Karon Na ang Tion sa Determinado nga Paghulag
Karon Na ang Tion sa Determinado nga Paghulag
“Tubtob pa bala san-o magkimpangkimpang kamo sa duha ka magkatuhay nga panghunahuna?”—1 HARI 18:21.
1. Ngaa ang aton tion tuhay gid sangsa nagligad?
NAGAPATI ka bala nga si Jehova amo ang lamang matuod nga Dios? Nagapati ka man bala nga ang mga tagna sa Biblia nagatudlo sa aton tion subong ang “katapusan nga mga adlaw” sang malaut nga sistema ni Satanas? (2 Timoteo 3:1) Kon amo, pat-od nga magaugyon ka nga karon, sa tanan nga mga tion, kinahanglan gid ang paghulag. Wala pa matabo sa maragtas sang tawo nga ang kabuhi sang tuman gid kadamo yara sa katalagman.
2. Ano ang natabo sa napulo-ka-tribo nga ginharian sang Israel sa tion sang paggahom ni Hari Ahab?
2 Sang ikapulo nga siglo B.C.E., kinahanglan maghimo sing isa ka serioso gid nga desisyon ang pungsod sang Israel. Sin-o ang ila alagaron? Sa idalom sang impluwensia sang iya pagano nga asawa, nga si Jesebel, ginpasanyog ni Hari Ahab ang pagsimba kay Baal sa napulo-ka-tribo nga ginharian sang Israel. Si Baal isa ka dios sang pertilidad nga amo kuno ang nagapaulan kag nagahatag sing mabungahon nga mga patubas. Madamo sang mga sumilimba ni Baal ang mahimo nagahalok ukon nagayaub sa idolo sang ila dios. Agod hayluhon si Baal nga pakamaayuhon ang ila mga patubas kag kasapatan, ang iya mga sumilimba nagapatuyang sa sekso upod sa mga pampam sang templo. May kinabatasan man sila nga pilasan ang ila kaugalingon agod magtulo ang dugo.—1 Hari 18:28.
3. Ano ang epekto sang pagsimba kay Baal sa katawhan sang Dios?
3 Ang nabilin nga mga 7,000 ka Israelinhon wala makigbahin sa sining idolatroso, imoral, kag masingki nga porma sang pagsimba. (1 Hari 19:18) Mainunungon sila nga nagpabilin sa ila katipan nga kaangtanan kay Jehova nga Dios, kag bangod sini ginhingabot sila. Halimbawa, ginpatay ni Reyna Jesebel ang madamo nga mga manalagna ni Jehova. (1 Hari 18:4, 13) Bangod sining mabudlay nga mga kahimtangan, ang kalabanan nga mga Israelinhon nagbuhat sing salakot nga pagtuluuhan, nga nagatinguha nga pahamut-an si Jehova kag si Baal. Apang, ang pagtalikod kay Jehova kag pagsimba sa butig nga dios isa ka buhat sang apostasya para sa isa ka Israelinhon. Nagsaad si Jehova nga pakamaayuhon ang mga Israelinhon kon higugmaon nila sia kag tumanon ang iya mga sugo. Apang, nagpaandam sia sa ila nga kon indi sila maghatag sa iya sing “eksklusibo nga debosyon,” papason niya sila.—Deuteronomio 5:6-10; 28:15, 63.
