Magpadayon sa Paglakat Subong sang Paglakat ni Jesucristo

“Sia nga nagasiling nga nagapabilin sia nga nahiusa upod [sa Dios] obligado man nga magpadayon sa paglakat subong sang paglakat sinang isa [si Jesus].”​—⁠1 JUAN 2:6.

1, 2. Ano ang nadalahig sa pagtulok sing maayo kay Jesus?

“MAGDALAGAN kita nga may pagbatas sang dalaganon nga ginabutang sa aton atubangan,” sulat ni apostol Pablo, “samtang nagatulok kita sing maayo sa Pangulo nga Ahente kag Manughimpit sang aton pagtuo, si Jesus.” (Hebreo 12:​1, 2) Ang paglakat sa dalanon sang pagkatutom nagakinahanglan nga magtulok kita sing maayo kay Jesucristo.

² Ang tinaga sa orihinal nga lenguahe nga ginbadbad ‘nagatulok sing maayo’ sa Cristianong Griegong Kasulatan, nagakahulugan sing “pagpatuhoy sing igtalupangod nga wala sing tublag,” “pagsaylo sang panulok halin sa isa ka butang pakadto sa iban,” “pagtuon sang panulok.” Ang isa ka reperensia nagasiling: “Sa tion nga ang Griegong manugdalagan wala na nagakonsentrar sa palumba kag sa tulumuron sini, kag magtulok sa kadam-an nga tumalan-aw, ang iya pagdalagan magahinay. Amo man sini ang matabo sa Cristiano.” Ang mga tublag mahimo makaupang sa aton espirituwal nga pag-uswag. Dapat kita magtulok sing maayo kay Jesucristo. Kag ano ang dapat naton tulukon sa Pangulo nga Ahente? Ang Griegong termino nga ginbadbad “pangulo nga ahente” nagakahulugan sing “pangulo nga lider, isa nga nagapanguna sa bisan ano nga butang kag nagapahamtang sing halimbawa.” Ang pagtulok sing maayo kay Jesus nagakinahanglan sing pag-ilog sa iya halimbawa.

3, 4. (a) Ang paglakat subong sang paglakat ni Jesucristo nagakinahanglan sing ano sa aton bahin? (b) Ano nga mga pamangkot ang dapat naton talupangdon?

³ “Sia nga nagasiling nga nagapabilin sia nga nahiusa upod [sa Dios] obligado man nga magpadayon sa paglakat subong sang paglakat sinang isa [si Jesus],” siling sang Biblia. (1 Juan 2:6) Dapat magpabilin kita nga nahiusa upod sa Dios paagi sa pagtuman sa mga sugo ni Jesus subong nga gintuman niya ang mga sugo sang iya Amay.​​—⁠Juan 15:10.

⁴ Busa, ang paglakat subong sang paglakat ni Jesus nagakinahanglan nga tumanon naton sia subong Pangulong Lider kag sundon naton sing maayo ang iya mga tikang. Ang importante nga mga pamangkot nga dapat binagbinagon sa sining bahin amo: Paano kita ginapangunahan ni Cristo karon? Paano kita maapektuhan sang pag-ilog sa iya paagi sang paglakat? Ano ang mga benepisyo sang pagsunod sa sulundan nga ginpahamtang ni Jesucristo?

Kon Paano Ginapangunahan ni Cristo ang Iya mga Sumulunod

5. Antes magkayab si Jesus sa langit, ano ang ginsaad niya sa iya mga sumulunod?

⁵ Antes sia magkayab sa langit, ang ginbanhaw nga si Jesucristo nagpakita sa iya mga disipulo kag naghatag sa ila sing isa ka importante nga hilikuton. Nagsiling sia: “Lakat kamo kag maghimo sing mga disipulo sa mga  tawo sang tanan nga kapungsuran.” Sadto nga tion, nagsaad man ang Pangulong Lider nga mangin kaupod nila sia samtang ginatuman nila ining sugo, nga nagasiling: “Yari karon! ako kaupod ninyo sa tanan nga adlaw tubtob sa katapusan sang sistema sang mga butang.” (Mateo 28:​19, 20) Kamusta si Jesucristo kag iya mga sumulunod sa sining tion sang katapusan sang sistema sang mga butang?

