Si Jehova Amo ang Aton Manugbantay

“Si Jehova amo ang akon Manugbantay. Wala sing makulang sa akon.”—⁠Salmo 23:1.

1-3. Ngaa indi makapakibot nga ginpaanggid ni David si Jehova sa isa ka manugbantay?

ANO ang isiling mo kon ipalaragway sa imo kon paano ginaatipan ni Jehova ang iya katawhan? Sa ano mo ipaanggid ang iya malum-ok nga pag-atipan sa iya matutom nga mga alagad? Kapin sa 3,000 ka tuig ang nagligad, ang hari nga salmista nga si David nagsulat sing isa ka matahom nga paglaragway kay Jehova, nga naggamit sing isa ka pagpaanggid nga gikan sa trabaho ni David sang pamatan-on pa sia.

² Sang pamatan-on pa si David, isa anay sia ka manugbantay sing mga karnero, gani may ihibalo sia tuhoy sa pag-atipan sa mga karnero. Nakahibalo gid sia nga kon pabay-an lang ang mga karnero, madali sila magtalang kag mahimo kawaton sang mga makawat ukon kaunon sang mabangis nga mga sapat. (1 Samuel 17:34-​36) Kon wala sing maatipanon nga manugbantay, mahimo indi sila makakita sing halalban. Sang magtigulang na sia, walay duhaduha nga may makalilipay nga mga handumanan si David sa madamo nga oras nga ginhinguyang niya sa pagtuytoy, pag-amlig, kag pagpakaon sa mga karnero.

³ Indi makapakibot kon ngaa nadumduman ni David ang trabaho sang manugbantay sang gin-inspirar sia nga ilaragway ang pag-atipan nga ginapakita ni Jehova sa iya katawhan. Ang ika-23 nga Salmo, nga ginsulat ni David, nagsugod sa sining mga pinamulong: “Si Jehova amo ang akon Manugbantay. Wala sing makulang sa akon.” Binagbinagon naton kon ngaa sibu gid ini nga pinamulong. Nian, paagi sa bulig sang Salmo 23, usisaon naton kon sa anong mga paagi nagaulikid si Jehova sa iya mga sumilimba kaangay sang pag-ulikid sang isa ka manugbantay sa iya mga karnero.​​—⁠1 Pedro 2:⁠25.

Isa ka Sibu Gid nga Pagpaanggid

4, 5. Paano ginalaragway sang Biblia ang mga kinaiya sang karnero?

⁴ Madamo sing titulo si Jehova sa Kasulatan, apang ang titulo nga “Manugbantay” amo ang labing malum-ok. (Salmo 80:1) Agod mahangpan sing maayo kon ngaa nagakaigo nga tawgon si Jehova nga Manugbantay, makabulig sa aton kon hibaluon naton ang duha ka butang: una, ang mga kinaiya sang karnero kag ikaduha, ang mga katungdanan kag mga kinaiya sang maayo nga manugbantay.

⁵ Pirme ginapatuhuyan sang Biblia ang mga kinaiya sang karnero, ginalaragway ini subong nagabalos gilayon sa pagpalangga sang manugbantay (2 Samuel 12:3), indi agresibo (Isaias 53:7), kag indi makapangapin sang kaugalingon. (Miqueas 5:8) Ang isa ka manunulat nga nagsagod sing karnero sa madamo nga tinuig nagsiling: “Ang mga karnero indi ‘makaatipan sang ila kaugalingon’ subong sang ginahunahuna sang iban. Nagakinahanglan sila sing mas daku katama nga atension kag maid-id nga pag-atipan  sangsa iban nga sapat.” Agod mabuhi, kinahanglan sining mahuyang nga mga tinuga ang isa ka maatipanon nga manugbantay.​​—⁠Ezequiel 34:5.

6. Paano ginapaathag sang isa ka diksionaryo sang Biblia ang kinaandan nga ginahimo sang isa ka dumaan nga manugbantay sa sulod sang isa ka adlaw?

