Ikaw Bala “Manggaranon sa Dios”?

ISA sa makapahunahuna nga mga parabola ni Jesucristo, amo ang tuhoy sa isa ka manggaranon nga tag-iya sang duta. Agod masigurado ang iya palaabuton, nagplano ang tag-iya sang duta nga magpahimo sing mas dalagku nga mga tambubo. Apang, sa ilustrasyon ni Jesus, ginlaragway ining tawo nga “di-makatarunganon.” (Lucas 12:16-21) Ang pila ka badbad sang Biblia naggamit pa gani sing tinaga nga “buangbuang.” Ngaa amo gid sini katigdas ang paglaragway sa iya?

Mahimo gid nga wala ginbinagbinag sang manggaranon nga tawo ang Dios sa iya mga plano; ni ginpadunggan ang Dios bangod sa madamo gid nga patubas. (Mateo 5:45) Sa baylo, sia nagpabugal: “Kalag, may madamo ka nga pagkabutang nga natigana sa madamong tuig; magpatawhay ka, magkaon ka, mag-inom ka, magkasadya ka.” Huo, nagpati sia nga ang bunga sang iya pinangabudlayan mangin isa ka “nagaamlig nga pader.”​—⁠Hulubaton 18:11.

Sa pagpaandam batok sa sining matinaastaason nga espiritu, ang disipulo nga si Santiago nagsulat: “Kari karon, kamo nga nagasiling: ‘Karon nga adlaw ukon buas magalakbay kami padulong sa sini nga siudad kag magapabilin didto sing isa ka tuig, kag magapatikang kami kag magaganansia,’ samtang wala kamo makahibalo kon ano ang mangin kabuhi ninyo buas. Kay kamo isa ka usbong nga nagapakita sa diutay nga tion kag dayon nagakawala.”​—⁠Santiago 4:​13, 14.

Matuod gid ining mga pinamulong, kay ang manggaranon sa parabola ni Jesus ginsilingan: “Ikaw nga di-makatarunganon, karon nga gab-i pangayuon nila sa imo ang imo kalag. Sin-o, nian, ang magatag-iya sang mga butang nga gintipon mo?” Kaangay sang nagakawala nga hun-og, ang manggaranon nga tawo mapatay antes niya matuman ang iya mga ginahandum. Nahangpan bala naton ang leksion? Si Jesus nagsiling: “Gani amo sina ang nagakatabo sa tawo nga nagatipon sing bahandi para sa iya kaugalingon apang indi manggaranon sa Dios.” Ikaw bala “manggaranon sa Dios”?