6, 7. Paano kita ginapangunahan ni Jesus paagi sa balaan nga espiritu?

⁶ “Ang mananabang, ang balaan nga espiritu, nga ipadala sang Amay sa akon ngalan,” siling ni Jesus, “ini magatudlo sa inyo sang tanan nga butang kag magapahanumdom sa inyo sang tanan nga butang nga ginsiling ko sa inyo.” (Juan 14:26) Ang balaan nga espiritu, nga ginpadala sa ngalan ni Jesus, nagatuytoy kag nagapalig-on sa aton karon. Nagahatag ini sa aton sing espirituwal nga kasanagan kag nagabulig sa aton nga mahangpan ‘bisan ang madalom nga mga butang sang Dios.’ (1 Corinto 2:10) Dugang pa, ang diosnon nga mga kinaiya nga gugma, kalipay, paghidait, pagkamapinasensiahon, pagkamainayuhon, pagkaayo, pagtuo, kalulo, pagpugong sa kaugalingon “mga bunga sang espiritu.” (Galacia 5:​22, 23) Paagi sa bulig sang balaan nga espiritu, sarang naton mapalambo ining mga kinaiya.

⁷ Samtang ginatun-an naton ang Kasulatan kag ginapanikasugan nga iaplikar ang aton natun-an, ang espiritu ni Jehova nagabulig sa aton nga mag-uswag sa kaalam, paghantop, paghangop, ihibalo, paghukom, kag ikasarang sa paghunahuna. (Hulubaton 2:​1-​11) Ang balaan nga espiritu nagabulig man sa aton nga mabatas ang mga pagsulay kag mga pagtilaw. (1 Corinto 10:13; 2 Corinto 4:⁠7; Filipos 4:13) Ang mga Cristiano ginalaygayan nga ‘tinluan ang ila kaugalingon sang tanan nga kadagtaan sang lawas kag espiritu, nga ginahimpit ang pagkabalaan.’ (2 Corinto 7:1) Mahimo gid bala kita magkabuhi nahisanto sa ginapatuman sang Dios nga pagkabalaan, ukon pagkatinlo, kon wala ang bulig sang balaan nga espiritu? Ang isa sa mga paagi nga ginagamit ni Jesus agod pangunahan kita karon amo ang balaan nga espiritu, nga gintugot ni Jehova nga Dios nga gamiton sang iya Anak.​​—⁠Mateo 28:18.

8, 9. Paano ginagamit ni Cristo ang “matutom kag mainandamon nga ulipon” sa pagpanguna?

⁸ Binagbinaga ang isa pa ka paagi kon paano karon ginapangunahan ni Cristo ang kongregasyon. Nagakomento sa iya presensia kag sa katapusan sang sistema sang mga butang, si Jesus nagsiling: “Sin-o bala ang matutom kag mainandamon nga ulipon nga ginpadumala sang iya agalon sa iya panimalay, sa paghatag sa ila sang ila pagkaon sa nagakaigo nga tion? Malipayon ining ulipon nga kon mag-abot ang iya agalon masapwan sia nga nagahimo sing subong. Sa pagkamatuod nagasiling ako sa inyo, Tangduan niya sia sa tanan niya nga pagkabutang.”​—⁠Mateo 24:​3, 45-47.

⁹ Ang “agalon” amo si Jesucristo. Ang “ulipon” amo ang grupo sang hinaplas nga mga Cristiano sa duta. Ining ulipon nga klase gintugyanan sa pag-atipan sang mga intereses ni Jesus sa duta kag sa pag-aman sang sibu sa tion nga espirituwal nga pagkaon. Isa ka magamay nga grupo sang kalipikado nga mga manugtatap gikan sa kabilugan nga “matutom kag mainandamon nga ulipon” ang nagahuman subong Nagadumala nga Hubon, nga nagaalagad subong tiglawas sang ulipon nga klase. Ginatuytuyan nila ang bug-os kalibutan nga pagbantala sang Ginharian nga hilikuton kag nagaaman sila sing espirituwal nga pagkaon sa nagakaigo nga tion. Busa ginatuytuyan ni Cristo ang kongregasyon paagi sa hinaplas sang espiritu nga “matutom kag mainandamon nga ulipon” kag sa Nagadumala nga Hubon sini.

