Armagedon—Isa Bala ka Malaglagon nga Katapusan?

ARMAGEDON! Nagapahunahuna bala ini nga tinaga sang lapnag nga kalaglagan ukon pagkasunog sang uniberso? Pila lamang ka tinaga sa Biblia ang nangin kinaandan na sa adlaw-adlaw nga paghambalanay sa madamo nga bahin sang kalibutan subong sang “Armagedon.” Ini nga termino lapnag nga ginagamit sa paglaragway sang madulom nga paglaum sang katawhan. Ang industriya sang mga pelikula kag telebisyon nagapasulod sa imahinasyon sang mga tawo sing makahaladlok nga mga danyag sang nagapakari nga “Armagedon.” Makatalanhaga kag sala nga mga ideya ang ginapatuhoy sa Armagedon. Bisan pa madamo ang ideya tuhoy sini, laban sini wala nagahisanto sa ginatudlo sang Biblia​—⁠ang ginhalinan sini nga tinaga​—⁠sa kon ano gid ang Armagedon.

Sanglit ginaangot sang Biblia ang Armagedon sa “katapusan sang kalibutan,” indi bala nga importante nga mahangpan sing maathag kon ano gid ang kahulugan sina nga tinaga? (Mateo 24:​3, King James Version) Kag indi bala mangin rasonable nga konsultahon ang ultimo nga nagaunod sing kamatuoran, ang Pulong sang Dios, agod mahibaluan ang mga sabat sa kon ano gid ang Armagedon kag kon ano ang mangin epekto sini sa imo kag sa imo pamilya?

Ipakita sini nga pag-usisa nga sa baylo sang malaglagon nga katapusan, ang Armagedon magabukas sang dalan para sa isa ka makalilipay nga panugod para sa mga tawo nga nagahandum nga magkabuhi kag magpasanyog sa isa ka matarong nga bag-ong kalibutan. Mahangpan mo sing maathag ining importante nga kamatuoran sa Kasulatan samtang ginabinagbinag mo ang paathag sa masunod nga artikulo kon ano gid ang matuod nga kahulugan sang Armagedon.

[Kahon/Retrato sa pahina 3]

ANO SA BANTA MO ANG ARMAGEDON?

• Isa ka sunog nuklear

• Isa ka kinaugali nga kalamidad

• Pagbunggo sa duta sang isa ka butang gikan sa langit

• Paglaglag sang Dios sa mga malauton