Mga Pamangkot Gikan sa mga Bumalasa

Ang paghampang bala sing masingki nga computer games makaapektar sang kaangtanan sang isa kay Jehova?

“Si Jehova nagausisa sa matarong subong man sa malaut,” siling ni Hari David sang dumaan nga Israel, “kag ang bisan sin-o nga nagahigugma sang kasingki ginadumtan gid sang Iya kalag.” (Salmo 11:5) Ang Hebreo nga tinaga para sa “dumot” mahimo magakahulugan nga mangin “isa nga kaaway.” Gani, ang bisan sin-o nga nagahigugma sa kasingki mangin kaaway sang Dios. Gani, ang pamangkot nga dapat naton binagbinagon, amo: Ang paghampang bala sing computer games nagapalambo sang gugma sa kasingki?

Ang masingki nga computer games nagapakadaku gid sang paggamit sing mga armas. Sa masami, ginahanas nila ang mga humalampang sa taktika sang inaway. Ang magasin nga The Economist nagsiling: “Nagagamit ang militar sang Amerika sing mga computer games sa ila paghanas. Ang pila sa mga hampang nga ginagamit sang militar matigayon man sang publiko.”

Matuod, ang mga nagahampang sing masingki nga computer games wala gid man nagahalit sa tuodtuod nga mga tawo. Apang, ano ang epekto sining ginpili nila nga kalingawan sa ila tagipusuon? (Mateo 5:​21, 22; Lucas 6:45) Anong masiling mo sa tawo nga nanamian mamuno, maniro, mangumpol, kag magpatay sang mga tawotawo sa kompyuter? Ano ang matabo sa tawo nga nagapaayaw sing inoras kada semana sa masingki nga mga hampang, nga daw halos nagiyan sa sini? Walay duhaduha nga makasiling ka nga ginapalambo niya ang gugma sa kasingki, subong nga ang isa nga nagatan-aw sing pornograpiya nagapalambo man sing imoral nga mga kailigbon.​​—⁠Mateo 5:​27-​29.

Ginadumtan gid bala ni Jehova ang isa nga mahigugmaon sang kasingki? Nagsiling si David nga “ginadumtan gid” sia ni Jehova. Sang adlaw ni Noe, ginpakita ni Jehova ang iya daku nga pagdumot sa mga mahigugmaon sang kasingki. Si Jehova nagsiling kay Noe: “Ang katapusan sang tanan nga unod nag-abot sa atubangan nakon, kay ang duta napun-an sing kasingki paagi sa ila; kag yari karon laglagon ko sila upod sang duta.” (Genesis 6:13) Ginlaglag sang matuod nga Dios ang katawhan sa bug-os nga duta bangod sang ila kasingki. Gin-amligan niya si Noe kag ang iya pamilya​—⁠walo ka tawo nga indi mahigugmaon sa kasingki.​​—⁠2 Pedro 2:5.

Ang mga tawo nga luyag mangin mga abyan ni Jehova ‘nagasalsal sang ila mga espada nga mga punta sang arado kag ang ila mga bangkaw nga mga galab nga inughagbas.’ Sa baylo nga magtuon nga higugmaon ang kasingki wala na sila “magtuon sing inaway.” (Isaias 2:4) Dapat naton ‘talikdan ang malain kag himuon ang maayo,’ agod magpabilin kita nga abyan sang Dios sa baylo nga mangin kaaway niya. Kinahanglan man naton ‘pangitaon ang paghidait kag tigayunon ini.’​—⁠1 Pedro 3:11.

Ano abi kon nayanggaw na kita sa paghampang sing masingki nga video games? Nian, dapat naton untatan ang paghimo sing mga butang nga ginadumtan ni Jehova kon luyag naton nga pahamut-an sia. Dapat kita mangamuyo nga buligan kita sang balaan nga espiritu sang Dios nga untatan ining makahalalit sa espirituwal nga batasan. Mauntat lamang naton ini kon pahanugutan naton ang mga kinaiya subong sang paghidait, pagkaayo, kag pagpugong sa kaugalingon nga magbulig sa aton sa pagkabuhi nahisanto sa mga dalanon sang Dios.​​—⁠Lucas 11:13; Galacia 5:​22, 23.