“Pagbantala sing Kahilwayan sa mga Bihag”

SANG ginsugdan ni Jesus ang iya ministeryo, nagsiling sia nga isa sa iya katuyuan amo ang “pagbantala sing kahilwayan sa mga bihag.” (Lucas 4:18) Bilang pagsunod sa halimbawa sang ila Agalon, ginabantala sang matuod nga mga Cristiano ang maayong balita sang Ginharian sa “tanan nga sahi sang mga tawo,” agod hilwayon sila gikan sa espirituwal nga pagkabihag kag buligan sila nga pauswagon ang ila kabuhi.—1 Timoteo 2:4.

Sa karon, ini nga hilikuton nagalakip sang pagbantala sa literal nga mga bihag—ang mga tawo nga nabilanggo bangod sang nanuhaytuhay nga mga krimen kag nagaapresyar sa espirituwal nga kahilwayan. Yari ang makapalig-on nga report tuhoy sa pagbantala sang mga Saksi ni Jehova sa mga bilangguan sang Ukraine kag sa iban pa nga mga bahin sang Europa.

Mga Adik Anay, Karon mga Cristiano Na

Sa edad ni Serhii * nga 38 anyos, 20 ka tuig sini ang ginhinguyang sa likod sang mga rehas. Sa bilangguan gani sia nakatapos eskwela. Nagsiling sia: “Mga tinuig na ang nagligad, nabilanggo ako bangod nakapatay ako, kag may tinuig pa ako nga talapuson sa bilangguan. Daw harihari ako sa sulod sang bilangguan, kag ginakahadlukan ako sang iban nga mga bilanggo.” Nagpabatyag bala ini sa iya nga hilway sia? Wala. Sa sulod sang madamo nga tinuig, ulipon si Serhii sang droga, makahulubog nga ilimnon, kag tabako.

Nian ginpaambit sa iya sang isa pa ka bilanggo ang kamatuoran sang Biblia. Daw subong ini sang silak sang kapawa sa dulom. Sa sulod lamang sang pila ka bulan, nalandas niya ang droga, nangin manugbantala sing maayong balita, kag nabawtismuhan. Masako karon si Serhii sa pag-alagad sa bilangguan subong bug-os tion nga ministro ni Jehova. Pito na ka kriminal ang nabuligan niya nga magbag-o kag nangin mga utod niya sa espirituwal. Anom sa ila ang nakagua na, apang si Serhii nabilin gihapon. Wala nagalain ang iya buot sa sini bangod malipayon sia nga mabuligan niya ang iban pa nga mahilway gikan sa espirituwal nga pagkabihag.—Binuhatan 20:35.

Ang isa sa mga gintudluan ni Serhii sa bilangguan amo si Victor, nga isa anay ka manugbaligya sing droga kag adik. Pagkagua niya sa bilangguan, padayon nga nag-uswag si Victor sa espirituwal kag sang ulihi nakagradwar sa Ministerial Training School sa Ukraine. Nagaalagad sia karon subong isa ka  espesyal payunir sa Moldova. Nag-asoy si Victor: “Nagsugod ako sa pagpanigarilyo sang 8 anyos ako, nagpatuyang sa makahulubog nga ilimnon sang 12 anyos ako, kag nagdroga sang 14 anyos ako. Luyag ko magbag-o, apang napaslawan ang tanan ko nga panikasog. Nian sang 1995, sang nagaplano kami nga mag-asawa nga magpalayo na sa akon malain nga mga amigo, ginbuno sia sang isa ka buangit kag napatay. Nangin miserable gid ang akon kabuhi. ‘Diin na karon ang akon asawa? Ano ang nagakatabo kon mapatay ang isa ka tawo?’ Pirme ako nagapamangkot apang wala ako sing makita nga mga sabat. Nagpaamulya ako sa mga droga. Naaresto ako bangod sa pagbaligya sing droga, gani nabilanggo ako sing lima ka tuig. Diri ako nabuligan ni Serhii nga makita ang mga sabat. Madamo nga beses na anay nga nagtinguha ako nga manginpadlos gikan sa mga droga, apang karon lang ako nagmadinalag-on bangod sa bulig sang Biblia. Gamhanan gid ang Pulong sang Dios!”—Hebreo 4:12.

