Maglakat Upod sa Dios, kag Aniha kon Ano ang Maayo
Maglakat Upod sa Dios, kag Aniha Kon Ano ang Maayo
“Nagasab-ug sila sang hangin, kag nagaani sila sang buhawi.”—OSEAS 8:7.
1. Paano kita makalakat upod kay Jehova?
ANG paglakbay sa isa ka delikado nga rehiyon mas hilway sa katalagman kon may isa ka eksperiensiado nga giya nga magtuytoy sa imo. Mas maalamon nga maglakat upod sa sinang giya sa baylo nga magkinaugalingon. Sa pila ka paagi, daw amo sini ang aton kahimtangan karon. Daw subong bala nga nagtanyag si Jehova nga giyahan kita sa pagtabok sa malapad nga desyerto sang malaut nga kalibutan karon. Maalamon nga maglakat kita upod sa iya sa baylo nga tinguhaan nga giyahan ang aton kaugalingon nga mga tikang. Paano kita makalakat upod sa Dios? Paagi sa pagsunod sa panuytoy nga gin-aman niya sa iya Pulong.
2. Ano ang binagbinagon sa sining artikulo?
2 Ginbinagbinag sang nauna nga artikulo ang simbuliko nga drama nga masapwan sa Oseas kapitulo 1 tubtob 5. Subong sang nakita naton, inang drama may leksion nga makabulig sa aton sa paglakat upod sa Dios. Binagbinagon naton karon ang pila ka talalupangdon nga punto sa kapitulo 6 tubtob 9. Makabulig kon magsugod kita paagi sa isa ka sumaryo sining apat ka kapitulo.
Isa ka Malip-ot nga Sumaryo
3. Isaysay sing malip-ot ang kaundan sang Oseas kapitulo 6 tubtob 9.
3 Ginpadala ni Jehova si Oseas agod magpanagna ilabi na sa naaminhan nga napulo ka tribo nga ginharian sang Israel. Yadto nga pungsod, nga kilala man subong Efraim nga sunod sa ngalan sang nagapanguna nga tribo sini, nagsikway sa Dios. Ginapakita sang Oseas kapitulo 6 tubtob 9 nga nangin di-mainunungon ang katawhan paagi sa paglapas sa katipan ni Jehova kag paagi sa paghimo sing kalautan. (Oseas 6:7) Nagsalig sila sa kalibutanon nga mga alyansa sa baylo nga magbalik kay Jehova. Bangod padayon sila nga nagsab-ug sang kon ano ang malain, magaani sila sang kon ano ang malain. Sa iban nga paghambal, agumon nila ang malain nga paghukom. Apang ang tagna ni Oseas nagaunod man sing isa ka makapalig-on nga mensahe. Ginapasalig ang katawhan nga sarang sila makabalik kay Jehova kag pakitaan sing kaluoy kon magpakita sila sing tinagipusuon nga paghinulsol.
4. Anong praktikal nga mga leksion gikan sa tagna ni Oseas ang aton binagbinagon?
4 Gikan sa sining apat ka kapitulo sang tagna ni Oseas, makakuha kita sing dugang pa nga panuytoy nga makabulig sa aton sa paglakat upod sa Dios. Binagbinagon naton ang apat ka praktikal nga mga leksion: (1) Ang matuod nga paghinulsol makita paagi sa buhat, indi sa mga pulong lamang; (2) indi makapahamuot sa Dios ang basta mga halad lamang; (3) nasakitan si Jehova kon ang iya mga sumilimba magbiya sa iya; kag (4) agod mag-ani sang kon ano ang maayo, dapat kita magsab-ug sang kon ano ang maayo.
Kon Paano Makita ang Matuod nga Paghinulsol
5. Ihatag ang talalupangdon nga mga aspekto sang kon ano ang ginsiling sa Oseas 6:1-3.
5 Ang tagna ni Oseas madamo sing ginatudlo sa aton tuhoy sa paghinulsol kag kaluoy. Sa Oseas 6:1-3, mabasa naton: “Kari, kamo nga katawhan, kag magbalik kita kay Jehova, kay sia mismo ang nagkusnit sa aton apang ayuhon niya kita. Padayon sia nga nagasalakay, apang bugkusan niya kita. Buhion niya kita pagkatapos sang duha ka adlaw. Sa ikatlo nga adlaw pabangunon niya kita, kag magakabuhi kita sa atubangan niya. Kag makilala naton, kag padayon naton nga makilala si Jehova. Kaangay sang pamanagbanag, ang iya paggua napahamtang sing malig-on. Kag magakari sia sa aton kaangay sang madamol nga ulan; kaangay sang ulan sa tigpamulak nga nagabunyag sang duta.”
