Madumduman Mo Bala?

Nakabenepisyo ka bala sa pagbasa sa ulihi nga mga gua sang Ang Lalantawan? Bueno, tilawi kon masabat mo ang masunod nga mga pamangkot:

• Ngaa ang una nga sala​—⁠ang pagkadimatinumanon ni Adan​—⁠mapaanggid sa isa ka ginapanubli nga balatian?

Kaangay ini sang isa ka balatian bangod ginpaliton ni Adan ang sala sa iya kaanakan. Gani, ginpanubli naton ang depekto sang sala, subong nga ang pila ka kabataan nakapanubli sing balatian gikan sa ila mga ginikanan.​—⁠8/15, pahina 5.

• Ano ang panguna nga mga kabangdanan sang pagdugang sang kasingki karon?

Ginatinguhaan ni Satanas nga patalikdon ang mga tawo kay Jehova paagi sa pagsab-ug sing espiritu sang kasingki sa tagipusuon, paagi sa mga pelikula, musika, kag mga hampang sa kompyuter nga nagabuyok sa mga humalampang nga himuon ang kasingki kag pagpatay. Ang kasingki sa media nangin kabangdanan man sang madamo nga kasingki.​—⁠9/1, pahina 29.

• Sin-o si Poncio Pilato?

Isa sia ka Romano nga indi tanto ka prominente ang posisyon nga iya ginauyatan kag mahimo nga nakaalagad sa militar. Gintangdo ni Emperador Tiberio sang Roma si Pilato nga gobernador sang probinsia sang Judea sang 26 C.⁠E. Sa tion sang pagbista kay Jesus, nabatian ni Pilato ang mga panumbungon sang Judiyong mga lider. Agod mapahamut-an ang kadam-an, nagpasugot sia nga patyon si Jesus.​—⁠9/15, pahina 10-12.

• Ano “ang tanda” nga ginsambit sa Mateo 24:3?

May madamo nga bahin ini nga tanda nga nagahuman sing isa ka kabilugan nga tanda, ukon sinyales. Ini nga tanda nagalakip sing inaway, tiggulutom, mga peste, kag mga linog, kag magabulig sa mga sumulunod ni Jesus nga marealisar ang iya “presensia” subong man “ang katapusan sang sistema sang mga butang.”​—⁠10/1, pahina 4-5.

• Ano ang Diaspora, kag diin ini nga mga duog?

Ang termino nagapatuhoy sa mga Judiyo nga nagapuyo sa gua sang Palestina. Sang una nga siglo, ang dalagku nga sentro sang mga Judiyo masapwan sa Siria, Asia Minor, Babilonia, kag Egipto, kag may magagmay nga mga komunidad sa Europa nga sakop sang Romano nga Emperyo.​—⁠10/15, pahina 12.

• Mahuptan bala sang isa ka Cristiano ang matinlo nga konsiensia kon batunon niya ang trabaho nga nagakinahanglan nga mag-uyat sing armas?

Personal nga desisyon sang isa kon bala batunon niya ang isa ka trabaho nga nagakinahanglan nga mag-uyat sing pusil ukon sing iban nga armas. Apang, ang isa nga nagauyat sing armas sa trabaho posible nga makasala sa dugo kon kinahanglan niya gamiton ini kag yara sa katalagman nga masamaran ukon mapatay bangod sang pag-atake ukon pagtimalos. Ang isa ka Cristiano nga nagauyat sini nga armas indi mahatagan sing bisan anong pinasahi nga mga pribilehiyo sa kongregasyon. (1 Timoteo 3:⁠3, 10)​—⁠11/1, pahina 31.

• Sanglit ang tinaga nga “Armagedon” naghalin sa ekspresyon nga “Bukid sang Megido,” mahanabo bala ang inaway sang Armagedon sa isa ka bukid sa Natung-an nga Sidlangan?

Indi. Wala sing Bukid sang Megido, isa lamang ka pukatod nga nagatindog malapit sa isa ka nalupyakan nga patag sa Israel. Indi makaigo diri ang tanan nga “mga hari sang duta kag ang ila mga hangaway.” Ang dakung inaway sang Dios mahanabo sa bug-os nga duta, kag pagatapuson sini ang tanan nga inaway. (Bugna 16:​14, 16; 19:19; Salmo 46:​8, 9)​—⁠12/1, pahina 4-7.