Ang Paghangop sa mga Tanda Isa Gid ka Serioso nga Butang!

“Pagdumdom ko primero nagasakit lang ang ulo sang amon anak nga lalaki nga si Andreas. Apang nadulaan sia sing gana sa pagkaon kag kataas sang iya hilanat. Nagtudo pa ang pagsakit sang iya ulo, amo kon ngaa nabalaka ako. Pag-abot gid sang akon bana, ginpadoktor namon si Andreas. Pagkatapos niya mausisa ang mga sintomas, gilayon nga gindala sa ospital si Andreas. Indi ordinaryo ang pagsakit sang iya ulo. Meningitis ang iya balatian. Ginbulong sia kag madali lang nga nag-ayo.”​—⁠Gertrud, taga-Alemanya nga iloy.

MAHIMO nga pamilyar ang madamo nga ginikanan sa naeksperiensiahan ni Gertrud. Matalupangdan nila ang mga tanda nga mahimo may balatian ang ila anak. Bisan pa indi tanan nga balatian serioso, magahinulsol gid ang mga ginikanan kon pasipakpakan nila ang mga sintomas nga ginabatyag sang ila mga anak. Sa tapos matalupangdan ang mga tanda, importante gid ang paghimo sing nagakaigo nga aksion. Isa ini ka serioso nga butang.

Amo man sini ang dapat himuon sa iban nga butang luwas sa ikaayong lawas. Ang isa ka halimbawa amo ang tsunami nga natabo sa palibot sang Indian Ocean sang Disiembre 2004. Namutikan na sang mga ahensia sang gobierno sa Australia kag Hawaii ang mabaskog nga linog nga natabo sa naaminhan nga Sumatra kag may panagupnop na sila sa katalagman nga mahimo matabo subong epekto sini. Apang, wala sing paagi nga mapaalinton ini sa mga tawo nga nagapuyo sa naapektuhan nga lugar. Subong resulta, kapin sa 220,000 ang napatay.

Mas Importante nga mga Tanda

Sang si Jesucristo yari sa duta, ginhatagan niya ang iya mga manugpalamati sing leksion nga dapat sila maghulag sa tanda nga ila makita. Ginpatuhuyan niya ang mas importante nga butang. Ang Biblia nagasugid: “Nagpalapit sa iya ang mga Fariseo kag mga Saduceo kag, sa pagsulay sa iya, ginpangabay nila sia nga pakitaan sila sing isa ka tanda gikan sa langit. Bilang sabat nagsiling sia sa ila: ‘Kon mag-abot ang gab-i naanad na kamo sa pagsiling, “Mangin maayo ang tiempo, kay mapula ang langit”; kag kon aga, “Mangin matugnaw kag maulan ang tiempo karon, kay mapula ang langit, apang magal-um.” Makahibalo kamo maghangop sang dagway sang langit, apang indi kamo  makahangop sang mga tanda sang mga tion.’”​—⁠Mateo 16:1-3.

Sa pagsambit sang “mga tanda sang mga tion,” ginpahangop ni Jesus nga dapat kuntani nahangpan na sang iya Judiyong mga manugpalamati sang nahauna nga siglo ang pagkahilingagawon sang mga tion nga ila ginakabuhian. Ang Judiyong sistema sang mga butang malapit na malaglag nga magaapektar sa ila tanan. Pila lamang ka adlaw antes sia mapatay, ginsambit ni Jesus sa iya mga disipulo ang isa pa ka tanda​—⁠ang tanda sang iya presensia. Ang iya ginsiling sadto nga tinion importante gid sa tagsatagsa karon.