Indi Ka Gid Pagbayaan ni Jehova

MAPINTAS nga ginahingabot ang mga Cristiano sa Judea kag dapat sila makigbato sa materyalistiko nga pagtamod sang mga tawo sa ila palibot. Agod palig-unon sila, ginsulit ni apostol Pablo ang mga pinamulong ni Jehova sa mga Israelinhon samtang nagapasulod sila sa Ginsaad nga Duta. Si Pablo nagsulat: “Indi ko gid kamo pagbayaan ukon pagpatumbayaan.” (Hebreo 13:⁠5; Deuteronomio 31:6) Walay duhaduha nga ginpabakod sini nga saad ang unang-siglo nga mga Cristiano sa Judea nga nakabaton sang iya sulat.

Amo man ini nga saad ang dapat magpabakod sa aton nga malandas ang mga kabalaka bangod sang pagkabuhi sa “makahalanguyos nga mga tion nga mabudlay pakigbagayan.” (2 Timoteo 3:1) Kon magsalig kita kay Jehova kag manghikot sing nagakaigo, alay-ayon niya kita bisan sa tuman kabudlay nga mga kahimtangan. Agod makita naton kon paano matuman ni Jehova ini nga saad, binagbinagon naton ang kahimtangan sang isa ka tawo kon hinali sia nga madulaan sing palangabuhian.

Pag-atubang sa Wala Ginapaabot

Nagadamo ang nagakadulaan sing trabaho sa bug-os nga kalibutan. Suno sa isa ka Polaco nga magasin, ang pagkawalay trabaho ginakabig nga “isa ka mabug-at gid nga problema sang tawo sa kabuhi.” Apektado man sini bisan ang industriyalisado nga mga pungsod. Halimbawa, sang tuig 2004, bisan sa mga miembro sang Organization for Economic Cooperation and Development, ang mga wala sing trabaho “nagdamo sing kapin sa 32 milyones, nga mas mataas sangsa panahon sang Great Depression sang katuigan 1930.” Sa Poland, ginapakita sang rekord sang Central Statistical Office nga tatlo ka milyon ka tawo ang wala sing trabaho sang Disiembre 2003, nga “nagarepresentar sa 18 porsiento sang mga tawo nga yara sa edad nga puede magtrabaho.” Ang isa ka tiliman-an nagsiling nga sang 2002 ang kadamuon sang wala sing trabaho nga mga Aprikano sa Nabagatnan nga Aprika nakalab-ot sa 47.8 porsiento!

Ang hinali nga pagkadula sing trabaho kag ang mapahalin sa trabaho problema gid sang madamo, lakip ang mga alagad ni Jehova. “Ang tion kag wala ginapaabot nga hitabo” nagakatabo sa tagsatagsa. (Manugwali 9:11) Mahimo mahambal man naton ang ginsiling ni salmista David: “Ang mga kalisdanan sang akon tagipusuon nagadamo.” (Salmo 25:17) Masarangan mo bala ang amo sini kabudlay nga mga kahimtangan? Maapektuhan sini ang imo emosyonal, espirituwal, kag materyal nga kahimtangan. Kon madulaan ka sing trabaho, makabangon ka pa ayhan?

 Paglandas sa Emosyonal nga Kahuol

“Mas masakit para sa mga lalaki ang madulaan sing trabaho,” sanglit sila ang kinaandan nga ginatamod nga dapat magsagod sang pamilya, paathag sang sikologo nga si Janusz Wietrzyński. Nagsiling sia nga ang pagkadula sing trabaho “hinali nga nagapabag-o sang emosyon sang isa ka lalaki,” halin sa kaakig pakadto sa pagpangampo sa kabuhi. Ang isa ka amay nga nadulaan sing trabaho mahimo madulaan sing kompiansa sa iya kaugalingon kag “mang-away sang iya kapamilya.”