⁶ Ano ang kinaandan nga ginahimo sang dumaan nga manugbantay sa sulod sang isa ka adlaw? Ang isa ka diksionaryo sang Biblia nagpaathag: “Sa kaagahon, ginatuytuyan niya ang panong halin sa toril, kag nagalakat sia sa ila unahan padulong sa ila halalban. Ginabantayan niya sila diri sa bilog nga adlaw, ginasiguro nga wala sing karnero nga magbulag, kag kon may malingatan sia kag may mapahilayo sa panong, maukod niya ini nga ginapangita kag ginabalik. . . . Sa gab-i ginabalik niya sila sa toril, kag ginaisip sila samtang nagaagi sa ubos sang lambay sa ganhaan agod pat-uron nga wala sing nadula. . . . Sa masami ginabantayan niya ang toril sa kagab-ihon gikan sa pagsalakay sang mabangis nga mga sapat, ukon sang mapahituon nga kawatan.”⁠ *

7. Ngaa ang manugbantay nagakinahanglan kon kaisa magpakita sing labi nga pagpailob kag kalum-ok?

⁷ May mga tion nga ang karnero, ilabi na ang nagabusong kag ang mga hoben, nagakinahanglan sing labi nga pagpailob kag kalum-ok. (Genesis 33:13) Ang isa ka reperensia sa Biblia nagasiling: “Ang pagkabun-ag sang karnero masami nagakatabo sa malayo nga lugar sa kilid sang bukid. Ginabantayan gid sing maayo sang manugbantay ang iloy sa tion sang iya kabudlayan kag ginahakwat ang kordero kag ginadala ini sa toril. Paglipas sang mga pila ka adlaw, tubtob nga makalakat na ini, mahimo ginakungkong niya ini sa iya mga butkon ukon sa pilo sang iya bayo.” (Isaias 40:​10, 11) Maathag gid nga ang isa ka maayo nga manugbantay nagakinahanglan sing kalig-on kag kalum-ok.

8. Anong mga rason sang iya pagsalig kay Jehova ang ginahatag ni David?

⁸ “Si Jehova amo ang akon Manugbantay”​—⁠indi bala nagakaigo ina nga paglaragway sa aton langitnon nga Amay? Samtang ginausisa naton ang Salmo 23, tan-awon naton kon paano ang Dios nagaulikid sa aton paagi sa kalig-on kag kalum-ok sang isa ka manugbantay. Sa bersikulo 1, ginpabutyag ni David ang iya pagsalig nga ihatag sang Dios ang mga kinahanglanon sang Iya mga karnero agod nga “wala sing makulang” sa ila. Sa masunod nga mga bersikulo, ginahatag ni David ang tatlo ka rason sang iya pagsalig: Ginatuytuyan, ginaamligan, kag ginapakaon ni Jehova ang Iya mga karnero. Binagbinagon naton ini sing isaisa.

“Ginatuytuyan Niya Ako”

9. Anong malinong nga danyag ang ginalaragway ni David, kag paano ini masapwan sang mga karnero?

⁹ Una, ginatuytuyan ni Jehova ang iya katawhan. Si David nagsulat: “Sa madabong nga mga halalban ginapahigda niya ako; sa luyo sang tubigon nga mga palahuwayan ginatuytuyan niya ako. Ginapabaskog niya ang akon kalag. Ginatuytuyan niya ako sa mga banas sang pagkamatarong tungod sa iya ngalan.” (Salmo 23:​2, 3) Isa ka panong nga nagahigda sing malinong sa tunga sang kabuganaan​—⁠ginalaragway ni David ang isa ka danyag sang pagkakontento, kaumpawan, kag kalig-unan. Ang Hebreong tinaga nga ginbadbad “halalban” mahimo magkahulugan sing “matahom nga lugar.” Kon pabay-an lamang, ang mga karnero mahimo nga indi makakita sing isa ka makapaumpaw nga lugar diin makahigda sila sing malinong. Dapat sila tuytuyan sang ila manugbantay sa sining “matahom nga lugar.”