Nagbag-o ang Kabalan nga mga Kriminal

Si Vasyl wala gid makagamit sing droga, apang isa man sia ka bihag. “Adik ako sa isport nga sipaay kag sumbaganay,” paathag niya. “Naghanas ako nga sakiton ang mga tawo apang wala sing bisan ano nga lagob.” Gingamit ni Vasyl ang iya masingki nga abilidad agod kawatan ang mga tawo. “Tatlo ka beses nga nabilanggo ako, amo kon ngaa ginbulagan ako sang akon asawa. Sa tion sang hingapusan nga lima ka tuig sa bilangguan, pirme ako makabasa sing mga literatura sang mga Saksi ni Jehova. Nagpahulag ini sa akon nga basahon ang Biblia, apang mahuyugon gihapon ako sa naluyagan ko gid—ang pagpakig-away nga wala sing mga pagsulundan.

“Apang, pagligad sang anom ka bulan nga pagbasa sing Biblia, may nagbag-o sa akon. Ang pagdaug sa pagpakig-away wala na nagapahalipay sa akon. Gani ginsugdan ko nga binagbinagon ang akon kabuhi sa kapawa sang Isaias 2:4 kag narealisar ko nga kon indi ko pagbag-uhon ang akon panghunahuna, manigulang na lang ako sa bilangguan. Gani ginhaboy ko ang tanan ko nga gamit sa pagpakig-away kag nagsugod sa pagbag-o sang akon personalidad. Indi ini mahapos, apang amat-amat ako nga nabuligan sang pagpamalandong kag pangamuyo agod untaton ang akon malain nga mga bisyo. Kon kaisa, nagahibi ako nga nagapakitluoy kay Jehova nga hatagan ako sing kusog agod makapanginpadlos ako gikan sa akon pagkaadik. Sang ulihi, nagmadinalag-on ako.

“Paggua ko sa bilangguan, nakaupod ko liwat ang akon pamilya. Nagaobra ako karon sa minahan sang karbon. Nagahatag ini sa akon sing bastante nga tion sa pagpakigbahin sa pagbantala upod sa akon asawa kag sa pagtuman sang akon mga responsibilidad sa sulod sang kongregasyon.”

 Ginkawatan ni Mykola kag sang iya mga abyan ang pila ka bangko sa Ukraine. Bangod sini, nasentensiahan sia sing napulo ka tuig nga pagkabilanggo. Antes sia mabilanggo, kis-a lang sia nakasulod sa simbahan—agod maghanda sa pagpangawat sa sadto nga simbahan. Wala magmadinalag-on ang iya plano, apang yadto nga pagduaw sa simbahan nagpapati kay Mykola nga ang Biblia mahimo gid nga puno lamang sing makatalaka nga mga sugilanon tuhoy sa Ortodokso nga mga pari, mga kandila, kag relihioso nga mga selebrasyon. Nagsiling sia: “Indi ko gid mahangpan kon ngaa, apang ginsugdan ko nga basahon ang Biblia. Nakibot ako nga indi gali ini subong sang ginhunahuna ko!” Nangabay sia sing isa ka pagtuon sa Biblia kag ginbawtismuhan sang 1999. Kon tulukon mo sia karon, daw indi mapatihan nga ining mapainubuson nga ministeryal nga alagad isa anay ka malaut kag armado nga kawatan sa bangko!

Ginsentensiahan si Vladimir sing kamatayon. Samtang nagahulat sang iya sentensia nga kamatayon, nangamuyo sia sa Dios kag nanaad nga magaalagad sia sa Iya kon indi madayon ang sentensia sa iya. Nian, ginbag-o ang layi, kag ang silot nga kamatayon sa iya ginpanubo sa tubtob buhi nga pagkabilanggo. Sa pagtuman sang iya panaad, ginsugdan ni Vladimir ang pagpangita sa matuod nga relihion. Nagpalista sia para sa isa ka kurso nga ginapatigayon paagi sa sulat kag nakabaton sing diploma gikan sa isa ka Adbentista nga relihion, pero wala sia makontento.