Si Adam, nga isa ka Cristianong amay nga may duha ka anak, nagpaathag sang iya nabatyagan sang madulaan sia sing trabaho: “Madali ako maakig; halos tanan nga butang nagapairitar sa akon. Kon gab-i, bisan ang akon mga damgo parte tanan sa trabaho kag kon paano ko masagod ang akon mga kabataan kag asawa, nga hinali man nga ginpahalin sa trabaho.” Sang sanday Ryszard kag Mariola nga isa ka mag-asawa nga may isa ka anak, nadulaan sang ila palangitan-an, may daku sila nga utang sa bangko. Ang asawa nag-asoy: “Indi ako mahim-os, ginasuknaan ako sang akon konsiensia nga sayop gid ang amon pagpangutang. Padayon ko nga ginapensar nga ako gid ang balasulon sini tanan.” Bangod sini nga kahimtangan, mahimo nga magburingot kita, mabalaka, ukon maugot gid, kag madaug kita sang aton ginabatyag. Gani, paano naton makontrol ining negatibo nga balatyagon?

Ang Biblia nagahatag sing epektibo nga laygay kon paano mahuptan ang positibo nga panimuot. “Indi kamo magkabalaka sa bisan ano nga butang,” laygay ni apostol Pablo, “kundi sa tagsa ka butang paagi sa pangamuyo kag pag-ampo nga may pagpasalamat ipakilala sa Dios ang inyo mga pangabay; kag ang paghidait sang Dios nga nagalabaw sa tanan nga panghunahuna magabantay sa inyo tagipusuon kag sa inyo ikasarang sa paghunahuna paagi kay Cristo Jesus.” (Filipos 4:​6, 7) Ang pagpalapit kay Jehova sa pangamuyo magahatag sa aton sing “paghidait sang Dios,” isa ka malinong nga panghunahuna pasad sa aton pagtuo sa iya. Ang asawa ni Adam nga si Irena, nagsiling: “Sa amon mga pangamuyo, ginasugid namon kay Jehova ang amon kahimtangan kag kon paano namon mapasimple pa ang amon kabuhi. Ang akon bana, nga mabinalak-on gid, makabatyag dayon nga may solusyon ang mga problema.”

Kon hinali lang nga nadulaan ka sing trabaho, maaplikar mo ang laygay ni Jesucristo sa Sermon sa Bukid: “Mag-untat sa pagkabalaka tuhoy sa inyo mga kalag kon ano ang inyo kaunon ukon kon ano ang inyo imnon, ukon tuhoy sa inyo mga lawas kon ano ang inyo isuksok. . . . Padayon, nian, nga pangitaa anay ang ginharian kag ang iya pagkamatarong, kag ining tanan iban pa nga mga butang idugang sa inyo.” (Mateo 6:​25, 33) Gin-aplikar nanday Ryszard kag Mariola ini nga laygay sa paglandas sang ila mga emosyon. “Pirme ako ginalugpayan sang akon bana kag ginasingganan nga indi gid kami pagbayaan ni Jehova,” hinumdom ni Mariola. Ang iya bana nagsiling man: “Paagi sa padayon nga pagpangamuyo sing magkaupod, labi kami nga nagsuod sa Dios kag sa isa kag isa, kag nangin lugpay gid ini sa amon.”

Ang balaan nga espiritu sang Dios makabulig man sa aton sa paglandas. Ang pagpugong sa kaugalingon nga ginapatubas sa aton sang espiritu, makabulig sa aton nga mangin kalmado kag mabakod. (Galacia 5:​22, 23) Ayhan indi ini mahapos, apang posible ini kay nagsaad si Jesus nga “ang Amay sa langit magahatag sing balaan nga espiritu sa mga nagapangayo sa iya.”​—⁠Lucas 11:13; 1 Juan 5:​14, 15.