4. Ano ang gintagna ni Jesus kag sang iya mga apostoles nga mahanabo sa tunga sang mga Cristiano, kag paano ini natuman?
4 Amo man sini ang kahimtangan sa Cristiandad karon. Ang mga miembro sang simbahan nagapangangkon nga mga Cristiano, apang ang ila mga kapiestahan, pagginawi, kag mga pagpati nagasumpakil sa mga panudlo sang Biblia. Kaangay ni Jesebel, ginapangunahan sang mga klero sang Cristiandad ang paghingabot sa mga Saksi ni Jehova. Ang klero sang Cristiandad may malawig man nga kasaysayan sang pagsakdag sa mga inaway kag busa may salabton sa kamatayon sang minilyon nga mga miembro sang simbahan. Ining relihioso nga pagsakdag sa panguluhan sang kalibutan ginalaragway sang Biblia subong espirituwal nga pagpakighilawas. (Bugna 18:2, 3) Dugang pa, labi nga ginkunsinti sang Cristiandad ang literal nga pagpakighilawas, bisan sa tunga sang mga klero sini. Gintagna ni Jesucristo kag sang iya mga apostoles ining daku nga apostasya. (Mateo 13:36-43; Binuhatan 20:29, 30; 2 Pedro 2:1, 2) Ano ang madangatan sang kapin sa isa ka bilyon nga sumulunod sang Cristiandad? Kag ano ang responsibilidad sang matuod nga mga sumilimba ni Jehova sa ila kag sa tanan nga ginpatalang sang butig nga relihion? Matigayon naton ang isa ka maathag nga sabat sa sining mga pamangkot paagi sa pagbinagbinag sang dramatiko nga mga hitabo nga nagdul-ong sa ‘pagpapas kay Baal sa Israel.’—2 Hari 10:28.
Ang Gugma sang Dios sa Iya Batinggilan nga Katawhan
5. Paano nagpakita si Jehova sing mahigugmaon nga pag-ulikid para sa iya batinggilan nga katawhan?
5 Wala nalipay si Jehova nga Dios sa pagsilot sa mga nangin di-matutom sa iya. Subong isa ka mahigugmaon nga Amay, luyag niya nga maghinulsol ang mga malauton kag magbalik sa iya. (Ezequiel 18:32; 2 Pedro 3:9) Bilang pamatuod sini, gingamit ni Jehova ang madamo nga mga manalagna sang mga adlaw ni Ahab kag ni Jesebel agod paandaman ang Iya katawhan sang mga resulta sang pagsimba kay Baal. Si Elias isa sa sini nga mga manalagna. Pagkatapos sang isa ka makahalapay nga tigpalamangag, nga ginpahibalo sing abanse, ginsilingan ni Elias si Hari Ahab nga tipunon sing tingob ang mga Israelinhon kag ang mga manalagna ni Baal sa Bukid Carmel.—1 Hari 18:1, 19.
6, 7. (a) Paano ginbuyagyag ni Elias ang kabangdanan sang pag-apostasya sang Israel? (b) Ano ang ginhimo sang mga manalagna ni Baal? (c) Ano ang ginhimo ni Elias?
6 Natabo ining pagtinipon sa duog sang “naguba” nga halaran ni Jehova, ayhan agod pahamut-an si Jesebel. (1 Hari 18:30) Makapasubo nga ang mga Israelinhon nga yadto didto indi makapat-od kon sin-o—si Jehova bala ukon si Baal—ang makasarang magpaulan. Gintiglawas si Baal sang 450 ka manalagna, samtang si Elias lamang ang manalagna nga nagatiglawas kay Jehova. Sa pagpatalupangod sang kabangdanan sang ila problema, namangkot si Elias sa katawhan: “Tubtob pa bala san-o magkimpangkimpang kamo sa duha ka magkatuhay nga panghunahuna?” Nian, sa mas simple pa gid nga mga pinamulong, ginpapili niya sila: “Kon si Jehova ang matuod nga Dios, sunda sia; apang kon si Baal, nian sunda sia.” Agod pahulagon ang indi makadesisyon nga mga Israelinhon nga ipatungod kay Jehova ang eksklusibo nga debosyon, nagpanugda si Elias sing isa ka pagtilaw sa pagka-Dios. Duha ka baka ang ihawon kag ihalad, ang isa para kay Jehova kag ang isa para kay Baal. Ang matuod nga Dios amo ang makaupos sang halad para sa iya. Ginhanda sang mga manalagna ni Baal ang ila halad, kag inoras sila nga nagpanawag: “O Baal, sabta kami!” Sang ginyubit sila ni Elias, ginpilas nila ang ila kaugalingon tubtob nga nagtulo ang dugo, kag nagsinggit sila sing mabaskog gid. Apang wala sing nagsabat.—1 Hari 18:21, 26-29.
