyo sang butig nga relihion malapit na laglagon.

¹⁴ Ang kalaglagan sang butig nga relihion amo ang tanda sang pagsugod sang dakung kapipit-an. Sa katapusan nga bahin sang dakung kapipit-an, ang nabilin nga mga elemento sining malaut nga sistema sang mga butang pagalaglagon. (Mateo 24:​29, 30; Bugna 16:​14, 16) Ang paglakat paagi sa pagtuo nagabulig sa aton nga magpabilin nga alerto sa katumanan sang tagna sang Biblia. Indi kita malimbungan sa paghunahuna nga ang himo-tawo nga ahensia kaangay sang Nasyones Unidas amo ang paagi sang Dios sa pagpaluntad sing matuod nga paghidait kag kalig-unan. Busa, indi bala dapat nga ang aton pagsinalayo nagapakita nga nagapati gid kita nga “ang dakung adlaw ni Jehova malapit na”?​—⁠Sofonias 1:14.

Paglakat Paagi sa Panulok​—⁠Daw Ano ka Makatalagam?

15. Walay sapayan sang pagpakamaayo sang Dios sa ila, sa ano nga siod nahulog ang pungsod sang Israel?

¹⁵ Ginailustrar sang mga eksperiensia sang dumaan nga Israel ang mga katalagman sang pagtugot sang isa nga magluya ang iya pagtuo bangod sang paglakat paagi sa panulok. Walay sapayan nga nasaksihan nila ang napulo ka kalalat-an nga nagpakahuya sa butig nga mga dios sang Egipto kag nian naeksperiensiahan ang tumalagsahon nga pagkaluwas sa Dagat nga Mapula, malinapason nga naghimo ang mga Israelinhon sing isa ka bulawan nga tinday nga baka kag nian ginsimba ini. Nangin di-mapailubon sila kag natak-an sa paghulat kay Moises, nga “nagpalantang sa pagdulhog sa bukid.” (Exodo 32:​1-4) Ang pagkadimapailubon nagpahulag sa ila sa pagsimba sa isa ka idolo nga makita sang ila literal nga mata. Ang ila paglakat paagi sa panulok nag-insulto kay Jehova kag nagresulta sa kalaglagan sang “mga tatlo ka libo ka lalaki.” (Exodo 32:25-​29) Daw ano gid ka makapasubo kon ang isa ka sumilimba ni Jehova karon maghimo sing mga desisyon nga nagapakita sing indi pagsalig kay Jehova kag sa iya ikasarang sa pagtuman sang iya mga saad!

16. Ano ang epekto sang naggua nga mga panagway sa mga Israelinhon?

¹⁶ Ang naggua nga mga panagway may di-maayo nga epekto sa mga Israelinhon sa iban nga mga paagi. Bangod sang paglakat paagi sa panulok,  nagkurog sila sa kahadlok sa ila mga kaaway. (Numeros 13:​28, 32; Deuteronomio 1:28) Nagresulta ini sa paghangkat nila sa hatag-Dios nga awtoridad ni Moises kag sa pagreklamo nila sa ila nangin kabuhi. Bangod sining kakulang sing pagtuo, mas ginpili pa nila ang kontrolado-sang-demonyo nga Egipto sangsa Ginsaad nga Duta. (Numeros 14:​1-4; Salmo 106:24) Pat-od nga nasaklaw gid si Jehova sang makita niya ang daku nga pagkawalay pagtahod sang iya katawhan sa ila di-kitaon nga Hari!

17. Ngaa ginsikway sang mga Israelinhon ang panuytoy ni Jehova sang adlaw ni Samuel?

¹⁷ Sang adlaw ni Samuel, ang nahamut-an nga pungsod nga Israel nasiod liwat sa paglakat paagi sa panulok. Naghandum ang mga tawo sing hari nga makita nila. Bisan pa ginpamatud-an na ni Jehova nga sia ang ila Hari, indi pa ini bastante para sa ila agod maglakat paagi sa pagtuo. (1 Samuel 8:​4-9) Binuang nga ginsikway nila ang himpit nga panuytoy ni Jehova kag nagresulta ini sa ila kahalitan, kay ginpili pa nila nga mangin kaangay sang mga pungsod sa palibot nila.​​—⁠1 Samuel 8:​19, 20.

