“Sila nga Nagakadto sa Dagat sa mga Barko”

NAGATINDOG sa atubang sang pantalan sang Gloucester, Massachusetts, E.⁠U.⁠A., amo ang bronse nga estatwa sang isa ka timonel, nga determinado nga nagatimon sang iya barko sa isa ka unos. Ang estatwa nagapadungog sa linibo ka mangingisda sa Gloucester nga nahibaluan nga napatay sa dagat. Sa tiilan sang estatwa kag sa plake nga nagaatubang sa sini mabasa ang mga pinamulong sang Salmo 107:​23, 24: “Sila nga nagakadto sa dagat sa mga barko, nga nagapatikang sa malapad nga mga tubig, Sila ang mga nakakita sang mga binuhatan ni Jehova, kag sang iya makatilingala nga mga binuhatan sa kadadalman.”

Makatalagam gid ang pagpangisda sa dagaya sa isda nga Atlantiko. Sa sulod sang mga tinuig, tubtob sa 5,368 ka lalaki nga taga-Gloucester, nga sa karon may populasyon nga mga 30,000, ang nahibaluan nga napatay sa dagat samtang nagapangisda. Suno sa plake: “Ang pila gindalasa sang nagabagusbos nga hangin kag dalagku nga mga balod nga dala sang unos nga halin sa aminhan-sidlangan. Ang pila naman napatay nga nagaisahanon sa isa ka gamay nga bangka sang wala na sila nakabalik sa schooner ukon de-layag nga sakayan sa pangisda nga nagdala sa ila sa palangisdaan. Ang iban nga sakayan ginwasdak sang unos kag nalunod. Ang iban pa gid nabungguan sang bapor.”

Ang monumento isa ka masubo nga pamatuod sa mga pagpangabudlay kag mga katalagman nga gin-atubang sang mga mangingisda sa sulod sang madamong siglo. Handurawa lamang ang mga luha sang kasubo nga ginpatulo sang mga nadulaan sing mga bana, mga amay, mga utod nga lalaki, kag mga anak nga lalaki. Apang, wala ginakalimtan ni Jehova nga Dios ang mga balo, mga ilo, ukon ang mga napatay sa dagat. Ginpatuhuyan ni apostol Juan ining palaabuton nga hitabo: “Ginhatag sang dagat ang mga patay nga yara sa iya, kag ginhatag sang kamatayon kag Hades ang mga patay nga yara sa ila.” (Bugna 20:13) Sa pagkamatuod, sa tion sang ila pagkabanhaw, ang mga “nagakadto sa dagat sa mga barko” makakita sang makatilingala nga “mga binuhatan ni Jehova.”