Krismas kag Bag-ong Tuig—Matuman Bala ang Handum Mo?

“Nagmando si Peter [the Great] sing pinasahi nga mga serbisyo para sa Bag-ong Tuig nga ginahiwat sa tanan nga simbahan kon Enero 1. Dugang pa, naghatag sia sing instruksion nga punihan sing mga sanga sang evergreen ang tanan nga bakalan sa sulod sang mga balay, kag nagsiling sia nga ang tanan nga banwahanon sang Moscow dapat ‘magpakita sang ila kalipay paagi sa matunog nga pagpanginbulahan’ sa isa kag isa kon Bag-ong Tuig.”—Peter the Great—His Life and World.

ANO ang imo handum sa Krismas kag Bag-ong Tuig nga selebrasyon? Isa ini ka mas malawig nga hut-ong sang selebrasyon. Mahimo nga bakasyon ang mga ginikanan kag mga kabataan sa sini nga tion, gani daw maayo gid ini nga okasyon nga mag-updanay ang mga pamilya. Ang Krismas amo ang tradisyunal nga adlaw sang pagkatawo ni Cristo. Ginahandum sang iban nga padunggan si Cristo sa sini nga tion sang tuig, bangod nagapati sila nga amo ini ang labing importante nga aspekto sang selebrasyon. Ayhan amo man sini ang imo pagpati.

Kon bala padunggan si Cristo, maglipaylipay ang pamilya, ukon pareho, minilyon nga mga bana, mga asawa, kag kabataan sa bug-os nga kalibutan ang nagakalangkag gid sa sini nga tion. Kamusta karon nga tuig? Mangin isa gid ayhan ini ka pinasahi nga tion para sa pamilya, kag pinasahi bala ini sa Dios? Kon may pagsinalusalo ang pamilya, mangin subong gid ayhan ini sang imo ginapaabot, ukon malugaw-an ka lang?

Madamo nga nagapaabot sa relihioso nga aspekto sang Krismas kag Bag-ong Tuig nga selebrasyon ang nakatalupangod nga sa masami wala ini nagapakita sang espiritu ni Cristo. Sa baylo, ang selebrasyon nangin isa lamang ka tion sa pagbaton sing mga regalo, isa ka balibad para sa sinalusalo nga mahimo maglakip sing paggawi nga nagapakahuya kay Cristo, ukon rason lamang para magreyunyon ang pamilya. Pirme nagakatabo nga sa sini nga sahi sang pagsinalusalo ang isa ukon kapin pa ka katapo sang pamilya nagapatuyang sa pagkaon kag sa makahulubog nga ilimnon, nga ginabangdan sang mga kinamog nga masami nagaresulta sa pagpanakit sa sulod sang pamilya. Mahimo nga natalupangdan mo ina, ukon mahimo pa gani nga naeksperiensiahan mo ina.

Kon amo, mahimo magasiling ka nga diutay gid lang ang nagbag-o sugod sang panahon sang Ruso nga emperador nga si Peter the Great, nga ginsambit sa umpisa. Bangod ginatublag sang nagakatabo karon, madamo ang nagahandum nga kuntani ang panahon sang selebrasyon mangin isa ka tion para sa tudok nga pagpamalandong kag mapuslanon nga pag-updanay sang pamilya. Nagapangampanya pa gani ang iban para sa isa ka pagbag-o, nga ginagamit ang mga eslogan subong sang, si Jesus ang rason sang selebrasyon. Apang mahimo pa bala ang pagbag-o? Kag magapadungog gid bala ini kay Cristo? May mga rason bala nga dapat mangin tuhay ang imo pagtamod sa selebrasyon?

Agod mahibaluan ang makaalayaw nga mga sabat, binagbinagon naton ang kahimtangan paagi sa pagtamod sang katawhan sang isa ka pungsod nga dapat kuntani may pinasahi nga rason nga apresyahon ining partikular nga tion sang tuig.