6-8. Ano ang sayop sa paghinulsol sang Israel?
6 Sin-o ang nagpamulong sining mga bersikulo? Oseas 6:4) Daw ano nga pamatuod sang manubo nga kahimtangan sa espirituwal sang katawhan sang Dios! Daw halos nadula na ang mahigugmaon nga kaayo, ukon mainunungon nga gugma—kaangay sang tun-og sa kaagahon nga naalimunaw dayon pagbutlak sang adlaw. Bisan pa nga ang katawhan nagpakunokuno nga naghinulsol, wala sing rason si Jehova nga magkaluoy. Ano ang problema?
Ang pila nagsiling nga ginpamulong ini sang di-matutom nga mga Israelinhon kag nagasiling pa nga ang di-matinumanon nga katawhan nagapakunokuno nga nagahinulsol kag nagahimulos sang kaluoy sang Dios. Apang, ang iban nagasiling nga ang nagahambal amo si manalagna Oseas, nga nagapakitluoy sa katawhan nga magbalik kay Jehova. Walay sapayan kon sin-o man ang nagpamulong, ang importante nga pamangkot amo, Nagbalik bala kay Jehova ang kalabanan nga katawhan sang napulo ka tribo nga ginharian sang Israel, nga nagapakita sing matuod nga paghinulsol? Ang sabat, wala. Si Jehova nagsiling paagi kay Oseas: “Ano ang himuon ko sa imo, O Efraim? Ano ang himuon ko sa imo, O Juda, bangod ang mahigugmaon nga kaayo ninyo nga katawhan kaangay sang mga panganod sa kaagahon kag kaangay sang tun-og nga temprano pa naalimunaw?” (7 Ang paghinulsol sang Israel indi gid tinagipusuon. Ang Oseas 7:14 nagsiling tuhoy sa di-kahamuot ni Jehova sa iya katawhan: “Wala sila magpangayo sing bulig sa akon upod ang ila tagipusuon, bisan pa nga nagatalangison sila sa ila mga higdaan.” Ang bersikulo 16 nagdugang: “Nagpadayon sila sa pagbalik, indi sa bisan ano nga mataas”—ukon, subong sang ginasiling sa footnote sang Reference Bible, “indi sa ginpataas nga porma sang pagsimba.” Ang mga tawo indi handa sa pagbalik sa ginpataas nga pagsimba kay Jehova paagi sa paghimo sang kinahanglanon nga mga pagbag-o agod ipasag-uli ang ila kaangtanan sa iya. Sa pagkamatuod, indi gid nila luyag maglakat upod sa Dios.
8 May isa pa ka problema sa paghinulsol sang Israel. Ang katawhan nagapakasala gihapon—ang matuod, madamo nga sahi sang sala, lakip ang pagpanunto, pagpatay, pagpangawat, idolatriya, kag di-maalamon nga pagpakig-alyansa sa iban nga pungsod. Sa Oseas 7:4, ginpaanggid ang mga tawo sa isa ka “hurnuhan,” ukon sa pugon sang manugtinapay, maathag nga bangod sang sayop nga mga kailigbon nga nagadabdab sa sulod nila. Bangod sining manubo nga kahimtangan sa espirituwal, nagakabagay bala sila kaluy-an? Indi gid! Si Oseas nagsiling sa rebelyuso nga mga tawo nga si Jehova “magadumdom sang ila mga sayop” kag “magatalupangod sang ila mga sala.” (Oseas 9:9) Indi sila pagkaluy-an!
9. Ano ang ginatudlo sa aton sang ginsiling ni Oseas tuhoy sa paghinulsol kag kaluoy?
9 Suno sa ginsiling ni Oseas, ano ang matun-an naton tuhoy sa paghinulsol kag kaluoy? Ang nagapaandam nga halimbawa sang walay pagtuo nga mga Israelinhon nagatudlo sa aton nga agod makabenepisyo sa kaluoy ni Jehova, dapat naton ipakita ang tinagipusuon nga paghinulsol. Paano makita ini nga sahi sang paghinulsol? Indi matunto si Jehova paagi lamang sa mga luha ukon mga tinaga. Ang matuod nga paghinulsol makita paagi sa mga
buhat. Agod kaluuyan, dapat biyaan sing bug-os sang nakasala ang iya malaut nga dalanon kag ipahisuno ang iya kabuhi sa mataas nga mga talaksan sang ginpataas nga pagsimba kay Jehova.Wala Ginakahamut-an sang Dios ang Basta mga Halad Lamang
10, 11. Subong gin-ilustrar sa kaso sang Israel, ngaa indi makapahamuot kay Jehova ang basta mga halad lamang?