10. Ano dapat ang aton panimuot tuhoy sa mga gulang, kag ngaa?

¹⁰ Ang isa pa ka pagpadayag sang pagpanguna ni Cristo amo ang “dulot nga mga lalaki”​—⁠Cristianong mga gulang, ukon mga manugtatap. Ginhatag sila “sa tuyo nga pasibuon liwat ang mga balaan, para sa ministeryal nga hilikuton, para sa pagpalig-on sa lawas ni Cristo.” (Efeso 4:​8, 11, 12) Tuhoy sa ila, ang Hebreo 13:7 nagasiling: “Dumduma ang mga nagapanguna sa inyo, nga nagpamulong sang pulong sang Dios sa inyo, kag samtang ginapamalandungan ninyo ang resulta sang ila paggawi iluga ang ila pagtuo.” Ang mga gulang amo ang nagapanguna sa kongregasyon. Sanglit ginailog nila si Cristo Jesus, ang ila pagtuo takus ilugon. (1 Corinto 11:1) Mapakita naton ang aton apresasyon tuhoy sa kahimusan sa mga gulang paagi sa pagtuman kag sa pagpasakop sa sining “dulot nga mga lalaki.”​​—⁠Hebreo 13:17.

11. Sa anong paagi ginapangunahan ni Cristo ang iya mga sumulunod karon, kag ano ang nadalahig sa paglakat subong sang iya paglakat?

 ¹¹ Huo, ginatuytuyan karon ni Jesucristo ang iya mga sumulunod paagi sa balaan nga espiritu, sa “matutom kag mainandamon nga ulipon,” kag sa mga gulang sang kongregasyon. Agod makalakat kita subong sang paglakat ni Cristo, kinahanglan mahangpan naton ang iya paagi sang pagpanguna kag magpasakop sa sini. Nagakinahanglan man nga ilugon naton ang iya paagi sang paglakat. “Sa sining dalanon gintawag kamo,” sulat ni apostol Pedro, “bangod bisan si Cristo nag-antos tungod sa inyo, nga nagabilin sa inyo sing huwaran agod nga sundon ninyo sing maayo ang iya mga tikang.” (1 Pedro 2:21) Sa anong paagi dapat makaapektar sa aton ang pagsunod sa himpit nga halimbawa ni Jesus?

Mangin Makatarunganon Kon Nagagamit sing Awtoridad

12. Sa anong aspekto sang halimbawa ni Cristo interesado gid ang mga gulang sa kongregasyon?

¹² Bisan pa ginhatagan si Jesus sang iya Amay sing kapin nga awtoridad sangsa iban, gingamit niya ini sing makatarunganon. Ang tanan sa kongregasyon​—⁠ilabi na ang mga manugtatap​—⁠dapat ‘magpakilala sa tanan nga tawo sang ila pagkamakatarunganon.’ (Filipos 4:⁠5; 1 Timoteo 3:​2, 3) Bangod ang mga gulang may awtoridad sa kongregasyon, importante nga sundon nila ang mga tikang ni Cristo sa paggamit sini.

13, 14. Sa anong paagi mailog sang mga gulang si Cristo samtang ginapalig-on nila ang iban sa pag-alagad sa Dios?

¹³ May patugsiling si Jesus sa mga limitasyon sang iya mga disipulo. Wala niya sila ginpangitaan sing kapin sa ila sarang mahatag. (Juan 16:12) Ginpalig-on ni Jesus ang iya mga sumulunod nga ‘magpanikasog sing lakas’ sa paghimo sang kabubut-on sang Dios, nga wala sila ginaipit. (Lucas 13:24) Ginhimo niya ini paagi sa pagpanguna kag sa pagpahulag sang ila tagipusuon. Sing kaanggid, ang Cristianong mga gulang karon wala man nagapilit sa iban nga mag-alagad sa Dios paagi sa pagpakonsiensia sa ila. Sa baylo, ginapalig-on sila sang mga gulang nga alagaron nila si Jehova bangod sang ila gugma sa iya kag kay Jesus, subong man sa ila isigkatawo.​​—⁠Mateo 22:37-​39.