7 Turno naman karon ni Elias. Una anay, ginkay-o niya ang halaran ni Jehova kag ginbutang ang ginhiwahiwa nga baka sa sini. Masunod, nagmando sia nga ang apat ka banga nga tubig iula sa halad. Ginhimo ini sing makatlo tubtob nga ang kalog sa palibot sang halaran napuno sing tubig. Nian si Elias nangamuyo: “O Jehova ang Dios ni Abraham, ni Isaac, kag ni Israel, ipakilala sini nga adlaw nga ikaw amo ang Dios sang Israel kag nga ako imo alagad kag tungod sang imo pulong ginhimo ko ini tanan nga butang. Sabta ako, O Jehova, sabta ako, agod nga ini nga katawhan magkilala nga ikaw, si Jehova, amo ang matuod nga Dios kag ikaw mismo nagpabalik liwat sang tagipusuon nila.”—1 Hari 18:30-37.
8. Paano ginsabat sang Dios ang pangamuyo ni Elias, kag ano ang ginhimo sang manalagna?
8 Nagsabat ang matuod nga Dios paagi sa kalayo halin sa langit nga nag-upos sang halad kag sang halaran. Gindilapan pa gani sang kalayo bisan ang tubig nga yara sa kalog sa palibot sang halaran! Handurawa ang epekto sa mga Israelinhon. “Naghapa sila sa gilayon kag nagsiling: ‘Si Jehova amo ang matuod nga Dios! Si Jehova amo ang matuod nga Dios!’” Nian naghimo pa si Elias sing determinado nga buhat, nga nagamando sa mga Israelinhon: “Dakpa ang mga manalagna ni Baal! Dili pagpapalagyuha ang bisan isa sa ila!” Nian, ang tanan nga 450 ka manalagna ni Baal ginpatay sa kunsaran sang Bukid Carmel.—1 Hari 18:38-40.
9. Paano gintilawan liwat ang matuod nga mga sumilimba?
9 Sa sadto man nga indi malipatan nga adlaw, nagpaulan si Jehova sa duta sa una nga tion sa sulod sang tatlo ka tuig kag tunga! (Santiago 5:17, 18) Mahanduraw mo ang hinambalanay sang mga Israelinhon samtang nagapauli sila; ginbindikar ni Jehova ang iya pagka-Dios. Apang, ang mga sumilimba ni Baal wala nangampo. Ginpadayon ni Jesebel ang iya paghingabot sa mga alagad ni Jehova. (1 Hari 19:1, 2; 21:11-16) Sa amo ang integridad sang katawhan sang Dios gintilawan liwat. Ihatag bala nila ang eksklusibo nga debosyon kay Jehova kon mag-abot ang iya adlaw sang paghukom batok sa mga sumilimba ni Baal?
Determinado nga Maghulag Karon
10. (a) Sa modernong tion, ano ang ginahimo sang hinaplas nga mga Cristiano? (b) Ano ang buot silingon sang pagtuman sa sugo nga masapwan sa Bugna 18:4?
10 Sa modernong tion, ang hinaplas nga mga Cristiano nagahimo sing isa ka hilikuton kaangay sang kay Elias. Paagi sa pulong kag naimprinta nga mga balasahon, ginapaandaman nila ang mga tawo sang tanan nga pungsod sa sulod kag sa gua sang Cristiandad tuhoy sa katalagman sang butig nga relihion. Subong resulta, minilyon ang naghimo sing determinado nga buhat agod nga indi na mangin miembro sang butig nga relihion. Gindedikar nila ang ila kabuhi kay Jehova kag nangin bawtismado nga mga disipulo ni Jesucristo. Huo, ginpamatian nila ang hilingagawon nga pangabay sang Dios tuhoy sa butig nga relihion: “Gua ka sa iya, katawhan ko, kon indi ninyo luyag makaambit sa iya mga sala, kag kon indi ninyo luyag makabaton sing bahin sa iya mga kalalat-an.”—Bugna 18:4.