10 Binagbinagon naton karon ang ikaduha nga leksion nga makabulig sa aton agod maglakat upod kay Jehova. Ini amo: Wala ginakahamut-an sang Dios ang basta mga halad lamang. Ang Oseas 6:6 nagasiling: “Nahamuot ako [si Jehova] sa mahigugmaon nga kaayo, kag indi sa halad; kag sa ihibalo sang Dios sa baylo sang bug-os nga mga halad-nga-sinunog.” Talupangda nga nalipay si Jehova sa mahigugmaon nga kaayo, ukon mainunungon nga gugma—isa ka kinaiya sang tagipusuon—kag sa ihibalo tuhoy sa iya. Apang mahimo magpalibog ka: ‘Ngaa ining bersikulo nagasiling nga si Jehova wala nahamuot sa “halad” kag sa “mga halad nga sinunog”? Indi bala nga ginpatuman ini sang Mosaikong Kasuguan?’
11 Ang mga halad kag mga dulot ginapatuman sang Kasuguan, apang may daku gid nga problema sa mga Israelinhon sang panahon ni Oseas. Mahimo nga may mga Israelinhon nga nagahalad agod magpakitakita sang ila debosyon. Sa amo man nga tion, padayon sila nga nagapakasala. Paagi sa ila pagkamakasasala ginpakita nila nga ang ila tagipusuon wala sing mainunungon nga gugma. Ginpakita man nila nga ginsikway nila ang ihibalo sang Dios, kay maathag gid nga wala sila nagakabuhi nahisanto sa sini. Kon sayop ang motibo sang mga tawo kag indi husto ang paagi sang ila pagkabuhi, ano ang pulos sang ila mga halad? Ang matuod, makangilil-ad ang ila mga halad sa panan-aw ni Jehova nga Dios.
12. Ano nga paandam ang ginaunod sang Oseas 6:6 para sa mga tawo nga nagakabuhi karon?
12 Ang mga pinamulong ni Oseas isa ka paandam sa madamo nga nagakadto sa simbahan karon. Nagahalad sila sa Dios sa porma sang relihioso nga mga buhat. Apang ang ila pagsimba may diutay lamang, ukon wala gid gani sing matuod nga epekto sa ila matag-adlaw nga paggawi. Kahamut-an bala sang Dios ini nga mga tawo kon wala sila ginapahulag sang ila tagipusuon nga magkuha sing sibu nga ihibalo tuhoy sa iya kag iaplikar ina nga ihibalo paagi sa pagsikway sang makasasala nga mga buhat? Wala dapat sing maghunahuna nga ang basta relihioso nga mga buhat lamang makapahamuot na sa Dios. Wala nalipay si Jehova sa mga tawo nga nagatinguha sa pagtigayon sang iya kahamuot paagi sa pormalismo nga pagsimba sa baylo nga magkabuhi nahisuno sa iya Pulong.—2 Timoteo 3:5.
13. Ano nga sahi sang mga halad ang ginahatag naton karon, apang ano dapat ang dumdumon naton tuhoy sa balor sini?
13 Subong matuod nga mga Cristiano, dapat naton dumdumon nga wala nagapahamuot sa Dios ang basta mga halad lamang. Matuod nga wala na kita karon nagahalad kay Jehova sing mga sapat. Walay sapayan, ‘nagahalad kita sa Dios sing halad sang pagdayaw, nga amo, ang bunga sang mga bibig nga nagapahayag sing dayag sang iya ngalan.’ (Hebreo 13:15) Importante nga indi kita mangin kaangay sang makasasala nga mga Israelinhon sang adlaw ni Oseas, nga maghunahuna nga sarang naton matabunan ang aton mga sala paagi sa sining espirituwal nga mga halad sa Dios. Binagbinaga ang halimbawa sang isa ka pamatan-on nga naghimo sing seksuwal nga imoralidad sing patago. Nag-ako sia sang ulihi: “Gindugangan ko ang akon paggua sa latagon, naghunahuna nga sarang ini makatabon sang akon sala.” Kaanggid ini sa ginhimo sang batinggilan nga mga Israelinhon. Apang, ang aton halad sang pagdayaw kalahamut-an lamang kay Jehova kon ginaupdan ini sing husto nga motibo sang tagipusuon kag diosnon nga paggawi.