¹⁴ Wala gin-abusuhan ni Jesus ang awtoridad nga gintugyan sa iya paagi sa pagkontrol sa kabuhi sang mga tawo. Wala sia magpahamtang sing di-malab-ot nga mga talaksan ni naghatag man sing madamo katama nga pagsulundan. Ang iya pamaagi amo ang pagpahulag sa iban paagi sa paglab-ot sang ila mga tagipusuon paagi sa mga prinsipio sa likod sang mga kasuguan nga ginhatag paagi kay Moises. (Mateo 5:​27, 28) Bilang pag-ilog kay Jesucristo, ang mga gulang wala nagapatuman sing mga pagsulundan nga pasad lamang sa ila kaugalingon nga luyag, opinyon, ukon prinsipio. May kaangtanan sa pamayo kag pamustura ukon pagliwaliwa kag kalingawan, ginatinguhaan sang mga gulang nga lab-uton ang mga tagipusuon paagi sa paggamit sing diosnon nga mga prinsipio, subong sang ginbalay sa Miqueas 6:​8; 1 Corinto 10:31-​33; kag 1 Timoteo 2:​9, 10.

Mangin Mahinuklugon kag Mapinatawaron

15. Ano ang reaksion ni Jesus sa mga kasaypanan sang iya mga disipulo?

¹⁵ Nagbilin si Jesus sing huwaran sa aton agod sundon naton ang iya paagi sang pag-atubang sa mga kasaypanan sang iya mga disipulo. Binagbinaga ang duha ka hitabo sa iya katapusan nga gab-i sa duta subong tawo. Pag-abot nila sa Getsemane, “gin-upod [ni Jesus] si Pedro kag Santiago kag Juan” kag ginsilingan sila nga ‘padayon nga magbantay.’ Nian, “sa pagkadto sa uluunhan naghapa sia sa duta kag nagpangamuyo.” Sang nagbalik sia, “nakita niya sila nga nagatulog.” Ano ang reaksion ni Jesus? Nagsiling sia: “Sa pagkamatuod, ang espiritu nalangkag, apang ang unod maluya.” (Marcos 14:32-38) Sa baylo nga akigan sanday Pedro, Santiago, kag Juan,  nagpakita sia sing pagkamahinuklugon! Sadto man nga gab-i, ginpanghiwala ni Pedro si Jesus sing makatlo. (Marcos 14:66-​72) Paano ginpakig-angutan ni Jesus si Pedro pagkatapos sadto? “Nabanhaw ang Ginuo kag nagpakita sia kay Simon [Pedro].” (Lucas 24:34) “Nagpakita sia kay Cefas,” siling sang Biblia, nian sa “napulog-duha.” (1 Corinto 15:5) Sa baylo nga maghinakit, ginpatawad ni Jesus ang iya mahinulsulon nga apostol kag ginpalig-on sia. Sang ulihi, gintugyanan ni Jesus si Pedro sing daku nga mga responsibilidad.​​—⁠Binuhatan 2:​14; 8:​14-​17; 10:​44, 45.

16. Paano kita makalakat subong sang paglakat ni Jesus kon ang aton masigkatumuluo makasala sa aton?

¹⁶ Kon ang aton mga masigkatumuluo magapaslaw ukon makasala sa aton bangod sang pagkadihimpit, indi bala nga, kaangay ni Jesus, dapat man kita mangin mahinuklugon kag mapinatawaron? Ginlaygayan ni Pedro ang iya masigkatumuluo: “Kamo tanan mag-anggid sa panghunahuna, nga nagapakita sing patugsiling, may utudnon nga gugma, mapinalanggaon nga kaawa, mapainubuson sa hunahuna, nga wala nagabalos sing halit sa halit ukon pasipala sa pasipala, kundi, sa baylo, nagapakamaayo.” (1 Pedro 3:​8, 9) Ano abi kon, sa baylo nga ilugon si Jesus, ang iban indi mahinuklugon ukon mapinatawaron sa aton? Bisan pa amo sina, obligado kita nga ilugon ni Jesus. Walay sapayan sina, obligado gihapon kita nga tinguhaan nga ilugon si Jesus kag maghulag kaangay sang ginhimo niya.​​—⁠1 Juan 3:⁠16.