10. Paano ginapakita sang Dios nga may pagsalig sia sa aton?

¹⁰ Paano kita karon ginatuytuyan ni Jehova? Ang isa ka paagi amo ang iya halimbawa. Ginalaygayan kita sang iya Pulong nga ‘mangin mga manug-ilog sang Dios.’ (Efeso 5:1) Ginsambit sa konteksto sining mga pinamulong ang kaawa, pagpatawad, kag gugma. (Efeso 4:32; 5:2) Sa pagkamatuod, nagpahamtang gid si Jehova sing pinakamaayo nga halimbawa sa pagpakita sining matahom nga mga kinaiya. Realistiko bala sia sa iya pangabay sa aton nga ilugon sia? Huo. Sa pagkamatuod, ining inspirado nga laygay nagapakita nga may pagsalig sia sa aton. Sa anong paagi? Ginhimo kita sa dagway sang Dios, buot silingon may moral kita nga mga kinaiya kag kapasidad para sa espirituwalidad. (Genesis 1:26) Busa, nakahibalo si Jehova nga walay sapayan sang aton pagkadihimpit, may potensial kita sa pagpalambo sing mga kinaiya nga kaangay sa iya. Hunahuna lamang​—⁠may pagsalig ang aton mahigugmaon nga Dios nga mailog naton sia. Kon sundon naton ang iya halimbawa, tuytuyan niya kita, sa  malaragwayon nga paghambal, sa isa ka matahom nga “palahuwayan.” Sa tunga sining masingki nga kalibutan, ‘magapuyo kita nga may kalig-unan,’ nga nagabatyag sing kalinong sa pagkahibalo nga ginakahamut-an kita sang Dios.​​—⁠Salmo 4:⁠8; 29:11.

11. Sa pagtuytoy sa iya mga karnero, ano ang ginahatagan ni Jehova sing konsiderasyon, kag paano ini ginapabanaag sa iya ginapangabay sa aton?

¹¹ Si Jehova malum-ok kag mapailubon sa iya pagtuytoy sa aton. Ginahatagan sing konsiderasyon sang isa ka manugbantay ang mga limitasyon sang iya mga karnero, amo nga ginatuytuyan niya sila “suno sa kadasigon sang ginasagod nga mga sapat.” (Genesis 33:14) Si Jehova nagatuytoy man “suno sa kadasigon sang” iya mga karnero. Ginahatagan niya sing konsiderasyon ang aton mga ikasarang kag mga kahimtangan. Daw subong bala nga nagapasibu sia sa kadasigon, nga wala nagapangabay sang labi pa sangsa masarangan naton. Ang iya ginapangabay amo nga mangin bug-os-kalag kita. (Colosas 3:23) Apang ano abi kon tigulang ka na kag indi mo na mahimo ang imo anay ginahimo? Ukon ano abi kon may malubha ka nga balatian nga nagasablag sa imo? Sa sini nga mga kahimtangan naton makita ang katahom sang bug-os-kalag nga pag-alagad. Wala sing duha ka kalag ang magkapareho. Ang pag-alagad sing bug-os-kalag nagakahulugan nga ginagamit mo sing bug-os ang imo kusog sa pag-alagad sa Dios suno sa imo masarangan. Bisan pa maghinay kita bangod sang balatian, ginapabaloran gihapon ni Jehova ang aton bug-os tagipusuon nga pagsimba.​​—⁠Marcos 12:​29, 30.

12. Anong halimbawa gikan sa Mosaikong Kasuguan ang nagailustrar nga si Jehova nagatuytoy “suno sa kadasigon sang” iya mga karnero?

¹² Agod mailustrar kon paano nagatuytoy si Jehova “suno sa kadasigon sang” iya mga karnero, binagbinaga ang ginasiling sang Mosaikong Kasuguan tuhoy sa pila ka halad tungod sa paglapas. Luyag ni Jehova ang maayo nga mga halad nga ginpahulag sang mapinasalamaton nga tagipusuon. Sa amo man nga tion, ang ginapatuman nga halad ginaklase depende sa ikasarang sang manughalad. Ang Kasuguan nagsiling: “Kon indi sia makasarang sing isa ka karnero, nian dapat sia magdala . . . sing duha ka tukmo ukon duha ka kuyabog nga salampati.” Kag ano abi kon indi sia makasarang sing bisan duha ka salampati? Nian puede sia makadala sing pila ka “harina nga mapino.” (Levitico 5:​7, 11) Ginapakita sini nga wala nagapangayo ang Dios sing sobra sa mahatag sang manughalad. Sanglit ang Dios wala nagabag-o, makalulugpay mahibaluan nga wala gid sia nagapangayo sing sobra sa mahatag naton; sa baylo, nahamuot sia nga batunon ang bisan ano nga masarangan naton. (Malaquias 3:6) Sa pagkamatuod, makalilipay gid nga matuytuyan sining mahinangpanon nga Manugbantay!