11. Ano ang kinahanglanon agod matigayon ang kahamuot ni Jehova?
11 Minilyon pa ang indi gihapon makapamat-od kon ano ang dapat nila himuon, bisan pa naganyat sila sa pasad sa Biblia nga mensahe nga ginabantala sang mga Saksi ni Jehova. Ang pila sa ila nagatambong sa Cristianong mga miting kon kaisa, subong sang pagsaulog sa Panihapon sang Ginuo ukon sang pila ka pamulongpulong sa isa ka distrito nga kombension. Ginapalig-on naton sila nga binagbinagon sing maayo ang pinamulong ni Elias: “Tubtob pa bala san-o nga magapungko kamo sa kudal?” (1 Hari 18:21, New English Bible) Sa baylo nga magpalantang, dapat sila maghulag sing determinado karon kag makugi nga mangabudlay sa tuyo nga mangin dedikado kag bawtismado nga mga sumilimba ni Jehova. Ang ila paglaum para sa kabuhi nga walay katapusan yara sa katalagman!—2 Tesalonica 1:6-9.
12. Sa anong makatalagam nga kahimtangan nahulog ang pila ka bawtismado nga mga Cristiano, kag ano ang dapat nila himuon?
12 Makapasubo nga ang pila sang bawtismado nga mga Cristiano nangin di-regular ukon di-aktibo sa ila pagsimba. (Hebreo 10:23-25; 13:15, 16) Nadula sang iban ang ila kakugi bangod sang kahadlok sa paghingabot, mga kabalaka sa pagkabuhi, panikasog nga magmanggaranon, ukon pagtinguha sa makagod nga mga handum. Si Jesus nagpaandam nga ini gid nga mga butang magapasandad, magalumos kag magasiod sa pila sang iya mga sumulunod. (Mateo 10:28-33; 13:20-22; Lucas 12:22-31; 21:34-36) Sa baylo nga ‘magkimpangkimpang sa duha ka panghunahuna,’ kon sa aton pa, dapat sila mangin ‘makugi kag maghinulsol’ paagi sa determinado nga paghulag sa gilayon agod himuon ang ila dedikasyon sa Dios.—Bugna 3:15-19.
Ang Hinali nga Katapusan sang Butig nga Relihion
13. Ilaragway ang kahimtangan sa Israel sang ginhaplasan si Jehu subong hari.
13 Ang rason kon ngaa hilingagawon gid para sa mga tawo nga determinado nga maghulag karon makita sa natabo sa Israel mga 18 ka tuig pagkatapos nga nahusay ang hulusayon tuhoy sa pagka-Dios sa Bukid Carmel. Hinali nga nag-abot ang adlaw sang paghukom ni Jehova batok sa pagsimba kay Baal sa tion sang pag-alagad ni Eliseo, ang nagbulos kay Elias. Nagagahom sa Israel si Jehoram, ang anak ni Hari Ahab, kag si Jesebel buhi pa gihapon subong reyna nga iloy. Likom nga ginpadala ni Eliseo ang iya alagad agod haplasan si Jehu, ang puno sang hangaway sang Israel, subong ang bag-o nga hari. Sadtong tion, si Jehu yara sa nasidlangan nga bahin sang Jordan sa Ramot-gilead, nga nagapanguna sa pagpakig-away batok sa mga kaaway sang Israel. Si Hari Jehoram yadto sa Jezreel sa nalupyakan nga patag malapit sa Megido, nga nagapaayo sang iya pilas bangod sa inaway.—2 Hari 8:29-9:4.