Unaha Anay ang mga Intereses sang Ginharian

17. Ano ang nagapakita nga gin-una ni Jesus ang paghimo sang kabubut-on sang Dios sa iya kabuhi?

¹⁷ May isa pa ka paagi nga makalakat kita kaangay sang paglakat ni Jesucristo. Importante katama nga bahin sang kabuhi ni Jesus ang pagbantala sing maayong balita sang Ginharian sang Dios. Pagkatapos makabantala sa Samaritana malapit sa siudad sang Sicar sa Samaria, nagsiling si Jesus sa iya mga disipulo: “Ang akon kalan-on amo ang paghimo sang kabubut-on sang nagpadala sa akon kag ang pagtapos sang iya buluhaton.” (Juan 4:34) Ang paghimo sang kabubut-on sang iya Amay nagsakdag kay Jesus; makapabaskog ini, makaalayaw, kag makapaumpaw sa iya kaangay sang pagkaon. Indi bala nga ang pag-ilog kay Jesus paagi sa pagpabilin nga nagakonsentrar sa paghimo sang kabubut-on sang Dios nagaresulta sa mapuslanon kag makaalayaw gid nga kabuhi?

18. Ano nga mga pagpakamaayo ang matigayon bangod sang pagpalig-on sa kabataan nga magsulod sa bug-os tion nga pag-alagad?

¹⁸ Kon ginapalig-on sang mga ginikanan ang ila kabataan nga magsulod sa bug-os tion nga pag-alagad, makabaton sila sing madamo nga pagpakamaayo subong man ang ila kabataan. Kutob pa sa pagkabata, ginpalig-on kag ginpahamtang sang isa ka amay sa iya kapid nga mga anak nga lalaki ang tulumuron nga magpayunir. Sang makagradwar na sila, nagpayunir matuod ang kapid. Ginapanganinaw ang iya kalipay bangod sini, ang amay nagsulat: “Wala gid kami ginpaslaw sang amon mga bata. Mapinasalamaton kami nga makasiling, ‘Ang mga anak palanublion gikan kay Jehova.’” (Salmo 127:3) Kag paano makabenepisyo ang kabataan sa pagsulod sa bug-os tion nga pag-alagad? Ang isa ka iloy nga may lima ka bata nagsiling: “Ang pagpayunir nagbulig sa akon tanan nga mga bata sa pagpalambo sing mas suod nga kaangtanan kay Jehova, nagpauswag ini sang ila batasan sa personal nga pagtuon, nagtudlo ini sa ila kon paano gamiton sing maalamon ang ila tion, kag nagtudlo ini sa ila kon paano unahon ang espirituwal nga mga butang sa ila kabuhi. Bisan pa sila tanan kinahanglan nga maghimo sing madamo nga pagbag-o, wala gid sing isa sa ila ang naghinulsol sa paglakat sa banas nga ila ginpili.”

19. Ano nga mga plano sa palaabuton ang dapat maalamon nga binagbinagon sang mga pamatan-on?

¹⁹ Mga pamatan-on, ano bala ang inyo plano  para sa palaabuton? Handum mo bala nga mangin sampaton sa isa ka propesyon? Ukon ginahimud-usan mo bala ang isa ka karera sa bug-os tion nga pag-alagad? “Magpadayon kamo sa pagbantay sing maayo nga ang inyo paglakat indi subong sang di-maalam kundi subong sang mga tawo nga maalamon,” laygay ni Pablo, “nga ginabakal ang nagakaigo nga tion para sa inyo kaugalingon, bangod nga ang mga adlaw malaut.” Nagsiling pa sia: “Bangod sini mag-untat kamo nga mangin di-makatarunganon, kundi padayon ninyo nga hangpon kon ano ang kabubut-on ni Jehova.”​—⁠Efeso 5:15-17.