“Wala Ako sing Nahadlukan nga Malaut, kay Ikaw Kaupod Nakon”

13. Sa Salmo 23:​4, paano nagpamulong si David sing mas suod, kag ngaa indi ini katingalahan?

¹³ Ginahatag ni David ang ikaduha nga rason sang iya pagsalig: Ginaamligan ni Jehova ang iya mga karnero. Aton mabasa: “Bisan pa nagalakat ako sa nalupyakan sang pitipit nga kadulom, wala ako sing nahadlukan nga malaut, kay ikaw kaupod nakon; ang imo sungkod kag ang imo baston amo ang nagalipay sa akon.” (Salmo 23:4) Nagpamulong karon si David sing mas suod, nga nagagamit sing pronombre nga “ikaw.” Indi ini katingalahan, kay nagasugid si David tuhoy sa kon paano sia ginbuligan sang Dios nga magbatas sing mga kalisdanan. Madamo sing naagihan si David nga madulom nga mga nalupyakan​—⁠mga tion nga ang iya mismo kaugalingon nga kabuhi nabutang sa katalagman. Apang wala niya gintugutan nga madaug sia sang  kahadlok, kay nabatyagan niya nga ang Dios​—⁠upod ang Iya “sungkod” kag “baston”​—⁠kaupod niya. Ang pagkahibalo sining pangamlig naglugpay kay David kag walay duhaduha nga nagpasuod pa gid sa iya kay Jehova.⁠ *

14. Anong pasalig ang ginahatag sang Biblia may kaangtanan sa pangamlig ni Jehova, apang ano ang buot silingon sini?

¹⁴ Paano karon ginaamligan ni Jehova ang iya mga karnero? Ang Biblia nagapasalig sa aton nga wala sing manugpamatok​—⁠demonyo man ukon tawo​—⁠ang magamadinalag-on sa pagdula sang iya mga karnero sa duta. Indi gid ina pagtugutan ni Jehova. (Isaias 54:17; 2 Pedro 2:9) Apang, wala ini nagakahulugan nga tamingan kita sang aton Manugbantay gikan sa tanan nga kalamidad. Nagaeksperiensia kita sing mga pagtilaw nga kinaandan nga nagaabot sa mga tawo, kag nagaatubang kita sing mga pagpamatok nga nagaabot sa tanan nga matuod nga mga Cristiano. (2 Timoteo 3:​12; Santiago 1:2) May mga tion nga makasiling kita nga daw “nagalakat [kita] sa nalupyakan sang pitipit nga kadulom.” Halimbawa, mahimo kita mabutang sa bibi sang kamatayon subong resulta sang paghingabot ukon sang mga problema sa panglawas. Ukon ayhan ang aton pinalangga mabutang sa bibi sang kamatayon ukon mapatay pa gani. Sa daw pinakadulom nga tion sang aton kabuhi, ang aton Manugbantay kaupod naton, kag tipigan niya kita. Paano?

15, 16. (a) Sa anong mga paagi nga ginabuligan kita ni Jehova nga malandas ang mga balagbag nga mahimo naton maatubang? (b) Isaysay ang isa ka eksperiensia nga nagapakita kon paano kita ginabuligan ni Jehova sa tion sang pagtilaw.