14, 15. Ano nga sugo ang nabaton ni Jehu, kag ano ang iya ginhimo?
14 Amo ini ang ginpahimo ni Jehova kay Jehu: “Laglagon mo ang panimalay ni Ahab nga imo agalon, agod nga ako magtimalos sang dugo sang mga alagad nga mga manalagna kag sang dugo sang tanan nga alagad ni Jehova sa kamot ni Jesebel. Kag ang bug-os nga panimalay ni Ahab mawala; . . . Si Jesebel kaunon sang mga ido sa kadutaan sang Jezreel, kag wala sing magalubong sa iya.”—2 Hari 9:7-10.
15 Si Jehu determinado nga naghulag sa gilayon. Wala sing pagpalantang nga nagsakay sia sa iya kangga kag naghuyab pa Jezreel. Nakilala sang isa ka manugbantay sa Jezreel ang pagpadalagan ni Jehu kag nagreport kay Hari Jehoram, gani si Jehoram nagsakay sa iya kangga kag nagsugata sa iya puno nga hangaway. Sang nagsugataay sila, si Jehoram namangkot: “May paghidait bala, Jehu?” Si Jehu nagsabat: “Ano bala nga paghidait, samtang nga tama kadamo ang pagkamakihilawason ni Jesebel nga imo iloy kag ang iya mga pagkadiwatahan?” Nian, antes makapalagyo si Hari Jehoram, ginbingat ni Jehu ang iya pana kag ginpatay si Jehoram bangod ang baslay naglapos sa iya tagipusuon.—2 Hari 9:20-24.
16. (a) Ano nga kahimtangan ang hinali nga gin-atubang sang mga opisyales sa palasyo ni Jesebel? (b) Paano natuman ang mga pinamulong ni Jehova tuhoy kay Jesebel?
16 Dalidali nga ginpahuyab ni Jehu ang iya kangga pa siudad. Ang nagpangoloreti nga si Jesebel naggawa sa bintana kag nagtamyaw kay Jehu sing mauligyaton. Wala sia ginsapak, nangayo si Jehu sing suporta: “Sin-o bala ang dampig sa akon? Sin-o?” Dapat karon maghulag sa gilayon ang mga alagad ni Jesebel. Ang duha ukon tatlo ka opisyales sa palasyo naggawa sa bintana. Hinali nga gintilawan ang ila pagkamainunungon. “Ihulog sia!” sugo ni Jehu. Ginhulog sang mga opisyales si Jesebel, diin gintapaktapak sia sang mga kabayo ni Jehu kag sang iya kangga. Sa amo napatay ang manugsugyot sang pagsimba kay Baal sa Israel. Antes pa sia malubong, ginkaon sang mga ido ang iya unod, subong sang gintagna.—2 Hari 9:30-37.
17. Ang paghukom sang Dios kay Jesebel dapat magpabakod sang aton pagtuo sa anong palaabuton nga hitabo?
17 Amo man sini ka makakulugmat nga katapusan ang magaabot sa simbuliko nga makihilawason nga may ngalan nga “Babilonia nga Daku.” Ang makihilawason nagarepresentar sa butig nga mga relihion sang kalibutan ni Satanas, nga naghalin sa dumaan nga siudad sang Babilonia. Pagkatapos nga malaglag ang butig nga relihion, iliso ni Jehova nga Dios ang iya igtalupangod sa tanan nga katawhan nga nagahuman sa sekular nga bahin sang kalibutan ni Satanas. Ini sila pagalaglagon man, bilang paghanda sang dalan para sa isa ka matarong nga bag-ong kalibutan.—Bugna 17:3-6; 19:19-21; 21:1-4.