Apang, sang mabasa niya ang mga magasin nga Lalantawan kag Magmata! sa librarya sang bilangguan, nagsulat si Vladimir sa sanga talatapan sang mga Saksi ni Jehova sa Ukraine, nga nagapangabay nga duawon sia. Sang ginduaw sia sang lokal nga mga kauturan, ginkabig niya ang iya kaugalingon nga Saksi na sia kag nagabantala sia sa sulod sang bilangguan. Nabuligan sia agod makalipikar nga isa ka manugbantala sang Ginharian. Samtang ginasulat ini nga artikulo, si Vladimir kag ang pito pa sa amo nga bilangguan nagahulat nga mabawtismuhan. Apang may problema sila. Sanglit ang mga priso nga may tubtob buhi nga sentensia ginabukot suno sa ila relihioso nga mga pagtuluuhan, ulupdanay si Vladimir kag ang iya mga karelihion sa isa ka selda. Gani kay sin-o sila mabantala? Ginapaambit nila ang maayong balita sa mga guardia sang bilangguan kag paagi sa sulat.

Gikan sa Ukraine, nagsaylo si Nazar sa Czech Republic, diin nagbuylog sia sa isa ka gang sang mga kawatan. Nagresulta ini sa tatlo ka tuig kag tunga nga pagkabilanggo. Samtang sa bilangguan, nagapakighambal sia kon magduaw ang mga Saksi ni Jehova gikan sa siudad sang Karlovy Vary, nakatuon sang kamatuoran, kag lubos nga nagbag-o. Sang makita ini, ang isa sa mga guardia nagsiling sa isa pa ka bilanggo nga kaupod ni Nazar sa selda: “Kon tanan kamo mangin subong sinang taga-Ukraine, mangita na ako sing lain nga obra.” Ang isa pa nagsiling: “Eksperto gid ang mga Saksi ni Jehova. Ang kriminal nga nagasulod sa bilangguan; nagagua nga isa ka disente nga tawo.” Nakapauli na karon si Nazar. Nagtuon sia sing pagpamanday kag nangasawa, kag sila nga mag-asawa nagaalagad subong bug-os tion nga mga ministro. Nagapasalamat gid sia sa mga pagduaw sang mga Saksi sa bilangguan!

Opisyal nga Pagkilala

Indi lamang mga bilanggo ang nagapasalamat sa ginahimo sang mga Saksi ni Jehova. Si Miroslaw Kowalski, isa ka humalambal para sa isa sang mga bilangguan sa Poland, nagsiling: “Ginaapresyar gid namon ang ila mga pagduaw. Masubo ang nagligad sang iban nga mga bilanggo. Mahimo nga wala gid sila matratar subong mga tawo. . . . Mapuslanon gid ang bulig [sang mga Saksi] bangod kulang kami sing mga tinawo kag mga manunudlo.”

Ang warden sang isa pa ka bilangguan sa Poland nagsulat sa sanga talatapan, nga nagapangabay sa mga Saksi nga dugangan pa ang ila aktibidad sa sulod sang bilangguan nga iya ginadumalahan. Ngaa? Nagpaathag sia: “Ang mas masunson nga pagduaw sang mga tiglawas sang Watchtower mahimo nga makabulig sa mga bilanggo sa pagpalambo sing maayo nga mga kinaiya, agod mapunggan ang ila pagkasupog.”

Ang isa ka pamantalaan sa Ukraine nagbalita tuhoy sa isa ka bilanggo nga tuman ang kasubo amo nga nagtinguha sia nga maghikog apang nabuligan sia sang mga Saksi ni Jehova. “Amat-amat nga nagabakod na karon ang emosyon sini nga lalaki,” siling sang balita. “Nagasunod sia sa rutina sa bilangguan kag isa ka halimbawa sa iban nga mga bilanggo.”

Mga Benepisyo Bisan Nakagua Na sa Bilangguan

Ang mga benepisyo gikan sa hilikuton nga ginahimo sang mga Saksi ni Jehova makita indi lamang sa sulod sang bilangguan. Ang mga bilanggo  nagabenepisyo gihapon bisan nakagua na sila. Duha ka Cristiano nga sanday Brigitte kag Renate, ang nagabulig sa mga tawo sa sining paagi sa sulod sang pila na ka tuig. Ang Aleman nga pamantalaan nga Main-Echo Aschaffenburg, nagbalita tuhoy sa ila: “Ginaatipan nila ang mga bilanggo sing tatlo tubtob lima ka bulan sa tapos sila makagua sa bilangguan, nga ginapalig-on sila nga magpahamtang sing tulumuron sa kabuhi. . . . Opisyal sila nga ginkilala subong mga boluntaryo nga nagaatipan sa mga bilanggo nga ginhatagan sing probasyon. . . . Mabuligon man kag positibo ang ila pagpakig-angot sa mga nagaobra sa bilangguan.” Pila na ka tawo ang nagdedikar sang ila kabuhi kay Jehova subong resulta sini nga sahi sang bulig.

