Ginpaambit Nila ang Maayong Balita sa mga Apa

“GINATUDLUAN nila kamo sang espirituwal nga mga butang!” Amo sini ang paglaragway sang direktor sa isa ka puluy-an sang mga tigulang sa Navalcarnero, Madrid sa Espanya, sa mga pagduaw sang mga Saksi ni Jehova sining karon lang. Ngaa nasiling niya ini?

Ang pila ka residente sang sentro sang Rosas del Camino mga apa. Apang, bangod nanikasog ang mga Saksi nga magtuon sing Spanish Sign Language, makakomunikar na sila sa sining mga residente. Gindayaw sang direktor ang mga Saksi bangod sang ila paghinguyang sing tion agod tudluan sing espirituwal nga mga prinsipio ang mga nagakinahanglan sini nga wala sing bayad. Nakita niya ang maayo nga epekto sang pagtudlo sing maayong balita sang Ginharian sa mga residente. Kag ginaapresyar gid sang mga residente​—⁠ilabi na sang mga bulag kag mga apa​—⁠ang mga pagduaw sang mga Saksi.

Si Eulogio, isa sa mga residente nga bulag kag apa, nagatuon na karon sa Biblia sa mga Saksi ni Jehova. Isa ka adlaw samtang nagatuon sila, nagpalapit ang isa ka tigulang nga lalaki kag gindaho sa Saksi ang binalaybay nga ginhimo sang mga residente bilang pasalamat nila sa mga Saksi. Ang binalaybay may tig-ulo nga “Ang Mangin Isa ka Saksi.” Ang bahin sini nagasiling: “May makaalayaw sila kag disiplinado nga kabuhi, kag gikan kay Jehova natigayon nila ang makalilipay nga kaalam. Masunson sila nga nagapamalaybalay bangod nagasalig sila kay Jehova.”

Ini mismo nga pagsalig kay Jehova ang nagpahulag sa madamo nga Saksi sa bug-os nga kalibutan nga magtuon sing sign language sa ila pungsod. Sa sini nga paagi mapaambit nila sa mga apa ang makapalig-on nga mensahe sang paglaum nga masapwan sa Biblia.