18. Sang napatay si Jesebel, ano ang natabo sa mga sumilimba ni Baal sa Israel?
18 Sang napatay si Jesebel, wala mag-uyang sing tion si Hari Jehu sa pagpatay sa tanan nga kaanakan ni Ahab kag sa iya panguna nga mga sumalakdag. (2 Hari 10:11) Apang madamo gihapon ang sumilimba ni Baal sa pungsod sang mga Israel. Tuhoy sini, determinado nga naghulag dayon si Jehu agod ipakita ang iya “indi pagtugot nga may kaagaw si Jehova.” (2 Hari 10:16) Nagpakunokuno subong sumilimba ni Baal, nag-organisar si Jehu sing isa ka daku nga piesta sa templo ni Baal nga ginpatindog ni Ahab sa Samaria. Ang tanan nga mga sumilimba ni Baal sa Israel nagkadto sa piesta. Nakibon sa sulod sang templo, ginpamatay sila tanan sang mga tinawo ni Jehu. Ang Biblia naghinakop sa sining mga pinamulong: “Amo ini ang paglaglag ni Jehu kay Baal gikan sa Israel.”—2 Hari 10:18-28.
19. Anong makakulugmat nga palaabuton ang nagahulat sa “dakung kadam-an” sang mainunungon nga mga sumilimba ni Jehova?
19 Ang pagsimba kay Baal ginpapas gikan sa Israel. Amo man sini ka pat-od nga ang butig nga mga relihion sang kalibutan malaglag sing hinali kag sing makakulugmat. Kay sin-o ka dampig sa tion sinang dakung adlaw sang paghukom? Determinado nga maghulag karon, kag mahimo may pribilehiyo ikaw nga malakip sa “dakung kadam-an” sang makalampuwas sa “dakung kapipit-an.” Nian mahimo mo mahanduraw ang nagligad nga may kalipay kag madayaw ang Dios bangod sa paghikot sing paghukom sa “dakung makihilawason nga babayi nga nagdagta sang duta sang iya pagkamakihilawason.” Sing nahiusa upod sa iban nga matuod nga mga sumilimba, mahimo nga magaugyon ka sa makakulunyag nga mga pulong nga ginaamba sang langitnon nga mga tingog: “Dayawa ninyo si Jah, kay si Jehova nga aton Dios, ang Labing Gamhanan, nagsugod na sa paggahom subong hari.”—Bugna 7:9, 10, 14; 19:1, 2, 6.
Mga Pamangkot nga Mapamalandungan
• Paano nakasala ang dumaan nga Israel sang pagsimba kay Baal?
• Anong daku nga apostasya ang gintagna sang Biblia, kag paano natuman ini nga tagna?
• Paano ginpapas ni Jehu ang pagsimba kay Baal?
• Ano ang himuon naton agod makalampuwas sa adlaw sang paghukom sang Dios?
[Mga Pamangkot sa Pagtinuon]
[Mapa sa pahina 25]
(Para sa aktual nga pormat, tan-awa ang publikasyon)
Socoh
Aphek
Helkath
Jokneam
Megiddo
Taanach
Dothan
SAMARIA
En-dor
Shunem
Ophrah
Jezreel
Ibleam (Gath-rimmon)
Tirzah
Beth-shemesh
Beth-shean (Beth-shan)
Jabesh-gilead?
Abel-meholah
House of Arbel
Ramoth-gilead
Mountain Peaks
Mt. Carmel
Mt. Tabor
Moreh
Mt. Gilboa
[Bodies of water]
Mediterranean Sea
Sea of Galilee
[River]
Jordan River
[Spring and well]
Well of Harod
[Credit Line]
Based on maps copyrighted by Pictorial Archive (Near Eastern History) Est. and Survey of Israel
[Retrato sa pahina 26]
Ang regular nga pagpakigbahin sa pagbantala sang Ginharian kag pagtambong sa Cristianong mga miting importante nga mga bahin sang matuod nga pagsimba
[Retrato sa pahina 28]
Kaangay ni Jehu, ang tanan nga luyag makalampuwas sa adlaw ni Jehova dapat determinado nga maghulag sa gilayon