18. Ano nga mga leksion ang aton matun-an tuhoy sa mga katalagman sang paglakat paagi sa panulok?

¹⁸ Subong modernong-adlaw nga mga alagad ni Jehova, ginapakabahandi naton ang aton maayo nga kaangtanan sa Dios. Nalangkag kita sa pagtuon kag sa pag-aplikar sa aton kabuhi sang mapuslanon nga mga leksion gikan sa mga hitabo sang una. (Roma 15:4) Sang ang mga Israelinhon naglakat paagi sa panulok, nalipatan nila nga ang Dios amo ang nagatuytoy sa ila paagi kay Moises. Kon indi kita maghalong, basi malipatan man naton nga si Jehova nga Dios kag ang Daku Pa nga Moises nga si Jesucristo, amo ang nagatuytoy sa Cristianong kongregasyon karon. (Bugna 1:12-16) Dapat mag-andam kita nga indi pagtan-awon sa tawhanon nga pagtamod ang dutan-on nga bahin sang organisasyon ni Jehova. Magadul-ong ini sa pagkapalareklamo kag pagkadula sing apresasyon sa mga tiglawas ni Jehova subong man sa espirituwal nga pagkaon nga ginaaman sang “matutom kag mainandamon nga ulipon.”​—⁠Mateo 24:45.

Mangin Determinado nga Maglakat Paagi sa Pagtuo

19, 20. Ano ang imo determinasyon, kag ngaa?

¹⁹ “Nagapakigdumog kita,” siling sang Biblia, “indi batok sa dugo kag unod, kundi batok sa mga panguluhan, batok sa mga awtoridad, batok sa mga manuggahom sang kalibutan sining kadudulman, batok sa malaut nga mga puersa nga espiritu sa langitnon nga mga duog.” (Efeso 6:12) Ang aton panguna nga kaaway amo si Satanas nga Yawa. Luyag gid niya nga gub-on ang aton pagtuo kay Jehova. Gamiton niya ang tanan nga sahi sang paghaylo agod talikdan naton ang aton desisyon nga alagaron ang Dios. (1 Pedro 5:8) Ano ang magaamlig sa aton agod indi malimbungan sang naggua nga panagway sang sistema ni Satanas? Amo ang paglakat paagi sa pagtuo, indi paagi sa panulok! Ang pagsalig sa mga saad ni Jehova magaamlig sa aton nga indi maeksperiensiahan ang ‘pagkalunod sang aton pagtuo.’ (1 Timoteo 1:19) Busa, dapat gid kita mangin determinado nga magpadayon sa paglakat paagi sa pagtuo, nagasalig sing bug-os sa pagpakamaayo ni Jehova. Kag kabay nga padayon kita nga mangamuyo nga malampuwasan naton ang tanan nga butang nga gintalana nga mahanabo sa malapit nga palaabuton.​​—⁠Lucas 21:36.

²⁰ Samtang nagalakat kita paagi sa pagtuo kag indi paagi sa panulok, may yara kita maayo gid nga Huwaran. “Si Cristo nag-antos tungod sa inyo,” siling sang Biblia, “nga nagabilin sa inyo sing huwaran agod nga sundon ninyo sing maayo ang iya mga tikang.” (1 Pedro 2:21) Binagbinagon sa masunod nga artikulo kon paano kita padayon nga maglakat subong sang iya paglakat.

Madumduman Mo Bala?

• Ano ang imo natun-an gikan sa mga halimbawa nanday Moises kag Esau tuhoy sa paglakat paagi sa pagtuo, indi paagi sa panulok?

• Ano ang yabi agod malikawan ang siod sang materyalismo?

• Paano ang paglakat paagi sa pagtuo nagabulig sa aton nga malikawan ang pagtamod nga ang katapusan malayo pa?

• Ngaa makatalagam ang paglakat paagi sa panulok?

[Mga Pamangkot sa Pagtinuon]

[Retrato sa pahina 17]

Si Moises naglakat paagi sa pagtuo

[Retrato sa pahina 18]

Ang mga kalingawan masami bala nagaupang sa imo teokratikong mga hilikuton?

[Retrato sa pahina 20]

Paano ang pagtalupangod sa Pulong sang Dios makaamlig sa imo?