Bisan gani ang mga opisyal sang bilangguan nagabenepisyo man gikan sa pagtudlo sing Biblia nga hilikuton sang mga Saksi ni Jehova. Halimbawa, si Roman isa anay ka major sang militar kag isa ka sikologo sa isa ka bilangguan sa Ukraine. Sang maduaw sia sang mga Saksi sa iya puluy-an, ginbaton niya ang pagtuon sa Biblia. Nian natukiban niya nga wala ginatugutan ang mga Saksi nga makontak ang mga bilanggo sa iya ginaobrahan. Gani nangayo sia sing permiso sa warden nga gamiton ang Biblia sa iya pagpakig-angot sa mga bilanggo. Ginpasugtan ang iya pangabay, kag mga napulo ka bilanggo ang nagpakita sing interes. Regular nga ginpaambit ni Roman ang iya nagadugang nga ihibalo sa Biblia sa sini nga mga bilanggo, kag maayo gid ang nangin resulta sang iya mga panikasog. Ang iban nga nakagua na sa bilangguan padayon nga nag-uswag kag nangin bawtismado nga mga Cristiano. Sang makita niya ang gahom sang pulong sang Dios, kapin pa nga ginserioso ni Roman ang iya pagtuon sa Biblia. Naghalin sia sa militar kag ginpadayon ang iya hilikuton sa pagtudlo sing Biblia. Kaupod niya karon sa pagbantala nga hilikuton ang isa anay ka bilanggo.

“Ang nagapabakod sa amon diri amo ang Biblia, ang pasad sa Biblia nga mga publikasyon, kag ang pagtuon sa Biblia,” sulat sang isa ka bilanggo. Ginapakita gid sining mga pulong nga kinahanglan ang pasad sa Biblia nga mga literatura sa sulod sang pila ka bilangguan. Ang isa ka kongregasyon sa Ukraine nagreport tuhoy sa pagtudlo sing Biblia nga ginahimo sa isa ka lokal nga bilangguan: “Nagapasalamat ang pagdumalahan sa mga literatura nga amon ginaaman. Ginasuplayan namon sila sing 60 ka kopya sang tagsa ka gua sang Ang Lalantawan kag Magmata!” Nagsulat ang isa pa ka kongregasyon: “Ginasuplayan namon ang isa ka bilangguan nga may 20 ka gamay nga librarya. Ginabutangan namon ang tagsa ka librarya sang aton panguna nga mga publikasyon. Beinte tanan ka karton sang mga literatura ang nabutang namon.” Sa isa ka bilangguan, ginatipon sang mga guardia ang aton mga magasin sa librarya agod makabenepisyo ang mga bilanggo gikan sa tagsa ka gua sini.

Sang 2002 nagpatok ang sanga talatapan sa Ukraine sing departamento para sa mga bilanggo. Tubtob sa sini nga tion, mga 120 ka bilangguan ang nakontak na sini nga departamento kag nag-asayn man ini sing mga kongregasyon nga magaatipan sa ila. Kada bulan mga 50 ka sulat ang mabaton gikan sa mga bilanggo, kalabanan sa ila nagapangabay sing mga literatura ukon sing isa ka pagtuon sa Biblia. Ginapadalhan sila sang sanga sing mga libro, mga magasin, kag mga brosyur tubtob makontak na sila sang lokal nga mga kauturan.

“Dumduma ninyo ang mga yara sa mga gapos sang bilangguan,” sulat ni apostol Pablo sa iya mga masigka-Cristiano. (Hebreo 13:3) Ginapatuhuyan niya ang mga nabilanggo tungod sa ila pagtuo. Sa karon, ginadumdom sang mga Saksi ni Jehova ang mga bilanggo, ginaduaw ang mga bilangguan, kag ‘nagabantala sing kahilwayan sa mga bihag.’—Lucas 4:18.

[Nota]

[Retrato sa pahina 9]

Pader sang bilangguan, L’viv, Ukraine

[Retrato sa pahina 10]

Si Mykola

[Retrato sa pahina 10]

Si Vasyl upod sa iya asawa nga si Iryna

[Retrato sa pahina 10]

Si Victor