¹⁵ Wala nagpasalig si Jehova sing milagruso nga pagpasilabot.⁠ * Apang amo ini ang masigurado naton: Buligan kita ni Jehova nga malandas ang bisan ano nga balagbag nga maatubang naton. Sarang niya kita hatagan sing kaalam agod malandas ang “nanuhaytuhay nga mga pagtilaw.” (Santiago 1:2⁠-⁠5) Ginagamit sang manugbantay ang iya sungkod ukon baston indi lamang sa pagtabog sa mga manunukob kundi agod suntukon sing mahinay ang mga karnero sa husto nga direksion. Mahimo man kita “suntukon [ni Jehova] sing mahinay,” ayhan paagi sa isa ka masigkatumuluo, agod maaplikar naton ang pasad-sa-Biblia nga laygay nga makabulig sing daku sa aton kahimtangan. Dugang pa, sarang kita hatagan ni Jehova sing kusog agod makabatas. (Filipos 4:13) Paagi sa iya balaan nga espiritu, masangkapan niya kita sing “gahom nga labaw sa kinaandan.” (2 Corinto 4:7) Mabuligan kita sang espiritu sang Dios nga mabatas ang bisan ano nga pagtilaw nga mahimo ihatag ni Satanas sa aton. (1 Corinto 10:13) Indi bala makalulugpay mahibaluan nga handa pirme si Jehova sa pagbulig sa aton?

¹⁶ Huo, bisan ano pa nga madulom nga nalupyakan ang aton maagihan, indi kita magalakat sa sini sing isahanon. Kaupod naton ang aton Manugbantay nga nagabulig sa aton sa mga paagi nga indi naton anay mahantop sa umpisa. Binagbinaga ang eksperiensia sang isa ka Cristianong gulang nga nasayasat nga may malubha nga tumor sa utok. “Ginaako ko nga sa umpisa nagapalibog ako nga basi naakig si Jehova sa akon ukon basi wala na niya ako ginahigugma. Apang determinado ako nga indi pagbiyaan si Jehova. Sa baylo, ginpabutyag ko ang akon mga kabalaka sa iya. Nian ginbuligan ako ni Jehova, masami nga ginapalig-on ako paagi sa mga kauturan. Madamo sa ila ang nag-istorya sang ila kaugalingon nga mga eksperiensia sa pag-atubang sa malubha nga balatian. Ang ila balanse nga mga komento nagpahanumdom sa akon nga indi man gid gali pinasahi ang akon kahimtangan. Paagi sa praktikal nga mga bulig, lakip na ang pila ka makatalandog nga pagpakita sing kaayo, napat-od ko nga si Jehova wala naakig sa akon. Walay sapayan sini, ginabatas ko sa gihapon ang akon balatian, kag wala ako makahibalo kon ano ang mangin resulta sini. Apang kumbinsido ako nga kaupod ko si Jehova kag nga padayon niya ako nga buligan sa atubangan sining pagtilaw.”

“Naghanda Ka sa Atubangan Ko sing Isa ka Lamesa”

17. Paano ginalaragway ni David si Jehova sa Salmo 23:​5, kag ngaa wala ini nagasumpakil sa ilustrasyon sang isa ka manugbantay?

¹⁷ Ginsitar ni David ang ikatlo nga rason sang iya pagsalig sa iya Manugbantay: Ginapakaon ni  Jehova ang iya mga karnero, kag nagapakaon sia sing bugana. Si David nagsulat: “Naghanda ka sa atubangan ko sing isa ka lamesa sa atubang sang mga nagadumot sa akon. Ginhisuan mo sing lana ang akon ulo; ang akon kopa puno kaayo.” (Salmo 23:5) Sa sining bersikulo, ginlaragway ni David ang iya Manugbantay subong isa ka maalwan nga manug-amuma nga nagaaman sing bugana nga pagkaon kag ilimnon. Ang duha ka ilustrasyon​—⁠isa ka maatipanon nga manugbantay kag isa ka maalwan nga manug-amuma​—⁠wala nagasumpakilay. Sa pagkamatuod, dapat nakahibalo gid ang isa ka maayong manugbantay kon diin mangita sing madabong nga halalban kag bugana nga tubig nga ilimnon agod “wala sing makulang” sa iya mga panong.​​—⁠Salmo 23:​1, 2.

