Mangin Mainuswagon kag Mapasibusibuon nga mga ministro
Mangin Mainuswagon kag Mapasibusibuon nga mga Ministro
“Nangin tanan nga butang ako sa tanan nga sahi sang tawo, agod nga sa bisan ano nga paagi maluwas ko ang iban.”—1 CORINTO 9:22.
1, 2. (a) Sa anong mga paagi si apostol Pablo isa ka epektibo nga ministro? (b) Paano ginlaragway ni Pablo ang iya panimuot tuhoy sa iya asaynment?
NAKAHIBALO sia makig-angot sa mga maalam kag subong man sa kubos nga mga manughimo sing tolda. Nabuyok man niya ang mga dignitaryo sang Roma kag ang mga mangunguma sang Frigia. Ang iya mga sinulatan nakapahulag sa matinuguton nga mga Griego kag sa konserbatibo nga mga Judiyo. Ang iya pangatarungan indi masuay subong nga may ikasarang man sia nga lab-uton ang mga balatyagon. Nagtinguha sia nga mangita sing punto nga ginaugyunan nila sang tanan nga nasugilanon niya agod nga madala niya ang iban kay Cristo.—Binuhatan 20:21.
2 Ini nga tawo amo si apostol Pablo, nga walay duhaduha isa ka epektibo kag mainuswagon nga ministro. (1 Timoteo 1:12) Nabaton niya gikan kay Jesus ang sugo nga ‘magdala sang ngalan ni [Cristo] sa mga pungsod subong man sa mga hari kag sa mga anak sang Israel.’ (Binuhatan 9:15) Ano ang iya panimuot sa sining asaynment? Sia nagsiling: “Nangin tanan nga butang ako sa tanan nga sahi sang tawo, agod nga sa bisan ano nga paagi maluwas ko ang iban. Apang ginahimo ko ang tanan nga butang tungod sa maayong balita, agod mangin manugpaambit ako sini sa iban.” (1 Corinto 9:19-23) Ano ang matun-an naton sa halimbawa ni Pablo nga makabulig sa aton nga mangin mas epektibo pa sa aton pagbantala kag pagpanudlo?
Ang Nagbag-o nga Tawo Nag-atubang sa Hangkat
3. Ano ang balatyagon ni Pablo sa mga Cristiano antes sia makumbertir?
3 Si Pablo bala anay mainantuson kag mabuot nga tawo amo nga bagay gid sia sa asaynment nga iya nabaton? Indi gid! Si Saulo (subong amo anay ang pagkakilala kay Pablo) nangin isa ka masingki nga manughingabot sang mga sumulunod ni Cristo bangod sang relihioso nga pagkapanatiko. Sang pamatan-on pa sia, gin-aprobahan niya ang pagpatay kay Esteban. Pagkatapos, walay kaluoy nga ginhingabot ni Pablo ang mga Cristiano. (Binuhatan 7:58; 8:1, 3; 1 Timoteo 1:13) Padayon sia sa “pagpahog kag pagpatay sa mga disipulo sang Ginuo.” Indi pa kontento nga hingabuton ang mga tumuluo sa Jerusalem lamang, sa iya kaakig nakalab-ot sia tubtob sa Damasco sa aminhan.—Binuhatan 9:1, 2.
4. Ano nga pagpasibu ang dapat himuon ni Pablo agod matuman ang iya asaynment?
4 Ang kabangdanan sang mabaskog nga pagdumot ni Pablo sa Cristianismo amo ang pagpati nga ining bag-o nga pagtuo magadagta sa Judaismo paagi sa pagsimpon sini sing tuhay kag di-kalahamut-an nga mga ideya. Sa katunayan, si Pablo “isa ka Fariseo” nga nagakahulugan “napain.” (Binuhatan 23:6) Hunahunaa kon daw ano ang kakibot ni Pablo sang mahibaluan niya nga ginpili sia sang Dios nga ibantala si Cristo sa mga Gentil pa! (Binuhatan 22:14, 15; 26:16-18) Kay ang mga Fariseo wala gani nagakaon upod sa mga ginakabig nila nga mga makasasala! (Lucas 7:36-39) Walay duhaduha nga nagakinahanglan ini sing daku nga panikasog sa iya bahin nga bag-uhon ang iya pagtamod kag ipahisanto ini sa kabubut-on sang Dios nga ang tanan nga sahi sang mga tawo dapat maluwas.—Galatia 1:13-17.