 Indi Pagpatumbayai ang Imo Espirituwal nga mga Kinahanglanon

Ang hinali nga pagkadula sing trabaho mahimo magpaluya sa umpisa bisan pa gani sa isa ka balanse gid nga Cristiano, apang indi gid naton dapat pagpatumbayaan ang aton espirituwal nga mga kinahanglanon. Binagbinaga, halimbawa, ang 40 anyos nga si Moises, nga nagbag-o ang bug-os nga kabuhi sang nadula niya ang iya mataas nga posisyon sa palasyo sang hari kag nangin manugbantay sang karnero, isa ka trabaho nga ginakangil-aran sang mga Egiptohanon. (Genesis 46:34) Dapat magpasibu si Moises sa iya bag-o nga kahimtangan. Sa nagsunod nga 40 ka tuig, gintugutan niya si Jehova nga dihunon kag ihanda sia para sa bag-o nga mga hilikuton nga magaabot. (Exodo 2:11-22; Binuhatan 7:​29, 30; Hebreo 11:24-26) Walay sapayan sang mga kabudlayan, ginsentro ni Moises ang iya igtalupangod sa espirituwal nga mga butang kag kinabubut-on nga ginbaton ang paghanas ni Jehova. Kabay nga indi gid naton pagpabay-an ang aton espirituwal nga mga prinsipio bangod sang di-maayo nga mga kahimtangan!

Bisan masakit kon madulaan ka sing trabaho, isa ini ka maayo nga kahigayunan agod mapabakod naton ang aton kaangtanan kay Jehova nga Dios kag sa iya katawhan. Amo sini ang ginbatyag ni Adam, nga ginhinambitan kaina. Nagsiling sia: “Sang nadulaan kami sang akon asawa sing trabaho, wala gid magsulod sa amon pensar nga magpalya sa Cristianong mga miting ukon buhinan ang amon tion sa pag-ebanghelyo nga hilikuton. Ini nga pagtamod nakabulig sa amon agod indi magkabalaka sing tuman tuhoy sa palaabuton.” Kasubong man sini ang pagtamod ni Ryszard: “Kon indi bangod sa mga miting kag sa ministeryo, wala gid siguro kami makalampuwas kag mahimo nga nadaug gid kami sang kabalaka. Ang pagpakighambal sa iban tuhoy sa espirituwal nga  mga butang makapalig-on man, kay ginaliso sini ang amon igtalupangod sa kinahanglanon sang iban sa baylo sangsa amon.”​—⁠Filipos 2:4.

Huo, sa baylo nga magkabalaka tuhoy sa trabaho, tilawi nga gamiton ang libre nga tion sa espirituwal nga mga hilikuton subong sang personal nga pagtuon, pagpakigbahin sa mga hilikuton sa kongregasyon, ukon pagpasangkad sa imo ministeryo. Sa baylo nga magpanimuko, may ‘madamo ka nga mahimo sa hilikuton sang Ginuo’​—⁠nga magapahalipay sa imo kag sa sinsero nga mga indibiduwal nga nagapamati sa mensahe sang Ginharian nga imo ginabantala.​—⁠1 Corinto 15:58.

Pag-aman Sing Materyal sa Imo Pamilya

Apang, ang espirituwal nga pagkaon indi makapaumpaw sa kagutom. Dapat gid naton dumdumon ini nga prinsipio: “Kon ang bisan sin-o wala nagaaman para sa ila nga yara sa iya, kag ilabi na para sa mga katapo sang iya panimalay, napanghiwala na niya ang pagtuo kag malain pa sa tawo nga wala sing pagtuo.” (1 Timoteo 5:8) “Bisan pa nga ang mga kauturan sa kongregasyon mabinuligon,” baton ni Adam, “subong mga Cristiano, may obligasyon kita nga mangita sing palangabuhian.” Makasalig kita sa pagsakdag ni Jehova kag sang iya katawhan, apang indi naton pagkalimtan nga dapat kita magpanikasog nga makakita sing trabaho.