Mangin Mainunungon

20, 21. Sa anong paagi si Jesus mainunungon, kag paano naton mailog ang iya pagkamainunungon?

²⁰ Agod makalakat subong sang paglakat ni Jesus, kinahanglan naton ilugon ang iya pagkamainunungon. May kaangtanan sa pagkamainunungon ni Jesus, ang Biblia nagsiling: “Bisan pa nagluntad sia sa dagway sang Dios, wala [sia] maghunahuna nga mangagaw, buot silingon, nga mangin tupong sia sa Dios. Wala, kundi gin-uba niya ang iya kaugalingon kag nangin dagway sang ulipon kag nangin kaanggid sang mga tawo. Labaw pa sa sina, sang nakita niya ang iya kaugalingon sa bayhon sang tawo, nagpaubos sia kag nangin matinumanon tubtob sa kamatayon, huo, kamatayon sa usok sang pag-antos.” Mainunungon nga ginsakdag ni Jesus ang pagkasoberano ni Jehova paagi sa pagpasakop sa kabubut-on sang Dios para sa iya. Nangin matinumanon sia tubtob sa pag-antos sing kamatayon sa usok. Dapat naton ‘huptan ini nga panimuot’ kag mainunungon nga magpasakop sa paghimo sang kabubut-on sang Dios.​—⁠Filipos 2:5-8.

²¹ Nagpakita man si Jesus sing pagkamainunungon sa iya matutom nga mga apostoles. Walay sapayan sang ila mga kaluyahon kag pagkadihimpit, ginhigugma sila ni Jesus “tubtob sa katapusan.” (Juan 13:1) Sing kaanggid, indi naton dapat pagmulayon ang mga di-kahimpitan sang aton mga kauturan.

Sunda ang Sulundan nga Ginpahamtang ni Jesus

22, 23. Ano ang mga benepisyo sang pagsunod sa sulundan nga ginpahamtang ni Jesus?

²² Sa pagkamatuod, subong di-himpit nga mga tawo, indi naton eksakto nga masundan ang mga tikang sang aton himpit nga Huwaran. Apang, makapanikasog kita nga masundan sing maayo ang iya mga tikang. Sa paghimo sini kinahanglan nga mahangpan naton kag magpasakop kita sa paagi ni Cristo sa pagpanguna kag sundon sing maayo ang sulundan nga iya ginpahamtang.

²³ Ang pag-ilog kay Cristo nagadul-ong sa madamo nga pagpakamaayo. Ang aton kabuhi mangin labi pa nga may kahulugan kag makaalayaw bangod nagakonsentrar kita sa paghimo sang kabubut-on sang Dios sa baylo sang aton kaugalingon. (Juan 5:​30; 6:38) May yara kita matinlo nga konsiensia. Ang aton paagi sang paglakat mangin huwaran. Gin-agda ni Jesus ang tanan nga ginabudlayan kag ginabug-atan nga magkadto sa iya kag mapaumpawan sa ila mga kalag. (Mateo 11:28-​30) Kon ginailog naton ang halimbawa ni Jesus, mapaumpawan man naton ang iban paagi sa pagpakig-upod nila sa aton. Kabay, nian nga magpadayon kita sa paglakat subong sang paglakat ni Jesus.

Madumduman Mo Bala?

• Paano ginapangunahan ni Cristo ang iya mga sumulunod karon?

• Paano masunod sang mga gulang ang pagpanguna ni Cristo sa paggamit sang ila hatag-Dios nga awtoridad?

• Paano naton mailog ang halimbawa ni Jesus sa pag-atubang sa mga kasaypanan sang iban?

• Paano mauna sang mga pamatan-on ang mga intereses sang Ginharian?

[Mga Pamangkot sa Pagtinuon]

[Retrato sa pahina 23]

Ang Cristianong mga gulang nagabulig sa aton nga sundon ang pagpanguna ni Cristo

[Mga retrato sa pahina 24, 25]

Mga pamatan-on, ano ang inyo mga plano agod matigayon ang isa ka makaalayaw nga Cristianong pagkabuhi?