5. Paano naton mailog si Pablo sa aton ministeryo?
5 Ayhan kinahanglan man naton himuon ini. Samtang masumalang naton ang mga tawo nga may lainlain nga mga lenguahe kag nasyonalidad sa aton teritoryo, dapat kita maghimo sing panikasog nga binagbinagon ang aton panimuot kag dulaon sa aton kaugalingon ang walay kabangdanan nga kaugot. (Efeso 4:22-24) Nahibaluan man naton ukon wala, ang aton gindak-an kag edukasyon may impluwensia sa aton. Mahimo ini magpatudok sa aton sing mga pagtamod kag mga panimuot nga may nadampigan, kag indi mapasibusibuon. Dapat naton landason ini nga mga balatyagon kon luyag naton magmadinalag-on sa pagpangita kag pagbulig sa tulad-karnero nga mga tawo. (Roma 15:7) Amo sini ang ginhimo ni Pablo. Ginbaton niya ang hangkat nga pasangkaron ang iya ministeryo. Ginpahulag sang gugma, ginpalambo niya ang ikasarang sa pagpanudlo nga takus ilugon. Sa pagkamatuod, ang pagtuon sa ministeryo sang “apostol sa mga pungsod” nagapakita nga sia mapanilagon, mapasibusibuon, kag mapahituon sa pagbantala kag pagpanudlo. *—Roma 11:13.
Ang Isa ka Mainuswagon nga Ministro Nagapanghikot
6. Paano nangin mapanilagon si Pablo sa ginhalinan sang iya mga tagpalamati, kag ano ang resulta?
6 Si Pablo mapanilagon sa mga pagpati kag ginhalinan sang iya mga tagpalamati. Sang nagapakighambal kay Hari Agripa II, ginkilala ni Pablo nga ang hari “sampaton sa tanan nga kinabatasan kag kasuayon sang mga Judiyo.” Nian malantipon nga gingamit ni Pablo ang iya ihibalo sa mga ginapatihan ni Agripa kag ginbinagbinag sa iya ang mga butang nga nahangpan gid sing maayo sang hari. Maathag gid ang mga pangatarungan ni Pablo amo nga si Agripa nagsiling: “Sa malip-ot nga tion mabuyok mo ako nga mangin Cristiano.”—Binuhatan 26:2, 3, 27, 28.
7. Paano ginpakita ni Pablo ang pagkamapasibusibuon sang nagbantala sia sa kadam-an sa Listra?
7 Si Pablo mapasibusibuon man. Talupangda ang tuhay nga pamaagi nga gingamit niya sang mangatarungan sia sa kadam-an sa siudad sang Listra nga indi sila pagsimbahon ni Bernabe subong mga dios. Ginasiling nga ining mga tawo, nga nagahambal sing Licaonianhon, kubos ang tinun-an kag mahilig sa disparatis. Suno sa Binuhatan 14:14-18, ginpatalupangod ni Pablo ang mga butang nga gintuga sang Dios kag ang bugana nga aman sang kinaugali subong pamatuod sang pagkasuperyor sang matuod nga Dios. Madali mahangpan ang argumento, kag ini maathag nga “nagpugong sa kadam-an sa paghalad” kanday Pablo kag Bernabe.
8. Sa anong mga paagi ginpakita ni Pablo nga mapasibusibuon sia walay sapayan sang iya mabaskog nga opinyon kon kaisa?
8 Huo, si Pablo indi himpit, kag kon kaisa may mabaskog sia nga opinyon sa pila ka butang. Halimbawa, sang isa ka okasyon sang ginpakahuy-an sia kag gintratar sing di-makatarunganon, naghambal sia batok sa isa ka Judiyo nga si Ananias. Apang sang ginsilingan si Pablo nga ang iya gin-insultuhan isa gali ka mataas nga saserdote, gilayon sia nga nangayo sing pasaylo. (Binuhatan 23:1-5) Sang pag-abot niya primero sa Atenas, ‘naakig sia sang makita niya ang siudad nga puno sing mga idolo.’ Apang, sang magpamulongpulong sia sa Mar’s Hill, wala makita kay Pablo ang amo nga kaakig. Sa baylo, direkta nga ginpatuhuyan niya ang mga taga-Atenas sa ila paghambalanay, nga nagapangatarungan pasad sa butang nga ila ginaugyunan paagi sa pagpatuhoy sa ila altar nga “Sa Isa ka Dios nga Wala Makilal-i” kag ginkutlo ang isa sa ila mamalaybay.—Binuhatan 17:16-28.