18. Ano ang nagapakita nga si Jehova isa ka maalwan nga manug-amuma?

¹⁸ Ang aton bala Manugbantay isa man ka maalwan nga manug-amuma? Huo! Hunahuna lamang ang kalidad, kadamuon, kag pagkananuhaytuhay sang espirituwal nga pagkaon nga ginabaton naton. Paagi sa matutom kag mainandamon nga ulipon nga klase, ginaamanan kita ni Jehova sing mabuligon nga mga publikasyon kag impormatibo nga mga programa sa mga miting, asambleya, kag mga kombension​—⁠ang tanan nagapuno sang aton espirituwal nga mga kinahanglanon. (Mateo 24:45-​47) Sa pagkamatuod, indi gid kita makulangan sing pagkaon. “Ang matutom kag mainandamon nga ulipon” nagbalhag sing minilyon ka Biblia kag mga bulig sa pagtuon sa Biblia, kag ining mga publikasyon matigayon na karon sa 413 ka lenguahe. Ang espirituwal nga pagkaon nga gin-aman ni Jehova nanuhaytuhay gid​—⁠gikan sa “gatas,” sadsaran nga mga panudlo sang Biblia, pakadto sa “pagkaon nga matig-a,” mas madalom nga espirituwal nga mga impormasyon. (Hebreo 5:​11-​14) Subong resulta, kon nagaatubang kita sing mga problema ukon mga desisyon, sa masami masapwan gid naton ang aton kinahanglanon. Ano na lang ayhan kita kon wala ining espirituwal nga mga pagkaon? Sa pagkamatuod, ang aton Manugbantay maalwan gid katama nga manug-aman!​​—⁠Isaias 25:⁠6; 65:13.

“Magapuyo Ako sa Balay ni Jehova”

19, 20. (a) Sa Salmo 23:​6, anong pagsalig ang ginpabutyag ni David, kag paano naton matigayon ining pagsalig? (b) Ano ang pagabinagbinagon sa masunod nga artikulo?

¹⁹ Pagkatapos mapamalandungan ang mga kinaiya sang iya Manugbantay kag Manug-aman, si David naghinakop: “Sa pagkamatuod ang pagkaayo kag ang mahigugmaon nga kaayo magasunod sa akon sa tanan nga adlaw sang akon kabuhi; kag magapuyo ako sa balay ni Jehova sa kalawigon sang mga adlaw.” (Salmo 23:6) Nagpamulong si David gikan sa tagipusuon nga puno sing pagpasalamat kag pagtuo​—⁠pagpasalamat sa pagdumdom sang nagligad kag pagtuo sa pagtulok sa palaabuton. Si David nga isa anay ka manugbantay malig-on, bangod nakahibalo sia nga tubtob nagapabilin sia nga suod sa iya langitnon nga Manugbantay, nga subong bala nagapuyo sa Iya balay, pirme sia atipanon ni Jehova sing mahigugmaon.

²⁰ Mapinasalamaton gid kita sa matahom nga mga tinaga nga narekord sa ika-23 nga Salmo! Nakita gid ni David ang sibu katama nga paglaragway kon paano ni Jehova ginatuytuyan, ginaamligan, kag ginapakaon ang iya mga karnero. Ang mapinalanggaon nga mga pulong ni David gintipigan agod mahatagan kita sing pagsalig nga makabig man naton si Jehova subong aton Manugbantay. Huo, tubtob magpabilin kita nga suod kay Jehova, atipanon niya kita subong sang pag-atipan sang isa ka mahigugmaon nga Manugbantay “sa kalawigon sang mga adlaw,” bisan sing tubtob sa walay katubtuban. Apang, subong iya mga karnero, may salabton kita nga maglakat upod sa aton dakung Manugbantay nga si Jehova. Kon ano ang nadalahig sa sini pagabinagbinagon sa masunod nga artikulo.

[Mga nota]

Madumduman Mo Bala?

• Ngaa nagakaigo nga ipaanggid ni David si Jehova sa isa ka manugbantay?

• Paano kita ginatuytuyan ni Jehova nga may paghangop?

• Sa anong mga paagi ginabuligan kita ni Jehova nga mabatas ang mga pagtilaw?

• Ano ang nagapakita nga si Jehova isa ka maalwan nga manug-amuma?

[Mga Pamangkot sa Pagtinuon]

[Retrato sa pahina 18]

Kaangay sang isa ka manugbantay sa Israel, ginatuytuyan ni Jehova ang Iya mga karnero