Nasakitan si Jehova Kon ang Iya mga Sumilimba Magbiya sa Iya
14. Ano ang ginapakita sang tagna ni Oseas tuhoy sa balatyagon sang Dios?
14 Ang ikatlo nga leksion nga matun-an naton gikan sa Oseas kapitulo 6 tubtob 9 nahanungod sa kon ano ang ginabatyag ni Jehova kon ang iya mga sumilimba magbiya sa iya. Ang Dios may mabaskog kag malum-ok nga balatyagon. May mapinalanggaon sia nga kalipay kag kaawa sa mga nagahinulsol sang ila mga sala. Apang, kon ang iya katawhan indi mangin mahinulsulon, si Jehova nagahimo sing determinado nga aksion. Bangod nagaulikid gid ang Dios sa aton kaayuhan, nagakalipay sia kon matutom kita nga nagalakat upod sa iya. “Si Jehova nahamuot sa iya katawhan,” siling sang Salmo 149:4. Apang, ano ang ginabatyag ni Jehova kon ang iya mga alagad mangin di-matutom?
15. Suno sa Oseas 6:7, ano anay ang paggawi sang pila ka Israelinhon?
15 Nagapatuhoy sa di-matutom nga mga Israelinhon, si Jehova nagasiling: “Sila, kaangay sang dutan-on nga tawo, naglalis sa katipan. Didto sila nagluib sa akon.” (Oseas 6:7) Ang Hebreong tinaga nga ginbadbad nga ‘magluib’ nagakahulugan man sing “makig-angot sing di-bunayag, (makig-angot) sing di-matutom.” Sa Malaquias 2:10-16, ang amo man nga Hebreong tinaga gingamit sa paglaragway sa di-mainunungon nga buhat sadtong mga Israelinhon nga nangin di-matutom sa ila tiayon. Tuhoy sa paggamit sining termino sa Oseas 6:7, ang isa ka reperensia nagasiling nga isa ini ka “pagpaanggid sa isa ka pag-asawahay agod ipakita ang pagkasuod sang kaangtanan . . . Ang problema personal, diin ang gugma ginguba.”
16, 17. (a) Paano nagpanghikot ang Israel may kaangtanan sa katipan sang Dios sa sinang pungsod? (b) Ano ang dapat naton dumdumon tuhoy sa aton paggawi?
16 Sing malaragwayon, ginpatuhuyan ni Jehova ang Israel subong iya asawa bangod sang iya katipan sa pungsod. Busa sang hungod nga ginlapas sang iya katawhan ang mga kasugtanan sa katipan, daw subong nga nagpakighilahi sila. Ang Dios kaangay sang isa ka mainunungon nga bana, apang ginbayaan sia sang iya katawhan!
17 Kamusta naman kita? Nagaulikid ang Dios kon bala magalakat kita upod sa iya ukon indi. Dapat dumdumon gid naton nga “ang Dios gugma” kag nga ang aton mga buhat nagaapektar sa iya. 1 Juan 4:16) Kon magpadayon kita sa sayop nga dalanon, ginasakit naton ang balatyagon ni Jehova kag indi gid naton sia mapahamut-an. Ang pagdumdom sini makapugong gid sa aton agod indi kita magpadala sa pagsulay.
(Kon Paano Kita Makaani sang Kon Ano ang Maayo
18, 19. Ano nga prinsipio ang aton masapwan sa Oseas 8:7, kag paano ining prinsipio nangin matuod sa mga Israelinhon?
18 Binagbinagon naton ang ikap-at nga leksion gikan sa tagna ni Oseas—kon paano kita makaani sang kon ano ang maayo. Tuhoy sa mga Israelinhon kag sa kabuangan kag pagkawalay pulos sang ila walay pagtuo nga dalanon, si Oseas nagsulat: “Nagasab-ug sila sang hangin, kag nagaani sila sang buhawi.” (Oseas 8:7) Makita naton diri ang isa ka prinsipio nga dapat naton dumdumon pirme: May direkta nga kaangtanan ang aton ginahimo karon sa kon ano ang matabo sa aton sa ulihi. Paano ini nga prinsipio nangin matuod sa kaso sang di-matutom nga mga Israelinhon?