9. Paano ginpakita ni Pablo ang pagkamapahituon sa pagpakig-angot sa nanuhaytuhay nga mga tagpalamati?
9 Sa pagpakig-angot sa nanuhaytuhay nga mga tagpalamati, ginpakita ni Pablo ang talalupangdon nga pagkamapahituon. Gintalupangod niya ang kultura kag ginhalinan nga nag-impluwensia sa panghunahuna sang iya mga tagpalamati. Sang nagsulat sia sa mga Cristiano sa Roma, nakahibalo gid sia nga nagakabuhi sila sa kapital sang labing gamhanan nga emperyo sadtong adlaw. Ang ginpadaku gid ni Pablo sa iya sulat sa mga Cristiano sa Roma amo nga ang gahom sang sala ni Adan sa paglaton nadaug sang gahom ni Cristo sa pagtubos. Nagpamulong sia sa mga Cristiano sa Roma kag sa mga tawo sa palibot nila sa isa ka paagi nga nagapukaw sa ila tagipusuon.—Roma 1:4; 5:14, 15.
10, 11. Paano ginbagay ni Pablo ang iya ilustrasyon sa iya mga tagpalamati? (Tan-awa man ang footnote.)
10 Ano ang ginhimo ni Pablo sang luyag niya ipaathag ang madalom nga mga kamatuoran sang Biblia sa iya mga tagpalamati? Malantipon gid si Pablo sa paggamit sing kinaandan, madali mahangpan nga mga ilustrasyon agod ipaathag ang masibod nga Makasulatanhon nga mga ideya. Halimbawa, nahibaluan ni Pablo nga ang mga tawo sa Roma pamilyar sa sistema sang pag-ulipon sa bug-os nga Emperyo sang Roma. Sa katunayan, madamo sa mga tawo nga iya ginsulatan ang mahimo mga ulipon. Busa, ang paggamit ni Pablo sang pagkaulipon subong ilustrasyon nagpabakod sang iya mabaskog nga mga argumento tuhoy sa ginpili sang tawo nga pagpasakop sa sala ukon sa pagkamatarong.—Roma 6:16-20.
11 “Sa mga Romano,” siling sang isa ka reperensia, “ang amo makahilway sa isa ka ulipon nga wala sing kondisyon, ukon mabakal sang ulipon ang iya kahilwayan paagi sa pagbayad sa iya amo. Ang iya kahilwayan sarang man maareglo kon ang pagpanag-iya isaylo sa isa ka dios.” Ang nahilway nga ulipon makapadayon sa pagtrabaho sa iya agalon para sa sueldo. Maathag nga ginpatuhuyan ni Pablo ini nga buhat sang magsulat sia tuhoy sa pagpili sang indibiduwal kon sin-o nga agalon ang iya tumanon—ang sala ukon ang pagkamatarong. Ang mga Cristiano sa Roma nahilway sa sala kag karon ginapanag-iyahan na sang Dios. Hilway sila sa pag-alagad sa Dios, apang sarang sila sa gihapon makapili nga alagaron ang sala—ang agalon anay—kon luyag nila. Inang simple apang pamilyar nga ilustrasyon magapahulag sa mga Cristiano sa Roma nga pamangkuton ang ila kaugalingon, ‘Sin-o nga agalon ang akon ginaalagad?’ *
Pagtuon Gikan sa Halimbawa ni Pablo
12, 13. (a) Ano nga mga panikasog ang kinahanglan karon agod malab-ot ang tagipusuon sang nanuhaytuhay nga mga tagpalamati? (b) Ano ang nasapwan mo nga epektibo kon nagabantala sa mga tawo gikan sa nanuhaytuhay nga mga ginhalinan?