Ano ang imo mahimo? “Indi magtinamad kag magpaabot nga magamilagro ang Dios,” paathag ni Adam. “Kon nagapangita ka sing trabaho, indi magpangalag-ag nga magpakilala nga isa ikaw sa mga Saksi ni Jehova. Masami nga ginaapresyar ina sang mga amo.” Si Ryszard naglaygay: “Magpulupamangkot sa imo mga kakilala kon diin may bakante, magsekyar pirme sa mga ahensia sang trabaho, basaha ang mga pasayod, subong sang: ‘Wanted, manug-atipan sa may sablag’; ukon, ‘Temporaryo nga obra: Mang-ipo sing strawberry.’ Padayon nga magpangita! Indi mangin pislian, batuna bisan pa magagmay lang nga obra ukon bisan ang indi mo luyag nga obra.”

Huo, “si Jehova ang [imo] manugtabang.” Indi ka gid niya “pagbayaan ukon pagpatumbayaan.” (Hebreo 13:​5, 6) Indi ka gid dapat magkabalaka sing tuman. Ang salmista nga si David nagsulat: “Itugyan kay Jehova ang imo dalanon, kag magsalig sa iya, kag sia mismo magapanghikot.” (Salmo 37:5) Ang ‘pagtugyan kay Jehova sang aton mga dalanon’ nagakahulugan nga nagasalig kita sa iya kag ginahimo ang mga butang suno sa iya kabubut-on, bisan pa kon ang mga kahimtangan indi paborable sa aton.

Nasakdag nanday Adam kag Irena ang ila pamilya paagi sa pagpaninlo sing mga bintana kag hagdanan kag paagi sa pagkinot kon nagapamalaklon. Regular man sila nga nagasekyar sa ahensia sang trabaho. “Pirme gid nagaabot ang bulig kon kinahanglan namon ini,” siling ni Irena. Ang iya bana nagsiling man: “Ginpakita sang amon eksperiensia nga ang amon mga ginapangamuyo wala nahisanto sa kabubut-on sang Dios. Nagtudlo ini sa amon nga magsandig sa iya kaalam kag indi maghikot sa amon kaugalingon nga paghangop. Maayo gid nga maghulat sa solusyon halin sa Dios.”​—⁠Santiago 1:4.

Sanday Ryszard kag Mariola nakakita sing lainlain nga mga trabaho apang sa amo man nga tion nagpakigbahin sila sa pagpanaksi sa mga teritoryo nga mas daku ang kinahanglanon. “Makakita kami sing trabaho sa mga tion nga wala na gid kami sing makaon,” siling Ryszard. “Ginabalibaran namon ang mga trabaho nga daku ang sueldo apang makaupang sa amon teokratikong mga responsibilidad. Nagahulat kami kay Jehova.” Nagapati sila nga ginmaniobra ni Jehova ang mga butang agod makaarkila sila sing barato nga apartment kag sang ulihi nakakita gid man sing trabaho si Ryszard.

Mahimo makahalanusbo gid kon madulaan ka sing trabaho, apang ngaa indi mo ini pagtamdon nga kahigayunan agod personal nga maeksperiensiahan mo nga si Jehova wala nagapatumbaya sa imo? Si Jehova nagaulikid sa imo. (1 Pedro 5:​6, 7) Nagsaad sia paagi kay manalagna Isaias: “Dili ka manghulonghulong, kay ako ang imo Dios. Palig-unon ko ikaw. Buligan ko gid ikaw.” (Isaias 41:10) Indi pagtuguti ang wala ginapaabot nga mga hitabo, lakip ang pagkadula sing trabaho, nga magpaluya sa imo. Himua ang tanan mo nga masarangan kag pabayai ang iban nga mga butang kay Jehova. Maghulat kay Jehova, “sing hipos.” (Panalabiton 3:26) Makabaton ka sing bugana nga mga pagpakamaayo.​—⁠Jeremias 17:7.

[Retrato sa pahina 9]

Gamita ang tion sa espirituwal nga mga hilikuton

[Mga retrato sa pahina 10]

Tun-i nga magkinot, kag indi magpili kon nagapangita sing trabaho