19 Paagi sa padayon nga pagpakasala, yadtong mga Israelinhon nagsab-ug sang kon ano ang malain. Mapalagyuhan bala nila ang mapait nga mga resulta sini? Indi gid. Ang Oseas 8:13 nagasiling: “Dumdumon niya [ni Jehova] karon ang ila mga sayop kag magahukom sang ila mga sala.” Kag sa Oseas 9:17, aton mabasa: “Sikwayon sila sang akon Dios, kay wala sila magpamati sa iya, kag mangin mga laaslaas sila sa tunga sang mga pungsod.” Sukton ni Jehova ang mga Israelinhon sa ila mga sala. Bangod nagsab-ug sila sang kon ano ang malain, magaani sila sang kon ano ang malain. Ang paghukom sang Dios batok sa ila natabo sang 740 B.C.E., sang ginpukan sang mga Asirianhon ang napulo ka tribo nga ginharian sang Israel kag ginbihag ang mga pumuluyo sini.
20. Ano ang ginatudlo sa aton sang eksperiensia sang mga Israelinhon?
20 Ang natabo sa sadtong mga Israelinhon nagatudlo sa aton sang sadsaran nga kamatuoran: Anihon naton ang aton ginasab-ug. Ang Pulong sang Dios nagapaandam sa aton: “Indi kamo magtalang: Ang Dios indi tiliawtiawan. Kay bisan ano ang ginasab-ug sang tawo, ini man ang iya anihon.” (Galacia 6:7) Kon magsab-ug kita sang kon ano ang malain, magaani kita sang kon ano ang malain. Halimbawa, ang mga nagakabuhi sing imoral magaani sing mapait nga mga resulta. Masubo gid ang madangatan sang isa ka di-mahinulsulon nga makasasala.
21. Paano kita makaani sang kon ano ang maayo?
21 Busa, paano kita nian makaani sang kon ano ang maayo? Ini nga pamangkot masabat paagi sa isa ka simple nga ilustrasyon. Kon luyag sang mangunguma nga makapatubas sing mais, magatanom bala sia sing humay? Sa pagkamatuod indi! Dapat sia magtanom sang luyag niya anihon. Sing kaanggid, kon luyag naton mag-ani sang kon ano ang maayo, dapat magsab-ug kita sang kon ano ang maayo. Luyag mo bala magpadayon sa pag-ani sang kon ano ang maayo—isa ka makaalayaw nga kabuhi karon upod ang paglaum nga magkabuhi sing walay katapusan sa bag-ong kalibutan sang Dios? Kon amo, dapat magpadayon ka sa pagsab-ug sang kon ano ang maayo paagi sa paglakat upod sa Dios kag pagkabuhi nahisanto sa iya matarong nga mga talaksan.
22. Ano nga mga leksion ang aton natun-an gikan sa Oseas kapitulo 6 tubtob 9?
22 Sa Oseas kapitulo 6 tubtob 9, natun-an naton ang apat ka leksion nga makabulig sa aton sa paglakat upod sa Dios: (1) Ang matuod nga paghinulsol ginapakita paagi sa buhat; (2) wala ginakahamut-an sang Dios ang basta mga halad lamang; (3) nasakitan si Jehova kon ang iya mga sumilimba magbiya sa iya; kag (4) agod mag-ani sang kon ano ang maayo, dapat kita magsab-ug sang kon ano ang maayo. Paano ang katapusan nga lima ka kapitulo sining tulun-an sa Biblia makabulig sa aton sa paglakat upod sa Dios?
Paano Mo Sabton?
• Paano makita ang matuod nga paghinulsol?
• Ngaa ang basta mga halad lamang indi makapahamuot sa aton langitnon nga Amay?
• Ano ang ginabatyag sang Dios kon ang iya mga sumilimba magbiya sa iya?
• Ano dapat ang isab-ug naton agod mag-ani kita sang kon ano ang maayo?
[Mga Pamangkot sa Pagtinuon]
[Retrato sa pahina 23]
Kaangay sang mga panganod sa kaagahon ang mainunungon nga gugma sang Israel naalimunaw
[Retrato sa pahina 23]
Ang malaut nga kailigbon sang Israel nagdabdab kaangay sang hurnuhan
[Retrato sa pahina 24]
Ngaa ginsikway ni Jehova ang mga halad sang iya katawhan?
[Retrato sa pahina 25]
Agod makaani sang kon ano ang maayo, dapat kita magsab-ug sang kon ano ang maayo