12 Kaangay ni Pablo, dapat kita mangin
mapanilagon, mapasibusibuon, kag mapahituon agod malab-ot ang tagipusuon sang aton nanuhaytuhay nga tagpalamati. Agod mabuligan ang aton mga tagpalamati nga mahangpan ang maayong balita, luyag naton nga labi pa sangsa pakulahaw lamang nga pagduaw, pagbantala sing isa ka nahanda nga mensahe, ukon pagbilin sing pila ka literatura sa Biblia ang himuon naton. Nagapanikasog kita nga mahibaluan ang ila mga ginakinahanglan kag mga ginakabalak-an, ang ila mga luyag kag indi luyag, kag ang ila mga ginakahadlukan kag mga ginahunahuna. Bisan pa nagakinahanglan ini sing daku nga pagbinagbinag kag panikasog, malangkagon ini nga ginahimo sang mga manugbantala sang Ginharian sa bug-os nga kalibutan. Halimbawa, ang sanga talatapan sang mga Saksi ni Jehova sa Hungary nagreport: “Ang mga kauturan nagpakita sing pagtahod sa mga kustombre kag estilo sa pagkabuhi sang mga tawo sang iban nga pungsod kag wala nagapaabot sa ila nga magsunod sa lokal nga mga kustombre.” Ginatinguhaan man ini sang mga Saksi bisan diin.13 Sa isa ka pungsod sa Malayo nga Sidlangan, ang kalabanan sang mga tawo nagakabalaka sa kapagros, paghanas sa mga bata, kag edukasyon. Ginagamit sang mga manugbantala didto ining mga topiko sa baylo nga hambalan ang mga butang subong sang paglala sang kahimtangan sang bug-os nga kalibutan ukon masibod nga mga isyu sa katilingban. Sing kaanggid, natalupangdan sang mga manugbantala sa isa ka daku nga siudad sa Estados Unidos nga ang mga tawo sa isa ka komunidad sa ila teritoryo nagakabalaka sa mga butang subong sang kagarukan, paggutok sang mga trapiko kag krimen. Madinalag-on nga gingamit sang mga Saksi ining mga topiko agod sugdan ang mga paghambalanay sa Biblia. Ginapat-od sang epektibo nga mga manunudlo sang Biblia nga bisan ano man nga topiko ang ila gamiton, mangin positibo sila kag makapalig-on, nga nagapadaku sang praktikal nga kapuslanan sang pag-aplikar sang mga prinsipio sa Biblia karon kag sang masanag nga palaabuton nga ginatanyag sang Dios.—Isaias 48:17, 18; 52:7.
14. Ilaragway ang mga paagi nga makapasibu kita sa nanuhaytuhay nga mga kinahanglanon kag mga kahimtangan sang mga tawo.
14 Mabuligon man nga lainlainon ang aton mga pamaagi sa ministeryo, sanglit ang mga tawo may nanuhaytuhay nga kultura, edukasyon kag relihioso nga ginhalinan. Ang aton pagpalapit sa mga tawo nga nagapati sa isa ka Manunuga apang wala nagapati sa Biblia tuhay sa sadtong mga nagapati nga wala nagaluntad ang Dios. Ang presentasyon nga gamiton naton sa isa nga nagabatyag nga ang tanan nga relihioso nga literatura isa lamang ka kasangkapan sa pagdoktrina, tuhay sa gamiton naton sa isa ka tawo nga nagabaton sa kon ano ang ginatudlo sang Biblia. Ang pagkamapasibusibuon kinahanglanon man sa pagpakig-angot sa nanuhaytuhay nga edukasyon sang mga tawo nga masugilanon naton. Ang malantipon nga mga manunudlo magagamit sing 1 Juan 5:20.
pangatarungan kag mga ilustrasyon nga nagakaigo sa kahimtangan.—Bulig Para sa Bag-uhan nga mga Ministro
15, 16. Ngaa kinahanglanon gid nga maghanas sing bag-o nga mga ministro?
15 Indi lamang ang pagpauswag sang metodo sang iya pagpanudlo ang ginkabalak-an ni Pablo. Nakita man niya nga kinahanglan hanason kag ihanda ang mga pamatan-on, subong nanday Timoteo kag Tito, agod mangin epektibo nga mga ministro. (2 Timoteo 2:2; 3:10, 14; Tito 1:4) Sa karon man, kinahanglan ang kahimusan para sa paghanas.
16 Sang 1914, mga 5,000 ang manugbantala sang Ginharian sa bug-os nga kalibutan; sa karon mga 5,000 ka bag-uhan ang ginabawtismuhan kada semana! (Isaias 54:2, 3; Binuhatan 11:21) Kon ang mga bag-uhan magapakig-upod na sa Cristianong kongregasyon kag luyag magpakigbahin sa ministeryo, nagakinahanglan sila sing paghanas kag panuytoy. (Galacia 6:6) Importante gid nga gamiton naton ang mga metodo sang Agalon, nga si Jesus, sa pagtudlo kag paghanas sa mga disipulo. *
17, 18. Paano naton mabuligan ang mga bag-uhan nga makatigayon sing kompiansa sa ministeryo?
17 Wala lamang ginpangita ni Jesus ang kadam-an kag ginsilingan ang iya mga apostoles nga magsugod na sa pagpakighambal. Una nga ginpadaku niya nga kinahanglan ang pagbantala nga hilikuton kag padayon nga pagpangamuyo tuhoy sa ila ministeryo. Nian naghatag sia sing tatlo ka kinahanglanon nga butang: kaupod, teritoryo, kag mensahe. (Mateo 9:35-38; 10:5-7; Marcos 6:7; Lucas 9:2, 6) Mahimo man naton ini. Nagabulig man kita sa aton bata, sa isa ka bag-o nga estudyante, ukon sa iban nga wala makapakigbahin sa pagbantala nga hilikuton sing madugaydugay na, nagakaigo nga magpanikasog nga mag-aman sing paghanas sa sining paagi.
18 Nagakinahanglan sing nagakaigo nga bulig ang mga bag-uhan agod matigayon ang kompiansa sa pagpresentar sang mensahe sang Ginharian. Mabuligan mo bala sila sa paghanda kag pag-ensayo sing isa ka simple kag makagalanyat nga presentasyon? Sa latagon, patan-awa sila sa imo halimbawa samtang una ka nga nagapakigsugilanon sa pila ka mga balay. Masunod mo ang halimbawa ni Gideon nga nagsiling sa iya masigka-mangangaway: “Magtuon kamo paagi sa pagtan-aw sa akon, kag amo ang himuon ninyo.” (Hukom 7:17) Nian, hatagi ang bag-uhan sing kahigayunan nga makapakigbahin. Mainit nga hatagi sila sing komendasyon bangod sa ila mga panikasog, kag kon nagakaigo, maghatag sing panugda kon ano ang dapat pa pauswagon.
19. Ano ang imo determinasyon samtang ginapanikasugan mo nga ‘matuman sing bug-os ang imo ministeryo’?
19 Agod ‘matuman sing bug-os ang aton ministeryo,’ dapat determinado kita nga mangin mapasibusibuon sa aton mga pamaagi, kag luyag naton hanason ang bag-uhan nga mga ministro nga himuon ang amo man. Kon binagbinagon naton ang importansia sang aton tulumuron—ang pagpaambit sang ihibalo gid sang Dios nga nagadul-ong sa kaluwasan—kumbinsido gid kita nga takus ini sa bisan ano nga panikasog nga “mangin tanan nga butang sa tanan nga sahi sang mga tawo, agod maluwas [naton] ang iban.”—2 Timoteo 4:5; 1 Corinto 9:22.
[Mga nota]
^ par. 5 Para sa mga halimbawa sa sining mga kinaiya ni Pablo sa ministeryo, binagbinaga ang Binuhatan 13:9, 16-42; 17:2-4; 18:1-4; 19:11-20; 20:34; Roma 10:11-15; 2 Corinto 6:11-13.
^ par. 11 Sing kaanggid, sa pagpaathag sang bag-o nga kaangtanan sang Dios kag sang iya hinaplas sing espiritu nga mga “anak,” gingamit ni Pablo ang legal nga konsepto nga pamilyar sa iya mga bumalasa sa Emperyo sang Roma. (Roma 8:14-17) “Ang pag-adoptar kustombre gid sang mga Romano, kag naangot gid sa Romanong ideya tuhoy sa pamilya,” siling sang libro nga St. Paul at Rome.
^ par. 16 Karon, may Pioneers Assist Others nga programa sa tanan nga kongregasyon sang mga Saksi ni Jehova. Sa sini nga programa ginagamit ang eksperiensia kag paghanas sang bug-os tion nga mga ministro sa pagbulig sa indi tanto ka eksperiensiado nga mga manugbantala.
Madumduman Mo Bala?
• Sa anong mga paagi mailog naton si Pablo sa aton ministeryo?
• Ano nga mga pagbag-o sa aton panghunahuna ang kinahanglanon?
• Paano naton mahuptan nga positibo ang aton mensahe?
• Ano ang kinahanglan sang bag-uhan nga mga ministro agod matigayon ang kompiansa?
[Mga Pamangkot sa Pagtinuon]
[Blurb sa pahina 29]
Si apostol Pablo mapanilagon, mapasibusibuon, kag mapahituon sa pagbantala kag pagpanudlo
[Blurb sa pahina 31]
Si Jesus nag-aman sing tatlo ka kinahanglanon nga butang para sa iya mga disipulo: kaupod, teritoryo, kag mensahe
[Retrato sa pahina 28]
Nangin madinalag-on si Pablo sa paglab-ot sa nanuhaytuhay nga mga tagpalamati paagi sa pagkamapasibusibuon
[Retrato sa pahina 30]
Ginatalupangod sang epektibo nga mga ministro ang kultura nga ginhalinan sang ila mga tagpalamati
[Retrato sa pahina 31]
Ginabuligan sang mainuswagon nga mga ministro ang mga bag-uhan nga maghanda sa ministeryo